ᐊᒥᓲᔪᑦ ᐅᑭᐅᖅᑕᖅᑐᒥ ᖃᓄᐃᓕᐅᕈᑕᐅᕙᒃᑐᑦ ᒪᓕᑦᑎᐊᖅᑐᑦ ᖃᑉᓗᓈᑦ ᓄᓇᖓᓂᒃ ᖃᓄᐃᓕᐅᕈᑕᐅᕙᒃᑐᓄᑦ, ᑭᓯᐊᓂ ᐅᕙᒍᓪᓕ ᐊᔾᔨᐅᙱᐊᕐᔪᒃᑐᒃᑯᑦ ᐱᓕᕆᕙᒃᑲᑉᑕ ᓯᓚᕗᑦ ᒪᓕᒃᖢᒍ. ᑕᐃᔭᐅᔪᓐᓇᖅᑐᖅ ᐅᑭᐅᖅᑕᖅᑐᒥᐅᑕᐅᓂᕐᒧᑦ.
ᐃᓕᓐᓂᐊᕐᕕᖕᒥ ᖄᖏᖅᓯᒋᐊᖅᖢᓂ ᖃᑉᓗᓈᑦ ᓄᓇᖓᓂᒃ ᑕᑯᑉᓗᓂᓗ ᖃᓄᐃᑦᑐᑐᐃᓐᓇᕐᓂᒃ ᐃᖏᕐᕋᔾᔪᑎᓂᒃ ᑐᑭᓕᕇᓕᖕᓂᒡᓗ ᐃᑯᒪᓅᖅᑐᓂᒃ, ᐅᔾᔨᕐᓇᖃᑦᑕᖅᑐᖅ ᓇᓕᐊᒃ ᓱᒃᑲᔪᒃᑯᑦ ᐃᖏᕐᕋᔭᒍᒪᖃᑦᑕᕐᒪᖔᑕ.
ᐃᓄᒡᓕ ᖃᓂᒋᔮᒎᖅᐸᑦ ᒫᓂ ᐅᓗᔪᒃ ᐃᓕᓐᓂᐊᕐᕕᒡᔪᐊᑉ ᐅᑭᐅᑉ ᐃᓗᐊᓂ ᐃᓕᓐᓂᐊᕐᓇᐅᔪᒥ, ᐃᖏᕐᕋᔾᔪᑎᑦ ᓴᓂᓕᕇᒐᔪᖕᒪᑕ ᐊᒻᒪᓗ, ᖃᑉᓗᓈᑦ ᓄᓇᖓᓂᑎᑐᑦ, ᓱᒃᑲᔮᕈᑕᐅᔪᒪᔪᑦ ᓇᓗᓇᙱᑦᑎᐊᓲᑦ.
ᐊᒻᒪᓗ, ᐃᖏᕐᕋᔭᒃᑐᖃᖅᑎᓪᓗᒍ ᖃᑉᓗᓈᑦ ᓄᓇᖓᓂᒃ ᐃᒡᓗᖃᕐᕕᐅᔪᒃᑯᑦ, ᑕᑯᓐᓇᖃᑦᑕᖅᑐᖅ ᓄᓇᒃᑰᕈᑎᖃᕐᕕᖃᕋᔪᖕᒪᑕ ᐃᓗᖏᓐᓄᑦ ᐊᑕᔪᓂᒃ, ᐊᖏᔪᓂᒃ ᒥᑭᔪᓂᒡᓗ, ᓱᕋᖁᓇᒋᑦ ᓯᓚᒃᑯᑦ ᐊᒻᒪᓗ ᐃᓂᖃᖅᑎᑦᑎᔪᒪᓂᕐᒧᑦ ᐋᖅᑭᒃᓱᖅᑕᐅᔭᕆᐊᓕᖕᓂᒃ ᐋᖅᑭᐅᒪᑎᑕᐅᔭᕆᐊᓕᖕᓂᒡᓗ.
ᐅᑭᐅᖅᑕᖅᑐᒥᓕ, ᐃᓄᒃ ᐸᓂᖃᕈᓂ ᓯᑕᒪᓕᖃᖅᑐᒥᒃ ᑲᒪᒋᔭᐅᑦᑎᐊᕆᐊᓕᖕᒥᒃ − ᐃᓄᒡᓗ ᖃᐅᔨᒪᒍᓂ ᐃᓕᖅᑯᓯᑐᖃᒥᓂᒃ − ᐃᒡᓗᕕᒐᓕᐅᕋᔭᖅᑐᖅ ᓯᑕᒪᓕᖕᒧᑦ ᓈᒻᒪᒋᐊᖅᑐᒥᒃ.
ᑕᐃᒪᐃᓕᐅᖅᓯᒪᔪᖅ ᑕᒡᕙ ᐊᓐᑎ ᐊᓕᔭᖅ 65-ᓂᒃ ᐅᑭᐅᓕᒃ, ᑲᖏᖅᖠᓂᕐᒥ ᑕᐃᒪᐃᓕᐅᓚᐅᖅᑐᖅ ᐱᓇᓱᐊᕈᓯᐅᓵᖅᑐᒥ.
ᐊᓕᔭᖅ ᐅᖃᖅᖢᓂ ᓇᑉᐸᖅᑎᕆᑦᐊᖅᑐᓘᓚᐅᖅᑐᕉᖅ ᓯᓚ ᐅᖁᖅᓯᒋᐊᖅᑳᕋᓂ ᐊᒻᒪᓗ ᐅᖁᖅᓯᒋᐊᖅᑎᓪᓗᒍ ᐃᒡᓗᕕᒐᓕᐊᖓ ᐊᐅᒃᐸᓪᓕᐊᓕᓚᐅᖅᑐᖅ.
ᐅᖃᖅᖢᓂ ᐅᑕᖅᑭᓕᓚᐅᖅᑐᕉᖅ ᐊᐳᑎᑦᑎᐊᕙᐅᓂᐊᖅᑐᒥᒃ ᓯᓚ ᓂᒡᓕᕙᓪᓕᐊᓂᐊᕐᓂᖓᓄᑦ ᐋᖅᑭᒃᓱᓕᖅᖢᓂᐅᒡᓗ.
“ᐃᒡᓗᕕᒐᓕᐅᓚᐅᖅᑐᖓ ᐸᓂᖕᒪ ᓯᑕᒪᓕᖓ ᐊᓄᕆᒦᖁᓇᒍ,” ᑕᐃᒪᓐᓇ ᐅᖃᖅᖢᓂ ᐊᓕᔭᖅ.
“ᓲᕐᓗ ᓄᓇᒃᑰᕈᑕᐅᓯᕝᕕᐊᓛᖅ ᓄᖅᑲᖅᑕᕐᕕᒋᔪᓐᓇᖅᑕᖓ ᐅᓐᓄᑕᒫᒃᑯᑦ ᓱᕈᖅᑕᐅᖁᓇᒍ ᓯᓚᒧᑦ.
“ᐅᑉᓘᑉ ᓇᑉᐸᐃᓐᓇᖓᓂᒃ ᑲᒪᒋᓇᔭᓚᐅᕋᓗᐊᖅᑕᕋ, ᑭᓯᐊᓂ ᓯᓚ ᓈᒻᒪᙲᓐᓇᓚᐅᕐᒪᑦ.”
ᐊᓕᔭᖅ ᐅᖃᖅᖢᓂ ᓄᑕᕋᐅᑉᓗᓂ ᓄᓇᒧᙵᐅᖃᑦᑕᓚᐅᕋᒥ ᐊᑖᑕᓂᓗ, ᒧᓯᓯ ᐊᓕᔭᖅᓗ, ᐊᒻᒪᓗ ᑕᐃᑲᓂ ᐃᓕᑦᑎᓚᐅᕋᒥ ᖃᓄᖅ ᑭᑉᓗᐃᓇᔭᕐᓂᕐᒧᑦ ᐃᒡᓗᕕᒐᒃᓴᓂᒃ ᐊᑖᑕᓂ ᑕᐅᑐᖃᑦᑕᖅᖢᒍ.
ᑎᑉᓯᒍᓱᒃᖢᓂ ᐅᖃᖅᖢᓂ ᐃᖅᑲᐅᒪᔭᒃᑯᑦ ᑕᐅᑐᑐᐃᓐᓇᕋᔪᖕᓂᖅᓴᐅᓚᐅᕐᓂᕐᒥᓄᑦ ᐃᑲᔪᕐᓇᓂ.
“ᐅᖃᕈᓐᓇᖅᑐᑎᖃᐃ ᐃᓕᑦᑎᑲᐅᑎᒋᓚᐅᙱᓐᓂᒻᓄᑦ 14-ᓂᒃ ᐅᑭᐅᖃᓕᖅᖢᖓ ᑭᓯᐊᓂ ᐃᓕᑦᑎᓚᐅᕋᒪ,” ᐃᒡᓚᖅᖢᓂ ᑕᐃᒪᓐᓇ ᐅᖃᖅᑐᖅ.
“ᐃᓚᖏᑦ ᐊᖑᑎᖃᑎᒃᑲ ᐅᑭᐅᖃᖅᖢᑎᒃ 12-ᓂᒃ ᐃᓕᑦᑎᓚᐅᖅᓯᒪᔪᑦ ᒥᑭᔪᓂᒃ ᐃᒡᓗᕕᒐᓕᐅᕐᓂᕐᒧᑦ. ᑕᐃᒪᐃᓚᐅᕐᒥᔪᖅ ᓂᖓᐅᒐ ᑕᐃᕕᑎ ᐅᓗᔪᒃ, 12-ᓂᒃ ᐅᑭᐅᖃᓚᐅᖅᑐᖅ 13-ᓂᒡᓘᕝᕙᑭᐊᖅ ᐱᒋᐅᕋᓱᓕᓵᕋᒥ.
“ᑎᑉᓯᓇᕋᓱᒋᔭᕋ, ᐃᓐᓇᕈᓕᖅᖢᖓ ᐃᓕᑦᑎᑕᐃᓐᓇᓚᐅᕋᒪ 14-ᓂᒃ ᐅᑭᐅᖃᖅᖢᖓ.”
ᐊᓕᔭᖅ ᐅᖃᖅᖢᓂ ᐃᓱᒫᓘᑎᖃᖃᑦᑕᕋᒥᒎᖅ ᒪᒃᑯᒃᑐᓂᒃ ᖃᕆᑕᐅᔭᒃᑯᑦ ᐱᙳᐊᑐᐃᓐᓇᖅᑐᓂᒃ ᐃᓕᑦᑎᓇᓱᙱᑦᑎᐊᖅᖢᑎᒃ ᐃᓕᖅᑯᓯᑐᖃᑎᒍᑦ ᐊᔪᙱᓐᓂᕆᔭᐅᔪᓂᒃ.
ᐅᖃᖅᖢᓂ ᐃᓚᖏᓐᓂᒃ ᐃᓕᓐᓂᐊᖅᑎᑦᑎᔪᓐᓇᓚᐅᕋᒥ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᑦᑎᒍᑎᒃᑯᑦ, ᐊᒻᒪᓗ ᓄᕙᒡᔪᐊᕐᓂᖅ−19 ᓴᖅᑭᑳᓪᓚᒃᑎᓪᓗᒍ ᓄᖅᑲᐅᑕᐅᑳᓪᓚᓚᐅᕐᒪᑦ, ᑕᐃᑉᓱᒪᓂᓵᖅ ᐃᓛᒃ.
“ᓄᑕᕋᕆᔭᖅᐳᑦ ᐅᐃᒻᒪᖅᑰᕐᒪᑕ ᐅᑉᓗᒥ ᓄᑖᑦ ᐅᐃᒪᓵᕈᑏᑦ ᓴᖅᑭᑉᐸᓪᓕᐊᓕᖅᑎᓪᓗᒋᑦ ᐊᓚᕈᓐᓇᐃᓪᓕᓯᒪᔭᖏᓐᓂᒃ.
“ᕿᑎᒍᑎᒥᓂᒃ ᓵᙵᙱᒃᑳᖓᒥᒃ ᕿᕕᐊᖓᑐᐃᓐᓇᖃᑦᑕᕐᒪᑕ ᐅᖃᓘᑎᒥᓂᒃ ᐊᒥᓱᓂᒃ ᐃᑲᕐᕋᓂᒃ.
“ᐊᒥᓱᑦ, ᐃᕐᓂᕋᑎᑐᑦ, ᐃᓱᒪᖃᑦᑕᕐᒪᑕ ᐃᓕᖅᑯᓯᑐᖃᑎᒍᑦ ᐊᔪᙱᓐᓂᕆᔭᐅᔪᑦ ᐃᓐᓇᑐᖃᕐᓄᑦ ᐊᑐᖅᑐᒃᓴᑐᐊᖑᓇᓱᒋᑉᓗᒋᑦ, ᑭᓯᐊᓂ ᐃᓐᓇᑐᖃᕐᓄᑦ ᑐᕌᖓᑐᐃᓐᓇᙱᑦᑐᑦ.
“ᐅᖃᐅᑏᓐᓇᖃᑦᑕᖅᑕᒃᑲ ᓄᓇᒥ ᓯᓚᑦᑕᐅᙱᑦᑐᒥ ᐊᖏᕐᕋᕈᓐᓇᐃᓪᓕᓯᒪᓇᔭᕈᑎᒃ − ᐅᕝᕙᓘᓐᓃᑦ ᖃᒧᑕᐅᔭᖏᑦ ᓱᖃᒐᔭᖅᐸᑕ − ᐃᒡᓗᕕᒐᓕᐅᕈᓐᓇᕐᓂᖅ ᐃᓅᓕᓴᐅᑎᒋᔪᓐᓇᕋᔭᖅᑕᖓ. ᑕᐃᒪᐃᑦᑐᓐᓇᕈᑎᒃ ᐅᕙᑉᑎᑐᑦ ᐃᓐᓇᐅᑎᒋᔪᓐᓇᖅᓯᔪᒫᕐᓂᕋᖅᖢᒋᑦ.”