Skip to content

ᐱᓇᓱᐊᕈᓯᑕᒫᒃᑯᑦ ᐱᒡᒍᓴᐅᔾᔪᐊᖅᑐᑦ ᐱᔫᒥᒍᓱᒃᑎᑦᑎᔪᖅ ᐃᓕᓐᓂᐊᖅᑐᓂᒃ ᐱᓕᕆᓇᓱᖁᑉᓗᒋᑦ ᐃᓚᐅᖃᑕᐅᑦᑎᐊᖁᑉᓗᒋᓪᓗ

Skills Canada Nunavut-ᑯᑦ ᐊᖏᕐᕋᕆᔭᐅᔪᓂᒃ ᐱᒡᒍᓴᐅᔾᔪᐊᖅᑎᑦᑎᑎᓪᓗᒋᑦ ᒪᒪᖅᑐᓂᒃ ᓴᓇᑎᑦᑎᔪᑦ ᑕᒡᕙᓂ ᐱᓇᓱᐊᕈᓯᕐᒥ burger-ᓕᐅᖅᑎᑦᑎᔪᑦ.

ᐱᐅᙳᐊᖤᒃ (ᐱᐅ ᐱᐅ) ᑯᓱᒐᖅ ᑲᖏᖅᖠᓂᕐᒥᐅᑕᖅ ᓯᕗᓪᓕᖅᐸᐅᑎᓚᐅᖅᑐᖅ ᖁᑦᑎᖕᓂᓕᖕᓂᒃ 1-ᒥ 5-ᒧᑦ ᐃᓕᓐᓂᐊᖅᑐᓂᒃ Skills Canada Nunavut-ᑯᓐᓂᒃ ᓂᕿᓕᐅᖅᓯᒪᔪᓂᒃ ᒪᒪᖅᑐᓂᒃ ᐊᖏᕐᕋᖅᓯᒪᑉᓗᓂ ᐱᒡᒍᓴᐅᔾᔪᐊᖅᑐᓂᒃ ᑕᖅᑭᕐᒥ ᑕᒡᕙᓂ ᐱᒋᐊᓕᓵᖅᑎᓪᓗᒍ.
ᐊᔾᔨ Skills Nunavut−ᑯᓐᓂᙶᖅᑐᖅ

Skills Canada Nunavut ᓴᖅᑭᑎᑦᑎᓚᐅᖅᑐᑦ ᐊᖏᕐᕋᒥ ᐱᒡᒍᓴᐅᔾᔪᐊᖅᑎᑦᑎᔪᒪᓂᕐᒥᒃ ᑲᔪᓯᑎᑦᑎᔪᒪᑉᓗᑎᒃ ᐃᑲᔪᕐᓂᕐᒧᑦ ᐃᓕᓐᓂᐊᖅᑐᓂᒃ ᓱᓇᙳᖅᓴᓂᕐᒧᑦ ᐃᓕᑦᑎᔪᓐᓇᖁᑉᓗᒋᑦ, ᖃᓄᕐᓗ ᐱᔨᑦᓯᕋᕈᓐᓇᖅᓯᓂᕐᒧᑦ ᐊᒻᒪᓗ ᐱᖁᑎᕐᔪᐊᓕᕆᓂᕐᒧᑦ ᑕᒪᕐᒥᒃ ᐃᓕᓐᓂᐊᕐᕖᑦ ᒪᑐᔭᐅᓯᒪᓕᖅᑎᓪᓗᒋᑦ 2019-2020-ᒥ ᐃᓕᓐᓂᐊᕐᓇᐅᔪᒥ ᐱᔾᔪᑎᒋᑉᓗᒍ ᓄᕙᒡᔪᐊᕐᓂᖅ - 19.

ᑕᒪᓐᓇ ᐱᒡᒍᓴᐅᔾᔪᐊᕈᑎ ᓴᖅᑭᑎᑦᑎᓯᒪᔪᖅ ᓄᑖᒥᒃ ᐊᖏᕐᕋᖅᓯᒪᓗᓂ ᐱᒡᒍᓴᐅᔾᔪᐊᕈᑎᒥᒃ ᓴᖅᑭᑎᑕᐅᕙᒃᑐᖅ ᓴᓇᑦᑕᐃᓕᐅᕌᓂᒃᑳᖓᑦ, ᐃᓚᐅᖃᑕᐅᔪᑦ ᐱᕕᒃᓴᖃᖅᑎᑕᐅᑉᓗᑎᒃ ᑕᓪᓕᒻᒥᕐᒧᑦ ᓇᒃᓯᐅᔾᔨᔪᓐᓇᕐᓂᕐᒧᑦ ᐊᔾᔨᓂᒃ ᐃᖕᒥᓂᒃ ᐱᒡᒍᓴᐅᔾᔪᐊᕐᓗᑎᒃ, ᐊᒻᒪᓗ ᑐᓂᓯᔭᕆᐊᖃᖅᖢᑎᒃ ᓴᓈᓂᒃᓯᒪᔭᒥᓂᒃ ᐊᔾᓕᐅᖅᓯᒪᔪᒥᒃ.

Burger−ᒥᒃ ᓴᓇᒡᒍᓴᐅᔾᔪᐊᖅᑐᑦ ᐱᒋᐊᖅᑎᑕᐅᓚᐅᖅᑐᑦ ᓴᓇᑦᑕᐃᓕᐅᕌᓂᓵᖅᑐᒥ, ᐊᐃᕆᓕ 27-ᒥ, ᐊᒻᒪᓗ ᑕᒡᕘᓇ ᑕᒪᕐᒥᒃ ᐃᓚᒌᒃ ᐃᓚᐅᖃᑕᐅᖁᔭᐅᑉᓗᑎᒃ, ᓴᓇᓇᓱᒡᓗᑎᒃ ᐊᔾᔨᐅᙱᑦᑐᒥᒃ burger-ᒥᒃ ᓂᕿᖏᑦ ᓴᓇᓯᒪᓗᒋᑦ ᐊᒻᒪᓗ ᐊᕿᕐᕈᔪᐊᖓ ᓂᕆᔪᒥᓇᖅᓯᑦᑎᐊᕐᓗᒍ.

ᐃᓄᒃᓯᐅᑎᑦ ᓂᕿᑦ ᐊᒻᒪᓗ ᐊᖏᕐᕋᒥ ᐊᕿᕐᕈᔪᐊᓕᐊᖑᕙᒃᑐᑦ ᐊᔭᐅᖅᑐᖅᑕᐅᑦᑎᐊᖅᑐᑦ ᐃᓚᒌᑦ ᓴᓇᔪᓐᓇᖁᑉᓗᒋᑦ ᖁᕕᐊᓱᖃᑎᒌᒡᓗᑎᒃ ᓴᖅᑭᑎᑦᑎᔪᓐᓇᕐᓂᕐᒧᑦ ᐃᒐᓯᒪᔪᒥᒃ ᒪᒪᕆᔭᐅᓪᓚᕆᒐᔭᖅᑐᒥᒃ.

ᐃᓱᓕᕝᕕᖓ ᐃᓚᒌᑦ Burger-ᓕᐅᕈᓐᓇᖁᑉᓗᒋᑦ ᒪᐃ 1, Skills Canada Nunavut-ᑯᑦ ᑐᓂᓯᓇᔭᖅᖢᑎᒃ ᓵᓚᒃᓴᖅᑐᒧᑦ $50-ᒥᒃ ᓂᐅᕕᕈᑎᒥᒃ ᓵᓚᒃᓴᖅᑐᒧᑦ ᐊᑐᓂ ᐱᖓᓱᓄᑦ ᐊᕕᒃᑐᖅᓯᒪᔪᒃᑯᑦ ᐱᒡᒍᓴᐅᔾᔪᐊᖅᑐᓄᑦ; ᐃᓕᓐᓂᐊᕐᓂᓖᑦ 1-ᒥ 5-ᒧᑦ, ᐃᓕᓐᓂᐊᕐᓂᓖᑦ 6-ᒥ 8-ᒧᑦ ᐊᒻᒪᓗ ᐃᓕᓐᓂᐊᕐᓂᓖᑦ 9-ᒥ 12-ᒧᑦ.

ᐊᕐᕕᐊᓂ ᒍᐊᑦ ᐱᓕᐊᑦ ᐊᑭᓕᖅᑐᖅᑕᐅᓇᓂ ᐃᑲᔪᖃᑦᑕᖅᓯᒪᓕᖅᑐᖅ ᖃᑉᓯᑲᓪᓚᖕᓂᒃ ᐅᑭᐅᓂᒃ ᐃᑲᔪᖅᖢᓂ ᓄᓇᖅᑲᑎᒥᓂᒃ ᐱᒡᒍᓴᐅᔾᔪᐊᕈᒪᔪᓂᒃ ᑕᓚᕕᓴᓕᕆᓂᒃᑯᑦ ᐅᐊᔪᓕᐅᕈᑎᒃᑯᓪᓗ ᐊᕐᕌᒍᑕᒫᒃᑯᑦ Skills Canada Nunavut ᐱᒡᒍᓴᐅᔾᔪᐊᖅᑎᑦᑎᖃᑦᑕᓚᐅᖅᑎᓪᓗᒋᑦ ᐃᖃᓗᖕᓂ.

ᐱᓕᐊᑦ ᐅᖃᖅᖢᓂ ᑕᐃᑉᑯᐊᒎᖅ ᑲᒪᔨᐅᔪᑦ ᐃᖃᓗᖕᓂ ᐱᒡᒍᓴᐅᔾᔪᐊᖃᑦᑕᖅᑐᓂᒃ ᐱᓕᕆᔪᒪᔪᒻᒪᕆᐊᓘᖃᑦᑕᖅᓯᒪᔪᑦ ᓄᑕᖅᑲᑦ ᐃᓚᐅᖃᑕᐅᖃᑦᑕᖁᑉᓗᒋᑦ ᓱᓇᙳᖅᓴᔪᒪᓂᕐᒧᑦ, ᐊᒻᒪᓗ ᐊᖏᕐᕋᒥ ᐊᔪᙱᓐᓂᖏᓐᓄᑦ ᐱᒡᒍᓴᐅᔾᔪᐊᖅᑐᑦ ᐊᔾᔨᐅᙱᑦᑑᔪᖅ ᑕᒪᓐᓇ ᑲᔪᓯᔪᓐᓇᖁᑉᓗᒍ ᓄᓇᕗᒥ ᐃᓕᓐᓂᐊᕐᕖᑦ ᒪᑐᓯᒪᑎᓪᓗᒋᑦ.

ᐅᖃᖅᖢᓂ ᑕᒪᕐᒥᒃ ᐃᓚᐅᖃᑕᐅᓲᑦ ᖁᕕᐊᓱᓚᐅᙱᒻᒪᑕ ᑕᒡᕙᓂ ᐅᑭᐅᒥ Skills Nunavut ᐱᒡᒍᓴᐅᔾᔪᐊᕈᑎᖓ ᓄᖅᑲᖅᑎᑕᐅᔭᕆᐊᖃᓚᐅᖅᑎᓪᓗᒍ, ᑕᐃᒪᐃᒻᒪᑦ, ᑕᑯᒐᒥ ᐊᖏᕐᕋᒥ ᐱᒡᒍᓴᐅᔾᔪᐊᖅᑎᑦᑎᓂᐊᖅᑐᓂᒃ Facebook-ᑯᑦ, ᑕᒪᓐᓇ ᓴᖅᑭᑎᓕᓚᐅᖅᑕᖓ ᐃᓕᓐᓂᐊᕐᕕᖓᑕ Facebook-ᖓᒍᑦ ᓄᓇᖓᓂᒃ ᓄᑕᖅᑲᑦ ᐃᓚᐅᖃᑕᐅᖁᑉᓗᒋᑦ.

“ᑕᒪᓐᓇ ᖁᕕᐊᒋᑦᑎᐊᓚᐅᕋᑉᑯ ᐊᒻᒪᓗ ᐱᐅᔫᖕᒪᑦ ᐃᓚᐅᖃᑕᐅᑎᑦᑎᔪᓐᓇᕐᓂᕐᒧᑦ ᓄᑕᖅᑲᓂᒃ ᐱᕙᓪᓕᐊᑎᑦᑎᔪᓐᓇᖁᑉᓗᒋᑦ ᐊᔪᙱᓐᓂᕆᔭᖏᓐᓂᒃ ᐱᒡᒍᓴᐅᔾᔪᐊᕐᓂᐅᖃᑦᑕᖅᑐᖅ ᓄᖅᑲᖅᑎᑕᐅᓚᐅᕋᓗᐊᖅᑎᓪᓗᒍ,” ᑕᐃᒪᓐᓇ ᐅᖃᖅᖢᓂ ᐱᓕᐊᑦ.

“ᑕᑯᑐᐊᕋᑉᑯ Skills Canada Nunavut Facebook-ᑯᑦ ᒪᒃᐱᒐᖓᒍᑦ, ᐃᓕᑲᐅᑎᒋᓚᐅᖅᑕᕋ ᐃᓕᓐᓂᐊᕐᕕᑉᑕ ᒪᒃᐱᒐᖓᓄᑦ ᐊᔭᐅᖅᑐᖅᖢᒋᑦ ᐃᓕᓐᓂᐊᖅᑐᖁᑎᕗᑦ ᑕᒡᕙᓂ ᐊᕐᕕᐊᓂ ᐃᓚᐅᖃᑕᐅᓇᔭᕐᓂᕐᒧᑦ.

“ᖁᔭᓐᓇᒦᖅᑕᒃᑲ Skills Nunavut-ᒥ ᑲᒪᔨᐅᔪᑦ ᑕᒪᑐᒥᙵ ᑲᔪᓯᑎᑦᑎᖕᒪᑕ ᐊᒃᓱᕈᕐᓇᖅᑐᒃᑰᕐᓇᕋᓗᐊᖅᑎᓪᓗᒍ ᐊᒻᒪᓗ ᓄᑕᖅᑲᑦ ᐅᔾᔨᕈᓱᒍᓐᓇᖁᑉᓗᒋᑦ, ᐃᓚᐅᖃᑕᐅᔪᓐᓇᖁᑉᓗᒋᑦ, ᖃᓄᐃᓕᐅᕈᑕᐅᔪᓂᒃ ᖁᕝᕙᖅᑎᕆᓂᕐᒧᑦ ᐊᔪᙱᓐᓂᕆᔭᐅᔪᓂᒃ.

ᐊᔭᐅᖅᑐᐃᔨᓪᓚᕆᐅᒐᒪ ᐊᔪᕈᓐᓃᖅᓴᖃᑦᑕᖁᔨᓂᕐᒧᑦ ᓱᓇᙳᖅᓴᓂᒃᑯᑦ ᐃᓛᒃ ᑕᒪᒃᑯᐊ ᐱᕙᓪᓕᐊᔾᔪᑕᐅᓂᐊᕐᒪᑕ ᐃᓕᓐᓂᐊᖅᑐᖁᑎᑉᑎᓐᓄᑦ ᐃᓕᓐᓂᐊᕈᑎᒥᓂᒃ ᐃᓕᓐᓂᐊᕐᕕᒡᔪᐊᕐᒥ ᐃᓱᓕᑦᑎᒃᐸᑕ ᓯᓚᑦᑐᖅᓴᕐᕕᖕᒥᐅᖓᓂᒃ ᐊᒻᒪᓗ ᖁᑦᑎᖕᓂᖅᓴᒃᑯᑦ ᐱᒋᐊᕈᑕᐅᔪᓐᓇᖅᑐᒃᑯᑦ − ᓄᓇᕗᑦ ᐱᑖᕆᐊᖃᓪᓚᕆᖕᒪᑦ ᐊᔪᙱᓐᓂᖃᖅᑐᓂᒃ ᐊᔪᙱᑦᑑᑕᐅᔪᓂᒃ ᐃᓄᖕᓂᒃ ᓇᐅᒃᑯᓗᒃᑖᖅ − ᓄᔭᓕᕆᔨᑖᕆᐊᓕᒃ, ᓱᑉᓗᓕᕆᔨᑖᕆᐊᓕᒃ, ᕿᔪᓕᕆᔨᑖᕆᐊᓕᒃ, ᓱᓇᑐᐃᓐᓇᕐᓂᒃ ᑕᐃᓯᔪᓐᓇᖅᑐᓯ − ᐊᒻᒪᓗ ᓱᓇᙳᖅᓴᕈᑏᑦ, ᑕᐃᒪᐅᔪᑦ ᓄᑕᕋᓄᑦ ᓴᓇᑐᓕᓴᕈᑕᐅᔪᓐᓇᖅᑐᑦ ᓄᓇᕗᒦᖏᓐᓇᕐᓗᑎᒃ ᐊᒻᒪᓗ ᓯᕗᓂᒃᓴᖃᑦᑎᐊᓕᕈᓐᓇᖅᑐᑦ.”