ᖁᐊᓴ ᑯᓱᒐᖅ ᐊᔾᔨᐅᙱᑦᑐᒃᑯᑦ ᑕᐅᑐᕐᕉᖅᑐᖅ ᓄᓇᕗᒥ 21-ᓂᒃ ᐅᑭᐅᓂᒃ ᖄᖏᖅᓯᒪᔪᓂᒃ ᐊᑖᑕᐅᑉᓗᓂ, ᓄᓇᒥᓂᒡᓗ ᑐᓴᐅᒪᓇᓱᒃᐸᒃᖢᓂ ᐃᓚᐅᖃᑕᐅᑦᑎᐊᕋᓱᒃᐸᒃᖢᓂᓗ, ᓯᐲᓰᒃᑯᓐᓂᓗ ᐅᖃᓪᓚᒃᑎᐅᓚᐅᖅᖢᓂ, ᓄᓇᓕᖕᒥᓗ ᒪᐃᔭᒋᔭᐅᓚᐅᖅᖢᓂ, ᒪᓕᒐᓕᐅᖅᑎᐅᑉᓗᓂ ᐊᒻᒪᓗ ᓄᓇᕗᒥ ᒥᓂᔅᑕᐅᖃᑕᐅᑉᓗᓂ.
ᑐᙵᓇᑦᑎᐊᖅᖢᓂ ᒪᓕᒐᓕᐅᖅᑎᐅᔪᖅ ᐊᒻᒪᓗ ᐅᐃᒋᔭᐅᑉᓗᓂ ᐊᑖᑕᐅᔪᖅ ᐊᒻᒪᓗ ᓄᓇᒋᔭᕐᒥᓂᒃ ᑲᒪᒃᑲᐅᔪᖅ, ᐊᖏᕐᕋᒥᓂᒃ ᐊᐱᖅᓱᖅᑕᐅᒐᔪᒃᑐᖅ ᑲᑎᒪᔪᓂᒡᓗ ᐊᒻᒪᓗ ᐸᑦᑕᖃᑕᐅᑉᓗᓂ (Poker) ᐅᕝᕙᓘᓐᓃᑦ ᓇᐅᒃᑲᖅᑕᖅᖢᓂ.
ᐃᓄᑦᑎᐊᕚᓗᒃ, ᐃᖕᒥᓂᒃ ᐊᔪᙱᓐᓂᕐᒥᓂᒃ ᐅᒃᐱᕈᓱᑦᑎᐊᖅᑐᖅ, ᐅᖃᕈᒪᔭᕌᖓᒥ ᐅᖃᖅᑕᐃᓕᙱᑦᑐᖅ, ᐸᒡᕕᒍᓱᖃᑦᑕᖅᑐᖅ ᑕᐃᑉᑯᓂᙵ ᐅᖃᖅᐸᒃᑐᓂᒃ ᐱᐊᓂᒃᑕᐅᔪᓐᓇᙱᓐᓂᕋᐃᔪᓂᒃ, ᖃᐅᔨᓇᓱᒃᐸᒃᑐᓂᒃ ᖃᓄᖅ ᐋᖅᑭᒃᓯᔪᓐᓇᕐᒪᖔᑦ.
ᐊᒻᒪᓗ ᑕᐅᑐᕐᕉᖅᑐᖅ ᓄᓇᕗᒥ ᓯᕗᓪᓕᖅᐹᓂᒃ 21-ᓂᒃ ᐅᑭᐅᖃᓕᖅᑎᓪᓗᒍ ᑕᐃᒪᓐᓇᕐᓚᑦᑎᐊᖅ, ᐅᔾᔨᕈᓱᒃᑐᖅ ᓈᒻᒪᙱᑦᑐᓂᒃ ᑭᓯᐊᓂ ᑕᐅᑐᖕᓂᖅᓴᐅᓇᓱᓲᖅ ᐱᐊᓂᖅᓴᓂᒃ ᓴᖅᑭᓯᒪᔪᓂᒃ ᓄᓇᕗᒥ ᐱᒋᐊᓕᓵᖅᓯᒪᑎᓪᓗᒍ.
ᑯᓱᒐᖅ ᐅᖃᖅᖢᓂ ᓄᓇᕗᑦ, ᐃᖕᒥᒃᑯᑦ, ᓴᖅᑭᑎᑦᑎᓯᒪᔪᖅ ᐊᓯᔾᔨᖅᓯᒪᓂᖅᐹᖑᔪᓂᒃ ᐃᓱᒪᒋᔭᐅᔪᓐᓇᖅᑐᒃᑯᑦ − ᒐᕙᒪᒋᔭᐅᔪᖅ ᐃᓗᓕᖃᕐᓂᖅᓴᐅᑉᓗᓂ ᓄᓇᕗᒥ ᐃᓅᓚᐅᖅᓯᒪᔪᓂᒃ ᐱᕈᖅᓴᖅᑕᐅᓯᒪᔪᓂᒡᓗ.
ᐅᖃᖅᖢᓂ ᓴᖅᑭᓚᐅᖅᓯᒪᑎᓪᓗᒍ, ᑕᐅᑐᕐᕉᖅᑕᐅᓯᒪᑐᐃᓐᓇᓚᐅᕐᒪᑦ ᒫᓐᓇᓵᖑᕐᓚᓚᐅᖅᑐᖅ ᐊᒻᒪᓗ ᐅᑉᓗᒥᐅᓕᖅᑐᖅ ᑖᑉᑯᐊ ᐃᓄᐃᑦ ᐃᓱᒪᓕᐅᕐᓂᐊᓕᖅᑐᑦ ᓄᓇᕗᑦ ᓇᒧᑦ ᑐᕌᖅᐸᓪᓕᐊᓂᐊᕐᒪᖔᑦ.
“ᓄᓇᕗᒥᐅᑦ ᐅᖃᓗᒍᓐᓇᖃᑦᑕᓕᖅᑐᑦ ᓯᕗᓕᖅᑎᖏᓐᓄᑦ ᑐᕌᓪᓚᑦᑖᖅᑐᒃᑯᑦ − ᑕᒪᓐᓇ ᐊᓯᔾᔨᖅᓯᒪᓂᐅᔪᖅ ᑕᐃᑉᓱᒪᓂᐅᖓᓂᒃ − ᑕᒪᕐᒥᒃ ᓄᓇᕗᒥᐅᑦ − ᓂᐱᒥᓂᒃ ᓇᓂᓯᓯᒪᔪᑦ ᐊᒻᒪᓗ ᓂᑉᓕᐊᒃᑲᐅᓂᖅᓴᐅᓕᖅᑐᑦ,” ᑕᐃᒪᓐᓇ ᐅᖃᖅᖢᓂ ᑯᓱᒐᖅ.
“ᖃᕆᑕᐅᔭᓕᕆᔾᔪᑏᑦ ᐱᕚᓪᓕᖅᓯᒪᓪᓚᕆᖕᒪᑕ 21-ᓂᒃ ᐅᑭᐅᓂᒃ ᐱᕙᓪᓕᐊᔾᔪᑕᐅᓕᖅᖢᓂ ᓄᓇᕗᒥ ᐅᑉᓗᒥ − ᖃᓄᖅ ᑐᓴᐅᒪᖃᑦᑕᐅᑎᖃᑦᑕᕐᓂᑉᑎᓐᓄᑦ ᓄᓇᕗᒥ, ᖃᓄᕐᓗ ᐊᑐᖃᑦᑕᕐᓂᐊᕐᓂᑉᑎᓐᓄᑦ ᓄᓇᕗᒥ ᐊᒻᒪᓗ ᓄᓇᕗᒥᐅᑕᓂᒃ − ᐊᓯᔾᔩᓯᒪᔪᖅ ᐅᑉᓗᑕᒫᒃᑯᑦ ᐃᓅᓯᕆᕙᒃᑕᑉᑎᓐᓂᒃ ᐊᒻᒪᓗ ᖃᓄᖅ ᐊᐅᓚᑦᑎᖃᑦᑕᕐᒪᖔᑉᑕ.
“ᑕᒪᕐᒥᒃ ᑕᒪᒃᑯᐊ ᐃᑲᔪᖅᓯᒪᔪᑦ ᓄᓇᓖᑦ ᐊᐅᓚᑦᑎᓂᖅᓴᐅᔪᓐᓇᖅᓯᖁᑉᓗᒋᑦ ᐊᒻᒪᓗ ᐊᑐᖃᑦᑕᓕᖅᑐᑦ ᒐᕙᒪᒃᑯᓐᓂᒃ ᑮᓇᐅᔭᓂᒃ ᐃᑲᔫᑎᒃᓴᑦ ᓄᓇᓕᖕᓂ ᑲᔪᓯᔪᓐᓇᖁᑉᓗᒋᑦ.
“ᓄᓇᓕᖕᓂ ᒐᕙᒪᒋᔭᐅᔪᑦ ᓄᓇᕗᒥ ᓴᙱᓂᖅᑖᒃᑲᓐᓂᖅᓯᒪᔪᑦ ᐊᐅᓚᑦᑎᒃᑲᓐᓂᕈᓐᓇᓕᖅᖢᑎᒡᓗ ᑕᐃᑉᓱᒪᓂᐅᖓᓂᒃ ᐊᒻᒪᓗ ᓂᐱᖏᑦ ᓴᙱᓂᖅᓴᐅᓕᖅᑐᑦᑕᐅᖅ.”
ᑯᓱᒐᖅ ᐅᖃᖅᖢᓂ 21 ᐅᑭᐅᑦ ᖃᑉᓰᓐᓇᐅᖕᒪᑕ, ᑕᐃᒪᐃᒻᒪᑦ ᐋᖅᑭᒋᐊᕈᑕᐅᔭᕆᐊᓖᑦ ᑕᐃᒪᐅᔪᑦ, ᐱᕙᓪᓕᐊᑎᑕᐅᔭᕆᐊᓖᓪᓗ ᑕᐃᒪᒃᑲᓐᓂᐅᔪᑦ ᐊᒻᒪᓗ ᐊᒃᓱᕈᕐᓇᕐᓂᐊᖅᑐᑦ ᑕᐃᒪᒃᑲᓐᓂᐅᓂᐊᖅᑐᑦ.
ᐅᖃᖅᖢᓂ ᓄᓇᕗᑦ ᐱᕙᓪᓕᐊᑦᑎᐊᖅᓯᒪᓂᖓ ᑕᐃᒪᐅᑎᓪᓗᒍ ᐊᒥᓲᔪᒃᑯᑦ ᓄᑖᖑᔪᒃᑯᑦ ᐱᕕᒃᓴᕆᔭᐅᔪᒃᑯᑦ ᐊᒻᒪᓗ ᐱᕈᖅᐹᓪᓕᖅᓯᒪᑎᓪᓗᒍ ᐅᔭᕋᖕᓂᐊᕐᓂᖅ ᑮᓇᐅᔾᔭᒃᓴᕈᑎᒃᓴᐃᑦ ᐅᑉᓗᒥᒧᑦ ᒪᓕᖕᓂᖅᓴᐅᓕᖅᑐᑦ ᓄᓇᕗᒥ, ᑭᓯᐊᓂᓕ, ᖃᓂᒌᒃᑑᑎᙱᓐᓂᖅᓴᐅᓕᖅᑐᑦ ‘ᐊᒃᖢᐃᑦᑐᑦ’ ᐊᒻᒪᓗ ‘ᐊᒃᖢᔪᑦ’.
“ᑕᒪᓐᓇ ᑲᔪᓰᓐᓇᕐᓂᐊᖅᑐᖅ ᑕᑯᖅᑳᖅᑎᓐᓇᑕ ᐊᒥᓲᓂᖅᓴᓂᒃ ᐃᓄᖕᓂᒃ ᐃᓕᓐᓂᐊᒃᑲᓐᓂᕋᓱᖕᓂᐊᖅᑐᓂᒃ (ᐃᓚᐅᖃᑕᐅᑉᓗᒍ ᓴᓇᑐᓕᓴᕐᕕᖕᒥ ᐃᓕᓐᓂᐊᕈᒪᔪᑦ) ᐊᒻᒪᓗ ᐱᐅᓯᕚᓪᓕᖅᑎᑦᑎᓗᑎᒃ ᓴᓇᐃᓐᓇᕈᓐᓇᖅᓯᓂᕐᒥᒃ.
“ᑕᒪᓐᓇ ᖁᓚᕐᓇᖅᑑᔭᖅᑐᖅ ᐃᓕᑦᑎᔾᔪᑕᐅᔭᕆᐊᓕᒃ ᑭᓯᐊᓂ ᑎᑭᐅᑎᓂᐊᖅᑕᖅᐳᑦ. ᐅᔭᕋᖕᓂᐊᕐᕕᖃᓕᖅᑐᒍᑦ ᓄᓇᒋᔭᑉᑕ ᖃᓂᒋᔭᑦᑎᐊᖓᓂᒃ ᐃᓕᑦᑎᔭᕆᐊᖃᓕᖅᑐᒍᑦ ᖃᓄᖅ ᐱᕚᓪᓕᕈᑎᒋᓂᖅᓴᐅᔪᓐᓇᕐᒪᖔᑉᑎᒍᑦ.
“ᐅᕙᒍᑦ, ᓄᓇᕗᒥᐅᑕᐅᑉᓗᑕ, ᐊᓯᔾᔩᔭᕆᐊᖃᖅᑐᒍᑦ ᖃᓄᖅ ᑕᐅᑐᖕᓂᐊᕐᒪᖔᑉᑕ ᓴᓇᔭᒃᓴᓂᒃ ᐊᒻᒪᓗ ᖃᓄᖅ ᐱᕈᖅᓴᐃᓂᐊᕐᒪᖔᑉᑕ ᐃᓚᑉᑎᓐᓂᒃ.
“ᓄᓇᕗᒥᐅᑕᐅᑉᓗᑕ, ᐃᓚᒌᒃᑑᑎᓂᕐᒥᒃ ᓯᕗᓪᓕᖅᐸᐅᑎᑦᑎᔭᕆᐊᖃᕐᓂᕐᒥᒃ ᐃᓕᓐᓂᐊᖅᑎᑕᐅᓯᒪᖃᑦᑕᕋᑉᑕ ᐊᒻᒪᓗ ᐃᓚᒌᖕᓂᒃᑯᑦ ᓴᙱᔫᒋᐊᖃᕐᓂᕐᒧᑦ − ᑕᒪᓐᓇ ᐱᔾᔪᑎᖃᕐᒥᔪᖅ ᑕᒪᐃᓐᓄᑦ ᐃᓚᑉᑎᓐᓄᑦ, ᐆᒃᑑᑎᒋᓗᒍ ᑲᖏᖅᖠᓂᕐᒥᐅᑦ ᐅᔾᔨᖅᑐᕈᑎᖃᑦᑕᖁᔭᐅᖕᒪᑕ − ᑭᓯᐊᓂ ᐃᓕᑦᑎᔭᕆᐊᖃᕐᒥᔪᒍᑦ ᓈᒻᒪᒃᓴᕈᓐᓇᕐᓂᕐᒧᑦ ᐊᖏᕐᕋᒥᒃ ᕿᒪᐃᓯᒪᓚᐅᐱᓪᓚᖃᑦᑕᕐᓂᐊᕐᓂᕐᒧᑦ ᓴᓇᔭᖅᑐᕐᓗᓂ ᐅᔭᕋᖕᓂᐊᕐᕕᖕᒥ ᒪᕐᕉᖕᓂᒃ ᐱᓇᓱᐊᕈᓯᕐᓂᒃ ᐃᓚᕗᑦ ᐃᓅᓯᑦᑎᐊᕆᖕᓂᖅᓴᐅᔪᓐᓇᖁᑉᓗᒋᑦ.
“ᒪᕐᕉᖕᓂᒃ ᐱᓇᓱᐊᕈᓯᕐᓂᒃ ᐅᑎᖅᑕᖃᑦᑕᕐᓂᖅ ᐃᓅᓯᕆᒥᐊᖅᑑᔭᓕᖅᑕᖅᐳᑦ ᓱᖏᐅᑎᒍᑉᑕ ᑕᒪᑐᒧᙵ ᑮᓇᐅᔾᔭᒃᓴᕈᑏᑦ ᓇᓕᒧᒌᓕᖅᓯᒪᔫᔭᕐᓂᐊᖅᑐᑦ.”
ᑯᓱᒐᖅ, ᐊᑖᑕᒋᔭᐅᔪᖅ ᐱᖓᓱᓂᒃ ᐸᓂᖃᖅᖢᓂ, ᐅᖃᖅᑐᖅ ᖃᕆᑕᐅᔭᓕᕆᓂᖅ ᐅᖃᓘᑎᐊᓛᖃᖃᑦᑕᓕᕐᓂᕐᓗ ᐊᓯᔾᔩᓯᒪᖕᒪᑦ ᓱᓇᓗᒃᑖᓂᒃ ᐸᓂᓂ ᖃᐅᔨᒪᓂᖅᓴᐅᓕᓚᐅᕐᒪᑕ ᓄᑖᓂᒃ ᐱᖁᑎᓂᒃ ᓴᖅᑭᑉᐸᓪᓕᐊᔪᓂᒃ ᐃᖕᒥᓂᐅᖓᓂ.
ᐅᖃᖅᖢᓂ ᑕᐅᑐᕐᕉᖅᑐᕉᖅ ᓄᑖᑦ ᐱᖁᑎᑦ ᓴᖅᑭᑉᐸᓪᓕᐊᑎᓪᓗᒋᑦ ᖃᕆᑕᐅᔭᓕᕆᔾᔪᑎᑦ ᒪᒃᑯᒃᑐᑦ ᐅᔾᔨᖅᑐᕈᓐᓇᕐᓂᖅᓴᐅᓂᐊᓕᕐᒪᑕ ᖃᓄᐃᓕᐅᖅᐸᓪᓕᐊᔪᓂᒃ ᐅᑉᓗᒥᐅᔪᖅ.
“ᐊᖓᔪᖅᑳᖑᑉᓗᓂ, ᐱᓕᕆᐊᒃᓴᖃᕋᑉᑕ ᑐᓴᐅᒪᑎᑦᑎᔭᕆᐊᖃᕐᓂᕐᒥᒃ ᑕᐃᑉᓱᒪᓂᐅᔪᒥᒃ ᓯᕗᓂᒃᓴᒧᑦ. ᖃᕆᑕᐅᔭᓕᕆᔾᔪᑏᑦ ᑕᒪᒃᑯᓂᙵ ᓴᖅᑭᑎᑦᑎᔾᔮᙱᑦᑐᑦ.
“ᐊᒥᓱᓂᒃ ᐅᑭᐅᓂᒃ ᓴᓇᓚᐅᖅᑎᓪᓗᖓ ᓯᐲᓰᒃᑯᓐᓂᒃ ᖁᔭᓕᔪᖓ ᐊᓱᓂᒃ ᐅᓂᑉᑳᖅᑐᐊᓂᒃ ᖃᐅᔨᒪᓕᓚᐅᕐᓂᒻᓄᑦ, ᑕᒪᒃᑯᐊ ᑕᒡᕙ ᐅᖃᐅᓯᕆᖃᑦᑕᖅᑕᒃᑲ ᓄᑕᖅᑲᒃᑲᓄᑦ ᐊᒻᒪᓗ ᐃᕐᖑᑕᒃᑲᓄᑦ.
“ᖃᓄᑭᐊᖅ ᐊᒃᑐᐊᔾᔪᑎᙱᓐᓂᖅᓴᐅᓕᖅᑐᒍᑦ.
“ᐅᑉᓗᒥᐅᔪᖅ ᒪᒃᑯᒃᑐᖁᑎᕗᑦ ᐃᓕᖅᑯᓯᑐᖃᒥᓂᒃ ᐊᓯᐅᔨᙱᓐᓇᓱᒋᔭᒃᑲ. ᐃᓚᐅᖃᑕᐅᓂᖅᓴᐅᑐᐃᓐᓇᖅᑐᑦ ᓄᑖᒧᑦ ᐃᓕᖅᑯᓯᑖᖑᔪᒧᑦ.”