Hᐊᑭᕕᒡᔪᐊᕈᒫᖅᑐᓂᒃ ᐸᕐᓇᐃᔩᑦ ᐃᓱᒪᓕᐅᖅᓯᒪᓕᖅᑐᑦ ᑲᔪᓯᖁᑉᓗᒍ ᑎᐅᕆᓐᔅ ᑐᑐ ᐃᖅᑲᐅᒪᑉᓗᒍ ᐊᖑᑎᑦ ᐃᓐᓇᐅᓂᖅᓴᑦ Hᐊᑭᕕᒡᔪᐊᕈᒫᕐᓂᖏᓐᓄᑦ ᑕᖅᑭᐅᓂᐊᖅᑐᒥ ᐱᑎᑦᑎᙱᒥᐊᕈᒪᙱᖦᖢᑎᒃ ᐅᑭᐅᒥ ᐊᑕᐅᓯᕐᒥᒃ ᑕᒪᓐᓇ ᐱᒻᒪᕆᐅᑎᑕᐅᖃᑦᑕᕐᒪᑦ ᑲᖏᖅᖠᓂᕐᒥ.
Hᐊᑭᕕᒡᔪᐊᕐᓂᐊᖅᑐᑦ Hᐊᑭᕕᒡᔪᐊᕐᓂᐊᕐᓂᖏᑦ ᓄᖅᑲᖅᑎᑕᐅᓚᐅᖅᑎᓪᓗᒋᑦ ᖃᑯᒍᒃᑲᓐᓂᖅ Hᐊᑭᑦᑐᒫᕐᓂᖏᑦ ᐋᖅᑭᒃᑕᐅᓚᐅᖅᑐᑦ ᓄᖅᑲᖅᑎᑕᐅᓚᐅᕐᒪᑕ ᓄᕙᒡᔪᐊᕐᓂᖅ −19 ᐱᔾᔪᑎᒋᑉᓗᒍ.
Hᐊᑭᕕᒡᔪᐊᖅᑏᑦ ᑲᑎᒪᔨᖓ ᑐᕈᐃ ᐊᒃᓴᕐᓂᖅ ᐅᖃᖅᖢᓂ, ᒫᓐᓇᐅᔪᖅ ᐋᖅᑭᒃᓯᓯᒪᔪᑦ Hᐊᑭᕕᒡᔪᐊᕐᓂᐅᓂᐊᖅᑐᖅ ᓄᓇᕗᒥᐅᑕᓄᑐᐃᓐᓇᖅ ᑐᕌᖓᓂᐊᕐᓂᖓᓄᑦ.
ᐅᖃᖅᖢᓂ ᐃᓱᒪᓕᐅᓚᐅᖅᑐᑦ ᑕᒪᓐᓇ ᑲᔪᓯᖁᑉᓗᒍ ᐅᑐᐱᕆ 13-ᒥ.
“ᒪᑐᐃᖓᑎᒃᑯᑉᑎᒍᑦ ᑭᒃᑯᑐᐃᓐᓇᕐᓄᑦ ᐱᙳᐊᖅᑏᑦ ᐃᓄᑑᔭᕆᐊᖃᕋᔭᖅᑐᑦ ᒪᕐᕈᖕᓂᒃ ᐱᓇᓱᐊᕈᓯᕐᓂᒃ ᑎᑭᑦᑐᓐᓇᕋᔭᙱᑦᑐᒃᓴᐅᖕᒪᑕ,” ᑕᐃᒪᓐᓇ ᐅᖃᖅᖢᓂ ᐊᒃᓴᕐᓂᖅ.
“ᑎᐅᕆᓐᔅ ᑐᑐ ᐃᖅᑲᐅᒪᑉᓗᒍ Hᐊᑭᕕᒡᔪᐊᕐᓂᐅᓂᐊᖅᑐᖅ ᐱᒋᐊᕈᑎᒃᓴᑦᑎᐊᕙᒃ Hᐊᑭᖃᑦᑕᕐᓂᐅᓂᐊᖅᑐᒥᒃ ᑲᖏᖅᖠᓂᕐᒥ. ᓴᖅᑭᓚᐅᙱᒻᒪᑦ ᐅᑭᐅᖅ ᐱᒋᐊᓕᓵᖅᑎᓪᓗᒍ ᐊᒻᒪᓗ ᓈᒻᒪᑐᐃᓐᓇᕋᔭᖅᑑᔭᕐᒪᑦ Hᐊᑭᕕᒡᔪᐊᖅᑎᑦᑎᒍᑉᑕ 2020-ᒥ.
“ᓇᓕᐊᒃᑎᒍᓪᓘᓐᓂᑦ ᑕᑯᔪᒪᙱᓐᓇᑉᑕ Hᐊᑭᕕᒡᔪᐊᕐᓂᖅ ᐱᖏᑐᐃᓐᓇᕋᔭᕐᓂᖓᓄᑦ ᐅᑭᐅᖅ.”
ᐊᒃᓴᕐᓂᖅ ᐅᖃᖅᖢᓂ ᓇᓗᓇᙱᑦᑐᕈᖅ ᓱᖏᐅᓐᓇᔾᔮᙱᒻᒪᑦ ᑕᐅᑐᒋᐊᖅᑐᖅᓯᒪᔪᖃᙱᑎᓪᓗᒍ ᐱᙳᐊᖅᑐᓂᒃ.
ᐅᖃᖅᖢᓂ ᓱᓇᑐᐃᓐᓇᑦ ᐊᓯᔾᔨᙱᑉᐸᑕ ᒫᓐᓇᐅᔪᖅ Hᐊᑭᕕᒡᔪᐊᕐᓂᐊᖅᑐᓄᑦ ᑎᑭᓪᓗᒍ, 100-ᑐᐃᓐᓇᑦ Hᐊᑭᕝᕕᖕᒦᑦᑐᓐᓇᖃᑦᑕᕐᓂᐊᕐᒪᑕ ᖃᖓᑐᐃᓐᓇᒃᑯᑦ.
“ᐸᕐᓇᐃᓯᒪᔪᒍᑦ ᒫᓐᓇᐅᔪᖅ ᐅᑯᐊᖑᖃᑦᑕᕐᓂᐊᕐᒪᑕ ᒪᕐᕈᒃ ᐱᙳᐊᖃᑎᒌᒃᑏᑦ ᓯᑯᒥ ᐱᙳᐊᕐᓗᑎᒃ ᐊᒻᒪᓗ ᑕᐅᑐᒍᓐᓇᖅᑐᑑᓗᑎᒃ ᐱᙳᐊᖃᑎᒌᒃᑏᑦ ᕿᑎᒋᐊᕋᔭᖅᑐᑦ Hᐊᑭᑦᑐᑦ ᐱᐊᓂᒃᐸᑕ.
“ᓈᓴᐅᓯᕆᓚᐅᕋᑉᑕ ᐊᒻᒪᓗ ᓇᓗᓇᐃᖅᓯᓚᐅᖅᖢᑕ 75-ᖑᓇᔭᕐᒪᑕ ᓯᑕᒪᐅᒃᐸᑕ ᐱᙳᐊᖃᑎᒌᒃᑏᑦ, ᐃᓚᐅᖃᑕᐅᓗᒋᓪᓗ Hᐊᑭᕕᒡᔪᐊᖅᑐᓂᒃ ᓴᓇᔩᑦ ᐊᒻᒪᓗ ᓯᐊᕐᕆᔮᕐᕕᖕᒥ ᓴᓇᔩᑦ.
“ᓱᖏᐅᓐᓇᔾᔮᙱᑦᑐᖅ ᑕᐅᑐᒋᐊᖅᑐᖅᓯᒪᔪᖃᙱᑎᓪᓗᒍ, ᑭᓯᐊᓂ Hᐊᑭᖅᑎᕐᔪᐊᕌᓗᐃᑦ ᑕᓚᕕᓴᒃᑰᓲᑦ ᑕᐃᒪᐃᓕᐅᕈᓐᓇᖅᐸᑕ ᑕᐃᒪᐃᓕᐅᕈᓐᓇᕐᒥᔪᒍᑦ, Hᐃᓖ?”
ᐊᒃᓴᕐᓂᖅ ᐅᖃᖅᖢᓂ ᓂᕆᐅᒃᑐᕈᖅ ᖁᓕᑦ 12-ᖑᓚᐅᖅᑐᓂᒃ 2019-ᒥ ᐱᙳᐊᕆᐊᖅᑐᓚᐅᖅᑐᓂᒃ ᐅᑎᕋᔭᕐᓂᖏᓐᓄᑦ ᑲᖏᖅᖠᓂᕐᒧᑦ ᑕᖅᑭᐅᓂᐊᖅᑐᒥ.
ᐅᖃᖅᖢᓂ ᓈᒻᒪᙱᓐᓂᖓ ᑕᐃᒪᑐᐊᖅ ᐅᑎᖅᑑᔭᕐᓂᐊᕐᒪᑕ ᑕᐃᑉᓱᒪᓂᐅᔪᒧᑦ ᒪᕐᕈᓕᖓᔾᔮᙱᑎᓪᓗᒋᑦ ᐱᙳᐊᖃᑎᒌᒃᑏᑦ ᒪᕐᕈᓕᖓᖃᑦᑕᓕᕐᓂᖏᑦ ᑲᔪᓯᓯᒪᑦᑎᐊᖅᓯᒪᒐᓗᐊᕐᒪᑕ ᐅᑭᐅᖑᓚᐅᖅᑐᖅ.
“ᐊᒥᓲᓂᖅᓴᑦ ᐱᙳᐊᖃᑎᒌᒃᑏᑦ ᐱᔫᒥᒍᓱᒃᑐᑦ, ᑭᓯᐊᓂ ᐅᓗᕆᐊᓇᕈᔪᒃᑐᖅ ᓯᕗᒻᒧᐊᒃᐸᓪᓕᐊᑉᓗᓂ.
“ᓯᑕᒪᑦ ᐱᙳᐊᖃᑎᒌᒃᑏᑦ ᐃᓚᐅᖃᑕᐅᓂᐊᕐᓂᕋᖅᑐᑦ Hᐊᑭᕕᒡᔪᐊᕐᓂᐊᖅᑐᓂᒃ ᐊᖏᕐᕋᒥᓂᒃ ᓯᐊᕐᕆᔮᕐᕕᖓ ᓯᑯᖃᙱᑦᑎᓪᓗᒍ ᓱᓕ.
ᑕᐃᒪᐃᒻᒪᑦ ᑕᓯᖏᓐᓂᖅᑲᐃ ᓯᐊᕐᕆᔮᕈᓘᔭᖃᑦᑕᖅᑐᑦ,” ᑎᑉᓯᒍᓱᓕᖅᖢᓂ.
ᐊᒃᓴᕐᓂᖅ ᐅᖃᖅᖢᓂ ᑕᒪᓐᓇ Hᐊᑭᕕᒡᔪᐊᕐᓂᐅᖃᑦᑕᖅᑐᖅ ᑮᓇᐅᔭᓕᐅᙱᓐᓂᖅᓴᐅᓂᐊᕐᒪᑦ $5,000 ᐊᒻᒪᓗ $10,000 ᐊᑯᓐᓂᖓᓂᒃ ᑕᐅᑐᒋᐊᖅᑐᖅᓯᒪᔪᖃᖃᑦᑕᔾᔮᙱᑎᓪᓗᒍ, ᑭᓯᐊᓂ ᓈᒻᒪᒃᑐᖅ.
ᐅᖃᖅᖢᓂ ᑕᒪᓐᓇ ᑮᓇᐅᔭᓕᐅᕈᑕᐅᙱᓐᓂᖓ ᐃᒃᐱᖕᓈᕐᔪᖕᓂᐊᖅᑐᖅ, ᑭᓯᐊᓂ ᓴᖅᑭᑦᑐᓐᓇᕐᓂᐊᖅᑐᑦ ᓱᓕ ᐱᙳᐊᕆᐊᖅᑐᕐᓂᐊᖅᑐᑦ.
“ᐊᖏᖃᑎᒌᒃᓯᒪᓗᒃᑖᖅᑑᔭᖅᑐᒍᑦ ᑕᐃᒪᙵᓂ Hᐃᒪᔅ (ᑕᑎ) ᐅᕙᖓᓗ ᐅᖃᓪᓚᒋᐊᖅᑐᖅᑳᖅᖢᓄᒃ Hᐊᒻᓚᒃᑯᑦ ᑲᑎᒪᔨᖏᓐᓄᑦ.
“ᓲᖃᐃᒻᒪ, ᑕᒪᓐᓇ Hᐊᑭᕕᒡᔪᐊᕐᓂᐅᖃᑦᑕᖅᑐᖅ ᑮᓇᐅᔾᔭᒃᓴᕈᑕᐅᖃᑦᑕᕐᒪᑦᑕᐅᖅ ᓄᓇᖅᑲᑎᒌᖕᓄᑦ ᐊᕐᕌᒍᑕᒫᒃᑯᑦ, ᐊᒻᒪᓗ ᑕᐃᒪᐃᑐᐃᓐᓇᕐᓂᐊᖅᑑᔭᖅᑐᖅ ᓄᓇᖅᑲᑎᒌᑦ ᖃᓄᐃᓕᐅᖅᑎᑦᑎᕈᓘᔭᕐᓂᐊᖅᑎᓪᓗᒋᑦ ᓄᓇᑉᑎᓐᓂᒃ.
“ᑕᒪᓐᓇ ᓈᒻᒪᑦᑎᐊᖅᑐᖅ ᑕᒪᐃᓐᓄᑦ ᐃᓄᖕᓄᑦ Hᐊᑭᕕᒡᔪᐊᕐᓂᐅᓂᐊᖅᑐᖅ ᑲᔪᓯᓂᐊᖅᑎᓪᓗᒍ ᐸᕐᓇᒃᑕᐅᓯᒪᓂᖓ ᒪᓕᒡᓗᒍ.”