Skip to content

ᐊᓯᐅᓯᒪᓚᐅᖅᑐᖅ ᕿᒻᒥᖅ ᑕᑯᕐ ᒥᒃᐳᑐᓪ ᓄᓇᒦᓚᐅᖅᑐᖅ ᐅᓐᓄᐊᒥ

ᐊᑕᐅᓯᕐᒥ ᐅᓐᓅᔪᒥ ᖁᕕᐊᓇᙱᑦᑐᐊᓘᓚᐅᖅᑐᒥ ᐱᓇᓱᐊᕈᓯᐅᓚᐅᖅᑐᖅ, ᓴᕐᓕ ᕕᓕᓐ ᐊᒻᒪᓗ ᐊᐃᑉᐸᖓ ᐃᓱᒪᓚᐅᖅᑑᒃ ᑕᑯᒃᑲᓐᓂᔾᔮᙱᓐᓇᓱᒋᑉᓗᑎᒃ ᑕᓪᓕᒪᓂᒃ ᐅᑭᐅᓂᒃ ᕿᒻᒥᕆᓕᖅᑕᒥᓂᒃ ᑕᑯᕐ ᒥᒃᐳᑐᓪᒥᒃ.

ᑭᓯᐊᓂ ᐃᓄᐃᑦ ᖃᒪᓂ’ᑐᐊᕐᒥ ᐊᓯᐊᒎᕐᕕᖃᕋᓱᒋᓚᐅᖅᑐᑦ.

ᑕᑯᕐ ᑲᑉᐱᐊᓱᖕᓂᖓ ᐱᒋᐊᓚᐅᖅᑐᖅ ᖃᓄᐃᙱᑦᑎᐊᓚᐅᖅᑳᖅᖢᓂ, ᐸᖓᓕᒃᑎᑕᐅᓂᐊᖅᖢᓂ ᐅᑉᓗᒃᑯᑦ ᑐᒡᓕᐊᓂ, ᓄᕕᐱᕆ 8-ᒥ.

ᑕᑯᕐ ᒥᒃᐳᑐᓪ ᖁᕕᐊᓱᒃᑐᖅ ᐅᖁᖅᓴᓕᕋᒥ ᐊᒻᒪᓗ ᐃᓚᒥᓃᓕᕐᒥᒐᒥ ᐅᓐᓅᔪᒥ ᐃᓄᑑᓚᐅᖅᑳᖅᖢᓂ ᓂᒡᓕᓇᖅᑐᐊᓗᖕᒥ ᓄᓇᒥ ᖃᒪᓂ’ᑐᐊᑉ ᖃᓂᒋᔭᖓᓂᒃ ᐱᓇᓱᐊᕈᓯᐅᓚᐅᖅᑐᒥ.

ᐊᓕᐊᓇᐃᙱᑦᑐᒧᑦ ᑎᑭᑳᓪᓚᓚᐅᖅᑐᑦ, ᑕᑯᕐ ᐊᓕᐊᓇᐃᙱᑦᑐᒧᑦ ᑎᑭᑳᓪᓚᖕᒪᑦ.

ᕕᓕᓐ ᐅᖃᖅᖢᓂ ᒪᕐᕉᒃ ᕿᒻᒦᒃ ᕿᒻᒥᕆᔭᐅᔪᑦ ᐊᐃᑉᐸᖓᑕ ᐸᓂᖓᓄᑦ, ᐸᖓᓕᖃᑕᐅᔫᒃ ᑕᐃᑲᓂ ᐅᑉᓗᖓᓂᒃ, ᓄᓇᓕᖕᒥ ᕿᒻᒥᕆᔭᐅᖕᒪᑎᒡᓕ ᖃᓄᐃᙱᓐᓇᔭᓚᐅᖅᑐᑦ ᐊᓃᕋᓗᐊᕈᑎᒃ.

ᐱᖃᑎᖓ ᐊᓃᕈᒪᒃᑲᐅᓂᖅᓴᐅᑉᓗᓂ.

“ᕿᒪᓯᑉᓗᑎᒃ ᑐᒃᑐᓂᒃ ᑕᑯᒐᒥᒃ ᐊᒻᒪᓗ ᑕᑯᕐ ᒪᓕᑲᑕᓕᖅᖢᓂ,” ᑕᐃᒪᓐᓇ ᐅᖃᖅᖢᓂ ᕕᓕᓐ.

“ᐊᑐᖅᑐᐊᑐᐃᓐᓇᖅᑑᒐᓗᐊᑦ ᑕᑯᕐᒥᒃ ᐸᖓᓕᖃᑕᐅᖁᑉᓗᒍ ᐊᒻᒪᓗ ᑎᑎᕋᕐᕕᐅᓕᖅᖢᖓ ᕿᓂᖃᑕᐅᖁᔭᐅᑉᓗᖓ. ᕿᒪᓯᓐᓂᕐᒪᑦ.

“ᐱᖃᑎᖓ ᕿᒻᒥᖅ ᓇᓂᔭᐅᑉᓗᓂ ᐃᒻᒪᖄ 5:00-ᒧᐊᖅᑎᓪᓗᒍ ᐅᓐᓄᒃᓴᒃᑯᑦ, ᑭᓯᐊᓂ ᑖᖅᓯᐊᓂᖕᒪᑦ ᑕᑯᔭᐅᔪᓐᓇᕐᓇᓂᓗ ᑕᑯᕐ. ᑎᑎᕋᑲᑕᓕᓚᐅᖅᑐᒍᑦ ᑐᓴᒐᒃᓴᓂᒃ ᓴᖅᑭᑎᑦᑎᑉᓗᑕ ᐊᓯᐅᓯᒪᓂᕋᖅᖢᒍ. ᑎᑎᕋᖅᖢᖓ ᖃᕆᑕᐅᔭᒃᑯᑦ.

Facebook ᖁᕕᐊᒋᑦᑎᐊᕋᑉᑯ. ᑕᑯᒋᐊᖃᑦᑕᕋᒪ ᓄᓇᓕᐅᑉ ᒥᒃᓵᓄᑦ ᑐᕌᖓᔪᒥᒃ ᓄᓇᓕᖕᒥᙶᖅᑐᓂᒃ ᑐᓴᒐᒃᓴᓂᒃ ᑕᑯᔪᒪᖃᑦᑕᒧᑦ ᐸᒡᕕᓵᕆᔪᒪᒃᑲᐅᑉᓗᖓᓗ ᓄᑕᖅᑲᒃᑲᓂᒃ. ᑭᓯᐊᓂ Facebook-ᑯᑦ ᑐᓴᒐᒃᓴᒥᒃ ᓴᖅᑭᑎᑦᑎᓚᐅᖅᑐᒍᑦ ᐊᒻᒪᓗ, ᒫᓐᓇᑲᐅᑎᒋ, ᐊᒥᓱᑦ ᐃᓄᐃᑦ ᕿᓂᖃᑕᐅᓕᓚᐅᖅᑐᑦ ᐃᓄᐃᓪᓗ ᐅᖃᖃᑦᑕᖅᖢᑎᒃ ᑕᑯᓚᐅᕐᓂᕋᖅᖢᑎᒃ ᑕᑯᕐᒥᒃ.”

ᕕᓕᓐ ᐅᖃᖅᖢᓂ ᓄᓇᖅᑲᑎᖓᑕ ᐃᓚᖓ ᕿᓂᖃᑕᐅᓚᐅᕐᒪᑦ ᑕᑯᕐᒥᒃ ᖃᒧᑎᓕᔭᖅᖢᓂ 10:30-ᒥ ᐅᓐᓄᒃᑯᑦ. ᐅᖃᖅᖢᓂᓗ ᐊᒥᓱᑦ ᐃᓄᐃᑦ ᖃᓄᐃᑦᑐᑐᐃᓐᓇᐃᑦ ᕿᓂᖃᑕᐅᓚᐅᕐᒪᑕ ᖃᒪᓂ’ᑐᐊᕐᒥ − ᐃᓚᓐᓇᕆᔭᐅᔪᑦ ᓯᓚᓕᕆᔭᐅᔪᓪᓗ − ᐆᒻᒪᑎᒃᑯᑦ ᐊᒃᑐᖅᑕᐅᓐᓇᓚᐅᖅᑐᖅ.

“ᑕᑯᕐ ᓯᓚᒦᓚᐅᖅᑐᖅ ᐃᒻᒪᖄ 22-ᓂᒃ ᐃᑲᕐᕋᓂᒃ ᑐᒡᓕᐊᓂ ᐅᑉᓗᒃᑯᑦ ᐊᒻᒪᓗ ᓇᓂᔭᐅᑉᓗᓂ ᖃᐅᖕᒪᑦ 1:00 ᖃᓂᒋᔭᖓᓂᒃ. ᓯᓚᑦᑎᐊᕚᓘᓚᐅᖅᑐᖅ ᑕᐃᑉᓱᒪᓂ ᐊᓂᖕᒪᑕ, ᐃᒻᒪᖄ -13-ᖑᑉᓗᓂ, ᑭᓯᐊᓂ ᐅᓐᓄᐊᖓᓂ ᓂᒡᓕᓇᖅᓯᓚᐅᖅᑐᖅ, ᐅᓐᓄᐊᖓᓂ 025-ᒥᓕᓚᐅᖅᖢᓂ, ᐊᓄᕌᕐᓂᖓ ᐃᓚᐅᑉᓗᒍ -33-ᒥᖦᖢᓂ.

ᕿᓂᖅᖢᒍ ᓯᓚᒥ, ᐅᖓᓯᓗᐊᙱᑦᑑᒐᓗᐊᕐᓂᖅ. ᐃᓄᖕᓂᒃ ᐹᖅᓯᒐᒪ, ᑎᑎᕋᕐᕕᐅᑉᓗᖓ ᐊᒻᒪᓗ ᐊᐃᔭᐅᑉᓗᖓ, ᑕᐃᑲᓃᑦᑐᕕᓂᖅ.

“ᐊᐱᕆᑉᓗᒋᑦ ᑐᖁᖓᙱᑦᑲᓗᐊᕐᒪᖔᑦ ᐊᖏᖅᑕᐅᑉᓗᖓ, ᑭᓯᐊᓂ ᐆᓕᑦᑐᕉᖅ. ᐄᓛᑦᑎᐊᖅ ᐆᓕᓚᐅᖅᑐᖅ. ᓴᔪᒃᑐᖅ, ᓲᕐᓗ ᑲᑉᐳᔾᔭᖅᑎᑐᑦ ᓴᔪᒃᑐᖅ.

“ᐅᕙᒻᓄᙵᐅᑉᓗᓂ, ᐅᖅᑰᓴᓕᖅᖢᒍ, ᖃᒧᑎᒧᐊᖅᖢᒍ ᐊᖏᕐᕋᐅᑎᑉᓗᒍ.”

ᕕᓕᓐ ᐅᖃᖅᖢᓂ ᑕᐃᑉᑯᐊ ᓇᓂᓯᓚᐅᖅᑐᑦ ᑕᑯᕐᒥᒃ ᐊᖑᓇᓱᒋᐊᖅᓯᒪᔪᕕᓃᑦ, ᓄᕐᕋᑯᓘᓇᓱᒋᔭᐅᔪᕕᓂᖅ ᕿᒪᒃᑕᐅᓯᒪᓇᓱᒋᑉᓗᒍ.

ᐅᖃᖅᖢᓂ ᖁᐊᖅᓯᒪᔪᑦ ᕿᒻᒦᑦ ᖃᓄᖅ ᑕᐅᑦᑐᖃᖃᑦᑕᕐᒪᖔᑕ ᓇᓗᔫᒐᓗᐊᕉᖅ ᑭᓯᐊᓂ ᑕᑯᕐ ᖁᐊᖅᓯᒪᔫᔭᓚᐅᙱᑦᑐᖅ.

“ᖃᐅᔨᒪᔪᖓ ᐅᒃᐱᕐᓇᓗᐊᙱᒻᒪᑦ, ᑭᓯᐊᓂ ᐃᓱᒪᔪᖓ ᑐᒃᑐᒧᑦ ᐅᖁᖅᓴᖅᑕᐅᓚᐅᕐᓂᖓᓄᑦ. ᑕᐃᒪᓐᓇ ᑭᓯᐊᓂ ᖁᐊᕋᔭᓚᐅᙱᒻᒪᑦ.

“ᐅᓐᓅᔪᒥ ᓄᓇᒦᖦᖢᓂ, ᐊᓕᐊᓇᐃᙱᑦᑐᐊᓘᓚᐅᖅᑐᖅ ᐃᒡᓗᑉᑎᓐᓂᒃ. ᓈᒻᒪᙱᑦᑐᐊᓘᓚᐅᖅᑐᖅ.

“ᐃᓐᓇᓚᐅᖅᑐᒍᑦ ᑕᐃᑲᓂ ᐅᓐᓅᔪᒥ ᑐᖁᖓᓇᓱᒋᓕᖅᖢᒍ. ᑕᑯᕐ ᑕᓪᓕᒪᐃᓐᓇᕐᓂᒃ ᐅᑭᐅᖃᕐᒪᑦ ᐊᒻᒪᓗ ᑕᒪᓐᓇ ᑕᒡᕙ ᓂᑲᓪᓗᖓᓐᓇᕐᓂᖅᐹᖑᓚᐅᖅᑐᖅ ᑐᖁᖓᓇᓱᒋᓕᖅᖢᒍ. ᐸᕐᓇᒃᓯᒪᓐᓇᕐᓂᖅᓴᐅᖅᑰᕐᒪᑦ ᐃᓐᓇᐅᓂᖅᓴᐅᔭᕌᖓᑕ ᐊᒻᒪᓗ ᑐᖁᔪᒫᓕᖅᑐᒃᓴᐅᑎᓪᓗᒋᑦ.

“ᑭᓯᐊᓂ ᐊᒥᓱᑦ ᐃᑲᔪᓚᐅᖅᑎᓪᓗᒋᑦ ᓇᓂᓯᓇᓱᒃᑎᓪᓗᑕ ᑕᑯᕐᒥᒃ ᖁᔭᓕᓐᓇᖅᑐᒻᒪᕆᐊᓗᒃ ᐃᓅᖃᑎᒋᔭᕐᒥᒃ ᐱᐅᔪᓪᓚᕆᐅᓚᐅᕐᒪᑦ ᑕᑯᑉᓗᓂ ᓇᒡᓕᒍᓱᒃᑐᓂᒃ ᐃᓄᖕᓂᒃ.”