ᐃᑲᔪᖅᑐᐊᓘᓚᐅᖅᑐᑦ ᐊᒥᓱᑦ ᓂᖀᑦ ᓱᕈᖁᓇᒋᑦ ᓂᐅᕕᕐᕕᒃ ᑲᖏᖅᖠᓂᕐᒥ ᖃᒥᑦᑐᐊᓘᓚᐅᖅᑎᓪᓗᒍ ᐅᑉᓛᒃᑯᑦ ᓯᑎᐱᕆ 1-ᒥ. ᓂᐅᕕᕐᕕᖕᒥ ᐅᖃᓪᓚᒃᑎ ᐃᓕᓐ ᑯᕐᑎᔅ ᕕᓂᐲᒃᒥᐅᑕᖅ, ᒪᓂᑐᐸᒥ, ᐅᖃᖅᖢᓂ ᑕᒪᕐᒥᒎᖅ ᖁᐊᖅᓯᐅᕝᕕᑦ ᖃᒥᓚᐅᕐᒪᑕ ᓄᓇᓕᐅᑉ ᐃᓚᖓ ᖃᒥᒻᒪᑦ, ᐃᓚᐅᖃᑕᐅᑉᓗᒋᑦ ᑕᒪᕐᒥᓗᒃᑖᖅᑲᔭᑦ ᐃᑭᑦᑕᖅᑐᑦ ᐊᓯᖏᓪᓗ ᐃᑯᒪᓅᖅᑐᑦ.
ᐅᖃᖅᖢᓂᓗ ᑕᐃᒪᐃᑦᑐᒃᑰᖅᑎᓪᓗᒋᑦ ᐃᑭᑦᑕᖅᑐᓕᕆᔨᑕᖃᓚᐅᙱᑦᑐᖅ ᑲᖏᖅᖠᓂᕐᒥ.
“ᕿᓚᒻᒥᐅᓂᖅᐹᒃᑯᑦ ᑎᑭᑦᑐᓐᓇᓚᐅᕐᓂᖏᑦ 1:00 ᐅᑉᓗᒃᑯᑦ ᑎᖕᒥᓲᖅ ᑎᑭᑉᐸᑦ, ᐊᒻᒪᓗ ᑕᒪᓐᓇ ᓇᓗᓇᓚᐅᖅᖢᓂ ᓯᓚ ᐱᔾᔪᑎᒋᑉᓗᒍ,” ᑕᐃᒪᓐᓇ ᐅᖃᖅᖢᓂ ᑯᕐᑎᔅ.
“ᑎᑭᑦᑐᓐᓇᖅᓯᑕᐃᓐᓇᓚᐅᖅᑐᑦ ᐊᖃᒍᙳᕐᒪᑦ.
“ᖃᑉᓯᑲᓪᓚᖕᓂᒃ ᐃᓱᒫᓘᑎᖃᓚᐅᖅᑐᑦ ᓴᓇᔨᕗᑦ ᑕᐃᑲᓂ ᐅᑉᓛᖓᓂᒃ, ᐊᒻᒪᓗ ᓯᕗᓪᓕᖅᐸᐅᖃᑕᐅᑉᓗᓂ ᖃᓄᖅ ᓱᕈᕈᓐᓇᖅᑐᑦ ᓂᕿᑦ ᑲᒪᒋᔭᐅᓇᔭᕐᒪᖔᑕ ᐊᒻᒪᓗ ᑕᐃᑲᓂ ᐃᓱᒪᓕᐅᓕᓚᐅᖅᑐᑦ ᕿᒫᕝᕕᖕᒥᐅᓂᒃ ᐃᑲᔪᖅᑎᑖᕈᒪᑉᓗᑎᒃ.”
ᑯᕐᑎᔅ ᐅᖃᖅᖢᓂ ᓴᓇᔩᒡᒎᖅ ᒪᑐᓯᓚᐅᖅᑐᑦ ᓂᐅᕕᕐᕕᖕᒥ ᐊᒻᒪᓗ ᑲᒪᓂᖅᓴᐅᓕᖅᖢᑎᒃ ᐸᐸᑕᕋᓱᖕᓂᐊᕐᓂᕐᒧᑦ ᖁᐊᖑᔭᕆᐊᓕᖕᓂᒃ.
ᐅᖃᖅᖢᓂ ᓂᐅᕕᕐᕕᒎᖅ ᑐᓂᓯᔪᒪᓚᐅᖅᑐᖅ ᖁᐊᖑᑎᑕᐅᙱᓐᓇᕈᓐᓇᖏᑦᑐᓂᒃ ᓂᕆᔭᒃᓴᐅᑎᓪᓗᒋᑦ ᓱᓕ.
“ᔪᐃᔅ ᑭᓐᑦ ᑲᑕᐅᔭᖅ ᕿᒫᕝᕕᒃᑯᓐᓂᕐᒥᐅᑕᖅ ᐋᖅᑭᒃᓱᐃᓕᓚᐅᖅᑐᖅ ᓂᕿᓂᒃ ᑐᓂᐅᖅᑲᐅᑎᒃᓴᓂᒃ − ᐃᒻᒪᖄ $10,000−ᑐᖅᑐᑦ ᓱᕈᕈᓐᓇᖅᑐᑦ − ᐃᓚᒌᒃᑐᓄᑦ ᑐᓂᐅᖅᑲᐅᑕᐅᓚᐅᖅᑐᑦ ᐊᒻᒪᓗ ᑎᒥᐅᔪᓄᑦ ᓄᓇᓕᖕᒥ ᔪᐃᔅ ᐃᓱᒪᖅᓲᑎᒋᑉᓗᓂᒋᑦ ᑭᒃᑯᓐᓅᕐᓂᐊᕐᓂᖏᓐᓄᑦ.
“ᓱᕈᕈᓐᓇᖅᑐᑦ ᓂᖀᑦ ᔪᐃᔅ ᑐᓂᐅᖅᑲᐅᑎᒋᓚᐅᖅᑕᖏᑦ ᐱᔭᕆᐊᖃᕋᓱᒋᔭᖏᓐᓄᑦ. ᐅᒃᐱᕆᑦᑎᐊᓚᐅᖅᑕᖅᐳᑦ ᑐᓂᐅᖅᑲᐃᓂᐊᕐᓂᖓᓄᑦ ᐊᔾᔨᒌᒃᑎᑦᑎᓗᓂ ᓄᓇᓕᖕᒥᐅᓂᒃ.
“ᐳᕈᓄ ᓚᕗᕐᑐᕐ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᓐᓂᕐᒥᐅᑕᖅ ᑕᓯᕐᔪᐊᕐᒥ ᐅᔭᕋᖕᓂᐊᖅᑐᓂᒃ ᓇᒃᓯᐅᔾᔨᓚᐅᖅᑐᖅ 40 feet-ᓂᒃ ᐊᖏᓂᓕᖕᒥᒃ ᖁᐊᖃᐅᒻᒥᒃ, ᐃᑲᔫᑕᐅᖁᑉᓗᒍ ᖁᔭᒋᑦᑎᐊᓚᐅᖅᑕᖅᐳᑦ ᐃᑲᔪᕐᓂᖏᓐᓄᑦ.
“ᐱᓕᕆᕝᕕᖕᒥᓂᙶᖅᑐᒥᒃ ᑕᒪᐅᙵᐅᔾᔨᓚᐅᖅᑐᑦ. ᐋᖅᑭᒃᓱᓚᐅᖅᑕᖅᐳᑦ ᖁᐊᖃᐅᑎᐊᓗᒃᑎᑐᑦ ᖁᐊᖅᓯᐅᕝᕕᑦᑎᓐᓂᙶᖅᑐᑦ ᑕᐃᑯᙵ ᐃᓕᐅᖅᑲᓕᓚᐅᕋᑉᑎᒍᑦ.”
ᑯᕐᑎᔅ ᐅᖃᖅᖢᓂ ᓂᕿᓂᒎᖅ ᐊᔾᔭᖅᑐᖅᑎᖏᑦ ᑲᖏᖅᖠᓂᕐᒥ, ᓴᕐᓕᐊᒃᑯᑦ ᓇᓗᕈᔪᒃᑑᔭᓚᐅᖅᑐᑦ ᖃᓄᐃᓕᐅᕆᐊᖃᕐᒪᖔᕐᒥᒃ ᐃᑲᔪᕐᓂᐊᕐᓗᑎᒃ.
ᑭᓯᐊᓂᓕ, ᐅᖃᖅᖢᓂ, ᓴᕐᓕᐊᒃᑯᒡᒎᖅ (ᕆᑦᓱᑦ ᑳᓇᓕ) ᐃᑲᔪᓪᓚᕆᓕᓚᐅᖅᑐᖅ ᓂᐅᕕᕐᕕᒃᑯᑦ ᐃᑲᔪᖅᑕᐅᔭᕆᐊᖃᓕᕐᒪᑕ.
“ᐃᒪᓐᓈᖅᑐᐃᓚᐅᖅᑐᑦ ᖁᐊᖅᓯᐅᕝᕕᐊᓗᒃ ᑕᒪᐅᙵᐅᔾᔭᐅᓕᕐᒪᑦ ᓄᓇᓕᖕᒧᑦ ᐊᒻᒪᓗ ᐊᑐᓚᐅᖅᑐᓪᓘᓐᓃᑦ ᓅᑦᑎᔾᔪᑎᒥᒃ ᓄᓇᒃᑰᕈᑎᕐᔪᐊᕐᒥᒃ ᖁᐊᖃᐅᑎᐊᓗᒃ ᓅᑕᐅᔪᓐᓇᖁᑉᓗᒍ ᐃᓂᒋᓂᐊᖅᑕᖓᓄᑦ.
“ᑕᒪᕐᒥᒃ ᐱᓕᕆᔪᑦ ᐱᓕᕆᑦᑎᐊᖅᑐᐊᓘᓚᐅᖅᑐᑦ ᑕᒪᕐᒥᒃ ᑐᖅᑯᖅᑎᕆᐊᓖᑦ ᓅᑕᐅᔪᓐᓇᖁᑉᓗᒋᑦ, ᐴᖅᑐᖅᑕᐅᑦᑎᐊᕈᓐᓇᖁᑉᓗᒋᑦ ᐊᒻᒪᓗ ᐃᓂᖓᓅᖅᑕᐅᖁᑉᓗᒋᑦ. ᐊᒥᓱᒻᒪᕆᐊᓗᐃᑦ ᐃᓄᐃᑦ ᐃᑲᔪᓚᐅᖅᑐᑦ.
“ᐱᓕᕆᕐᔪᐊᕐᓇᓚᐅᖅᑐᖅ ᑭᓯᐊᓂ ᑮᓇᐅᔭᐃᙱᓐᓂᖅᓴᐅᓚᐅᖅᑐᒍᑦ 20,000 ᐸᐅᓐᑯᑦ ᖁᐊᖑᔭᕆᐊᓕᒃᑯᑦ, ᐃᓚᐅᖃᑕᐅᑉᓗᒋᑦ ᐃᖢᐊᖅᓴᐅᑏᑦ.”