ᑲᖏᖅᖠᓂᕐᒥ ᐳᑭᖅᑕᓕᙳᐊᑦ ᒫᓐᓇᓵᖑᓚᐅᖅᑐᖅ ᓴᖅᑭᑎᑦᑎᓚᐅᖅᑐᑦ ᐊᕐᕌᒍᑕᒫᒃᑯᑦ ᐃᖅᑲᐃᑎᑦᑎᒍᑎᒋᕙᒃᑕᖏᓐᓂᒃ ᐱᔾᔪᑎᒋᑉᓗᒋᑦ ᓯᑕᒪᓖᑦ ᒥᒃᓵᓄᑦ ᒪᓕᒐᑦ ᐊᑐᐊᒐᕆᔭᐅᕙᒃᑐᓪᓗ ᐊᒻᒪᓗ, ᑕᐃᒪᐃᒐᔪᒃᑲᒥᒃ, ᑕᒪᕐᒥᒃᐅᙱᑦᑐᑦ ᐃᓄᐃᑦ ᑐᙵᓱᒃᑎᑦᑎᓚᐅᖅᑐᑦ ᐃᖅᑲᐃᑎᑕᐅᓂᕐᒧᑦ. ᖃᑉᑎᕆᔨᒃᑯᑦ ᐊᖓᔪᖅᑳᖓ ᒪᑯᓯ ᐅᐊᐃᔭᑦ ᐅᖃᖅᖢᓂ ᐊᓯᔾᔨᖅᓯᒪᙱᑦᑐᒡᒎᖅ ᓯᑕᒪᓕᖕᓄᑦ ᒪᓕᒐᐃᑦ ᒪᕐᕉᖕᓂᒃ ᐅᑭᐅᓂᒃ ᐊᒻᒪᓗ ᐅᑉᓘᑉ ᓄᙳᐊᓂ, ᑕᒪᕐᒥᖅᑲᔭᑦ ᐃᓱᒪᑦᑎᐊᕐᓂᕐᒧᑦ ᑐᕌᖓᑐᐃᓐᓇᖅᑐᑦ ᐃᓱᒫᓗᒃᑎᑦᑎᔪᒪᙱᓐᓂᕐᒧᑦ.
ᐅᐊᐃᔭᑦ ᐅᖃᖅᖢᓂ ᓄᓇᖓᓂ ᐳᑭᖅᑕᓕᙳᐊᒃᑯᑦ ᐊᒻᒪᓗ ᐳᑭᖅᑕᓕᒃᑯᑦ ᒪᓕᒃᑎᑦᑎᕙᖕᒪᑕ ᒪᓕᒐᕆᔭᐅᔪᓂᒃ ᓯᑕᒪᓖᑦ ᒥᒃᓵᓄᑦ.
“ᓯᕗᓪᓕᖅᐹᖅ ᓯᑕᒪᓕᒃᑯᑦ ᐱᕐᕈᓗᐊᕿᓚᐅᖅᑐᖅ ᐅᐱᕐᖔᖑᔪᖅ ᐱᖓᑦᑎᕐᒥᐅᓵᖅᑐᖅ (ᔫᓐ 10-ᒥ) ᐊᒻᒪᓗ ᐊᕐᓇᐅᔪᖅ ᓂᐊᖁᒃᑯᑦ ᐋᓐᓂᖅᖢᓂ,” ᑕᐃᒪᓐᓇ ᐅᖃᖅᖢᓂ ᐅᐊᐃᔭᑦ.
“ᑕᐃᒪᐃᑦᑐᒃᑰᕋᔪᒃᑐᑦ ᑲᒪᑦᑎᐊᙱᑦᑐᑦ.
“ᖃᐅᖓᒍᑦ ᕿᑦᑐᒑᒃᓯᒪᓕᖅᖢᓂ, ᐊᒻᒪᓗ ᐋᓐᓂᐊᖅᑐᒻᒪᕆᐊᓘᑉᓗᓂ ᒪᓂᖅᑲᒦᑦᑐᖅ ᑕᐃᑯᙵ ᐅᐸᒃᑲᑉᑎᒍᑦ ᐊᒻᒪᓗ ᐊᔾᔭᕆᐊᖃᓕᓚᐅᖅᑕᖅᐳᑦ ᐋᓐᓂᐊᕐᕕᖕᒧᑦ ᐅᓯᑲᖅᑕᐅᑎᒃᑯᑦ.
“ᐃᓛᒃ, ᐃᓄᐃᑦ ᐅᖃᐱᓗᒐᔪᖕᒪᑕ ᓯᑎᔪᓂᒃ ᓇᓴᖅᓯᒪᔭᕆᐊᖃᖃᑦᑕᕐᓂᕐᒧᑦ − ᐅᓯᒋᔭᐅᓚᐅᖅᑐᖅ ᓯᑕᒪᓕᒃᑯᑦ − ᐊᒻᒪᓗ ᑕᐃᒪᐃᑦᑐᖃᕈᓐᓇᕐᒪᑦ, ᐱᒋᐊᓪᓚᒃᓯᒪᔪᓐᓇᕆᑉᓗᓂ, ᓯᑎᔪᓂᒃ ᓇᓴᖅᓯᒪᙱᓪᓗᓂ.”
ᐅᐊᐃᔭᑦ ᐅᖃᖅᖢᓂ ᐊᒥᓲᓂᖅᓴᑦ ᑲᖏᖅᖠᓂᕐᒥᐅᑕᑦ ᐃᑲᔪᖅᑐᐃᑦᑎᐊᓲᑦ ᐳᑭᖅᑕᓕᙳᐊᓂᒃ ᓯᑕᒪᓖᑦ ᐱᔾᔪᑎᒋᑉᓗᒋᑦ.
ᐅᖃᖅᖢᓂ ᐊᒥᓲᓂᖅᓴᑦ ᐃᓄᐃᑦ ᖁᕕᐊᓱᙱᖃᑦᑕᕐᒪᑕ 14-ᓂᒃ ᐅᑭᐅᓖᑦ ᐃᖏᕐᕋᔭᖃᑦᑕᕐᓂᖏᓐᓄᑦ ᓄᓇᓕᖕᒥ ᓯᑕᒪᓕᒃᑯᑦ. “14-ᓂᒃ ᐅᑭᐅᓖᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᖁᒍᓐᓇᖅᑎᑕᐅᓯᒪᔪᑦ ᓯᑕᒪᓕᒃᑯᑦ ᐱᖁᔭᒃᑯᑦ. ᑲᑎᒪᖃᑎᒋᓚᐅᕋᑉᑭᑦ ᐳᑭᖅᑕᓕᙳᐊᓕᕆᔨᒃᑯᑦ ᑲᑎᒪᔨᕋᓛᖏᑦ Hᐊᒻᓚᒃᑯᓐᓂᒃ ᓯᑕᒻᒥᐅᓵᖅᑐᒥ ᐊᒻᒪᓗ ᑕᒪᓐᓇ ᐊᓯᔾᔨᑐᐃᓐᓇᕈᓐᓇᙱᓐᓇᑉᑎᒍᑦ ᑲᑎᒪᔨᒃᑯᑎᒍᑦ. ᐊᓯᔾᔨᖅᑕᐅᔭᕆᐊᖃᕋᔭᖅᑐᖅ ᓄᓇᕗᑦ ᒐᕙᒪᒃᑯᖏᑦᑎᒍᑦ.
“ᓄᓇᕗᑦ ᒐᕙᒪᒃᑯᖏᑦᑕ ᐱᖁᔭᖓ ᒪᓕᖕᒪᑦ ᑲᓇᑕᒥ ᐱᖁᔭᕆᐊᔭᔪᒃᑯᑦ, ᑕᐃᒪᐃᒻᒪᑦ ᐱᒻᒪᕆᐊᓗᒃ. ᑭᓯᐊᓂ ᐃᒪᓐᓇᐃᑦᑐᖅ − ᓄᑕᖅᑲᑦ ᓯᑕᒪᓕᖕᓂᒃ ᐊᑐᖃᑦᑕᖁᙱᒃᑯᒃᑎᒃ ᐊᖓᔪᖅᑳᕆᔭᐅᔪᑦ ᐊᖓᔪᖅᑳᑦᑎᐊᕙᐅᓗᑎᒃ ᓄᑕᕋᒥᓂᒃ ᓯᑕᒪᓕᖕᓂᒃ ᐊᑐᖅᑎᑦᑎᖃᑦᑕᕋᔭᙱᒻᒪᑕ. 14-ᓂᒃ ᐅᑭᐅᓖᑦ ᐅᑭᐅᑭᓗᐊᖅᑐᑦ ᐃᖏᕐᕋᔭᖃᑦᑕᕆᐊᒃᓴᖅ ᓄᓇᓕᖕᒥ ᓯᑕᒪᓕᒃᑯᑦ. ᐃᓛᑦᑎᐊᒻᒪᕆᒃ!
“ᐊᖓᔪᖅᑳᑦ ᐃᓚᖏᑦ ᓄᑕᕋᒥᓂᒃ 14-ᓂᒃ ᐅᑭᐅᓕᖕᓂᒃ ᓄᓇᒃᑰᕈᑎᓂᒃ ᐊᖁᑎᑦᑎᖃᑦᑕᕐᒪᑕ ᓄᓇᓕᖕᒥ. ᐊᖓᔪᖅᑳᕆᔭᐅᔪᑦ ᑲᒪᑦᑎᐊᖃᑦᑕᖅᐸᑕ, ᓄᑕᖅᑲᑦ ᐊᖁᖃᑦᑕᕋᔭᙱᑦᑐᑦ.”
ᐅᐊᐃᔭᑦ ᐅᖃᖅᖢᓂ ᓯᑕᒪᓖᑦ ᓇᓪᓕᐅᒃᑯᒫᖅᑖᖅᑕᐅᓯᒪᖃᑦᑕᕆᐊᓖᑦ, ᐊᒻᒪᓗ ᐃᓄᐃᑦ ᑕᒪᕐᒥᒃ ᑐᑭᓯᐅᒪᔭᕆᐊᓖᑦ ᖃᓄᖅ ᑕᒪᓐᓇ ᐃᑲᔫᑕᐅᓇᔭᕐᓂᖓᓄᑦ ᐊᖁᒍᑎᖏᑦ ᓇᓪᓕᐅᒃᑯᒫᖃᖃᑦᑕᕆᐊᖃᕐᓂᖏᓐᓄᑦ.
ᐅᖃᖅᖢᓂ ᐄ, ᓇᓪᐅᓕᒃᑯᒫᖅᑖᖅᑎᑦᑎᖃᑦᑕᕐᓂᖅ ᐊᑭᑐᔫᔪᖅ, ᑭᓯᐊᓂ, ᓯᕗᓂᒃᓴᒥ, ᓇᓪᓕᐅᒃᑯᒫᖃᙱᓐᓂᖅ ᐊᑭᑐᓂᖅᓴᐅᔪᓐᓇᖅᑐᖅ.
“ᖃᐅᔨᒪᔪᓯ, ᑕᐃᒪᐃᖁᔨᙱᒻᒪᕆᒃᑲᓗᐊᖅᑐᒍᑦ, ᑭᓯᐊᓂ ᓄᑕᕋᕐᒥᒃ ᑐᓗᖅᓯᔪᖃᕐᓂᖅᐸᑦ ᓇᓪᓕᐅᒃᑯᒫᖃᙱᓪᓗᑎᒡᓗ − ᐃᒪᓐᓇᐃᓪᓚᑦᑖᖅᑐᖅ − ᓄᑕᕋᐅᑉ ᑐᓗᖅᑕᐅᔫᑉ ᐊᖓᔪᖅᑳᖏᑦ ᐸᓯᔭᒃᓴᙳᖅᑎᑦᑎᔪᓐᓇᖅᑐᑦ ᐊᒻᒪᓗ ᐃᒡᓗᖃᕈᓐᓃᖅᑎᑦᑎᔪᓐᓇᖅᑐᑦ, ᓄᓇᒃᑰᕈᑎᖃᕈᓐᓃᖅᑎᑦᑎᔪᓐᓇᖅᑐᑦ ᐊᒻᒪᓗ ᑕᒪᐃᓐᓂᒃ ᐱᖁᑎᖏᓐᓂᒃ.”
ᑲᖏᖅᖠᓂᖅ ᖃᐅᔨᓴᖅᑕᐅᕙᖕᒪᑦ ᐳᑭᖅᑕᓕᙳᐊᓄᑦ, ᐃᒪᓐᓇᐃᒐᔪᒃᑐᑦ, 80-ᓂᒃ ᐃᑲᕐᕋᓂᒃ ᐱᓇᓱᐊᕈᓯᑕᒫᑦ ᓂᑭᑦᑖᖅᖢᑎᒃ, ᐊᒻᒪᓗ ᐳᑭᖅᑕᓕᙳᐊᑦ ᐊᑐᐃᓐᓇᐅᓲᑦ ᓴᓇᑦᑕᐃᓕᐅᓕᕌᖓᑦ.
ᐅᐊᐃᔭᑦ ᐅᖃᖅᖢᓂ ᐳᑭᖅᑕᓕᙳᐊᑦ ᐱᓕᕆᖃᑎᖃᑦᑎᐊᖃᑦᑕᕐᒪᑕ ᐳᑭᖅᑕᓕᖕᓂᒃ ᓯᑕᒪᓕᒃᑯᑦ ᒪᓕᒐᑦ ᒪᓕᒃᑕᐅᑦᑎᐊᖃᑦᑕᖁᑉᓗᒋᑦ. ᐅᖃᖅᖢᓂ ᐱᒻᒪᕆᐊᓘᖕᒪᑦ ᐅᓯᔭᐅᔪᑦ ᓇᓴᖅᓯᒪᖃᑦᑕᕆᐊᖃᕐᓂᖏᓐᓄᑦᑕᐅᖅ ᓯᑕᒪᓕᒃᑯᑦ, ᐊᒻᒪᓗ ᐱᒻᒪᕆᐊᓗᒃ ᐃᓄᐃᑦ ᑐᑭᓯᐅᒪᔭᕆᐊᖃᕐᓂᖏᓐᓄᑦ ᑕᒪᑐᒥᙵ.
“ᐊᖁᑦᑐᖅ ᓯᑕᒪᓕᖕᒥᒃ, ᐆᒃᑑᑎᒋᓗᒍ, ᓯᑎᔪᒥᒃ ᓇᓴᖅᓯᒪᒃᐸᑦ, ᐴᑲᖅᑕᖅᐸᑦ ᐊᒻᒪᓗ ᓂᐊᖁᖓ ᐋᕐᓗᑳᓪᓚᒃᐸᑦ ᐊᒻᒪᓗ ᓂᐊᖅᑯᐊᖅᓯᓗᓂ ᐅᓯᔭᒥᓂᒃ, ᓯᑎᔪᒥᒃ ᓇᓴᖅᓯᒪᙱᑦᑐᒥᒃ... ᓂᐊᖅᑯᐊᖅᓯᒪᔪᓂᒃ ᖃᐅᔨᖃᑦᑕᖅᓯᒪᔪᖓ ᑕᐃᒪᐃᑦᑐᒃᑯᑦ.
“ᓇᐃᓪᓕᒋᐊᖅᓯᒪᓗᒍ, ᐅᓯᔭᐅᔪᑦ ᐋᓐᓂᑳᓪᓚᒍᓐᓇᖃᑦᑕᖅᑐᑦ ᐊᖁᑦᑐᑎᑐᑦ.”
ᑭᓇᑐᐃᓐᓇᖅ ᓯᑎᔪᒥᒃ ᓇᓴᖅᓯᒪᙱᑦᑐᖅ ᓯᑕᒪᓕᒃᑰᕐᓗᓂ ᑲᖏᖅᖠᓂᕐᒥ ᐊᑭᓖᑎᑕᐅᔪᓐᓇᖅᑐᖅ $60-ᒥᒃ ᐊᒻᒪᓗ ᑭᓇᑐᐃᓐᓇᖅ ᐊᖁᑦᑐᖅ ᓯᑕᒪᓕᖕᒥᒃ ᓇᓪᓕᐅᒃᑯᒫᖃᙱᑦᑐᒥᒃ ᐊᑎᓕᐅᖅᑕᐅᔾᔪᑕᐅᓯᒪᙱᑦᑐᒥᒃ ᐊᑭᓖᑎᑕᐅᔪᓐᓇᖅᑐᖅ $500-ᒥᒃ, ᐊᑭᑐᓂᖅᓴᖅ ᓇᓪᓕᐅᒃᑯᒫᖅᑖᕈᑎᒃᓴᒃᑯᑦ.
“ᐃᒻᒪᖄ ᐊᕐᕕᓂᓖᑦ ᓯᑕᒪᓖᑦ ᐱᕐᕈᓗᐊᕿᒍᑕᐅᒐᔪᒃᑐᑦ ᐊᕐᕌᒍᑕᒫᒃᑯᑦ,” ᑕᐃᒪᓐᓇ ᐅᖃᖅᖢᓂ ᐅᐊᐃᔭᑦ,” ᐊᒻᒪᓗ ᐊᕐᕌᒍᑕᒫᒃᑯᑦ, ᐋᓐᓂᖅᑐᖃᖃᑦᑕᖅᑐᖅ ᐅᕝᕙᓘᓐᓂᑦ ᐱᓗᐊᕐᓂᖅᓴᒃᑯᑦ.
“ᒪᒃᑯᒃᑐᒥᒃ ᐃᓅᔪᓐᓃᖅᑐᖃᓚᐅᖅᑐᖅ ᓯᑕᒪᓕᒡᔪᐊᒃᑯᑦ ᐊᕐᕌᓂ ᑲᖏᖅᖠᓂᕐᒥ ᐊᒻᒪᓗ, ᓯᑎᔪᒥᒃ ᓇᓴᖅᓯᒪᓚᐅᖅᐸᑦ, ᐃᓅᓇᔭᖅᑐᒃᓴᐅᔪᖅ ᓱᓕ ᐅᑉᓗᒥ.”