ᐅᑉᓗᖅᑕ ᑲᑎᒪᔨᖏᑦ ᑐᓂᐅᖅᑲᐃᓚᐅᕐᒥᔪᑦ ᓂᕿᓂᒃ ᓂᕿᑖᕆᐊᓕᖕᓄᑦ ᔭᓄᐊᕆ 26-ᒥ ᑕᐃᑲᓂ ᐅᑉᓗᕐᒥ ᐊᔾᔨᐅᙱᑦᑐᓂᒃ ᐱᑎᑕᐅᓯᒪᓚᐅᖅᖢᑎᒃ ᖁᔭᓐᓇᒦᖅᑕᖅᐳᑦ ᖃᒪᓂ’ᑐᐊᕐᒥ ᑲᑎᒪᔩᑦ ᖃᑉᓗᓈᓂᙶᖅᑐᓂᒃ ᑎᑭᕝᕕᐅᓯᒪᓚᐅᕐᓂᖏᓐᓄᑦ.
ᑲᑎᒪᔨᐅᖃᑕᐅᔪᖅ ᐃᐅᕆᓐ ᓯᑐᕋᑭᓐ ᐅᖃᖅᖢᓂ ᐅᑉᓗᖅᑕᒃᑯᑦ ᖁᔭᓐᓇᒦᕆᐊᖃᓪᓚᕆᖕᒪᑕ ᓂᕿᑖᖅᑎᑦᑎᓚᐅᖅᑐᓄᑦ, ᕿᔪᖁᑎᐊᓗᖕᓂᒃ ᓇᒃᓯᐅᔾᔨᓚᐅᕐᒪᑕ ᓂᕿᓂᒃ ᖁᐊᖑᔪᓂᒃ, ᐃᐳᐃᑦᑐᓂᒡᓗ ᐊᒻᒪᓗ ᐸᑦᑕᐃᑦᑐᓂᒃ ᑭᑉᓗᖅᓯᒪᔪᓂᒃ.
ᖁᔭᓕᓯᒪᔪᒍᑦ ᑲᓇᑕᒥ ᓂᕿᑖᕐᕕᐅᕙᒃᑐᒥ ᓂᕿᓂᒃ ᕿᔪᖁᑎᓂᒃ ᑎᑭᑎᑦᑎᓚᐅᕐᒪᑕ ᖁᐊᖑᔪᓂᒃ ᐊᕿᒡᒋᕐᔪᐊᓂᒃ.
“Second Harvest-ᑯᑦ ᑐᓂᐅᖅᑲᖅᑕᐅᖃᑦᑕᕐᒪᑕ ᓂᕿᓂᒃ ᓂᐅᕕᖅᑕᐅᓯᒪᙱᑦᑐᓂᒃ ᐊᓯᖏᓐᓂᒃ ᑎᒥᐅᔪᓂᒃ ᖃᑉᓗᓈᑦ ᓄᓇᖓᓂ, ᐊᒻᒪᓗ ᓇᓂᓯᕙᒃᖢᑎᒃ ᐊᓯᖏᑦᑎᒍᑦ ᑐᓂᐅᖅᑲᐃᓇᔭᕐᓂᕐᒧᑦ ᐊᓯᖏᓐᓄᑦ ᓄᓇᓕᖕᓄᑦ ᓇᓂᑐᐃᓐᓇᖅ, ᐅᑭᐅᖅᑕᖅᑐᒥᑐᐃᓐᓇᐅᙱᑦᑐᖅ,” ᑕᐃᒪᓐᓇ ᐅᖃᖅᖢᓂ ᓯᑐᕋᑭᓐ.
“ᐅᖃᓗᒡᕕᐅᓚᐅᕋᒪ ᑖᑉᑯᓇᙵᑦ ᐊᒻᒪᓗ, ᑐᑭᓯᐅᒪᔭᒃᑯᑦ, ᑮᓇᐅᔭᖅᑖᓚᐅᖅᖢᑎᒃ ᒐᕙᒪᑐᖃᒃᑯᓐᓂᒃ ᐊᒥᓱᓂᒃ ᖁᐊᖑᔪᓂᒃ ᐊᐅᓪᓚᖅᑎᑦᑎᖃᑦᑕᖁᔭᐅᑉᓗᑎᒃ ᓂᕿᑖᕐᕕᖕᓄᑦ ᑲᓇᑕᒥ ᓄᕙᒡᔪᐊᕐᓂᒃᑯᑦ ᐊᒃᑐᖅᑕᐅᓯᒪᔪᓂᒃ ᐃᓚᐅᖃᑕᐅᑉᓗᒋᑦ ᐅᑭᐅᖅᑕᖅᑐᒥ ᓄᓇᓖᑦ.
“ᐅᕙᑉᑎᓐᓄᑦ ᑐᓴᖅᑎᑦᑎᒋᐊᓚᐅᕐᒪᑕ ᕿᔪᖁᑎᕐᔪᐊᓂᒃ ᓂᕿᖃᕐᓂᖏᓐᓄᑦ ᖁᐊᖑᔪᓂᒃ ᐊᒻᒪᓗ ᑮᓇᐅᔭᖅᑕᖃᕐᓂᕋᖅᖢᑎᒃ ᓇᒃᓯᐅᔾᔨᒍᑎᒃᓴᓂᒃ ᓂᕿᑖᕐᕕᑉᑎᓐᓄᑦ, ᐊᒻᒪᓗ ᑐᓴᕈᒪᓚᐅᖅᑐᑦ ᖃᓄᖅ ᐊᖏᑎᒋᔪᒥᒃ ᐅᒥᖕᒪᖕᓂᒃ ᐱᔪᒪᖕᒪᖔᑉᑕ, ᐃᓛᒃ ᖃᑉᓯᓂᒃ ᕿᔪᖁᑎᓂᒃ.
“ᐃᒪᓐᓇᐃᓕᓚᐅᖅᑐᒍᑦ, ᓱᓇᒥᒃ? ᐅᖃᓗᑲᑕᓕᖅᖢᑕᓗ.”
ᓯᑐᕋᑭᓐ ᐅᖃᖅᖢᓂ ᐃᓄᐃᑦ ᖃᐅᔨᒪᖕᒪᑕ, ᐅᑉᓗᖅᑕᒃᑯᑦ ᒥᑭᔪᒥᒃ ᐃᒡᓗᕐᔪᐊᕐᒦᒻᒪᑕ ᖃᒪᓂ’ᑐᐊᕐᒥ ᐱᖃᑕᐅᓯᕝᕕᒃᑕᖃᔮᙱᖦᖢᓂ.
ᐅᖃᖅᖢᓂ ᐅᑉᓗᖅᑕᒃᑯᑦ ᒫᓐᓇᓵᖑᓯᒪᔪᖅ ᑐᒃᓯᕋᐅᑎᒥᒃ ᓇᒃᓯᐅᔾᔨᓚᐅᕐᒪᑕ ᓂᐅᕕᕈᒪᓂᕐᒧᑦ ᖁᐊᖅᓯᐅᕝᕕᐊᓗᖕᒥᒃ ᐊᑉᓗᖅᑕᒃᑯᑦ ᓂᕿᑖᕐᕕᖓᓄᑦ ᐅᑕᖅᑭᔪᑦ ᓱᓕ ᐊᖏᖅᑕᐅᓂᐊᕐᒪᖔᕐᒥᒃ.
“ᑕᐃᒪᐃᒻᒪᑦ, ᓯᕗᓪᓕᖅᐹᒃᑯᑦ, ᐃᓱᒪᓚᐅᖅᑐᒍᑦ ᖃᐃᑕᐅᔪᑦ ᐊᒥᓲᓗᐊᕆᐊᖃᙱᓐᓂᖏᓐᓄᑦ ᐃᓂᒃᓴᖃᙱᓗᐊᕐᓂᖏᓐᓄᑦ ᓂᖀᑦ.
“ᐅᖃᖃᑎᖃᓕᖅᖢᑕᓗ ᓂᐅᕕᕐᕕᖕᓂᒃ, ᓂᐅᕕᖅᑎᓂᒃ ᑯᐊᐸᒃᑯᓐᓂᒡᓗ, ᐊᖏᓕᓚᐅᖅᑐᑦ ᓂᕿᓂᒃ ᑎᑭᕝᕕᐅᒍᑦᑕ ᓯᕐᓗᐊᖏᓐᓃᑦᑐᓐᓇᕐᓂᖏᓐᓄᑦ ᓂᒡᓕᓇᖅᑐᖃᐅᓯᕝᕕᖏᓐᓂᒃ.
“ᑕᐃᒪᐃᒻᒪᑦ ᑎᑭᕝᕕᐅᔪᓐᓇᖅᓯᓚᐅᖅᑐᒍᑦ ᒪᕐᕉᖕᓂᒃ ᕿᔪᖁᑎᕐᔪᐊᓂᒃ ᖁᐊᖑᔪᓂᒃ ᐅᒥᖕᒪᒃ ᓂᕿᖏᓐᓂᒃ ᓯᖃᓪᓕᑎᖅᓯᒪᔪᓂᒃ, ᐸᑦᑕᐃᑦᑐᓂᒡᓗ ᑭᑉᓗᖅᓯᒪᔪᓂᒃ, ᐃᖃᓗᖕᓂᒡᓗ ᐊᒻᒪᓗ ᐃᐳᐃᑦᑐᓃᑦᑐᓂᒃ ᐃᖃᓗᖕᓂᒃ, ᑕᐃᒪᐃᒻᒪᑦ ᓇᒃᓯᐅᔾᔭᐅᓕᓚᐅᖅᑐᒍᑦ.
“ᖁᔭᓐᓇᒦᕆᐊᖃᖅᑕᖅᐳᑦ ᐱᐅᕆ ᐸᐅᕗᔅ ᐊᒻᒪᓗ ᐱᓕᕆᖃᑎᒌᒃᑏᑦ ᓂᐅᕕᕐᕕᖕᒥ ᑐᖅᑐᖅᓯᓯᒪᖕᒪᑕ ᓂᕿᓂᒃ ᐊᒻᒪᓗ ᐊᔾᔭᖅᓯᓯᒪᓂᖏᓐᓄᑦ ᓂᕿᓂᒃ ᐊᑉᓗᖅᑕᒃᑯᓐᓄᑦ, ᐊᒻᒪᓗ ᐊᑦHᐊᒻ ᐊᑐᔅ ᑯᐊᐸᒃᑯᓐᓂᕐᒥᐅᑕᖅ ᑐᖅᑯᖅᓯᓯᒪᓚᐅᕐᒪᑦᑕᐅᖅ ᖁᐊᖑᔪᓂᒃ ᐊᕿᒡᒋᕐᔪᐊᓂᒃ ᐃᖃᓗᖕᓂᒡᓗ.”
ᓯᑐᕋᓴᓐ ᐅᖃᖅᖢᓂ ᓂᖀᑦ ᖃᒪᓂ’ᑐᐊᕐᒧᑦ ᑎᑭᓚᐅᕐᒪᑕ ᖁᕕᐊᓱᒡᕕᙳᖅᐸᓪᓕᐊᓕᖅᑎᓪᓗᒍ. ᐅᖃᖅᖢᓂ ᐊᒥᓱᒡᒎᖅ ᓂᕿᑖᖅᑎᑦᑎᔪᑦ ᑲᔪᓯᕙᓪᓕᐊᑎᓪᓗᒋᑦ ᖁᕕᐊᓱᖕᓇᒥ, ᐊᑉᓗᖅᑕᒃᑯᑦ ᐅᑕᖅᑭᔪᒪᓕᓚᐅᕐᒪᑕ ᔭᓄᐊᕆᒧᑦ ᑐᓂᐅᖅᑲᐃᓂᐊᕐᓂᕐᒧᑦ ᓂᕿᓂᒃ ᐃᑲᔫᑕᐅᓂᖅᓴᐅᔪᓐᓇᖁᑉᓗᒋᑦ.
“ᐱᓕᕆᓐᓇᖅᑐᒻᒪᕆᐊᓘᖕᒪᑦ ᐊᔾᔭᖅᑐᐃᓂᐊᖅᖢᓂ, ᑕᐃᒪᐃᒻᒪᑦ ᐃᓄᐃᑦ ᑲᑎᓗᒃᑖᓚᐅᖅᑐᑦ ᐴᖅᑐᐃᑉᓗᑎᒃ ᐊᒻᒪᓗ ᑐᐅᖅᑲᐃᑉᓗᑎᒃ ᓄᓇᓕᖕᒥ ᔭᓄᐊᕆ 26-ᒥ.
“ᑐᓂᓯᓚᐅᖅᑐᒍᑦ ᐃᓚᖏᓐᓂᒃ ᐅᒥᖕᒪᒃ ᓂᕿᖏᓐᓂᒃ ᓯᖓᐃᔪᑦ ᐃᑲᔪᖅᑕᐅᕝᕕᖓᓄᑦ ᐃᒐᒋᐅᖅᓴᐃᖃᑦᑕᕐᒪᑕ ᓯᖓᐃᔪᓂᒃ ᐊᒻᒪᓗ ᐱᑕᖃᒃᑲᓐᓂᖅᑐᒍᑦ ᐃᓱᒪᒃᓴᖅᓯᐅᖅᑐᒍᑦ ᖃᓄᖅ ᑐᓂᐅᖅᑲᐅᑎᒋᓇᔭᕐᒪᖔᑉᑎᒍᑦ.
“ᑐᓂᐅᖅᑲᐃᒐᔪᒃᑐᒍᑦ 130-ᓂᒃ ᐴᒃᓴᕐᓂᒃ ᓂᕿᑕᕈᑎᓂᒃ ᓂᕿᑖᕐᕕᒃᑯᑦ ᐊᒻᒪᓗ ᐊᑎᕐᓂᒃ ᐱᓯᒪᔪᒍᑦ ᓂᕿᑖᕐᕕᖕᒥ ᓂᕿᑖᕆᐊᖅᑐᕋᔪᒃᑐᓂᒃ.
“ᖃᐅᔨᒪᔪᖅᑕᖃᙱᒐᔪᖕᒪᑦ ᐅᕝᕙᓘᓐᓃᑦ ᐅᐸᒍᑎᔪᓐᓇᐃᓪᓕᔪᖃᕋᔪᒃᖢᓂ ᓱᓇᒥᑭᐊᖅ ᐱᔾᔪᑎᖃᖅᖢᑎᒃ ᑭᓯᐊᓂ ᓄᓇᓕᖕᒥ ᑕᐃᒪᐃᑦᑐᓂᒃ ᐃᑲᔫᑎᖃᕆᐊᖃᓪᓚᕆᒃᑐᖅ, ᐊᒻᒪᓗ ᑲᔪᓯᑎᑦᑏᓐᓇᕋᓱᒋᐊᖃᖅᑐᒍᑦ ᐊᓯᔾᔩᔪᒪᓂᕐᒧᑦ.”