ᐊᒥᓲᓚᐅᖅᑐᑦ ᐊᕐᕋᒍᑕᒫᒃᑯᑦ ᐅᖃᓘᑎᓕᕆᔨᒃᑯᑦ ᑲᖏᖅᖠᓂᕐᒥ Hᐊᑭᖅᑎᓂᒃ ᐃᓕᓐᓂᐊᖅᑎᑦᑎᓂᖃᖃᑦᑕᖅᑎᓪᓗᒋᑦ, 200 ᐅᖓᑖᓃᓚᐅᖅᑐᑦ ᓄᑕᖅᑲᑦ ᐃᓚᐅᖃᑕᐅᓚᐅᖅᑐᑦ ᑕᓪᓕᒪᓂᒃ ᐅᑉᓗᓂᒃ Hᐊᑭᕐᓂᒃᑯᑦ ᐃᓕᓐᓂᐊᖅᑎᑕᐅᔪᓂᒃ ᐅᑐᐱᕆ 19-23-ᒧᑦ ᑲᖏᖅᖠᓂᕐᒥ.
ᐃᓕᓐᓂᐊᖅᑐᓂᒃ ᐱᕙᓪᓕᐊᑎᑦᑎᔨ ᐊᒻᒪᓗ ᓯᕗᓕᖅᑎᒋᔭᐅᔪᖅ ᐃᓕᓐᓂᐊᖅᑎᑦᑎᔨᓂᒃ ᑕᐃᕕᑎ ᑲᓛᒃ ᐅᖃᓚᐅᖅᑐᖅ ᐱᓇᓱᐊᕈᓯᕆᔭᕈᖅ ᐃᓕᓐᓂᐊᖅᑎᓪᓗᒋᑦ ᑲᔪᓯᓂᖃᑦᑎᐊᓚᐅᖅᑐᖅ.
ᐅᖃᖅᖢᓂ ᐊᓕᐊᓇᐃᓚᐅᖅᑐᕈᖅ ᐱᙳᐊᖅᑏᑦ ᐊᑐᐃᓐᓇᐅᑎᓪᓗᒋᑉ ᐅᑉᓗᓗᒃᑖᒃᑯᑦ ᐃᓕᓐᓂᐊᖅᑎᑕᐅᑎᓪᓗᒋᑦ, ᑕᐃᒪᓐᓇ ᐊᔪᕐᓇᙱᓐᓂᖅᓴᐅᖃᑦᑕᕐᒪᑦ ᐱᙳᐊᖅᑎᓄᑦ ᐊᒻᒪᓗ ᒥᐊᓂᖅᓯᔨᖏᓐᓄᑦ.
“ᐅᑭᐅᖑᔪᖅ, ᓯᐊᕐᕆᔮᕐᕕᒃ ᒪᑐᐃᖅᑕᐅᑕᐃᓐᓇᓚᐅᖅᑎᓪᓗᒍ, ᐃᓕᓐᓂᐊᖅᑐᑦ ᑲᔪᓯᑎᑕᐅᓚᐅᙱᒻᒪᑕ ᐃᓕᓐᓂᐊᖅᑎᑦᑎᔩᑦ ᐃᓕᓐᓂᐊᕐᕕᖕᒥ ᑲᑎᒪᓂᖃᖅᑎᓪᓗᒋᑦ ᐱᓇᓱᐊᕈᓯᕐᒥ, ᐊᒻᒪᓗ ᐱᐅᓂᖅᓴᒃᑯᑦ ᐃᑲᔫᑎᒥᒃ ᓴᖅᑭᑦᑎᕝᕕᒋᓚᐅᖅᖢᑎᒍᑦ ᐅᑉᓗᓗᒃᑖᒃᑯᑦ ᖃᐃᓯᒪᔪᓐᓇᖅᑎᓪᓗᒋᑦ.” ᑕᐃᒪᓐᓇ ᐅᖃᖅᖢᓂ ᑲᓛᒃ.
“ᓯᑯᒥ ᐃᓕᓐᓂᐊᖅᑎᑦᑎᒋᐊᖃᑦᑕᓚᐅᖅᑐᒍᑦ ᐅᑉᓗᑕᒫᒃᑯᑦ 9:00-ᒥ ᐅᑉᓛᒃᑯᑦ ᐊᒻᒪᓗ ᐱᐊᓂᒃᐸᒃᖢᑕ ᐅᓐᓄᑕᒫᒃᑯᑦ ᐃᒻᒪᖄ 9:30-ᒥ, ᑕᐃᒪᐃᒻᒪᑦ ᐅᑉᓗᑕᖄᓘᓕᖃᑦᑕᓚᐅᖅᑐᑦ ᓯᑯᒥ.
“ᓄᖅᑲᖓᓚᐅᐱᓪᓚᖕᓇᖃᑦᑕᓚᐅᖅᑐᖅ ᓯᑯ ᓴᓗᒻᒪᖅᓴᖅᑕᐅᔭᕆᐊᖃᓕᕌᖓᑦ ᐅᑭᐅᓖᑦ ᐊᕕᒃᑐᖅᓯᒪᔪᑦ ᐊᑯᓐᓂᖓᓂᒃ, ᑭᓯᐊᓂ ᓄᖅᑲᖓᓐᓇᕋᓗᐊᖅᑎᓪᓗᒍ ᐊᖓᔪᖅᑳᑦ ᑐᑭᓯᒋᐊᕋᔪᖃᑦᑕᓚᐅᕐᒪᑕ ᓱᓇᕈᓘᔭᕐᓂᒃ, ᓴᓚᐅᓱᖕᓇᓗᐊᖃᑦᑕᓚᐅᙱᑦᑐᖅ.”
ᑲᓛᒃ, Hᐊᒻᓚᒃᑯᑦ ᕿᑎᒃᑐᓕᕆᔨᖓ, ᐅᖃᓚᐅᖅᑐᖅ ᖁᕕᐊᓱᓚᐅᖅᑐᕈᖅ ᑕᒪᕐᒥᒃ ᐃᓚᐅᖃᑕᐅᔪᑦ ᐱᓕᕆᑦᑎᐊᓚᐅᕐᒪᑕ ᓯᐊᕐᕆᔮᕐᕕᖕᒥ ᐃᓕᓐᓂᐊᖅᑎᑕᐅᑎᓪᓗᒋᑦ.
ᐅᖃᖅᖢᓂ ᖃᑉᓰᓐᓇᐅᔪᒡᒎᖅ ᐃᓱᒪᒃᓴᖅᓯᐅᕈᑕᐅᔭᕆᐊᓖᑦ ᓱᓕ, ᑭᓯᐊᓂ ᐃᓗᐃᑦᑐᒃᑯᑦ, ᐃᓄᐃᑦ ᒪᓕᑦᑎᐊᖃᑦᑕᖅᑐᑦ ᒪᓕᒐᓕᐊᖑᓯᒪᔪᓂᒃ ᓄᕙᒡᔪᐊᕐᓇᐅᔪᖅ - 19 ᐱᔾᔪᑎᒋᑉᓗᒍ.
“ᑕᒪᐃᓐᓄᖅᑲᔭᖅ ᖃᐃᖃᑦᑕᖅᑐᑦ ᓯᐊᕐᕆᔮᕐᕕᖕᒧᑦ ᒪᓕᑦᑎᐊᖏᓐᓇᖅᑐᑦ ᒪᓕᒐᕆᔭᐅᔪᓂᒃ.
“ᐃᓚᖓᒍᑦᑕᐅᖅ ᐸᕐᓇᐃᓯᒪᓚᐅᕋᑉᑕ ᐱᓇᓱᐊᕈᓯᐅᑉ ᐃᓗᐊᓂ ᓄᑕᖅᑲᑦ ᐃᓕᓐᓂᐊᖅᑎᑦᑐᒪᑉᓗᒋᑦ ᖃᓄᐃᓕᐅᕈᓐᓇᕐᒪᖔᑕ ᖃᓄᐃᓕᐅᕈᓐᓇᙱᒻᒪᖔᑕᓗ ᓯᐊᕐᕆᔮᕐᕕᖕᒥ ᐅᑉᓗᒥᐅᓕᖅᑐᖅ, ᑕᒡᕙ ᐃᓚᖓᒍᑦ ᐃᓕᓐᓂᐊᕈᑕᐅᓚᐅᖅᑐᖅ ᐅᖃᐅᓯᓕᕆᓂᒃᑯᑦ.
“ᐊᓯᔾᔨᖅᓯᒪᓕᕐᒪᑕ ᐃᓅᓯᖅᐳᑦ ᐊᒻᒪᓗ ᓯᐊᕐᕆᔮᕐᕕᖕᒦᑦᑕᖅᑐᑐᐃᓐᓇᕈᓐᓇᐃᓪᓕᓪᓗᑎᒃ, ᑕᐃᒪᐃᓕᐅᕈᒪᖃᑦᑕᖅᑑᒐᓗᐊᑦ ᐊᒥᓱᑦ ᓄᑕᖅᑲᑦ ᑲᖏᖅᖠᓂᕐᒥ.
“ᓄᕙᒡᔪᐊᕐᓂᒃᑯᑦ ᒪᓕᒐᑦ ᐊᒃᓱᕈᕐᓇᖅᑑᔪᑦ ᑕᒪᐃᓐᓄᑦ ᐃᓄᖕᓄᑦ, ᑭᓯᐊᓂ ᒪᓕᒋᐊᖃᕋᑉᑕ ᒪᓕᒐᓂᒃ ᑲᔪᓯᑦᑎᐊᕈᒪᒍᑉᑕ.”
ᑲᓛᒃ ᐅᖃᖅᖢᓂ 7 ᑕᖅᑭᐅᓕᖅᑐᖅᑲᐃ ᑭᖑᓪᓕᖅᐹᒥ ᓄᑕᖅᑲᑦ ᓯᐊᕐᕆᔮᓚᐅᖅᑎᓪᓗᒋᑦ, ᑕᐃᒪᐃᒻᒪᑦ ᓯᐊᕐᕆᔮᕈᒪᔪᐊᓘᓚᐅᖅᑐᑦ ᐱᙳᐊᖅᑏᑦ.
ᐅᖃᖅᖢᓂ ᓄᑕᖅᑲᑦ ᖁᕕᐊᓱᑦᑎᐊᓚᐅᕐᓂᖏᓐᓄᑦ ᓯᕗᓪᓕᖅᐹᒥ ᐅᑉᓗᕐᒥ ᐃᓕᓐᓂᐊᖅᑎᑕᐅᑎᓪᓗᒋᑦ, ᑭᓯᐊᓂ ᐅᐃᒪᔮᓗᐊᕈᓐᓃᓚᐅᖅᑐᑦ ᐊᒻᒪᓗ ᐅᔾᔨᖅᑐᕐᓂᖅᓴᐅᓕᖅᖢᑎᒃ ᓯᑯᒥ ᐃᓕᓐᓂᐊᖅᑎᑕᐅᑎᓪᓗᒋᑦ ᐊᓯᖏᑦᑎᒍᓪᓗ ᐃᓕᓐᓂᐊᖅᑎᑕᐅᑎᓪᓗᒋᑦ.
“ᓄᑕᖅᑲᑦ ᐊᔪᕈᓐᓃᖅᐹᓪᓕᖅᓯᒪᓚᐅᖅᑐᑦ ᐱᓇᓱᐊᕈᓯᖅ ᑲᔪᓯᑎᓪᓗᒍ, ᐊᒻᒪᓗ ᑐᑭᓯᐅᒪᑦᑎᐊᖅᖢᑎᒃ ᓱᓇᓂᒃ ᐃᓕᓐᓂᐊᖅᑎᑕᐅᖕᒪᖔᕐᒦᒃ.
“ᐊᒥᓱᒻᒪᕆᐊᓘᓚᐅᖅᑐᑦ ᐃᓕᓐᓂᐊᖃᑕᐅᔪᑦ ᓄᑕᖅᑲᑦ ᐅᑭᐅᖅ. ᐊᒥᓱᙳᖅᐸᓪᓕᐊᑐᐃᓐᓇᖅᑐᑦ ᐊᕐᕋᒍᑕᒫᒃᑯᑦ ᐊᒻᒪᓗ ᑭᒡᓕᖃᕐᕕᐅᔪᒧᑦ ᑎᑭᑉᐸᓪᓕᐊᑐᐃᓐᓇᖅᑐᖅ, ᓈᒻᒪᒃᖢᓂ ᓈᒻᒪᙱᖦᖢᓂᓗ.
“Hᐊᑭᕐᓂᖅ ᓴᖅᑭᔮᖅᑎᑕᐅᖕᒪᑦ ᑲᖏᖅᖠᓂᕐᒥ. Hᐊᑭᕐᓂᒃᑯᑦ ᐊᓐᓄᕌᕆᔭᐅᕙᒃᑐᓂᒃ ᑐᓂᐅᖅᑲᐃᖃᑦᑕᖅᖢᑕ, ᐊᑭᓕᖅᑑᑏᓪᓗ ᐅᑭᐅᒥ Hᐊᑭᖃᑦᑕᕐᓂᐊᕐᓂᕐᒧᑦ ᐊᑦᑎᖕᓂᖅᓴᐅᑉᓗᑎᒃ ᐊᒻᒪᓗ ᐃᒪᓐᓇᐃᑦᑑᔭᖅᑐᖅ ᐊᒥᓲᓂᖅᓴᐅᔫᔭᓕᖅᑐᑦ ᐃᓚᐅᖃᑕᐅᔪᑦ Hᐊᑭᕐᓂᒃᑯᑦ ᑕᒫᓂ, ᑕᒪᓐᓇ ᐱᐅᔪᖅ.
“ᑭᓯᐊᓂ, ᐊᔪᕐᓇᖅᓯᓲᖅ ᐃᓕᓐᓂᐊᖅᑎᑦᑎᑦᑎᐊᕈᒪᒐᓗᐊᖅᖢᓂ ᐃᓚᐅᖃᑕᐅᔪᒪᔪᑦ ᐊᒥᓲᓗᐊᓕᕌᖓᑕ.”
ᐊᑐᓂ ᐅᑭᐅᖃᕐᕕᐅᔪᑦ ᓇᖕᒥᓂᖅ ᓯᕗᓕᖅᑎᖃᖃᑦᑕᕐᒪᑕ ᐃᓕᓐᓂᐊᖅᑐᓂᒃ, ᐊᒻᒪᓗ ᑲᓛᒃ ᐅᖃᖅᖢᓂ ᓯᕗᓕᖅᑎᒋᔭᐅᔪᑦ ᐱᓕᕆᑦᑎᐊᖅᑐᐊᓘᓚᐅᕐᓂᖏᓐᓄᑦ ᐋᓯᑦ ᐅᑭᐅᖅ.
ᐅᖃᖅᖢᓂ ᐃᒻᒪᖄᒎᖅ 90%−ᖑᔪᑦ ᓯᕗᓕᖅᑏᑦ ᐃᓕᓐᓂᐊᖃᑕᐅᖃᑦᑕᖅᓯᒪᓂᑰᔪᑦ ᐊᒻᒪᓗ ᖃᐅᔨᒪᑦᑎᐊᖅᖢᑎᒃ ᐃᓕᓐᓂᐊᖅᑐᑦ ᖃᓄᐃᓕᐅᖅᑎᑕᐅᖃᑦᑕᕐᓂᖏᓐᓄᑦ.
“ᐅᐱᒋᖕᒥᔭᕋᑦᑕᐅᖅ ᖃᑉᓯᑦ ᐊᕐᓇᑦ Hᐊᑭᖃᑕᐅᖃᑦᑕᓕᕐᓂᖏᓐᓄᑦ ᑲᖏᖅᖠᓂᕐᒥ. ᐅᑭᐅᖃᖃᑎᒋᔭᒃᑲᓂᒃ ᐊᕐᓇᐃᑦ ᐱᙳᐊᖃᑦᑕᓚᐅᖅᑐᑦ, ᑕᐃᒪᐅᔪᖅ ᒍᓗᐊᕆᔭ ᖃᓗᔾᔭᖅ, ᐊᔪᙱᓐᓂᖅᐹᖑᖃᑕᐅᓚᐅᖅᑐᖅ ᐱᙳᐊᖅᑎᓂᒃ ᐊᒻᒪᓗ ᐊᓯᖃᖅᑑᔭᕐᓇᓂ.
“ᑕᒡᕙᓂ ᐅᑭᐅᒥ 14-ᖑᓚᐅᖅᑐᑦ ᐊᕐᓇᐃᑦ ᐊᑕᐅᓯᕐᒥ ᐱᙳᐊᖃᑎᒌᒃᑐᓂᒃ ᐊᒻᒪᓗ 16-ᖑᓚᐅᖅᑐᑦ ᐊᕐᓇᐃᑦ ᐱᖃᑎᖓᓂᒃ − 60 ᐅᖓᑖᓃᑦᑐᑦ ᑲᑎᖦᖢᒋᑦ ᐃᓚᐅᖃᑕᐅᔪᑦ − ᐅᒃᐱᕐᓇᙱᑦᑐᕐᓘᓐᓃᑦ ᖃᓄᖅ ᐊᒥᓱᙳᖅᐹᓪᓕᖅᑎᒋᖕᒪᖔᑕ ᐊᕐᓇᑦ Hᐊᑭᖅᐸᒃᑐᑦ ᑲᖏᖅᖠᓂᕐᒥ.
“ᖃᓄᖅ ᐊᒻᒪᓗ ᓱᖕᒪᑦ ᑕᐃᒪᐃᓯᒪᖕᒪᖔᑕ ᖃᐅᔨᒪᙱᑦᑐᖓ, ᑭᓯᐊᓂ ᐊᕐᓇᐃᑦ Hᐊᑭᖅᑏᑦ ᑲᖏᖅᖠᓂᕐᒥ ᓄᑕᕋᐅᑎᓪᓗᖓ ᐅᑉᓗᒥᒧᑦ ᐊᓯᔾᔨᖅᓯᒪᓪᓚᕆᒃᑐᑦ ᐊᒻᒪᓗ ᐊᒥᓲᓂᖅᓴᑦ ᐊᕐᓇᑦ ᕿᑎᒋᐊᖅᑐᓪᓚᑦᑖᓲᑦ.
“ᑕᐃᑉᑯᐊ ᐱᒋᐊᖃᑎᖃᓚᐅᖅᑐᑦ ᐊᖑᑎᓂᒃ ᐊᔪᙱᑦᑎᐊᖅᑐᑦᑕᐅᖅ ᐊᖑᑎᑎᑐᑦ, ᐱᒡᒍᓴᐅᔾᔪᐊᓪᓚᕆᓲᑦ, ᐱᓕᕆᕐᔪᐊᓲᑦ ᐊᒻᒪᓗ ᑐᕌᒐᖃᖅᑐᑦ ᐅᑭᐅᖅᑕᖅᑐᒥ ᐱᙳᐊᕕᒡᔪᐊᕈᒫᖅᑐᓄᑦ ᐃᓚᐅᖃᑕᐅᔪᒪᔪᒫᕐᓂᕐᒧᑦ.
“ᐊᒃᓱᕈᕐᓇᕐᓂᖅᓴᐅᓲᖅ ᑭᖑᕙᖅᖢᑎᒃ ᐃᓚᐅᖃᑕᐅᓕᓵᖅᑐᓄᑦ, ᑭᓯᐊᓂ ᖁᕕᐊᒋᔭᖃᖅᑐᑦ Hᐊᑭᕐᓂᕐᒥᒃ ᐊᒻᒪᓗ ᖁᕕᐊᓱᑦᑎᐊᓲᑦ ᕿᑎᒃᖢᑎᒃ ᑕᐃᒪᐃᒻᒪᑦ ᓈᒻᒪᒃᑐᖅ.”