ᐅᐃᒋᒃ ᓄᓕᐊᕇᒃ ᐱᓕᕆᖃᑎᒌᒃᖢᑎᒃ ᐊᑯᓛᖅ ᐊᒪᕈᖅ ᐊᒻᒪᓗ ᑕᕐᓖᓐ ᓄᑭᒃ−ᐊᒪᕈᖅ, ᐊᑭᓕᖅᑐᖅᑕᐅᓇᑎᒃ ᐃᑲᔪᖅᑎᒋᔭᖏᓪᓗ, ᐱᓕᕆᑦᑎᐊᕋᓱᒃᓯᒪᔪᑦ ᓂᕿᖃᖅᑎᑦᑎᓇᓱᒃᖢᑎᒃ ᐊᑯᓂᕐᓚᒃ ᖃᒪᓂ’ᑐᐊᕐᒥ.
ᓄᑭᒃ−ᐊᒪᕈᖅ, ᐱᕙᓪᓕᐊᔪᓕᕆᔨᐅᔪᖅ ᖃᒪᓂ’ᑐᐊᑉ Hᐊᒻᓚᒃᑯᖓᓂᒃ, ᐅᖃᖅᖢᓂ ᑕᒪᓐᓇ ᐱᒋᐊᓚᐅᕐᒪᑦ ᐃᒻᒪᖄ ᖁᓕᑦ ᐅᑭᐅᑦ ᑕᐃᑉᓱᒪᓂ ᓄᑕᕋᖏᑦ ᒥᑭᔫᑎᓪᓗᒋᑦ ᐊᒥᓱᓂᒃ ᐅᒡᓚᖅᑎᖃᖅᖢᑎᒃ ᐊᖏᕐᕋᒥᓂᒃ.
ᐅᖃᖅᖢᓂ ᑕᐃᑉᓱᒪᓂ ᐃᒐᒋᐅᖅᓴᓚᐅᖅᓯᒪᖕᒪᑦ ᓲᕐᓗ ᐅᓇᑕᖅᑐᒃᓵᓗᖕᓂᒃ ᐊᒥᓱᓂᒃ ᐃᒐᒍᔾᔪᑎᑐᑦ.
“ᐃᓱᒪᓕᐅᓚᐅᖅᓯᒪᔪᖓ ᑕᐃᑉᓱᒪᓂ ᐊᒥᐊᒃᑯᐃᑦ ᓂᖀᑦ ᓯᐊᕐᕆᔮᕐᕕᓕᐊᕈᑎᔪᒪᖃᑦᑕᖅᖢᒋᑦ, ᑕᐃᑉᓱᒪᓂ ᓈᓚᒡᕕᐊᓛᕐᒧᙵᐅᓚᐅᖅᓯᒪᔪᖓ ᑐᓴᖅᑎᑦᑎᑉᓗᖓ ᐊᒥᐊᒃᑯᓂᒃ ᓂᕿᓕᐊᒃᑲᓂᒃ ᐆᓇᖅᑐᓂᒃ ᐱᑕᖃᕐᒪᑦ ᐊᐃᔭᐅᔪᓐᓇᖅᑐᓂᒃ ᓯᐊᕐᕆᔮᕐᕕᖕᒥ,” ᑕᐃᒪᓐᓇ ᐅᖃᖅᖢᓂ ᑕᕐᓖᓐ.
“ᐊᒥᓱᑦ ᖃᐃᓚᐅᖅᓯᒪᔪᑦ ᑕᐃᑉᓱᒪᓂ ᓯᕗᓪᓕᖅᐹᒥ ᑕᐃᒪᐃᓕᐅᖅᑎᓪᓗᖓ, ᑕᐃᒪᐃᒻᒪᑦ ᐅᐃᒐᓗ ᐃᓱᒪᓕᐅᓚᐅᖅᓯᒪᔪᒍᒃ ᓂᕿᓕᐅᖃᑦᑕᕈᒪᑉᓗᑕ ᐊᖏᕐᕋᑉᑎᓐᓂᒃ ᐊᒻᒪᓗ ᐅᖃᖃᑎᖃᕈᒪᑉᓗᑕ ᓯᐊᕐᕆᔮᕐᕕᖕᒥ ᓴᓇᔨᓂᒃ ᐃᒐᕝᕕᖓ ᐊᑐᐃᓐᓇᐅᒃᐸᑦ ᓂᕆᑎᑦᑎᖃᑦᑕᕈᒪᑉᓗᑕ ᖃᑯᑎᒃᑯᑦ.
“ᐆᓇᖅᑐᓂᒃ ᐅᑉᓗᕈᒥᑕᖅᑎᑦᑎᓂᖅ ᐱᒋᐊᓚᐅᖅᓯᒪᔪᖅ ᐊᑕᐅᓰᕐᓗᑕ ᑕᖅᑭᑕᒫᒃᑯᑦ ᐱᑎᑦᑎᖃᑦᑕᕆᐊᖅᖢᑕ ᐊᒻᒪᓗ ᓴᓇᙱᓚᐅᐱᓪᓚᖕᓂᐊᖅᖢᖓ ᒪᕐᕉᖕᓂᒃ ᐅᑭᐅᓂᒃ, ᑮᓇᐅᔭᑎᒍᑦ ᐃᑲᔫᓯᐊᖅᑖᓚᐅᖅᑐᒍᑦ ᓂᐅᕕᖅᑎᓂᒃ ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ ᑕᐃᑲᙵᑦ ᐱᒋᐊᖅᖢᒍ ᐱᓇᓱᐊᕈᓯᑕᒫᑦ ᓂᕆᑎᑦᑎᖃᑦᑕᓕᓚᐅᖅᑐᒍᑦ.
“ᓯᑕᒪᑦ ᐱᓕᕆᖃᑎᒌᒐᔪᒃᑐᑦ, ᐅᕙᖓ ᐱᖃᑕᐅᑉᓗᖓ, ᓂᕆᔭᐅᓂᐊᖅᑐᑦ ᐃᓚᒃᓴᖏᑦ ᐋᖅᑭᒃᓱᖅᑳᖅᖢᑎᒍᑦ, ᐅᓐᓄᖓᓂᐅᒐᔪᒃᑐᖅ, ᐊᒻᒪᓗ ᓂᕿᓕᐅᓕᖅᖢᑕ ᐅᑉᓛᒃᑯᑦ ᐊᔾᔭᖅᑳᕐᓇᑎᒍᑦ ᓯᐊᕐᕆᔮᕐᕕᖕᒧᑦ.”
ᐆᓇᖅᑐᓂᒃ ᐅᑉᓗᕈᒥᑕᖅᑐᖅᑎᑦᑎᖃᑦᑕᕐᓂᖅ ᓄᖅᑲᐅᑎᓚᐅᖅᑕᖅᐳᑦ ᓄᑭᒃ−ᐊᒪᕈᖅ ᓴᓇᕝᕕᖕᒥᓄᑦ ᐅᑎᕐᒪᑦ. ᑭᓯᐊᓂ ᐅᑉᓗᒥ, ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓖᑦ ᑕᐃᒪᐅᓕᖅᑎᓪᓗᒋᑦ ᐃᓄᐃᑦ ᐊᑕᐅᓯᕐᒥ ᑲᑎᖃᑦᑕᕆᐊᖃᕈᓐᓃᖅᑎᓪᓗᒋᑦ, ᓄᑭᒃ−ᐊᒪᕈᖅ ᐱᓕᕆᖃᑎᖏᓪᓗ ᐃᓱᒪᒃᓴᖅᓯᐅᓕᓚᐅᖅᑐᑦ ᖃᓄᖅᑑᕈᓐᓇᕐᒪᖔᕐᒥᒃ ᐆᓇᖅᑐᓂᒃ ᓂᕆᑎᑦᑎᖃᑦᑕᕈᒪᓂᒃᑯᑦ ᓄᓇᓕᖕᒥ.
ᑕᐃᒪᐅᑎᓪᓗᒍ, ᖃᒪᓂ’ᑐᐊᕐᒥ Hᐊᒻᒪᒃᑯᑦ ᑮᓇᐅᔭᖃᕐᓂᖅᖢᑎᒃ ᐊᒻᒪᓗ ᕿᓂᖅᑐᑦ ᐃᑲᔪᖅᑎᒃᓴᓂᒃ ᑲᔪᓯᔪᓐᓇᖁᑉᓗᒍ ᐅᑉᓛᕈᒥᑕᖅᑐᖅᑎᑦᑎᖃᑦᑕᕐᓂᖅ ᐱᒋᐊᖅᑎᑕᐅᓚᐅᖅᓯᒪᔪᖅ ᓄᓇᓕᖕᒥ ᐃᓕᓐᓂᐊᕐᕕᖕᓄᑦ ᓄᕙᒡᔪᐊᕐᓂᖅ ᓴᖅᑭᖅᑳᖅᑎᓐᓇᒍ ᒫᑦᓯᒥ.
ᓄᑭᒃ−ᐊᒪᕈᖅ ᐅᖃᖅᖢᓂ ᐃᓕᓐᓂᐊᕐᕕᒃ ᑲᔪᓯᑎᑦᑎᔪᓐᓇᓚᐅᙱᒻᒪᑦ ᐅᑉᓛᕈᒥᑕᖅᑐᖅᑎᑦᑎᖃᑦᑕᕐᓂᕐᒥᒃ ᐃᓕᓐᓂᐊᖅᑐᑦ ᐅᑎᕐᒪᑕ ᐃᓕᓐᓂᐊᕐᕕᖕᒧᑦ.
ᐅᖃᖅᖢᓂ ᐅᖃᐅᔾᔨᓚᐅᕐᓂᕐᒥᓄᑦ Hᐊᒻᓚᒃᑯᓐᓂᒃ ᐱᓕᕆᖃᑎᓂᓗ ᓂᕆᑎᑦᑎᖃᑦᑕᓚᐅᕋᓗᐊᖅᖢᑎᒃ ᐱᑎᑦᑎᔪᓐᓃᕋᒥᒃ ᓴᓇᕝᕕᖕᒥᓄᑦ ᐅᑎᖅᓯᒪᓕᓚᐅᖅᑎᓪᓗᒍ ᐊᒻᒪᓗ ᖁᕕᐊᓱᑦᑎᐊᕋᔭᕐᓂᕐᒥᓄᑦ ᑕᒪᑐᒥᙵ ᐸᕐᓇᐃᖃᑦᑕᕈᓐᓇᖅᓯᖕᒥᒍᑎᒃ, ᑐᓂᐅᖅᑲᐃᔪᓐᓇᖃᑦᑕᖅᓯᖕᒥᒍᑎᒡᓗ ᐅᑉᓛᕈᒥᑕᒐᒃᓴᓂᒃ.
“Hᐊᒻᓚᒃᑯᑦ ᑮᓇᐅᔭᓂᒃ ᓈᒻᒪᒃᑐᓂᒃ ᐱᓯᒪᓚᐅᖅᑐᑦ ᐊᑐᖅᑕᐅᔪᒃᓴᓂᒃ ᐊᕐᕕᓂᓕᖕᓂᒃ ᐱᓇᓱᐊᕈᓯᕐᓂᒃ ᓯᕗᓪᓕᖅᐹᒥ ᑐᓂᐅᖅᑲᐃᓚᐅᖅᑳᖅᑎᓪᓗᑕ ᑎᓯᐱᕆ 12-ᒥ. ᐊᔪᕐᓇᕈᓘᔭᓚᐅᖅᑐᖅ ᓇᓂᓯᓇᓱᒃᖢᓂ ᐊᓯᖏᓐᓂᒃ ᐃᑲᔪᒃᑲᓐᓂᕋᔭᖅᑐᓂᒃ ᑭᓯᐊᓂ, ᐱᐊᓂᒃᐸᓪᓕᐊᓕᖅᑎᓪᓗᑕ, ᐊᔪᕐᓇᕈᓐᓃᖅᑑᔭᕐᓂᖅᓴᐅᔪᖅ ᐃᑲᔪᕈᓐᓇᖅᑐᓂᒃ.
“ᑐᓂᐅᖅᑲᐃᖃᑦᑕᓚᐅᖅᑐᒍᑦ 100-ᓂᒃ ᐴᕐᓂᒃ ᐅᑉᓛᕈᒥᑕᓂᒃ ᓴᓇᑦᑕᐃᓕᐊᕈᓯᑕᒫᒃᑯᑦ ᐅᑉᓗᒃᑯᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᓅᖃᑎᒌᑦᑎᐊᕐᓂᒃᑯᑦ ᐱᓕᕆᕝᕕᖓᓂᒃ ᐴᒃᓴᐃᑦ ᐃᓗᓕᖃᖅᖢᒋᑦ ᐊᓗᒐᒃᓴᓂᒃ, pancake-ᓕᐅᒐᒃᓴᓂᒃ, muffin-ᓕᐅᕈᑎᒃᓴᓂᒃ, ᒪᓐᓂᖕᓂᒃ ᐊᒻᒪᓗ ᐃᒻᒧᖕᒥᒃ.
“ᖃᑉᓯᑲᓪᓚᑦ ᐊᓈᓇᐅᔪᑦ ᐅᖃᖃᑦᑕᖅᓯᒪᔪᑦ ᐅᕙᑉᑎᓐᓄᑦ ᓄᑕᕋᖏᒡᒎᖅ ᐃᒐᒋᐅᖅᓴᖃᑦᑕᓕᕐᒪᑕ ᐊᖏᕐᕋᒥᓂ muffin-ᓕᐅᕈᑎᒃᓴᖃᕐᓂᖓᓄᑦ ᐴᕐᓂᒃ. ᑕᒪᓐᓇ ᐃᑲᔫᑎ ᐃᑲᔫᑕᐅᖃᑦᑕᖅᑐᖅ ᐃᓚᒌᖕᓂᒃ ᓂᕿᖃᖅᑎᑦᑎᓂᒃᑯᑦ, ᐱᓗᐊᖅᑐᒥ ᓂᖀᑦ ᑕᒫᓂ ᐊᑭᑐᔫᑎᓪᓗᒋᑦ.
“ᐅᑉᓛᕈᒥᑕᒃᓴᑦ ᐴᒃᓴᒦᑦᑐᑦ ᐃᓱᓕᓐᓂᐊᓕᖅᑐᑦ ᑖᑉᓱᒪ ᐱᓇᓱᐊᕈᓯᐅᑉ ᓄᙳᐊᓂ, ᑭᓯᐊᓂ ᑮᓇᐅᔭᖅᓯᐅᖅᓯᒪᔪᖓ ᐊᔾᔨᒌᙱᑦᑑᑕᐅᔪᓂᒃ ᐆᓇᖅᑐᓂᒃ ᐅᑉᓗᕈᒥᑕᖅᑎᑦᑎᒍᑎᒃᓴᒧᑦ, ᑕᐃᒪᑐᖅ ᑮᓇᐅᔭᑦ ᐱᔪᓐᓇᕐᓂᐊᖅᐸᖅᐳᑦ ᐊᒻᒪᓗ ᑐᓂᐅᖅᑲᐃᔪᓐᓇᖃᑦᑕᕐᓗᑕ ᓂᕆᔭᒃᓴᓂᒃ ᓄᓇᓕᖕᒥ ᐅᕝᕙᓘᓐᓃᑦ ᓯᐊᕐᕆᔮᕐᕕᒃ ᒪᑐᐃᒃᑲᓐᓂᖅᐸᑦ.”