ᐅᐃᒪᔮᕈᓘᔭᓚᐅᖅᑐᑦ ᑲᖏᖅᖠᓂᕐᒥᐅᑦ ᑐᓴᓵᕋᒥᒃ ᓯᕗᓪᓕᖅᐹᒥ ᓄᕙᒡᔪᐊᕐᓂᖅᑖᖅᑐᖃᖅᓯᒪᓂᖓᓄᑦ ᓄᓇᒥᓂᒃ ᑕᐃᒪᐃᒻᒪᑦ ᐊᔪᕿᖅᑐᐃᔨ ᔭᐅᕐᑦ ᐊᔅᐳᐊᓐ ᐊᒻᒪᓗ ᐊᔪᕿᖅᑐᐃᔨᓅᖅᑐᖅ ᕋᓐᑎ ᒥᓗ ᑲᖏᖅᖠᓂᐅᑉ ᐊᑉᖁᑎᖏᓐᓂᒃ ᑐᓂᐅᖅᑲᐃᓕᓚᐅᖅᑐᑦ ᒪᑐᐊᓂᒃ ᐊᔪᕿᖅᑐᐃᔨᓂᙶᖅᑐᓂᒃ ᑲᖏᖅᖠᓂᕐᒥ ᐱᓇᓱᐊᕈᓯᐅᓚᐅᖅᑐᒥ.
ᒥᓗᕐ ᐅᖃᖅᖢᓂ ᑲᖏᖅᖠᓂᕐᒥ ᑐᒃᓯᐊᕐᕕᒃ ᐊᒥᓱᓂᒃ ᒪᑐᐊᖃᓚᐅᕐᒪᑦ ᑲᖏᖅᖠᓂᕐᒧᑦ ᐊᐅᓪᓚᐅᔾᔭᐅᔪᓂᒃ ᐅᑭᐅᖅ ᐱᒋᐊᓕᓵᖅᑎᓪᓗᒍ ᐅᑭᐅᖅᑕᖅᑐᒥ ᑐᒃᓴᐊᕐᕕᖕᓂᒃ ᑲᒪᔨᒃᑯᓐᓄᑦ ᐱᓕᕆᖃᑎᖃᖅᖢᑎᒃ Samaritan’s Purse-ᑯᓐᓂᒃ, ᓄᕙᒡᔪᐊᕐᓂᖅ ᓴᖅᑭᑉᐸᓪᓕᐊᓕᓵᖅᑎᓪᓗᒍ ᑲᓇᑕᒥ.
ᐅᖃᖅᖢᓂ ᐃᒻᒪᖄ 300-ᓂᒃ 400-ᓄᑦ ᒪᑐᐊᓂᒃ ᓇᒃᓯᐅᔾᔭᐅᓚᐅᕐᓂᕋᖅᖢᑎᒃ.
“ᐊᑐᒃᑲᓐᓂᕈᓐᓇᖅᑐᑦ ᒪᑐᐊᑦ, ᑭᓯᐊᓂ ᑐᒃᓯᕋᐅᑕᐅᓗᐊᓚᐅᙱᒻᒪᑕ ᐅᐱᕐᖔᖅ ᒫᓐᓇᓕ ᐊᑐᕆᐊᖃᓪᓚᕆᓕᖅᖢᑎᒃ,” ᑕᐃᒪᓐᓇ ᐅᖃᖅᖢᓂ ᒥᓗᕐ.
“ᓇᒃᓯᐅᔾᔭᐅᓚᐅᕐᒥᔪᒍᑦ ᐊᒥᓱᓂᒃ ᑐᒃᓯᐅᑎᓂᒃ ᐊᒻᒪᓗ ᐃᓄᒃᑎᑑᖅᑐᓂᒃ ᑐᒃᓯᐅᑎᓂᒃ ᐃᓱᒪᑉᓗᑎᒃ ᐃᓄᐃᑦ ᑕᒪᒃᑯᓂᙵ ᐱᔪᒪᓇᔭᕐᓂᖏᓐᓄᑦ, ᐱᓗᐊᖅᑐᒥ ᑕᐃᒪᐃᑦᑐᒃᑰᖅᑎᓪᓗᑕ ᐃᓄᐃᓪᓗ ᐊᓂᓗᐊᕈᓐᓇᐃᓪᓕᑎᓪᓗᒋᑦ.”
“ᑐᒃᓯᐅᑎᓂᒃ ᐱᑕᖃᖅᑐᒍᑦ ᓱᓕ ᐊᒻᒪᓗ ᐊᔾᔭᖅᑐᐃᔪᓐᓇᖅᑐᒃᓴᐅᔪᒍᑦ ᐅᓗᕆᐊᓇᙱᑦᑐᒃᑯᑦ ᑭᓇᑐᐃᓐᓇᕐᒧᑦ ᐱᑖᕈᒪᔪᓄᑦ.”
ᒥᓗᕐ ᐅᖃᖅᖢᓂ ᒫᓐᓇᑲᐅᑎᒋᖅᑲᔭᖅ ᐃᓄᐃᑦ ᐊᓂᑦᑕᐃᓕᑎᑕᐅᓕᖅᑎᓪᓗᒋᑦ ᑲᖏᖅᖠᓂᕐᒥ ᓯᕗᓪᓕᖅᐹᒥ ᓄᕙᒡᔪᐊᕐᓂᖅᑕᖃᕐᓂᕋᖅᑕᐅᑎᓪᓗᒍ, ᑕᑯᓚᐅᕋᒥᒎᖅ Facebook-ᑯᑦ ᑎᑎᕋᖅᓯᒪᔪᓂᒃ ᐃᓄᖕᓂᒃ ᖃᐅᔨᔪᒪᔪᓂᒃ ᓇᑭᑦ ᒪᑐᐊᖅᑖᕈᓐᓇᕋᔭᖅᑐᓂᒃ.
ᑕᐃᒪᐃᒻᒪᑦ ᐊᔅᒧᐊᓐᓗ ᐅᖃᖃᑎᒌᓕᓚᐅᖅᑑᒃ.
“ᐃᓛᒃ, ᐱᓯᒪᒐᑉᑕ ᒪᑐᐊᓂᒃ ᑐᓂᐅᖅᑲᐅᔪᒪᓕᓚᐅᖅᑐᒍᑦ ᑭᓯᐊᓂ ᑐᒃᓯᐊᕐᕕᖕᒥ ᐊᑐᕈᒪᙱᖦᖢᑕ ᐃᓄᐃᑦ ᐃᑎᖅᑕᕋᔭᕐᒪᑕ ᑲᑎᖃᑦᑕᕐᓗᑎᒡᓗ ᐃᓗᐊᓂ.
“ᐅᖃᓕᓚᐅᖅᑐᖓ ᑐᓂᐅᖅᑲᐅᔪᓐᓇᕐᓂᕋᖅᖢᖓ ᒪᑐᐊᓂᒃ ᓄᓇᒃᑰᕈᑎᒻᓂᒃ. ᐊᖏᕐᒪᑦ ᐊᔪᕿᖅᑐᐃᔨ, ᐸᕐᓇᐃᓕᓚᐅᖅᑐᒍᑦ ᑕᓪᓕᒪᓂᒃ ᓄᖅᑲᖅᑕᕐᕕᖃᕐᓂᐊᕐᓂᕐᒧᑦ ᑲᖏᖅᖠᓂᐅᑉ ᐃᓗᐊᓂ ᐅᕙᖓ ᐊᑕᐅᓯᕐᒥ ᐃᓱᐊᓃᓪᓗᖓ ᐊᒻᒪᓗ ᐊᔪᕿᖅᑐᐃᔨ ᐱᖃᑖᓂ ᐃᓱᐊᓃᓪᓗᓂ.
“ᑕᐃᒪᐃᒻᒪᑦ ᑎᑎᕋᓕᓚᐅᖅᑐᖓ Facebook-ᑯᑦ ᐊᒻᒪᓗ ᐊᔪᕿᖅᑐᐃᔨ ᓈᓚᐅᑎᐊᓛᒃᑯᑦ ᑐᓴᖅᑎᑦᑎᑉᓗᓂ. ᓈᓚᒡᕕᖕᒧᑦ ᐅᖃᓗᖃᑦᑕᓕᓚᐅᖅᑐᒍᑦ ᓅᑐᐊᕌᖓᑉᑕ ᑐᓴᖅᑎᖦᖢᒋᑦ ᓇᓃᓕᕐᒪᖔᑉᑕ ᑕᒪᓐᓇ ᐊᐅᓪᓛᑦᑎᐊᖅᑐᐊᓘᔮᓚᐅᖅᑐᖅ. ᐃᓄᐃᑦ ᖁᕕᐊᓱᑦᑎᐊᖅᑑᔭᓚᐅᖅᑐᑦ.
“ᐱᓕᕆᒋᐊᓚᐅᖅᑐᒍᑦ 2:00-ᒥ ᐅᕝᕙᓘᓐᓂᑦ 2:30-ᒥ ᐅᑉᓗᒃᑯᑦ ᓄᕕᐱᕆ 11-ᒥ ᐊᒻᒪᓗ ᓄᖑᕈᑎᑉᓗᑕ ᐃᒻᒪᖄ 5:00-ᒥ. ᖃᑉᓰᓐᓇᕐᓂᒃ ᐸᐸᑦᑎᓚᐅᖅᑐᒍᑦ ᐊᑐᖅᑕᐅᔪᓐᓇᖁᑉᓗᒋᑦ ᑐᒃᓯᐊᕆᐊᖅᐸᒃᑐᓄᑦ ᐊᑐᕈᒫᖁᑉᓗᒋᑦ ᑐᒃᓯᐊᕐᕕᖕᒥ ᑐᒃᓯᐊᕈᓐᓇᖅᓯᒍᑉᑕ.
“ᖁᔭᓕᑐᐃᓐᓇᖅᑐᖓ ᑐᓂᐅᖅᑲᐅᔪᓐᓇᖅᑲᐅᒐᑉᑕ ᐃᓄᖕᓄᑦ ᐊᒻᒪᓗ ᖁᕕᐊᓱᑦᑎᐊᖅᖢᑎᒃ ᑐᓂᔭᐅᓂᕐᒥᓂᒃ.”