Skip to content

ᑲᖏᖅᖠᓂᕐᒥ ᓄᕙᒡᔪᐊᕐᓂᒃᑯᑦ ᐊᒃᑐᖅᑕᐅᓂᕆᖅᑳᓚᐅᖅᑕᒥᓂᒃ ᖃᓄᐃᑦᑐᓐᓃᖅᑎᑦᑎᔪᑦ

ᑲᖏᖅᖠᓂᕐᒥ ᒪᐃᔭᒋᔭᐅᔪᖅ Hᐊᕆ ᑕᐅᑐᙱ ᓴᕆᒪᓲᑎᖃᖅᑐᖅ ᓄᓇᒥᓂᒃ ᖃᓄᖅ ᑲᒪᒋᐊᓚᐅᕐᓂᖏᓐᓄᑦ ᓯᕗᓪᓕᖅᐹᒥ ᓄᕙᒡᔪᐊᕐᓂᖅᑖᖅᓯᒪᓚᐅᖅᑐᒥᒃ ᓄᓇᒥᓂ ᓄᕙᒡᔪᐊᕐᓂᖅ ᐱᒋᐊᓕᓚᐅᖅᑳᖅᑎᓪᓗᒍ.

ᑭᓯᐊᓂ ᑕᑯᒃᑲᓐᓂᕈᒪᔪᖅ Hᐊᒻᓚᒃᑯᑦ ᑲᑎᒪᔨᖏᑦ ᐃᓚᐅᖃᑕᐅᓂᖅᓴᐅᖁᑉᓗᒋᑦ ᐃᓱᒪᓕᐅᕈᑕᐅᕙᒃᑐᓄᑦ ᐊᒻᒪᓗ ᒪᓕᒃᑕᐅᔭᕆᐊᓖᑦ ᖃᓱᒋᐊᖅᑕᐅᖃᑦᑕᕐᓂᖏᓐᓄᑦ ᑕᐃᒪᐃᑦᑐᖃᓕᑳᓪᓚᒃᑲᓐᓂᕋᔭᖅᐸᑦ.

ᐃᓅᓯᖅ ᐅᑎᖅᐸᓪᓕᐊᓯᒪᓕᖅᑐᖅ ᑲᖏᖅᖠᓂᕐᒥ ᑕᐃᒪᙵᓂ ᐊᓂᑦᑕᐃᓕᑎᑕᐅᓕᓚᐅᖅᑳᖅᑎᓪᓗᒋᑦ ᒪᓕᒃᑕᐅᔭᕆᐊᓖᓪᓗ ᖃᓱᖓᓂᖅᓴᐅᓕᖅᖢᑎᒃ ᓄᓇᓕᖕᒥ ᑎᓯᐱᕆ 3-ᒥ.

ᑕᐅᑐᙱ ᐅᖃᖅᖢᓂ ᐅᐱᒍᓱᑦᑎᐊᖅᑐᕉᖅ ᖃᓄᖅ ᑲᖏᖅᖠᓂᕐᒥᐅᑦ ᒪᓕᑦᑎᐊᓚᐅᕐᓂᖏᓐᓄᑦ ᒪᓕᒐᓂᒃ ᐃᓄᐃᑦ ᐊᓂᑦᑕᐃᓕᑎᑕᐅᓕᓚᐅᖅᑎᓪᓗᒋᑦ ᐊᒻᒪᓗ ᐱᓕᕆᖃᑎᒌᑦᑎᐊᓚᐅᕐᓂᖏᓐᓄᑦ ᓯᐊᒻᒪᒃᑲᓐᓂᖁᓇᒍ ᓄᕙᒡᔪᐊᕐᓂᖅ, ᒪᓐᓇᐅᔪᖅ.

ᐅᖃᖅᖢᓂ ᑎᑎᕋᖅᓯᒪᔪᓂᒡᒎᖅ ᑕᑯᔪᒪᓇᔭᖅᑐᖅ ᓄᓇᓕᐅᑉ ᐃᓗᐊᓂ ᐃᑎᖅᑕᕐᕕᐅᕙᒃᑐᓂᒃ ᐃᖅᑲᐃᑎᑦᑎᒍᑎᓂᒃ ᐃᓄᖕᓄᑦ ᓄᕙᒡᔪᐊᕐᓂᖅᑕᖃᕐᓂᖓᓄᑦ ᓱᓕ ᓄᓇᕐᔪᐊᕐᒥ, ᐊᒻᒪᓗ ᐅᔾᔨᖅᑐᕆᐊᖃᕐᓂᖏᓐᓄᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᒪᓕᒃᑕᐅᔭᕆᐊᓕᖕᓂᒃ.

ᑲᒪᑦᑎᐊᙱᓐᓇᕆᐊᖃᖅᑐᒍᑦ ᐊᒻᒪᓗ, ᓄᓇᓕᐅᑉᓗᑕ, ᐱᓕᕇᓐᓇᕐᓗᑕ ᓯᐊᒻᒪᒃᐸᓪᓕᐊᖁᓇᒍ ᓄᕙᒡᔪᐊᕐᓂᖅ ᓲᕐᓗ ᓄᕙᒡᔪᐊᕐᓂᖅᑕᖃᓚᐅᖅᑎᓪᓗᒍ ᓄᓇᑉᑎᓐᓂᒃ ᑕᐃᒪᓐᓇᑦᑎᐊᖅ,” ᑕᐃᒪᓐᓇ ᐅᖃᖅᖢᓂ ᑕᐅᑐᙱ.

“ᖃᐅᔨᒪᔪᖓ ᐊᒃᓱᕈᕐᓇᖅᑐᐊᓘᖕᒪᑦ, ᐱᓗᐊᖅᑐᒥ ᒫᓐᓇᐅᓕᖅᑐᖅ ᐅᑭᐅᑉ ᐃᓗᐊᓂ, ᑭᓯᐊᓂ ᐅᒡᓚᕋᓗᐊᖅᑕᐃᓕᔭᕆᐊᖃᖅᑐᒍᑦ ᐃᓅᖃᑎᑉᑎᓐᓄᑦ ᐅᐸᒍᑎᓗᐊᖅᑕᐃᓕᔭᕆᐊᖃᖅᑐᒍᑦ.

ᐃᓱᒪᓚᐅᕋᑉᑕ ᒪᓕᒃᑕᐅᔭᕆᐊᓖᑦ ᖃᓱᒋᐊᖅᑕᐅᓇᔭᕐᓂᖏᓐᓄᑦ ᑎᓯᐱᕆ 10-ᒥ, ᐊᒻᒪᓗ ᖁᒃᓴᓪᓚᖕᓇᓚᐅᖅᖢᓂ Hᐊᒻᓚᒃᑯᑦ ᑲᑎᒪᔨᖏᓐᓄᑦ ᖃᓱᒋᐊᖅᑕᐅᓚᐅᕐᓂᖏᓐᓄᑦ ᑕᐃᑲᓂ ᐅᑉᓗᕐᒥ ᓂᕆᐅᓇᙱᑦᑐᒃᑯᑦ.

“ᐅᔾᔨᙱᓈᖅᑕᐅᔫᔭᓚᐅᕋᑉᑕ, ᑕᐃᒪᐃᒻᒪᑦ ᒪᓕᑐᐃᓐᓇᕆᐊᖃᖅᑐᒍᑦ. ᖃᐅᔨᒪᔨᐅᖕᒪᑕ ᑕᒡᕘᓇ ᐊᒻᒪᓗ ᐃᓅᓯᖅ ᐊᓯᔾᔨᓗᐊᖅᑕᐃᓕᓇᓱᖕᒪᒍ ᓄᓇᓕᖕᒥ, ᑭᓯᐊᓂ ᑕᐃᒪᑐᖅ ᑐᐊᕕᓗᐊᙱᑉᐳᑦ.”

ᑕᐅᑐᙱ ᐅᖃᖅᖢᓂ ᑲᖏᖅᖠᓂᕐᒥ Hᐊᒻᓚᒃᑯᑦ ᓴᓇᔨᖏᑦ ᐅᐱᓐᓇᑦᑎᐊᓚᐅᕐᓂᖏᓐᓄᑦ ᑲᖏᖅᖠᓂᕐᒥᐅᑦ ᐊᓂᑦᑕᐃᓕᑎᑕᐅᑎᓪᓗᒋᑦ.

ᐅᖃᖅᖢᓂ Hᐊᒻᓚᒃᑯᑦ ᓴᓇᔨᖏᑦ ᐱᓕᕆᑦᑎᐊᖅᑐᐊᓘᓚᐅᕐᒪᑕ ᓱᓇᓗᒃᑖᑦ ᐊᐅᓪᓛᑦᑎᐊᕈᓐᓇᖁᑉᓗᒋᑦ ᐱᔪᓐᓇᕐᓂᓗᒃᑖᒃᑯᑦ.

“ᐱᓕᕆᑦᑎᐊᓚᐅᖅᑐᑦ ᐃᑲᔪᕐᓂᒃᑯᑦ ᐃᓄᐃᓪᓗ ᐊᑭᓕᖅᑐᖅᑕᐅᓇᑎᒃ ᐃᑲᔪᑦᑎᐊᓚᐅᖅᖢᑎᒃ, ᐊᒻᒪᓗ ᐃᑲᔪᓪᓚᕆᓚᐅᖅᑐᑦ ᐊᔾᔨᒌᙱᑦᑑᑕᐅᔪᒃᑯᑦ ᐃᑲᔫᑎᒃᑯᑦ ᑲᒪᒋᔭᐅᔪᒃᑯᑦ ᓄᓇᓕᖕᒥ ᐃᑲᔪᕆᐊᕈᑎᓄᑦ, ᓲᕐᓗ ᓂᕿᓂᒃ ᐊᔾᔭᖅᑐᐃᓂᖅ ᐊᑐᓂ ᐃᒡᓗᒋᔭᐅᔪᓄᑦ ᓄᓇᓕᖕᒥ.

“ᓄᓇᖅᑲᑎᒌᑦ ᖃᐅᔨᒪᖕᒪᑕ ᓄᕙᒡᔪᐊᕐᓂᖅ ᑎᑭᑦᑐᓐᓇᕐᓂᖓᓄᑦ ᑲᖏᖅᖠᓂᕐᒧᑦ, ᐊᒻᒪᓗ ᓴᙱᓂᖅᓴᐅᔪᒃᑯᑦ ᑎᑭᓐᓇᔭᖅᐸᑦ ᓄᓇᑉᑎᓐᓄᑦ − ᓴᖅᑭᒃᑲᓐᓂᕋᔭᖅᐸᑦ − ᖃᐅᔨᒪᓕᖅᑐᒍᑦ ᖃᓄᖅ ᐱᔭᕆᐊᑐᑎᒋᖕᒪᖔᑦ ᐱᑕᖃᕈᓐᓃᖅᑎᑦᑎᓇᓱᒃᖢᓂ.

“ᑕᑯᑎᑕᐅᓚᐅᖅᑰᖅᑐᒍᑦ ᐅᔾᔨᕈᓱᓕᕈᓐᓇᖁᑉᓗᑕ ᖃᓄᖅ ᐱᔭᕆᐊᑐᑎᒋᖕᒪᖔᑦ ᑕᒫᓃᓕᖅᑎᓪᓗᒍ.

ᐱᐅᓂᖅᓴᒻᒪᕆᐊᓗᒃ ᑕᒪᑦᑕ ᐱᓕᕆᑦᑎᐊᕋᓱᒃᑯᑉᑕ ᓄᓇᑉᑎᓐᓄᑦ ᑎᑭᑎᑦᑕᐃᓕᓇᓱᒡᓗᒍ ᐱᔪᓐᓇᕐᓂᓗᒃᑖᒃᑯᑦ. ᐊᒃᓱᓪᓘᓐᓃᑦ ᓯᐊᒻᒪᒃᑲᓐᓂᓚᐅᙱᒻᒪᑦ ᑕᒫᓂ ᐊᒻᒪᓗ ᐃᒻᒪᖄ ᐱᔾᔪᑕᐅᖃᑕᐅᔪᖅ ᐃᒡᓗᒋᔭᐅᔪᑦ ᑕᒫᓂ ᐃᓄᒋᐊᙱᓐᓂᖅᓴᐅᖕᒪᑕ ᐊᕐᕕᐊᕐᒥᐅᓂᐅᖓᓂᒃ, ᐆᒃᑑᑎᒋᓗᒍ.”

ᑕᐅᑐᙱ ᐅᖃᖅᖢᓂ ᑐᓴᖅᑎᑦᑎᔪᒪᔪᖅ ᑲᖏᖅᖠᓂᕐᒥᐅᑕᓂᒃ ᒫᓐᓇᐅᔪᖅ ᖁᕕᐊᓱᒃᑲᒥ ᑲᖏᖅᖠᓂᕐᒥ ᓄᕙᒡᔪᐊᕐᓂᖅᑕᖃᕈᓐᓃᕐᓂᖓᓄᑦ ᑭᓯᐊᓂ ᐱᔭᕆᐊᑐᓂᐊᖅᑐᖅ ᓴᖅᑭᒃᑲᓐᓂᖁᓇᒍ.

ᐅᖃᖅᖢᓂ ᐃᓄᐃᑦ ᐅᔾᔨᖅᑐᐃᓐᓇᕆᐊᖃᕐᓂᐊᕐᒪᑕ ᓄᕙᒡᔪᐊᕐᓂᖅ ᑲᖏᖅᖠᓂᕐᒧᑦ ᑎᑭᒃᑲᓐᓂᖁᓇᒍ.

“ᓄᕙᒡᔪᐊᕐᓂᐅᔪᖅ ᑲᑉᐱᐊᓇᖅᑐᐊᓗᒃ, ᑕᐃᒪᐃᒻᒪᑦ ᓴᓗᒪᐃᓐᓇᕋᓱᒋᐊᖃᕐᓂᐊᖅᑐᒍᑦ, ᒪᑐᐊᖅᓯᒪᖃᑦᑕᕐᓗᑕ, ᐅᖓᓯᒌᒡᔪᒥᓇᓱᖃᑦᑕᕐᓗᑕ ᐊᒻᒪᓗ ᑲᔪᓯᑎᓪᓗᒋᑦ ᖃᓄᐃᓕᐅᕈᑎᒋᖃᑦᑕᓚᐅᖅᑕᖅᐳᑦ ᐊᓂᑦᑕᐃᓕᑎᑕᐅᑎᓪᓗᑕ ᐊᒻᒪᓗ ᑐᖔᓂ.”

ᑕᐅᑐᙱ ᐅᖃᖅᖢᓂ Hᐊᒻᓚᒃᑯᑦ ᑲᑎᒪᔨᖏᒡᒎᖅ ᓂᐱᖃᕐᓂᖅᓴᐅᔭᕆᐊᖃᓚᐅᖅᑑᒐᓗᐊᑦ ᐃᓱᒪᓕᐅᕆᓂᒃᑯᑦ ᖃᓱᑕᐅᒋᐊᖅᑎᓪᓗᒋᑦ ᒪᓕᒃᑕᐅᔭᕆᐊᓖᑦ.

ᐅᖃᖅᖢᓂ ᑲᑎᒪᔩᑦ ᓂᐱᖃᖅᑎᑕᐅᔭᕆᐊᖃᕋᓗᐊᕐᒪᑕ ᑲᑎᑦᑎᓂᐊᕐᓂᕐᒧᑦ ᑐᑭᓯᒋᐊᕈᑎᒃᓴᓂᒃ ᓄᓇᓕᖕᓄᑦ ᑕᑯᔭᐅᓂᐊᖅᑐᓂᒃ.

“ᐅᕙᑉᑎᓐᓄᑦ ᐃᑲᔫᑕᐅᓇᔭᖅᑐᒃᓴᐅᔪᖅ ᐊᒻᒪᓗ ᐃᑲᔫᑕᐅᓇᔭᖅᑐᒃᓴᐅᔪᖅ ᑕᐃᑉᑯᓄᙵᖅᑕᐅᖅ.

ᑐᑭᓯᓂᕐᓗᒃᑕᐅᑦᑕᐃᓕᓚᖓ. ᓄᓇᕗᑦ ᒐᕙᒪᒃᑯᖏᑦ ᐱᓕᕆᑦᑎᐊᖅᑐᐊᓗᐃᑦ. ᐱᓕᕆᔪᓐᓇᕐᓂᓗᒃᑖᖏᓐᓂᒃ ᐱᓕᕆᔪᑦ ᐅᖓᑖᒍᒃᑲᓐᓂᕐᓗ.

“ᖁᔭᓕᑐᐃᓐᓇᕆᐊᖃᖅᑐᒍᑦ ᒫᓐᓇᐅᔪᖅ ᐊᒻᒪᓗ ᐱᓕᕆᑦᑎᐊᖏᓐᓇᕐᓗᑕ ᓯᐊᒻᒪᒃᑕᐃᓕᔾᔪᑎᒃᓴᑦ ᑲᔪᓯᑎᑦᑎᐊᕐᓗᒋᑦ ᐊᒻᒪᓗ ᓄᓇᒋᔭᖅᐳᑦ ᐱᐅᔪᓐᓃᖅᐸᓪᓕᐊᖁᓇᒍ.

“ᓵᓚᒃᓴᖅᓯᒪᔪᒍᑦ ᑭᓯᐊᓂ ᓵᓚᒌᓐᓇᕋᓱᒋᐊᖃᖅᑕᖅᐳᑦ ᐋᓐᓂᐊᕐᓂᐊᓗᒃ.”