Skip to content

ᓄᑖᖅ ᐃᓕᑕᖅᓯᓂᖅ ᐅᖃᓕᒫᒐᖃᕐᕕᒃ ᖁᕕᐊᒋᔭᐅᑦᑎᐊᖅᑐᖅ ᑲᖏᖅᖠᓂᕐᒥ

ᓄᑖᖅ (ᐃᓕᑕᖅᓯᓂᖅ) ᓄᓇᕗᒥ ᐅᖃᐅᓯᓕᕆᓂᕐᒧᑦ ᑲᑎᒪᔨᒃᑯᑦ ᐅᖃᓕᒫᕐᕕᒃᑖᖓ ᑲᔪᓯᓂᖃᑦᑎᐊᖅᑐᖅ ᐊᑐᖅᑕᐅᖃᑦᑕᖅᑐᖅ ᒪᒃᑯᒃᑐᓄᑦ ᑲᖏᖅᖠᓂᕐᒥ.

ᖃᓇᒃ ᐃᓴᓗᒃ, ᓯᕗᓂᐊᓃᑦᑐᖅ ᓴᐅᒥᖅᖠᕐᒥ, ᑭᑎ ᑲᓇᓕ ᐊᒻᒪᓗ ᑯᕐᓯᑎᓐ ᖃᕝᕕᑦᑐᖅ ᖁᕕᐊᓱᑦᑎᐊᖅᑐᑦ ᐅᖃᓕᒫᕈᓐᓇᕋᒥᒃ ᓄᑖᒥ ᓄᓇᕗᒥ ᐅᖃᐅᓯᓕᕆᓂᕐᒧᑦ ᑲᑎᒪᔨᒃᑯᑦ ᐅᖃᓕᒫᕐᕕᒃᑖᖓᓂᒃ ᑲᖏᖅᖠᓂᕐᒥ ᓯᑎᐱᕆ 25-ᒥ.

RBC ᑮᓇᐅᔭᖃᕐᕕᐅᑉ ᐃᓚᖓᓃᑦᑐᖅ ᑲᖏᖅᖠᓂᕐᒥ, ᑭᓕ ᓕᓐᑎᐅᓪ ᐅᖃᖅᖢᓂ ᐃᓱᒪᓕᐅᓚᐅᖅᑐᒡᒎᖅ ᑲᔪᓯᑎᑕᐅᖁᑉᓗᒍ ᐅᖃᓕᒫᒐᖃᕐᕕᒃ ᑲᖏᖅᖠᓂᐅᑉ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐃᓱᒪᓕᐅᖅᑳᖅᑎᓪᓗᒋᑦ ᒪᑐᓯᓂᐊᕐᓂᕐᒧᑦ ᐅᖃᓕᒫᒐᖃᕐᕕᖕᒥᒃ ᒫᓂ ᐅᓗᔪᒃ ᐃᓕᓐᓂᐊᕐᕕᖓᓂᒃ.

ᓕᓐᑎᐅᓪ ᐅᖃᖅᖢᓂ ᐃᓕᑕᖅᓯᓂᒃᑯᑦ ᑲᒪᒋᐊᕐᓂᐊᓕᓚᐅᖅᑑᒐᓗᐊᑦ ᒫᓂ ᐅᓗᔪᒃ ᐃᓕᓐᓂᐊᕐᕕᖕᒥ ᐅᖃᓕᒫᒐᖃᕐᕕᖕᒥ ᑭᓯᐊᓂ ᑐᓴᖅᑎᑕᐅᓚᐅᕐᒪᑕ ᐃᓂᖓ ᐊᓯᐊᒍᑦ ᐊᑐᖅᑕᐅᓂᐊᓕᕐᓂᖓᓄᑦ.

ᐅᖃᖅᖢᓂ ᒫᓐᓇᑲᐅᑎᒋ ᑐᒡᓕᐊᓄᑦ ᐸᕐᓇᐅᑎᒥᓄᑦ ᓅᓕᓚᐅᕐᓂᕐᒥᓄᑦ, ᐋᖅᑭᒋᐊᑲᐅᑎᒋᔪᓐᓇᖁᑉᓗᒍ, ᐊᒻᒪᓗ ᒪᑐᐃᖅᓯᑉᓗᑎᒃ ᒥᑭᔪᒥᒃ ᐅᖃᓕᒫᒐᖃᕐᕕᖕᒥᒃ ᐃᑭᙳᑎᒌᑦ ᐱᓕᕆᕝᕕᐅᑉ ᐃᓂᖓᓂᒃ ᐊᑐᖅᑐᐊᖅᑕᒥᓂᒃ ᐱᕈᖅᓴᐃᔨᒃᑯᓐᓂᒃ.

ᒪᑐᐃᓚᐅᖅᑐᖅ ᓯᑎᐱᕆ 8-ᒥ, ᐊᒻᒪᓗ ᒪᑐᐃᖓᑎᓐᓇᓱᖃᑦᑕᕐᓂᐊᖅᑕᖅᐳᑦ ᓴᓇᑦᑕᐃᓕᐅᕌᓂᒃᑳᖓᑦ ᑕᓪᓕᒻᒥᕐᒧᑦ 9:00-ᒥ ᐅᑉᓛᒃᑯᑦ ᐅᑉᓗᕈᒥᑕᕐᓇᒧᑦ, ᐊᖓᔪᖅᑳᕆᔭᐅᔪᑦ ᓄᑕᕋᓛᓕᔭᕐᓗᑎᒃ ᑕᐃᑯᙵᐅᔪᓐᓇᖅᓯᖃᑦᑕᖅᖢᑎᒃ 1:00-ᒥ 3:00-ᒧᑦ ᐅᑉᓗᒃᑯᑦ, ᐃᓕᓐᓂᐊᖅᑐᓪᓗ ᐃᓕᓐᓂᐊᕌᓂᒃᑳᖓᒥᒃ ᑕᐃᑯᙵᐅᔪᓐᓇᖅᓯᖃᑦᑕᖅᖢᑎᒃ,” ᑕᐃᒪᓐᓇ ᐅᖃᖅᖢᓂ ᓕᓐᑎᐅᓪ.

“ᐃᓕᓐᓂᐊᖅᑐᑦ ᐃᓕᓐᓂᐊᕌᓂᒃᑳᖓᑕ ᐃᓕᓐᓂᐊᖅᑐᓄᑦ ᒪᑐᐃᖓᓕᓲᖅ 3:30-ᒥ 6:00-ᒧᑦ ᐅᓐᓄᒃᑯᑦ, ᐊᒻᒪᓗ ᒪᑐᐃᖓᓕᖅᐸᒃᖢᓂ ᐃᓄᖕᓄᑦ, ᐅᑭᐅᓕᖕᓄᑦ 14-ᓂᒃ ᐅᖓᑖᓄᓪᓗ, 6:00-ᒥ 8:00-ᒧᑦ ᐅᓐᓄᒃᑯᑦ ᐱᓇᓱᐊᕈᓯᐅᑉ ᐃᓗᐊᓂ.

“ᐊᒻᒪᓗ, ᓴᓇᑦᑕᐃᓕᐊᕈᓯᕐᒥ, ᐅᖃᓕᒫᒐᖃᕐᕕᒃ ᒪᑐᐃᖓᓲᖅ ᐃᓄᖕᓄᑦ 10:00-ᒥ ᐅᑉᓛᒃᑯᑦ 4:00-ᒧᑦ ᐅᑉᓗᒃᑯᑦ.”

ᓕᓐᑎᐅᓪ ᐅᖃᖅᖢᓂ ᐃᓕᑕᖅᓯᓂᖅ ᐱᓕᕆᓪᓚᕆᖕᒪᑦ ᑕᐃᑲᓂ ᐅᖃᓕᒫᒐᖃᕐᕕᒃ ᐱᕈᖅᐸᓪᓕᐊᖁᑉᓗᒍ ᐊᒻᒪᓗ ᐊᒥᓱᒃᑲᓐᓂᕐᓂᒃ ᐅᖃᓕᒫᒐᖅᑖᒃᑲᓐᓂᕈᓐᓇᖁᑉᓗᒍ.

ᐅᖃᖅᖢᓂ ᐃᓱᒪᒋᔭᐅᔪᓂᒃ ᑐᓴᖃᑦᑕᕈᒪᑎᓪᓗᒋᑦ ᕿᔪᖁᑎᑯᓗᖕᒥᒃ ᐋᖅᑭᒃᓯᓯᒪᔪᑦ ᐃᓄᐃᑦ ᑎᑎᕋᕈᓐᓇᖃᑦᑕᖁᑉᓗᒋᑦ ᐃᓱᒪᒋᔭᕐᒥᓂᒃ ᖃᓄᖅᑑᒃᑲᓐᓂᕋᔭᕐᒪᖔᑕ ᐊᒥᓱᑦ ᓄᑕᖅᑲᑦ ᐃᓐᓇᐃᓪᓗ ᐅᖃᓕᒫᒐᖃᕐᕕᖕᒥ ᐊᑐᖃᑦᑕᖅᑐᑦ ᑎᑎᕋᖃᑦᑕᓕᐊᓂᒃᑐᑦ ᐃᓱᒪᒋᔭᕐᒥᓂᒃ, ᐊᒻᒪᓗ ᐊᒥᓱᑦ ᐃᓄᐃᑦ ᐊᓕᐊᓇᐃᒍᓱᑐᐃᓐᓇᖅᑐᑦ ᐃᓂᑖᖑᔪᒥᒃ.

ᓴᓚᐅᓱᖕᓇᑦᑎᐊᖅᑐᖅ ᑐᙵᓇᑦᑎᐊᖅᖢᓂᓗ ᐅᖃᓕᒫᒐᖃᕐᕕᒃ, ᑳᐱᖃᖅᖢᓂ ᑏᖃᖅᖢᓂᓗ, ᑕᒧᐊᔭᒃᓴᖃᖃᑦᑕᖅᖢᓂᓗ ᖃᓄᐃᑦᑐᑐᐃᓐᓇᕐᓂᒃ.

“ᐊᐅᓪᓛᑦᑎᐊᖅᑑᔭᖅᑐᖅ, ᐋᖅᑭᐅᒪᓂᖓ ᑕᐃᒪᐃᑎᓪᓗᒍ, ᐃᓐᓇᕐᓗᑦ ᐃᓂᑕᖃᖅᖢᓂ, ᓂᐸᐃᕝᕕᐅᔭᕆᐊᓕᖕᒥᒡᓗ ᐃᒡᓗᑕᖃᖅᖢᓂ ᓄᑕᖅᑲᓄᑦ ᐅᖃᓕᒫᕈᒪᔪᓄᑦ ᐊᒻᒪᓗ ᐱᙳᐊᕐᕕᒃᑕᖃᖅᖢᓂ ᐱᙳᐊᖃᖅᑐᓂᒃ ᐊᒻᒪᓗ ᓄᑕᖅᑲᓄᑦ ᐅᖃᓕᒫᒐᓂᒃ ᐃᓗᓕᖃᖅᖢᓂ.

“ᓴᓇᙳᐊᕐᕕᒃᑕᓕᒃᑕᐅᖅ ᐊᒻᒪᓗ ᐃᓕᓐᓂᐊᕈᑎᓂᒃ ᐃᓗᓕᖃᖅᑐᖅ ᓄᑕᖅᑲᑦ ᑎᑎᕋᕆᐅᖅᓴᔪᓐᓇᖁᑉᓗᒋᑦ ᐅᖃᓕᒫᕆᐅᖅᓴᔪᓐᓇᖁᑉᓗᒋᑦ ᐅᑉᓗᑕᒫᒃᑯᑦ ᐃᓕᓐᓂᐊᖅᑐᑦ ᐃᓕᓐᓂᐊᕌᓂᒃᑳᖓᑕ. ᖃᓄᐃᓕᐅᕈᑎᒃᓴᑦ ᐊᓯᔾᔨᕋᓱᖃᑦᑕᖅᑕᖅᐳᑦ ᐅᑉᓗᑕᒫᒃᑯᑦ ᓄᑖᓂᒃ ᓄᑕᖅᑲᑦ ᐱᓕᕆᐊᖃᕈᓐᓇᖁᑉᓗᒋᑦ.

“ᐊᒻᒪᓗᑦᑕᐅᖅ ᐃᒐᕝᕕᖃᖅᑐᖅ ᑕᒧᐊᔭᒃᓴᖃᕐᕕᐅᔪᒥ.”

ᓕᓐᑎᐅᓪ ᐅᖃᖅᖢᓂ, ᐅᑉᓗᒥᒧᑦ, ᐃᓕᓐᓂᐊᖅᑐᑦ ᐃᓕᓐᓂᐊᕌᓂᒃᑳᖓᑕ ᖁᕕᐊᒋᔭᐅᓂᖅᐹᖑᔫᔭᖅᑐᖅ ᓄᑖᒥ ᐅᖃᓕᒫᒐᖃᕐᕕᖕᒥ.

ᐅᖃᖅᖢᓂ ᓄᕙᒡᔪᐊᕐᓂᖅ-19 ᐱᔾᔪᑎᒋᑉᓗᒍ, ᐅᖃᓕᒫᒐᖃᕐᕕᒃ ᐃᓄᖃᕈᓐᓇᖃᑦᑕᖅᑐᖅ 25-ᓂᒃ ᓄᑕᖅᑲᓂᒃ ᖃᖓᑐᐃᓐᓇᖅ.

“ᓄᑕᖅᑲᑦ ᐅᓪᓚᔪᐊᖅᖢᑎᒡᓘᓐᓃᑦ ᐅᖃᓕᒫᒐᖃᕐᕕᓕᐊᓲᑦ ᐃᓕᓐᓂᐊᕌᓂᒃᑳᖓᒥᒃ 25-ᖑᔪᓂᒃ ᐱᖃᑕᐅᔪᓐᓇᕈᒪᑉᓗᑎᒃ ᐃᑎᕈᓐᓇᖅᑐᓂᒃ.

“ᐊᓕᐊᓇᐃᒍᓱᑦᑎᐊᓲᑦ ᖃᐃᔭᕆᐊᒃᓴᖅ, ᐃᑎᖅᑎᑦᑎᑦᑕᐃᓕᔭᕆᐊᖃᖃᑦᑕᖅᑐᒍᓪᓘᓐᓃᑦ ᐃᓚᖏᓐᓂᒃ 25-ᖑᓕᕌᖓᑕ ᓄᑕᖅᑲᑦ ᖃᐃᓯᒪᔪᑦ. ᑕᒪᓐᓇ ᐅᔾᔨᖅᑐᑦᑎᐊᖅᑕᖅᐳᑦ − ᓄᑕᖅᑲᑦ ᐊᑎᓕᐅᖃᑦᑕᕆᐊᓖᑦ ᖃᐃᔭᕌᖓᑕ − ᑕᐃᑉᑯᐊᑦᑕᐃᓐᓇᖅ ᓄᑕᖅᑲᑦ ᐅᑉᓗᑕᒫᒃᑯᑦ ᖃᐃᑐᐃᓐᓇᖃᑦᑕᖁᓇᒋᑦ.

“ᐊᓕᐊᓇᐃᑦᑐᖅ ᑕᒪᓐᓇ ᖁᕕᐊᒋᔭᐅᖕᒪᑦ ᐊᒻᒪᓗ ᐃᓄᐃᑦ ᖃᐃᔪᒪᖃᑦᑕᕐᒪᑕ. ᐃᓄᖕᓄᑦ ᐃᑎᖅᑕᕐᕕᓪᓚᕆᒃ ᐅᖃᓕᒫᒐᖃᕐᕕᐅᑉᓗᓂᓗ.

“ᑕᒪᓐᓇ ᐃᑲᔫᑎ ᑮᓇᐅᔭᓕᖅᑕᐅᓯᒪᔪᖅ ᒫᑦᓯ 2021-ᒧᑦ, ᐊᒻᒪᓗ ᑕᒪᓐᓇ ᓄᓇᓕᖕᒧᑦ ᐱᒋᔭᐅᔪᒪᑦᑎᐊᖅᐸᑦ, ᑮᓇᐅᔭᖅᑖᒃᑲᓐᓂᕋᓱᖕᓂᐊᖅᑐᒍᑦ ᒪᑐᐃᖓᒃᑲᓐᓂᕈᓐᓇᖁᑉᓗᒍ.”