Skip to content

ᒪᒃᑯᒃᑐᖅ ᑎᑎᕋᐅᔭᖅᑎ ᐃᓱᒪᒃᓴᖅᓯᐅᕈᑎᖃᖅᑐᖅ ᓯᕗᓂᒃᓴᒥᓂᒃ ᐅᑉᓗᒥᐅᔪᖅ ᑎᑎᕋᐅᔭᖅᐸᒃᖢᓂ

ᐊᒥᓲᔪᒃᑯᑦ, ᓄᓇᕐᔪᐊᕐᒥ ᑎᑎᕋᐅᔭᖅᑏᑦ ᐃᓱᒪᒃᓴᖅᓯᐅᕋᔪᒃᑐᑦ ᓱᓇᓕᐅᕐᓂᐊᕐᒪᖔᕐᒥᒃ, ᐃᓱᒪᒋᔭᕐᒥᓂᒃ ᓴᖅᑭᑎᑦᑎᒐᔪᒃᑐᑦ, ᑐᑭᓕᐊᒥᓂᒃ ᐊᒻᒪᓗ ᑐᓴᖅᑎᑦᑎᔾᔪᑎᒋᔪᒪᔭᕐᒥᓂᒃ, ᖃᓄᖅ ᓴᖅᑭᑎᑦᑎᓯᒪᒐᓗᐊᖅᑎᓪᓗᒋᑦ.

ᒪᒃᑯᒃᑐᖅ ᑎᑎᕋᐅᔭᖅᑎ ᓴᕐᓕᑦ ᖃᕆᑕᖅ ᐊᑦᑕᓇᖅᑐᒃᑰᖅᑕᐃᓕᒪᒍᑎᒥᒃ ᓯᕗᓪᓕᖅᐸᐅᑎᑦᑎᔪᖅ ᑎᑎᕋᐅᔭᖅᖢᓂ ᒪᒃᑯᒃᑐᑦ ᐃᑎᖅᑕᕐᕕᖓᑕ ᓯᓚᑖᓂᒃ ᐊᕐᕕᐊᓂ ᐊᕐᕕᓂᓖᑦ ᐅᑭᐅᑦ ᐱᐊᓂᒃᓯᒪᓕᖅᑐᑦ. ᐊᔾᔨ ᓴᕐᓕᑦ ᖃᕆᑕᕐᒥᙶᖅᑐᖅ

ᐊᕐᕕᐊᕐᒥᐅᑕᕐᓕ ᓴᕐᓕᑦ ᖃᕆᑕᖅ, 25-ᓂᒃ ᐅᑭᐅᓕᒃ, ᑎᑎᕋᐅᔭᖃᑦᑕᕐᓂᖅ, ᐃᖕᒥᒃᑯᑦ, ᓯᕗᒻᒧᐊᒃᐸᓪᓕᐊᔾᔪᑎᒋᔭᖓ, ᐃᓅᓚᐅᕐᒪᑦ ᓇᒡᓕᒋᔭᐅᑉᓗᓂ ᐊᓈᓇᑦᑎᐊᕐᒥᓄᑦ, ᐅᖃᖃᑎᒋᔭᐅᕙᒃᖢᓂ ᓱᓇᓂᒃ ᐱᕕᒃᓴᖃᕐᒪᖔᑦ, ᐃᓅᖃᑎᒋᔭᐅᕙᒃᖢᓂ ᓱᓇᓕᕆᔨᐅᔪᒪᒃᐸᑦ, ᐊᒻᒪᓗ ᓯᕗᒻᒧᐊᒃᐸᓪᓕᐊᔪᓐᓇᕐᓂᕐᒧᑦ ᑎᑎᕋᐅᔭᕐᓂᒃᑯᑦ ᖃᕆᑕᐅᔭᕋᓛᒃᑯᑦ.

ᑎᑎᕋᐅᔭᕈᒪᓂᖅᓴᐅᖃᑦᑕᓕᓚᐅᖅᑐᖅ ᖃᕆᑕᖅ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᕌᓂᒃᓯᒪᓕᖅᖢᓂ ᐊᒻᒪᓗ ᓅᒃᑲᒥ ᐃᒡᓗᒋᔭᐅᔪᒧᑦ ᖁᓪᓕᒃᑯᓐᓄᑦ 2012-ᒥ ᐃᓕᑕᕆᔭᐅᓚᐅᖅᑐᒧᑦ ᐊᕐᓇᐅᓪᓗᓂ ᐃᓱᒪᖅᑯᖅᑐᔫᓂᖓᓄᑦ − ᐊᓈᓇᑦᑎᐊᕆᑉᓗᓂᐅᒡᓗ, ᕈᑕ ᖃᕆᑕᖅ.

ᓴᕐᓕᑦ ᐅᖃᖅᖢᓂ ᑎᑎᕋᐅᔭᖅᑎᐅᙱᓐᓇᕋᒥ, ᐊᒻᒪᓗ ᐊᓈᓇᑦᑎᐊᒃᑯᒥᓄᑦ ᓅᓯᒪᓕᖅᖢᓂ ᐱᔫᒥᒍᓱᖕᓂᖅᓴᐅᓕᓚᐅᕋᒥ ᑎᑎᕋᐅᔭᖃᑦᑕᕈᒪᓂᕐᒧᑦ ᐊᒻᒪᓗ ᐊᖏᓂᖅᓴᓂᒃ ᐱᓕᕆᐊᖃᖃᑦᑕᓕᖅᖢᓂ.

ᐊᓈᓇᑦᑎᐊᓂᒎᖅ ᐃᑲᔪᖅᓯᒪᓪᓚᕆᒃᑐᖅ ᐃᖕᒥᓂᒃ, ᐃᖕᒥᓂᒃ ᐅᒃᐱᕈᓱᒍᓐᓇᖅᓯᓂᕐᒧᑦ “ᓇᖕᒥᓂᖅ ᐱᓕᕆᐊᕆᔪᒪᔭᒥᓂᒃ ᑲᒪᔪᓐᓇᖅᓯᓂᕐᒧᑦ” ᐃᓱᒪᒃᓴᖅᓯᐅᖃᑦᑕᓕᖅᑎᓪᓗᒍ ᓇᓗᓇᐃᖅᓯᖃᑦᑕᓕᖅᑎᓪᓗᒍᓗ ᐃᒃᐱᒋᔭᒥᓂᒃ ᑎᑎᕋᐅᔭᕐᓂᒃᑯᑦ − ᓴᖅᑭᑦᑐᖃᓕᓚᐅᖅᑐᖅ ᐱᕕᒃᓴᕆᔭᖏᓐᓂᒃ.

“ᐃᓕᓐᓂᐊᖅᑎᑦᑎᔨᖃᓚᐅᖅᓯᒪᖕᒪᑦ ᑕᒫᓂᕐᒥᐅᑕᐅᓚᐅᖅᓯᒪᔪᒥᒃ − ᕋᔅ ᐸᑐᓴᓐ − ᓴᓇᑎᑦᑎᓚᐅᖅᓯᒪᔪᖅ ᒪᕐᕉᖕᓂᒃ ᐊᖑᑎᓂᒃ ᑐᕌᓐᑐᒥᐅᑕᓂᒃ ᒥᙳᐊᖅᑎᖦᖢᒋᑦ ᐱᙳᐊᕐᕕᖕᒥ, ᐃᓕᑦᑎᕝᕕᒋᓚᐅᖅᓯᒪᔭᒃᑲ ᑕᐅᑐᒃᖢᒋᑦ ᒥᙳᐊᖅᑑᒃ ᓴᓂᕋᒃᑯᑦ,” ᑕᐃᒪᓐᓇ ᐅᖃᖅᖢᓂ ᓴᕐᓕᑦ.

ᐊᒥᓱᓂᒃ ᑎᖕᒥᑳᖅᑐᓂᒃ ᒥᙳᐊᓂᒃ ᐊᒥᐊᒃᑯᖃᓚᐅᕐᒪᑎᒃ ᐊᒻᒪᓗ ᓴᓇᓚᐅᖅᓯᒪᑉᓗᖓ ᐊᖅᑭᐅᒪᕝᕕᒃᑯᓐᓂᒃ ᑕᐃᑉᓱᒪᓂ − 2013-ᒥ ᐅᕝᕙᓘᕝᕙᑭᐊᖅ 2014-ᒥ − ᑲᒪᔨᐅᓚᐅᖅᑐᑦ ᒪᒃᑯᒃᑐᑦ ᐃᑎᖅᑕᕐᕕᖓᓂᒃ.

“ᐊᖏᖅᑕᐅᓕᓚᐅᕋᒪ ᑯᑭᒃ ᐸᐃᑲᒧᑦ ᐊᖅᑭᐅᒪᕝᕕᒃᑯᓐᓂᒃ ᒥᙳᐊᕈᒪᒐᑉᑯ ᒪᒃᑯᒃᑐᑦ ᐃᑎᖅᑕᕐᕕᖓ, ᐊᒻᒪᓗ ᐊᖏᖅᑕᐅᑉᓗᖓ ᐃᓕᓐᓂᐊᕐᕕᒡᔪᐊᕐᒧᑦ ᐊᑐᕈᒪᒐᑉᑭᑦ ᐊᒥᐊᒃᑯᒋᔭᐅᓚᐅᖅᑐᑦ ᒥᙳᑏᑦ, ᒥᙳᐊᓕᓚᐅᖅᑕᕋ ᒪᒃᑯᒃᑐᑦ ᐃᑎᖅᑕᕐᕕᖓᑕ ᓯᓚᑎᖓ.

ᑎᑎᕋᐅᔭᕈᔾᔭᐅᓯᒪᔪᑦ Hᐊᒻᓚᒃᑯᑦ ᓴᕐᓕᑦ ᖃᕆᑕᕐᒧᑦ ᑎᑎᕋᐅᔭᔪᔪᐊᓗᒃ ᒪᒃᑯᒃᑐᖅ ᐊᕐᕕᐊᕐᒥᐅᑕᖅ. ᐊᔾᔨ ᓴᕐᓕᑦ ᖃᕆᑕᕐᒥᙶᖅᑐᖅ

“ᐊᒥᓱᑦ ᓴᓂᕋᒃᑯᑦ ᒥᙳᐊᒐᒃᓴᑦ ᓴᖅᑭᑲᑕᓕᓚᐅᖅᑐᑦ ᑕᐃᑲᙵᑦ ᐱᒋᐊᖅᖢᒍ.”

ᓴᕐᓕᑦ ᐅᖃᖅᖢᓂ Hᐊᒻᓚᒃᑯᓐᓄᑦ ᖃᐅᔨᒋᐊᕐᕕᐅᑲᐅᑎᒋᓚᐅᕐᒪᑦ ᒪᒃᑯᒃᑐᑦ ᐃᑎᖅᑕᕐᕕᖓᑕ ᓯᓚᑎᖓ ᐱᐊᓂᑐᐊᕐᒪᒍ, ᑎᑎᕋᐅᔭᖁᔭᐅᑉᓗᓂ ᒪᕐᕉᖕᓂᒃ ᐱᓕᕆᕝᕕᖏᑦᑕ ᐃᓗᖏᓐᓂᒃ.

ᐅᖃᖅᖢᓂ Hᐊᒻᓚᒃᑯᑦ ᑎᑎᕋᐅᔭᖁᔨᒃᑲᓐᓂᓕᓚᐅᕐᒥᔪᑦ ᖃᑉᓯᑲᓪᓚᑦ ᐅᑭᐅᑦ ᐱᐊᓂᖕᒪᑕ.

“ᑎᑎᕋᐅᔭᖁᔨᓚᐅᖅᑐᑦ ᒥᙳᐊᖁᔨᑉᓗᑎᒃ ᓄᑖᖅ Hᐊᒻᓚᒃᑯᑦ ᑎᑎᕋᕐᕕᖓᑕ ᐃᓗᐊᓂ ᒪᑐᐃᖅᑕᐅᓂᐊᖅᑎᓪᓗᒍ 2016-ᒥ, ᐄᖑᖅᑰᖅᑐᖅ, ᐊᒻᒪᓗ ᖁᒃᓴᓇᕈᔪᓚᐅᖅᑐᖅ ᐊᖏᓂᖅᐹᖑᓚᐅᕐᒪᑦ ᓴᓂᕋᖅ ᑎᑎᕋᐅᔭᕐᕕᒋᓯᒪᖃᑦᑕᖅᑕᒃᑲᓂᒃ.

“ᒥᙳᑏᑦ ᖃᓄᖅ ᐊᑐᓪᓚᑦᑖᕆᐊᒃᓴᖅ ᖃᐅᔨᒪᓚᐅᙱᓐᓇᑉᑭᑦ, ᑭᓯᐊᓂ ᑎᖕᒥᑳᖅᑐᓂᒃ ᐊᔪᕐᓇᙱᓐᓂᖅᓴᐅᓚᐅᖅᑐᑦ ᓯᐊᒻᒪᑦᑎᐊᕐᓂᖅᓴᐅᖃᑦᑕᕐᒪᑕ.

“ᐃᖢᐊᕐᓂᕆᓚᐅᖅᑕᖓ ᐱᕕᒃᓴᖃᖅᑎᑕᐅᑦᑎᐊᓚᐅᕋᒪ ᐃᓱᒪᒃᓴᖅᓯᐅᕈᓐᓇᕐᓂᕐᒧᑦ ᓱᓇᓂᒃ ᒥᙳᐊᕈᒪᖕᒪᖔᕐᒪ.”

ᓴᕐᓕᑦ ᐅᖃᖅᖢᓂ ᐊᖏᕐᕋᒥᓂᒃ ᐃᓂᖃᕐᒪᑦ ᒥᙳᐊᕐᕕᒋᕙᒃᑕᒥᓂᒃ, ᑎᑎᕋᕐᕕᒋᕙᒃᑕᒥᓂᒃ ᐊᒻᒪᓗ ᐅᖃᓕᒫᕐᕕᒋᕙᒃᑕᒥᓂᒃ. ᐅᖃᖅᖢᓂ ᐱᖁᑎᖃᐅᑦᑎᐊᕋᒥ − ᐊᒥᓱᑦ ᑐᓂᕐᕈᓯᐊᖏᑦ − ᐊᒻᒪᓗ ᐊᒥᓱᓂᒃ ᐱᓕᕆᖃᑎᖃᖃᑦᑕᕋᒥ ᐊᖏᕐᕋᒥᓂᒃ.

“ᐊᔾᔨᒌᙱᑦᑑᑕᐅᔪᓂᒃ ᒥᙳᑎᓂᒃ ᐊᑐᖃᑦᑕᖅᑐᖓ ᑎᑎᕋᐅᑎᓂᒡᓗ ᐊᒻᒪᓗ ᒫᓐᓇᐅᔪᖅ ᖃᕆᑕᐅᔭᒃᑯᑦ ᐱᓕᕆᕙᓪᓕᐊᓕᖅᖢᖓ, ᖃᕆᑕᐅᔭᕋᓛᒃᑯᑦ ᑎᑎᕋᐅᔭᖅᐸᒃᖢᖓ ᑕᐃᒪᓐᓇᕐᓚᒃ.

ᐃᓄᖕᓄᑦ ᐊᐱᕆᔭᐅᖃᑦᑕᖅᓯᒪᖕᒥᔪᖓ ᑲᒃᑭᓂᖏᓐᓂᒃ ᑎᑎᕋᐅᔭᖁᔭᐅᑉᓗᖓ ᐅᕝᕙᓘᓐᓃᑦ ᓇᖕᒥᓂᖁᑎᖏᑦᑕ ᓇᓗᓇᐃᒃᑯᑕᒃᓴᖏᓐᓂᒃ ᐱᒋᐊᖅᑎᑦᑐᒪᔭᖏᓐᓂᒃ.

ᐅᖃᐅᔾᔨᕙᒃᑐᑦ ᓱᓇᓂᒃ ᑕᑯᔪᒪᖕᒪᖔᕐᒦᒃ ᐊᒻᒪᓗ ᐱᔪᓐᓇᕐᓂᓗᒃᑖᒃᑯᑦ ᓴᖅᑭᑎᑦᑎᓇᓱᖃᑦᑕᖅᑐᖓ ᐱᔪᒪᔭᖏᓐᓂᒃ. ᐱᓕᕆᐊᕆᕙᒃᑕᒃᑲ ᒫᓐᓇᐅᔪᖅ, ᐊᓯᒃᑲᓄᑦ ᑐᕌᖓᒐᔪᒃᑐᑦ ᐊᒻᒪᓗ ᖃᓄᐃᒋᙱᑦᑎᐊᖅᑕᒃᑲ.

“ᐊᒥᓲᔪᑦ ᑕᑯᑎᑦᑐᓐᓇᙱᑕᒃᑲ ᐊᓯᖏᓐᓄᑦ ᐃᓄᖕᓄᑦ ᐅᕙᒻᓂᙶᕐᓂᖅᓴᐅᖕᒪᑕ ᐃᓱᒪᒋᖃᑦᑕᖅᑕᒃᑯᑦ.”

ᓴᕐᓕᑦ ᐅᖃᖅᖢᓂ ᐃᓱᒪᒃᓴᖅᓯᐅᖅᐸᓪᓕᐊᒐᒥ ᑎᑎᕋᐅᔭᕐᓂᕐᒧᑦ ᐃᓕᓐᓂᐊᕆᐊᕈᒪᑉᓗᓂ ᐊᑕᐅᓯᕐᒥᒡᓘᓐᓃᑦ ᐅᑭᐅᒥ.

ᑕᐃᑲᙵᑦ, ᐃᓕᓐᓂᐊᖅᑐᓕᕆᓂᒃᑯᑦ ᑎᑎᕋᐅᔭᕐᓂᕐᒧᑦ ᐱᓕᕆᒋᐊᕐᓂᖅᓴᐅᔪᒪᓂᐊᖅᖢᓂ, ᑕᐃᒪᓐᓇ ᐅᖃᖅᓯᒪᔪᖅ.

“ᐃᓕᓐᓂᐊᖅᑎᑦᑎᔨᐅᔪᒪᒐᒪ ᐃᓕᓐᓂᐊᖅᑎᑦᑎᖃᑦᑕᕐᓗᖓ ᑎᑎᕋᐅᔭᖅᑎᐅᔪᒪᔪᓂᒃ.

“ᓇᓕᐊᖕᓂᓪᓚᑦᑖᖅ ᐃᓕᓐᓂᐊᕐᕕᖕᒥᒃ ᐃᓱᒪᒃᓴᖅᓯᐅᖅᓯᒪᙱᑦᑐᖓ, ᑭᓯᐊᓂ ᐃᓱᒪᓯᒪᔪᖓ ᐊᑐᕚᓕᐊᕈᒪᑉᓗᖓ.

“ᖃᓄᓪᓚᑦᑖᖑᓂᐊᕐᒪᖔᑦ ᐃᓱᒪᒃᓴᖅᓯᐅᖅᑐᖓ ᓱᓕ.

“ᑕᐃᒪᐃᑦᑐᓕᕆᔨᐅᔪᒪᐃᓐᓇᕋᒪ, ᐱᔪᓐᓇᖅᓯᑐᐊᕈᒪ ᐃᓕᓐᓂᐊᒃᑲᓐᓂᕈᓐᓇᕐᓂᕐᒧᑦ.”