60 ᐅᑭᐅᑦ ᖄᖏᖅᓯᒪᑐᐃᓐᓇᖅᑐᑦ ᐃᓄᐃᑦ ᓄᓇᑖᖅᐸᓪᓕᐊᓕᓚᐅᖅᑎᓪᓗᒋᑦ ᑎᑭᕋᕐᔪᐊᓂ − ᒫᓐᓇᓵᖑᓂᖓᓄᑦ ᐃᓚᖏᑦ ᑎᑭᕋᕐᔪᐊᕐᒥᐅᑕᐅᔪᑦ ᑎᑭᕋᕐᔪᐊᕐᒥᐅᑕᐅᖅᑳᓚᐅᖅᓯᒪᔪᑦ ᐃᓅᔪᑦ ᓱᓕ ᐅᖃᐅᓯᖃᕈᓐᓇᖅᖢᑎᒃ ᖃᓄᖅ ᑎᑭᕋᕐᔪᐊᖅ ᐱᒋᐊᖅᑳᓚᐅᕐᓂᖓᓄᑦ. ᓄᓇᓕᐅᔪᖅ ᐃᓚᐅᖃᑕᐅᔪᖅ ᖃᑉᓯᑲᓪᓚᖕᓂᒃ ᓄᓇᓕᖕᓂᒃ ᒐᕙᒪᑐᖃᒃᑯᑦ ᓄᓇᙳᖅᑎᓚᐅᖅᑕᖏᓐᓂᒃ ᐃᓄᐃᑦ ᓅᑎᑕᐅᑉᓗᑎᒃ ᐱᒋᐊᖅᖢᒍ 1920-ᖏᓐᓂᒃ.
ᐱᒋᐊᕈᑎᖓ ᐊᒃᓱᕈᕐᓇᓚᐅᕋᓗᐊᖅᑎᓪᓗᒍ, ᐅᑉᓗᒥᐅᔪᖅ ᑎᑭᕋᕐᔪᐊᕐᒥᐅᑦ ᐃᓅᖃᑎᒌᑦᑎᐊᖅᑐᑦ ᖃᐅᔨᒪᔭᐅᑦᑎᐊᖅᑐᓪᓗ Hᐊᑭᒃᑲᐅᓂᖏᓐᓄᑦ ᐅᖓᓯᒃᑐᓄᑦ ᓄᓇᓕᖕᓄᑦ ᓯᑭᑑᒃᑯᑦ ᐃᖏᕐᕋᓲᑦ Hᐊᑭᒋᐊᖅᑐᖅᖢᑎᒃ. ᖃᑉᓰᓐᓇᐅᓂᖅᐹᖑᔪᓪᓗ ᐃᓅᓯᕐᒥᓂᒃ ᑭᐱᓯᖃᑦᑕᖅᑐᓂᒃ ᓄᓇᕗᒥ.
ᕕᕗᐊᕆ 2019-ᒥ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᑦ ᑎᑎᕋᖅᑎᖓ ᑯᑎ ᐸᓐᑐᕐ ᐊᒻᒪᓗ ᓱᓯ ᓇᐸᔪᖅ−ᓱᐊᑦ ᑎᑭᕋᕐᔪᐊᓕᐊᓚᐅᖅᑑᒃ ᑎᑎᕋᕆᐊᖅᑐᖅᖢᑎᒃ ᐅᓂᑉᑳᖅᑐᐊᓂᒃ ᐊᕐᕕᓂᓕᖕᓂᒃ ᓄᓇᖅᑲᑎᒌᒃᑐᓂᙶᖅᑐᓂᒃ. ᐊᕐᕕᓂᓕᖕᓂᒃ ᐱᓇᓱᐊᕈᓯᕐᓂᒃ ᖃᐃᔪᓂᒃ, ᓴᖅᑭᑎᑦᑎᓂᐊᖅᑐᒍᑦ ᑎᑎᕋᐅᓯᕆᓚᐅᖅᑕᑉᑎᓐᓂᒃ, ᐃᓚᐅᖃᑕᐅᑉᓗᒋᑦ ᒪᕐᕈᒃ ᓄᓇᖃᖅᑳᓚᐅᖅᑑᒃ ᐅᓂᑉᑳᖅᑐᐊᖏᑦ, ᐱᖃᑎᖓ ᐊᐃᑦᑖᖑᒐᓗᐊᖅ ᐃᓅᔪᓐᓃᓚᐅᖅᑐᖅ ᐊᕐᕌᓂ.
ᐅᑯᐊ ᐅᖃᐅᓰᑦ ᑎᑭᕋᕐᔪᐊᕐᒥᙶᖅᑐᑦ
ᑐᓴᒐᒃᓴᓕᕆᔨᐅᑉ ᐅᖃᐅᓯᖓ: ᑖᑉᓱᒪ ᐅᓂᑉᑳᖅᑐᐊᑉ ᐊᔾᔨᖓ ᓴᖅᑭᓚᐅᖅᑐᖅ ᐊᐅᔭᒃᑯᑦ 2019-ᒥ ᐅᖃᓕᒫᒐᒃᑯᑦ Walrus-ᑯᑦ. ᑕᑯᓂᐊᖅᐸᐃᑦ ᐱᓇᓱᐊᕈᓯᐅᓕᕐᒥᒃᐸᑦ ᑐᓴᒐᒃᓴᖅ ᐱᖓᔪᖓ ᐅᓂᑉᑳᖅᑐᐊᑉ ᐃᓚᖓ.
ᓯᑕᓐᓕ ᐋᒡᔪᒃ
ᑯᑎ ᐸᓐᑐᕐ/ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᓐᓂᙶᖅᑐᖅ ᐊᔾᔨ
ᐱᓇᓱᐊᕐᓇᖅᑐᒻᒪᕆᐊᓗᒃ ᑎᑭᕋᕐᔪᐊᕐᒦᖦᖢᓂ. ᐊᓯᖏᓐᓂᒃ ᓄᓇᓕᒃᑎᑑᙱᑦᑐᖅ. ᐃᒪᖅᐳᑦ ᖃᓛᖅᑎᑦᑕᕆᐊᖃᖃᑦᑕᖅᓯᒪᓕᖅᑕᖅᐳᑦ ᓯᑕᒪᓂᒃ ᐅᑭᐅᓂᐅᓕᖅᑐᖅ. ᓄᓇᕗᑦ ᒐᕙᒪᒃᑯᖏᑦ ᐃᒪᓕᕆᕝᕕᖕᒥᒃ ᐋᖅᑭᒃᓯᔪᒪᓯᒪᔪᑦ. ᑎᑭᕋᕐᔪᐊᖅ ᐊᖏᓂᖅᓴᐅᓚᐅᖅᐸᑦ ᐊᕐᕕᐊᖅᑎᑐᑦ ᐅᕝᕙᓘᓐᓃᑦ ᑲᖏᖅᖠᓂᖅᑎᑐᑦ ᑲᒪᒋᔭᐅᓯᒪᓕᖅᑲᒻᒥᕋᔭᙱᑦᑐᖅ, ᐱᐊᓂᒃᑕᐅᓯᒪᓕᕋᔭᖅᑐᖅ. ᑮᓇᐅᔭᒥᒃ ᐊᖏᓗᐊᙱᑦᑐᒥᒃ ᐱᑕᖃᕐᒪᑦ Hᐊᒻᓚᒃᑯᓐᓂᒃ ᓯᑯᑕᕈᑎᒋᕙᒃᑕᖅᐳᑦ ᑕᓯᕐᒥᒃ ᐊᒻᒪᓗ ᓄᓇᓕᖕᒧᙵᐅᔾᔪᑎᕙᒃᑕᖅᐳᑦ, ᓯᑯᑕᖅᐸᒃᑕᖅᐳᑦ ᐱᐅᓂᖅᓴᒻᒪᕆᐊᓘᖕᒪᑦ ᐃᒪᖁᑎᒋᕙᒃᑕᑉᑎᓐᓂᒃ ᐊᖏᕐᕋᒥ.
ᑕᐃᒪᓐᓇ ᑕᒡᕙ ᒥᑭᓂᖅᓴᑦ ᓄᓇᓖᑦ ᐱᓇᓱᖃᑦᑕᕆᐊᓖᑦ ᓄᓇᕗᑦ ᒐᕙᒪᒃᑯᓐᓂᒃ. ᑕᐃᒪᓘᓐᓃᑦ, ᑐᓴᖃᑦᑕᖅᓯᒪᔪᖓ ᐃᓄᖕᓂᒃ ᓄᓇᕗᑦ ᒐᕙᒪᒃᑯᑦ ᒪᓕᒐᓕᐅᖅᑎᖏᓐᓂᒃ ᐅᖃᖅᓯᒪᔪᓂᒃ ᓄᓇᓖᑦ ᒥᑭᓐᓂᖅᓴᑦ ᐊᑑᑎᖃᙱᓐᓂᖏᓐᓄᑦ ᐅᑭᐅᖅᑕᖅᑐᒥ. ᑕᐃᒪᓐᓇ ᑐᓴᖃᑦᑕᖅᓯᒪᔪᖓ. ᐅᖃᐅᑎᓯᒪᔭᕋ ᒐᕙᒪᒃᑯᑦ ᓯᕗᓕᖅᑎᖓ ᑕᐃᒪᓐᓇ ᐅᖃᖅᑐᒥᒃ ᑐᓴᒃᑲᓐᓂᕈᒪ, ᐸᓯᔭᒃᓴᙳᖅᑎᑦᑐᒫᕐᓂᕋᖅᖢᒋᑦ ᒐᕙᒪᖁᑎᕗᑦ. ᐃᓱᒫᓗᓕᖅᐸᖕᒪᑕ ᐃᓄᖁᑎᕗᑦ. ᖃᓄᑐᐃᓐᓇᖅ ᑮᓇᐅᔭᓂᒃ ᑐᓂᔭᐅᒐᓗᐊᕈᑉᑕ ᐊᓯᐊᓄᑦ ᓄᓇᓕᖕᒧᑦ ᓅᓐᓇᔭᙱᑦᑐᒍᑦ. ᓄᓇᒋᔭᖅᐳᑦ ᐅᖓᒋᒐᑉᑎᒍᑦ.
ᐃᓅᓚᐅᖅᓯᒪᔪᖓ ᑰᒡᔪᐊᕐᒥ. ᖃᑕᙳᑎᒃᑲ ᓅᑕᐅᓚᐅᖅᓯᒪᔪᑦ ᑎᑭᕋᕐᔪᐊᕐᒧᑦ 1964-ᒥ Garry Lake-ᒥᙶᖅᖢᑎᒃ. ᖃᐅᔨᒪᔭᒃᑯᑦ, ᐃᓄᐃᑦ Garry Lake-ᒥ ᐱᕐᓕᑲᑕᓕᓚᐅᕐᓂᕐᒪᑕ, ᑕᐃᒪᐃᒻᒪᑦ ᐃᓚᒃᑲ ᖃᒪᓂ’ᑐᐊᓕᐊᓚᐅᖅᓯᒪᔪᑦ, ᐊᒻᒪᓗ ᖃᒪᓂ’ᑐᐊᕐᒥ ᓅᑕᐅᑉᓗᑎᒃ − ᓄᓇᒥ ᓯᒡᔭᒧᑦ.
ᐃᓕᓐᓂᐊᓕᓚᐅᖅᑐᖓ ᑕᒡᕙᓂ ᑎᑭᕋᕐᔪᐊᕐᒥ. ᑕᐃᑉᓱᒪᓂ, ᐃᓕᓐᓂᐊᓕᓵᖅᑐᓄᑦ ᖁᑦᑎᖕᓂᓕᖕᒧᑦ 9-ᒧᑦ ᐃᓕᓐᓂᐊᕐᓂᖅ ᑎᑭᓯᒪᓚᐅᖅᑐᖅ ᐃᓕᓐᓂᐊᕐᕕᑉᑎᓐᓂᒃ. ᐱᖓᓱᑦ ᐊᖓᔪᖅᑳᕆᔭᕐᒪ ᐸᓂᖏᑦ ᑎᒍᔭᐅᒥᐊᓚᐅᖅᓯᒪᔪᑦ ᐊᖓᔪᖅᑳᒃᑲᓂᒃ ᐃᓕᓐᓂᐊᕆᐊᖅᑎᑕᐅᑉᓗᑎᒃ ᐃᒡᓗᓕᒑᕐᔪᖕᒧᑦ. ᐃᓕᓐᓂᐊᕐᓂᖃᓕᖅᖢᖓ 9-ᒥ, ᐊᖓᔪᖅᑳᒃᑲ ᐅᖃᐅᑎᓚᐅᖅᑕᒃᑲ ᐃᓕᓐᓂᐊᖅᑎᑦᑎᔨᒐ ᐅᖃᕐᓂᕋᖅᖢᒍ ᐃᓕᓐᓂᐊᕐᓂᕋ ᐃᓱᓕᓐᓂᐊᓕᕐᒪᑦ ᑎᑭᕋᕐᔪᐊᕐᒥ ᐊᒻᒪᓗ ᐃᓕᓐᓂᐊᕆᐊᖃᕐᓂᐊᕐᓂᕋᖅᖢᖓ ᐃᖃᓗᖕᓂ ᔭᓗᓇᐃᕝᒥᓘᓐᓃᑦ. ᐅᕙᒻᓄᑦ ᐅᖃᓚᐅᖅᓯᒪᔫᒃ ᐃᒪᓐᓇ, “ᐃᓕᓐᓂᐊᕆᐊᔾᔮᙱᑦᑐᑎᑦ.” ᑕᐃᒪᓕ ᐃᓕᓐᓂᐊᕈᓐᓃᑐᐃᓐᓇᓚᐅᖅᑐᖓ. ᖃᐅᔨᒪᖕᒪᑕᖃᐃ ᓱᓇᒥᑭᐊᖅ.
ᓂᕈᐊᒐᒃᓴᙳᓚᐅᖅᑐᖓ Hᐊᒻᓚᒃᑯᑦ ᑲᑎᒪᔨᖏᓐᓄᑦ 1992-ᒥ, ᓂᕈᐊᖅᑕᐅᑉᓗᖓᓗ. ᐊᔭᐅᖅᑐᖅᑕᐅᓚᐅᕋᒪ ᑲᑎᒪᔨᙳᖁᔭᐅᑉᓗᖓ. 22-ᓂᒃ ᐅᑭᐅᖃᓕᖅᖢᖓ, ᐃᒻᒪᖄ? ᐃᓕᓐᓂᐊᕐᕕᖕᒧᑦ ᐅᑎᖅᑑᔭᓚᐅᖅᑐᖓ.
ᒪᐃᔭᐅᓯᒪᔪᖓ ᒪᕐᕈᐃᖅᑕᖅᖢᖓ, 1997-ᒥ 2002-ᒧᑦ ᐊᒻᒪᓗ 2012-ᒥ 2019-ᒧᑦ. ᐃᓕᑕᕆᔭᐅᔾᔪᑎᑕᖃᙱᖦᖢᓂ ᐃᓕᓐᓂᐊᕌᓂᒍᑎᒥᒃ 12-ᒧᑦ, ᐱᓕᕆᕐᔪᐊᕐᓇᕐᓂᖅᓴᒻᒪᕆᐊᓗᒃ ᓇᓕᒧᒌᒐᓱᒃᖢᓂ ᖁᑦᑎᖕᓂᓕᖕᒥᒃ 12-ᒥ ᐃᓕᓐᓂᐊᕐᓂᓕᖕᒥᒃ. ᐃᓕᑦᑎᒃᑲᓐᓂᕈᒪᔪᖓ, ᐊᒻᒪᓗ ᖃᐅᔨᒪᓚᐅᕋᒪ ᓄᓇᒻᓂᒃ ᐃᑲᔪᕈᓐᓇᕐᓂᒻᓄᑦ. ᑐᑭᓯᐅᒪᑉᓗᓂ ᖃᑉᓗᓈᑎᑐᑦ ᐃᓄᒃᑎᑐᓪᓗ, ᐃᑲᔫᑎᓕᒻᒪᕆᐊᓗᒃ.
ᑭᕙᓪᓕᕐᒥ, ᐊᒥᓲᓕᖅᑐᑦ ᖁᑦᑎᖕᓂᓕᖕᒥ 12-ᒥ ᐃᓕᓐᓂᐊᕌᓂᒃᓯᒪᔪᑦ ᓴᓇᙱᑦᑐᑦ. ᐃᑲᔪᖅᑐᐃᖏᓐᓇᖅᓯᒪᔪᖓ ᐅᔭᕋᖕᓂᐊᖅᑐᓕᕆᓂᕐᒥᒃ, ᓄᓇᒋᔭᖅᐳᑦ ᐊᓯᔾᔨᖅᑕᐅᖁᙱᒃᑲᓗᐊᖅᖢᒍ, ᐊᒃᑐᖅᑕᐅᙱᓪᓗᓂ. ᒪᒃᑯᒃᑐᑦ ᐱᓕᕆᖃᑦᑕᕆᐊᖃᕐᒪᑕ ᓄᖅᑲᖓᑐᐃᓐᓇᙱᓪᓗᑎᒃ. ᒪᒃᑯᒃᑐᑐᐊᖑᙱᑦᑐᑦ, ᐃᓐᓇᐅᓂᖅᓴᓪᓘᓐᓃᑦ, ᐱᓕᕆᙱᒃᑯᑎᒃ, ᑐᒃᑐᒐᓱᖕᓂᐊᖅᑐᑦ ᐊᒻᒪᓗ ᓂᐅᕕᐊᒃᓴᖃᖃᑦᑕᕐᓗᑎᒃ, ᑮᓇᐅᔭᓕᐅᕐᓇᕐᒪᑦ. ᐃᓕᓐᓂᐊᖅᑎᑕᐅᓯᒪᒐᑉᑕ ᐃᖃᓗᒐᓱᒃᑎᓪᓗᑕ ᑐᒃᑐᒐᓱᒃᑎᓪᓗᑕᓘᓐᓃᑦ ᐱᑕᖃᑦᑕᖁᔭᐅᑉᓗᑕ ᐱᔭᕆᐊᖃᖅᑕᑉᑎᓐᓂᑐᐃᓐᓇᖅ. ᓄᑕᕋᐅᑉᓗᑕ, ᐊᖑᓇᓱᒃᑏᑦ ᑐᓂᓯᒐᔪᓚᐅᖅᑐᑦ ᐱᑕᖅᑕᒥᓂᒃ. ᐅᑉᓗᒥᓕ, ᐅᖓᑖᒍᒃᑲᓐᓂᖅ ᐱᑕᖃᑦᑕᓕᖅᑐᑦ ᓂᐅᕕᐊᒃᓴᖃᖃᑦᑕᓕᖅᖢᑎᒡᓗ. ᐃᓛᓐᓂᒃᑯᑦ, ᓈᓚᐅᑎᐊᓛᓂᒃ ᑐᓴᕐᓇᓲᖅ ᐃᒪᓐᓇᐃᓕᔪᓂᒃ, “ᓂᐅᕕᕈᒪᔪᖓ ᑐᒃᑐᒥᒃ ᓂᕿᒥᒃ ᑐᒃᑑᑉ ᐅᓈᖓᓂᒃ,” ᑕᒪᓐᓇ ᕿᒃᓵᖕᓇᖅᑐᖅ. ᑕᐃᒪᐃᑦᑐᓂᒃ ᑐᓴᖃᑦᑕᕐᓇᓚᐅᙱᒻᒪᑦ.
ᑕᐃᒪᑐᖅ ᐊᕙᑎᑦ ᐅᑭᐅᑦ ᐱᐊᓂᒃᐸᑕ ᑎᑭᕋᕐᔪᐊᖅ ᓇᖕᒥᓂᖅ ᓄᓇᕗᒥ ᒪᓕᒐᓕᐅᖅᑎᖃᓕᕈᒫᖅᐳᖅ ᐊᒻᒪᓗ ᐱᖁᑎᕐᔪᐊᖅᑖᒃᑲᓐᓂᕐᓗᓂ ᓄᑕᖅᑲᓄᑦ ᑐᕌᖓᔪᓂᒃ. ᐱᐅᓱᒋᔮᕐᓇᙱᑦᑑᒐᓗᐊᖅ, ᑭᓯᐊᓂ ᐊᒥᓱᑦ ᐅᖃᓲᑦ ᑎᑭᕋᕐᔪᐊᕐᒥ ᐃᓅᓯᕐᒥᓂᒃ ᑭᐱᓯᓯᒪᔪᑦ ᖃᑉᓰᓇᐅᓂᖅᐹᖑᖕᒪᑕ ᓄᓇᕗᒥ. ᑕᐃᒪᐃᑦᑐᖅ ᖃᓂᒌᒃᑑᑎᒐᑉᑕ ᓄᓇᖅᑲᑎᒌᒃᑐᒍᑦ ᐊᒻᒪᓗ ᐃᑲᔪᖅᑑᑎᕙᒃᖢᑕ. ᒪᒃᑯᒃᑐᖁᑎᕗᑦ ᐱᓕᕆᑎᓐᓇᓱᐃᓐᓇᖃᑦᑕᖅᑕᖅᐳᑦ.