60 ᐅᑭᐅᑦ ᖄᖏᖅᓯᒪᑐᐃᓐᓇᖅᑐᑦ ᐃᓄᐃᑦ ᓄᓇᑖᖅᐸᓪᓕᐊᓕᓚᐅᖅᑎᓪᓗᒋᑦ ᑎᑭᕋᕐᔪᐊᓂ − ᒫᓐᓇᓵᖑᓂᖓᓄᑦ ᐃᓚᖏᑦ ᑎᑭᕋᕐᔪᐊᕐᒥᐅᑕᐅᔪᑦ ᑎᑭᕋᕐᔪᐊᕐᒥᐅᑕᐅᖅᑳᓚᐅᖅᓯᒪᔪᑦ ᐃᓅᔪᑦ ᓱᓕ ᐅᖃᐅᓯᖃᕈᓐᓇᖅᖢᑎᒃ ᖃᓄᖅ ᑎᑭᕋᕐᔪᐊᖅ ᐱᒋᐊᖅᑳᓚᐅᕐᓂᖓᓄᑦ. ᓄᓇᓕᐅᔪᖅ ᐃᓚᐅᖃᑕᐅᔪᖅ ᖃᑉᓯᑲᓪᓚᖕᓂᒃ ᓄᓇᓕᖕᓂᒃ ᒐᕙᒪᑐᖃᒃᑯᑦ ᓄᓇᙳᖅᑎᓚᐅᖅᑕᖏᓐᓂᒃ ᐃᓄᐃᑦ ᓅᑎᑕᐅᑉᓗᑎᒃ ᐱᒋᐊᖅᖢᒍ 1920-ᖏᓐᓂᒃ.
ᐱᒋᐊᕈᑎᖓ ᐊᒃᓱᕈᕐᓇᓚᐅᕋᓗᐊᖅᑎᓪᓗᒍ, ᐅᑉᓗᒥᐅᔪᖅ ᑎᑭᕋᕐᔪᐊᕐᒥᐅᑦ ᐃᓅᖃᑎᒌᑦᑎᐊᖅᑐᑦ ᖃᐅᔨᒪᔭᐅᑦᑎᐊᖅᑐᓪᓗ Hᐊᑭᒃᑲᐅᓂᖏᓐᓄᑦ ᐅᖓᓯᒃᑐᓄᑦ ᓄᓇᓕᖕᓄᑦ ᓯᑭᑑᒃᑯᑦ ᐃᖏᕐᕋᓲᑦ Hᐊᑭᒋᐊᖅᑐᖅᖢᑎᒃ. ᖃᑉᓰᓐᓇᐅᓂᖅᐹᖑᔪᓪᓗ ᐃᓅᓯᕐᒥᓂᒃ ᑭᐱᓯᖃᑦᑕᖅᑐᓂᒃ ᓄᓇᕗᒥ.
ᕕᕗᐊᕆ 2019-ᒥ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᑦ ᑎᑎᕋᖅᑎᖓ ᑯᑎ ᐸᓐᑐᕐ ᐊᒻᒪᓗ ᓱᓯ ᓇᐸᔪᖅ−ᓱᐊᑦ ᑎᑭᕋᕐᔪᐊᓕᐊᓚᐅᖅᑑᒃ ᑎᑎᕋᕆᐊᖅᑐᖅᖢᑎᒃ ᐅᓂᑉᑳᖅᑐᐊᓂᒃ ᐊᕐᕕᓂᓕᖕᓂᒃ ᓄᓇᖅᑲᑎᒌᒃᑐᓂᙶᖅᑐᓂᒃ. ᐊᕐᕕᓂᓕᖕᓂᒃ ᐱᓇᓱᐊᕈᓯᕐᓂᒃ ᖃᐃᔪᓂᒃ, ᓴᖅᑭᑎᑦᑎᓂᐊᖅᑐᒍᑦ ᑎᑎᕋᐅᓯᕆᓚᐅᖅᑕᑉᑎᓐᓂᒃ, ᐃᓚᐅᖃᑕᐅᑉᓗᒋᑦ ᒪᕐᕈᒃ ᓄᓇᖃᖅᑳᓚᐅᖅᑑᒃ ᐅᓂᑉᑳᖅᑐᐊᖏᑦ, ᐱᖃᑎᖓ ᐊᐃᑦᑖᖑᒐᓗᐊᖅ ᐃᓅᔪᓐᓃᓚᐅᖅᑐᖅ ᐊᕐᕌᓂ.
ᐅᑯᐊ ᐅᖃᐅᓰᑦ ᑎᑭᕋᕐᔪᐊᕐᒥᙶᖅᑐᑦ
ᑐᓴᒐᒃᓴᓕᕆᔨᐅᑉ ᐅᖃᐅᓯᖓ: ᑖᑉᓱᒪ ᐅᓂᑉᑳᖅᑐᐊᑉ ᐊᔾᔨᖓ ᓴᖅᑭᓚᐅᖅᑐᖅ ᐊᐅᔭᒃᑯᑦ 2019-ᒥ ᐅᖃᓕᒫᒐᒃᑯᑦ Walrus-ᑯᑦ.
ᒪᓕ ᐅᑲᓕᖅ
ᐃᓄᒃᑎᑐᑦ ᐊᑎᕋ ᐃᔭᑲᒃ. ᐊᓈᓇᑦᑎᐊᕐᒪ ᐊᑎᖓ. ᐊᑖᑕᒪ ᐊᓈᓇᒋᓚᐅᖅᑕᖓ. ᐊᑎᕋᑦᑕᐅᖅ ᐅᓗᖅᓯ ᑕᒫᓂᕐᒥᐅᑕᐅᖃᑦᑕᓚᐅᖅᑐᖅ ᐊᑎᕋ. ᐊᓈᓇᒐ ᓯᓐᓇᒃᑑᒪᓚᐅᖅᓯᒪᖕᒪᑦ ᐅᓗᖅᓯᒥᒃ ᐅᓗᖅᓯ ᐊᑦᑎᖅᑕᐅᔪᒪᓐᓂᖅᖢᓂ.
ᐱᕈᖅᓴᑉᓗᖓ ᑎᑭᕋᕐᔪᐊᕐᒥ, ᐃᖃᓗᒡᔪᐊᕋᓱᐃᓐᓇᖃᑦᑕᖅᓯᒪᔪᑦ, ᐊᒻᒪᓗ ᐃᖃᓗᒡᔪᐊᕋᓱᖕᓂᐊᖅᑐᓂᒃ ᐅᑕᖅᑭᙳᖃᑦᑕᖅᓯᒪᔪᒍᑦ. ᐃᖃᓗᒡᔪᐊᕋᓱᓕᕌᖓᑉᑕ ᐊᑕᐅᓯᖅ ᐃᖃᓗᒐᓱᒡᕕᒃ ᐅᕐᓃᓐᓇᖃᑦᑕᓚᐅᖅᑕᖅᐳᑦ ᐃᖃᓗᒡᔪᐊᕈᓐᓇᙱᖦᖢᑕ, ᑭᓯᐊᓂ ᑕᐃᑯᙵᐅᖏᓐᓇᖃᑦᑕᓚᐅᖅᑐᒍᑦ ᐊᑖᑕᒐ ᐊᖁᑎᒋᒐᑉᑎᒍᑦ.
ᓄᑕᖅᑭᐅᓕᓚᐅᖅᑐᖓ ᒪᒃᑯᒃᖢᖓ, ᐊᒻᒪᓗ ᒪᕐᕈᖕᓂᒃ ᓄᑕᕋᖃᓕᓚᐅᖅᑐᖓ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᕌᓂᒃᖢᖓ. ᐊᔭᐅᖅᑎᒋᓚᐅᖅᑕᒃᑲ ᐱᐊᓂᑦᑎᐊᕈᒪᓂᕐᒧᑦ. ᐃᒪᓐᓇ, “ᐱᐊᓂᑦᑎᐊᕆᐊᖃᖅᑐᖓ ᐃᓕᓐᓂᐊᕈᑎᒐᓂᒃ ᐃᓕᓐᓂᐊᕐᓂᒃᑯᑦ ᑲᔪᓯᑦᑎᐊᕐᓗᖓ ᐊᔪᖅᓴᖅᑎᔾᔮᙱᓐᓇᑉᑭᑦ.”
ᓯᖓᐃᓚᐅᖅᑐᖓ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᖢᖓ ᐃᖃᓗᖕᓂ. ᐊᑕᐅᓯᕐᒥᒃ ᐱᓇᓱᐊᕈᓯᕐᒥᒃ ᐃᓕᓐᓂᐊᓚᐅᙱᑦᑐᖓ ᐃᕐᓂᖅᑳᖅᖢᖓ. ᐊᒃᓱᓪᓘᓐᓃᑦ, ᐃᓕᓐᓂᐊᖅᑎᑦᑎᔨᒐ ᖃᓄᐃᒃᓴᓚᐅᙱᒻᒪᑦ ᓄᑕᕋᓛᕋ ᐃᓕᓐᓂᐊᕆᐊᕈᑎᖃᑦᑕᕋᑉᑯ. ᑭᓯᐊᓂ ᐃᓕᓐᓂᐊᕈᑎᒃᑲᓂᒃ ᐅᔾᔨᖅᑐᑦᑎᐊᕈᓐᓇᐃᓪᓕᒐᒪ ᐊᖏᕐᕋᕋᓃᑎᓕᓚᐅᖅᑕᕋ ᐱᐊᓂᒃᓯᔪᓐᓇᖁᑉᓗᖓ ᐃᓕᓐᓂᐊᕈᑎᒃᑲᓂᒃ. ᐊᒃᓱᕈᕐᓇᖅᑐᐊᓘᓚᐅᖅᑐᖅ ᐃᓕᑕᕆᔭᐅᔾᔪᑎᒥᒃ ᐱᓚᐅᙱᓐᓇᒪ, ᑭᓯᐊᓂ ᐱᐊᓂᒃᓯᓚᐅᖅᑐᖓ. ᖃᑉᓯᑲᓪᓚᑦ ᐅᑭᐅᑦ ᐱᐊᓂᖕᒪᑕ, ᐅᑎᖅᖢᖓ ᓯᓚᑦᑐᖅᓴᕐᕕᖕᒧᑦ, ᑲᖏᖅᖠᓂᕐᒥ. ᐊᓯᐊᓄᑦ ᓄᓇᓕᖕᒧᑦ ᓅᖦᖢᓂ − ᐊᔾᔨᐅᙱᑦᑐᒻᒪᕆᐊᓘᓲᖅ, ᐊᖏᓂᖅᓴᐅᑉᓗᓂᓗ ᓄᓇᓕᒃ − ᐊᑯᓂ ᓱᖏᐅᑎᔪᓐᓇᓚᐅᙱᑦᑐᖓ, ᑭᓯᐊᓂ ᐱᐊᓂᓚᐅᖅᑐᖓ.
ᐱᐊᓂᒃᑲᒪ, ᓴᓇᔭᒃᓴᖃᙱᖦᖢᖓ ᐃᒡᓗᖃᙱᖦᖢᖓᓘᓐᓃᑦ. ᑎᑭᕋᕐᔪᐊᕐᒧᑦ ᐅᑎᕆᐊᖃᓚᐅᖅᑐᖓ. ᓴᓇᐃᓐᓇᕐᓂᐊᓕᖅᖢᖓᓗ ᕿᑎᒃᑐᓕᕆᔨᐅᓂᒃᑯᑦ.
ᓴᓇᔭᒃᓴᖅᑖᔾᔮᙱᓐᓇᓱᒋᓚᐅᖅᑐᖓ ᒥᑭᔪᒥᒃ ᓄᓇᓕᖕᒥ, ᐱᓗᐊᖅᑐᒥ ᓴᓇᐃᓐᓇᕐᓂᐊᕐᓂᒃᑯᑦ. ᐊᒻᒪᓗ ᒪᕐᕈᖕᓂᒃ ᐅᑭᐅᓂᒃ ᐃᒡᓗᖃᓚᐅᖅᑳᖅᖢᖓ ᐊᒻᒪᓗ ᐅᑎᕆᐊᖃᓕᖅᖢᓂ ᐊᓈᓇᒃᑯᓐᓄᑦ, ᐊᖓᔪᖅᑳᕐᒪ ᐃᒡᓗᖓᓄᑦ, ᐊᒃᓱᕈᕐᓇᓚᐅᖅᑐᖅ.
ᐃᓕᓐᓂᐊᖅᖢᖓ ᓱᓕ ᕿᑎᒃᑐᓂᒃ ᐱᖃᑕᐅᒃᑳᓘᓚᐅᖅᑐᖓ. ᐊᖅᓴᕐᓂᖅ ᖁᕕᐊᒋᓂᖅᐹᕆᓚᐅᖅᑕᕋ. ᑕᐃᑉᓱᒪᓂ ᐱᑕᖃᓚᐅᙱᓐᓇᑉᑕ ᑮᓇᐅᔾᔭᒃᓴᖅᓯᐅᓇᔭᖅᑐᒥᒃ ᕿᑎᒃᑐᓕᕆᓂᒃᑯᑦ ᐊᒻᒪᓗ ᕿᑎᒋᐊᖅᑐᕐᓂᐊᖅᑐᓂᒃ ᐋᖅᑭᒃᓯᔨᐅᓇᔭᖅᑐᒥᒃ.
ᓴᓇᓕᕋᒪ ᕿᑎᒃᑐᓕᕆᔨᐅᓂᒃᑯᑦ, ᑕᒪᓐᓇ ᐃᑲᔪᖅᓯᒪᔪᖅ ᐅᕙᒻᓄᑦ ᑮᓇᐅᔾᔭᒃᓴᕈᒪᖃᑦᑕᕋᒪ ᓄᑕᖅᑲᑦ ᐱᔾᔪᑎᒋᑉᓗᒋᑦ: ᐊᖅᓴᕐᓂᒃᑯᑦ, ᐹᔅᑭᑦᐹᕐᓂᒃᑯᑦ, Hᐊᑭᓐᓂᒃᑯᑦ, ᐊᓯᖏᑦᑎᒍᓪᓗ ᐱᙳᐊᖅᑐᓕᕆᓂᒃᑯᑦ.
ᐅᑭᐅᖅ, ᐊᖅᓴᖅᑎᓂᒃ ᓂᕕᐊᖅᓵᕐᓂᒃ ᑲᑎᑦᑎᓚᐅᖅᑐᖓ ᐊᖅᓴᕆᐊᖅᑐᖃᑕᐅᓚᐅᖅᑐᑦ ᐱᒡᒍᓴᐅᔾᔪᐊᖅᑐᓄᑦ 15 ᑐᖔᓂ ᐅᑭᐅᓖᑦ ᓄᓇᕗᒥᐅᑦ ᐊᖅᓴᕐᓂᒃᑯᑦ ᐱᒡᒍᓴᐅᔾᔪᐊᖅᑎᓪᓗᒋᑦ.
ᖃᕆᑕᐅᔭᒃᑯᑦ ᑎᑎᕋᕐᕕᐅᓚᐅᖅᓯᒪᒐᒪ ᓄᓇᕗᒥᐅᑦ ᐱᒡᒍᓴᐅᔾᔪᐊᕐᓂᐊᕐᓂᖏᓐᓄᑦ ᑲᖏᖅᖠᓂᕐᒥ. ᐅᖃᖃᑎᖃᖅᖢᖓ ᐃᓕᓐᓂᐊᖅᑎᑦᑎᔨᒥᒃ, ᐅᖃᐅᑎᑉᓗᒍ ᐃᒪᓐᓇ, “ᐱᙳᐊᖅᑎᓂᒃ ᑲᑎᑦᑎᓇᔭᕋᒪ.”
ᓴᓂᕋᒃᑯᑦ ᑎᑎᕋᖅᓯᒪᔪᒥᒃ ᓴᖅᑭᑎᑦᑎᓕᓚᐅᖅᑐᒍᑦ ᐆᒃᑐᖅᑐᖃᕈᓐᓇᕐᓂᐊᕐᓂᕋᖅᖢᒍ, ᐱᙳᐊᖅᑎᓂᒃ ᑲᑎᑦᑎᓕᓚᐅᖅᑐᒍᑦ. ᓄᑲᑯᓗᒐ ᑕᐃᔭᓇ ᒥᐊᓂᖅᓯᔨᒋᔭᐅᑉᓗᓂ.
ᐅᖃᐅᑎᑉᓗᑎᒍᓪᓗ ᐱᙳᐊᖅᑏᑦ ᐃᒪᓐᓇ, “ᐃᑲᔪᕆᐊᖃᕐᓂᐊᖅᑐᓯ ᑮᓇᐅᔾᔭᒃᓴᕐᓂᒃᑯᑦ, ᐅᐸᒍᑎᖃᑦᑕᕆᐊᖃᕐᓂᐊᖅᑐᓯ ᐊᔪᕈᓐᓃᖅᓴᕐᓂᐊᓕᕌᖓᑉᓯ ᐊᒻᒪᓗ 100%-ᒥᒃ ᐃᓚᐅᖃᑕᐅᑦᑎᐊᕐᓂᖃᕐᓗᓯ.”
ᐊᒃᓱᕈᕐᓇᕐᓚᓚᐅᖅᑐᖅ ᐱᒋᐊᓕᓵᖅᖢᑕ ᑭᓯᐊᓂ ᖃᓂᓪᓕᕙᓪᓕᐊᓕᕐᒪᑦ ᐱᓕᕆᔪᒪᔪᒻᒪᕆᐊᓘᓕᓚᐅᖅᑐᑦ ᐊᒻᒪᓗ ᐃᒐᔭᒥᓂᒃ ᓂᐅᕕᐊᒃᓴᖃᖃᑦᑕᓕᖅᖢᑎᒃ, ᐊᑭᓗᒃᑐᖅᑕᖅᑎᑦᑎᖃᑦᑕᓕᖅᖢᑎᒃ, ᐱᙳᖅᑎᑦᑎᕙᒃᖢᑎᒃ, ᐅᓐᓄᒃᑯᓪᓗ ᑕᕐᕆᔭᖅᑎᑦᑎᕙᒃᖢᑎᒃ.
ᒎᓘᑖᕋᓱᓕᕋᑉᑕ ᑲᖏᖅᖠᓂᕐᒥ, ᐱᒻᒪᕆᐊᓘᓚᐅᖅᑐᖅ ᐅᕙᑉᑎᓐᓄᑦ, ᓵᓚᐅᓕᓚᐅᖅᓯᒪᒐᑉᑕ 1-0-ᒥᒃ. ᑭᓯᐊᓂ ᐃᖃᓗᖕᒥᐅᑕᖅ ᐱᙳᐊᖅᑎ ᖃᓄᐃᓕᖕᒪᒃᑭᐊᖅ ᐱᙳᐊᖅᑎᑉᑎᓐᓄᑦ ᒥᐊᓂᖅᓯᔨᐅᑉ ᐃᓂᖓᑕ ᑭᒡᓕᖓᓂ. ᐱᙳᐊᖅᑎᒋᔭᖅᐳᑦ ᐃᑎᖅᑎᑦᑎᒐᓱᒍᓐᓇᖅᓯᓚᐅᖅᑐᖅ, ᐊᔾᔨᒌᓕᖅᖢᑕᓗ ᐃᑎᖅᑎᑦᑎᖕᒪᑦ.
ᑕᐃᑲᙵᑦ, ᐱᒋᐊᓪᓚᓚᐅᖅᑐᑦ ᐱᙳᐊᖅᑎᕗᑦ. ᐊᔾᔨᒌᓕᕐᒪᑕ ᐃᑎᖅᑎᑦᑎᓯᒪᓂᖅᐳᑦ, ᐊᒥᖅᑳᖅᖢᑕ ᐃᑎᖅᑎᑦᑎᓇᓱᖃᑦᑕᓕᓚᐅᖅᑐᒍᑦ. ᐃᖃᓗᖕᒥᐅᑦ ᓯᕗᓪᓕᖅᐸᐅᑉᓗᑎᒃ ᐃᑎᖅᑎᑦᑎᒋᐊᓚᐅᖅᑐᑦ ᐅᓂᐅᖅᖢᑎᒡᓗ.
ᓂᕕᐊᖅᓵᑉᑕ ᐃᓚᖓ ᐃᑎᖅᑎᑦᑎᓇᓱᒋᐊᖃᓕᕐᒪᑦ ᐃᓕᖅᑎᑦᑎᑉᓗᓂ. ᐱᙳᐊᖅᑏᑦ ᐅᐸᒍᑎᓕᓚᐅᖅᑐᑦ ᐃᑎᖅᑎᑦᑎᔪᖅ ᐅᐸᒃᖢᒍ, ᑕᐃᒻᓇ ᐱᙳᐊᖅᑐᓂᒃ ᐃᒪᓐᓈᖅᑐᐃᔨ ᐅᕕᙱᐊᖅᑐᖅᖢᓂ ᐅᖃᖅᖢᓂ, “ᓵᓚᒃᓴᙱᑦᑐᓯ ᓱᓕ, ᓵᓚᒃᓴᙱᑦᑐᓯ ᓱᓕ.”
ᐃᖃᓗᖕᒥᐅᑦ ᐃᑎᖅᑎᑦᑎᒋᐊᖅᖢᑎᒃ, ᐃᑎᙱᒃᑭᑉᓗᓂ. ᐅᕙᒍᑦ ᐃᑎᖅᑎᑦᑎᒋᐊᓕᕐᒥᑉᓗᑕ. ᐊᑏᓇᐅᓚᐅᖅᑐᖅ ᐅᕝᕙᓘᓐᓃᑦ ᒪᐃᓯ − ᓇᓕᐊᑭᐊᖅ ᑐᑭᖅᓯᑉᓗᓂ ᐊᖅᓴᕐᒥᒃ ᐃᑎᖅᑎᑦᑎᒋᐊᕐᒪᑦ, ᐃᑎᖅᖢᓂ. ᐱᙳᐊᖅᑎᓂᒃ ᐃᒪᓐᓈᖅᑐᐃᔨ ᐱᖓᓱᐃᖅᑕᖅᖢᓂ ᐅᕕᙱᐊᖅᖢᓂ, ᕿᒡᒋᖅᑕᓕᓚᐅᖅᑐᒍᑦ. ᐃᓄᐃᑦ ᑕᒪᕐᒥᒃ ᖁᕕᐊᑦᑕᒃᖢᑎᒃ ᐃᕆᐊᓛᓕᖅᖢᑎᒃ. ᐊᓕᐊᓇᐃᓐᓂᖅᐹᖑᓚᐅᖅᓯᒪᔪᖅ.
ᓄᓇᖅᑲᑎᕗᑦ ᖁᕕᐊᓱᑦᑎᐊᓚᐅᖅᑐᑦ ᖁᕕᐊᒋᖃᑎᒋᔭᐅᑉᓗᑎᒃ ᓂᕕᐊᖅᓵᑯᓗᒃᐳᑦ, ᒪᒃᑯᒃᑐᑯᓘᖕᒪᑕ, 15 ᑐᖔᓂ ᐅᑭᐅᖃᖅᑐᐃᓐᓇᐃᑦ, ᐊᒻᒪᓗ ᒥᑭᔪᒥᒃ ᓄᓇᓕᖕᒥᐅᑕᑯᓗᐃᑦ ᓵᓚᖃᖅᖢᑎᒃ ᓄᓇᓕᕐᔪᐊᕐᒥᐅᑕᓂᒃ − ᐃᖃᓗᐃᑦ ᓯᑎᐅᓂᕋᖅᑕᐅᖕᒪᑦ, ᐊᖏᓂᖅᓴᖅ ᓄᓇᓕᒃ − ᓴᕆᒪᓇᒻᒪᕆᒃᑐᖅ ᒥᑭᓂᖅᓴᐅᑉᓗᑕ ᓄᓇᓕᐅᑉᓗᑕ.
ᖃᐅᔨᒪᔪᖓ ᒥᑭᔪᒥᒃ ᓄᓇᓕᖕᒥ ᓄᓇᖃᖅᖢᓂ ᐊᒃᓱᕈᕐᓇᖅᓯᖃᑦᑕᕐᒪᑦ ᐊᒻᒪᓗ ᑖᖅᑐᐊᓘᔮᓕᖅᐸᒃᖢᓂ ᐱᕈᖅᓴᑉᓗᓂ.
ᕿᑎᖕᓂᒃᑯᑦ ᐱᐊᓂᒍᑎᖃᑦᑕᖅᑐᒍᑦ, ᐱᓗᐊᖅᑐᒥ ᒥᑭᓐᓂᖅᓴᒥ ᓄᓇᓕᖕᒥ − ᖃᓄᐃᑦᑐᒃᑰᖅᖢᓂ ᐊᓂᒎᑎᓐᓇᖅᑐᖅ.
ᐱᕕᒃᓴᖃᕈᓐᓇᑦᑎᐊᖅᑐᑦ ᑕᒪᒃᑯᐊ ᓄᑕᖅᑲᖁᑎᕗᑦ, ᐊᒻᒪᓗ ᐅᔾᔨᕈᓱᒃᑐᖓ ᑕᑯᔭᐅᔭᕆᐊᖃᕐᓂᖏᓐᓄᑦ, ᐃᓅᖃᑎᖃᕈᒪᑦᑎᐊᖅᑐᑦ ᑕᒫᓂᕐᒥᐅᑕᐅᑐᐃᓐᓇᐅᙱᓪᓗᑎᒃ ᐊᔪᖅᓯᓯᒪᑐᐃᓐᓇᙱᓪᓗᑎᒃ ᒥᑭᓂᖅᓴᒥ ᓄᓇᓕᖕᒥ.
ᖃᐅᔨᒪᔪᖓ ᐊᖏᕐᕋᕆᒐᑉᑎᒍᑦ, ᑭᓯᐊᓂ ᒪᒃᑯᒃᑑᑉᓗᓂ ᓱᓇᑐᐃᓐᓇᕐᓂᒃ ᖃᐅᔨᔪᒪᓐᓇᕐᒪᑦ, ᑕᖅᑲᐅᙵ ᑕᑯᒋᐊᕈᒪᓐᓇᕐᒪᑦ, ᐊᑕᐅᓯᕐᒦᓐᓈᓘᒍᒪᓐᓇᙱᒻᒪᑦ. ᐊᖏᕐᕋᕆᔭᖅᐳᑦ ᑕᒫᓃᖏᓐᓇᕐᓂᐊᖅᑐᖅ. ᐊᖏᕐᕋᕆᐊᖃᕐᓇᕈᒫᖅᑐᖅ ᐳᓚᕋᕐᓗᒋᓪᓘᓐᓃᑦ ᐃᓚᑎᑦ.
ᐊᒻᒪᓗ ᐃᓱᒪᒌᓐᓇᖃᑦᑕᖅᑕᒃᑲ ᓄᑕᖅᑲᒃᑲ. ᓄᑕᖅᑲᒃᑲ ᖃᐅᔨᒪᖁᒐᑉᑭᑦ ᓄᓇᓕᒡᔪᐊᕐᒥ ᐱᕈᖅᓴᓂᒃᑯᑦ ᐅᕝᕙᓘᓐᓃᑦ ᐊᓯᐊᓂᒃ ᓄᓇᓕᖕᒥ, ᐱᕕᒃᓴᖃᒃᑲᓐᓂᕈᓐᓇᖁᑉᓗᒋᑦ ᑕᐃᒪᐃᓚᐅᙱᓐᓇᒪᓕ ᑕᒡᕙᓂ ᓄᓇᖃᖅᖢᖓ.
ᐊᓯᔾᔨᓪᓚᕆᒐᔭᖅᑰᖅᑐᖅ ᐃᓅᓯᖏᑦ ᐃᖕᒥᓄᑦ. ᓱᖏᐅᑎᔭᕆᐊᖃᕋᔭᖅᑐᑦ.
ᓄᓇᕗᒥᐅᑕᐅᙱᓐᓇᖅᑐᖓ ᐃᓅᓯᓗᒃᑖᖅ ᐊᒻᒪᓗ ᐱᕕᒃᓴᖃᓚᐅᖅᓯᒪᓇᖓ ᑕᐃᒪᓐᓇ. ᓄᑕᖅᑲᒃᑲ ᖃᐅᔨᒪᖁᔭᒃᑲ ᐃᓕᖅᑯᓯᑐᖃᑉᑎᓐᓂᒃ, ᑭᓯᐊᓂ ᑕᐃᒪᓐᓇ ᐃᓅᕌᓂᒃᓯᒪᔪᒍᑦ ᐱᐊᓂᒍᑎᓯᒪᔪᒍᑦ. ᐊᒃᓱᕈᕐᓇᖃᑦᑕᖅᑐᖅ ᐃᓛᓐᓂᒃᑯᑦ ᐅᑭᐅᖅᑕᖅᑐᒥᐅᑕᐅᑉᓗᓂ, ᑭᓯᐊᓂ ᐱᐊᓂᒍᑎᓐᓇᖅᑐᖅ. ᓱᖏᐅᑎᓐᓇᖅᑐᖅ ᓄᓇᑖᑉᑎᓐᓂᒃ ᐊᒻᒪᓗ ᓄᑖᒥ ᐃᓕᖅᑯᓯᖃᓕᕐᓂᒃᑯᑦ.