Skip to content

ᓴᓪᓕᕐᒥᐅᑕᖅ ᐊᔪᕿᖅᑐᐃᔨᙳᖅᑐᖅ

ᓴᓪᓕᕐᒥᐅᑕᖅ ᐹᓪ ᐳᓪᓚᑦ ᐊᔪᕿᖅᑐᐃᔨᙳᖅᑎᑕᐅᓚᐅᖅᑐᖅ ᑲᖏᖅᖠᓂᕐᒥ ᔪᓚᐃ 23-ᖑᑎᓪᓗᒍ.

ᐳᓪᓚᑦ, 71-ᓂᒃ ᐅᑭᐅᓕᒃ, ᐊᔪᕿᖅᑐᐃᔨᙳᖅᑎᑕᐅᑉᓗᓂᒎᖅ ᐊᕐᕕᐊᕐᒥᐅᑦ ᐊᔪᕿᖅᑐᐃᔨᖓᓄᑦ ᓗᓯ ᓇᑦᓯᕐᒧᑦ ᑐᑭᖃᖅᑐᖅ ᒎᑎᐅᑉ ᐱᓕᕆᖁᓯᒪᖕᒪᒍ ᐅᒃᐱᕐᓂᒃᑯᑦ ᓄᓇᖓᓂᒃ, ᐊᓯᖏᓐᓂᒡᓗ ᓄᓇᓕᖕᓂᒃ ᖃᐃᖁᔭᐅᓯᒪᔭᕌᖓᒥ ᑭᕙᓪᓕᕐᒥ ᐅᖓᑖᓂᓘᓐᓃᑦ.

ᐹᓪ ᐳᓪᓚᑦ ᓴᓪᓕᕐᒥᐅᑕᖅ ᐊᔪᕿᖅᑐᐃᔨᙳᖅᑎᑕᐅᔪᖅ ᐅᑭᐅᖃᓕᖅᖢᓂ 71-ᓂᒃ ᑲᖏᖅᖠᓂᕐᒥ ᔪᓚᐃ 23-ᖑᓚᐅᖅᑐᒥ.

ᐅᖃᖅᖢᓂ ᐊᔪᕿᖅᑐᐃᔨᒃᑯᓐᓂᒃ ᐱᓕᕆᖃᑦᑕᖅᓯᒪᓕᕋᒥ 1986-ᒥ ᐱᒋᐊᖅᖢᒍ ᐊᒻᒪᓗ ᐊᓕᐊᓇᐃᒍᓱᒃᑐᖅ ᓄᑖᒥᒃ ᑲᒪᕙᓪᓕᐊᓂᐊᓕᕋᒥ ᐱᔭᕆᐊᑐᔫᓂᐊᖅᑐᒃᓴᐅᒐᓗᐊᖅᑎᓪᓗᒍ.

ᓇᐃᓪᓕᒋᐊᖅᓯᒪᓗᒍ ᐅᓂᑉᑳᖅᑐᐊᕋ, ᓂᐱᒋᔭᐅᔪᒪᒐᒪ ᒎᑎᒧᑦ ᓇᓃᒃᑲᓗᐊᕈᒪ, ᐅᖃᕈᑎᖃᑦᑕᕆᐊᖃᕋᑉᑯ,” ᑕᐃᒪᓐᓇ ᐅᖃᖅᖢᓂ ᐳᓪᓚᑦ. “ᐊᑕᐅᓰᓐᓇᕐᒥᒃ ᐃᓅᓯᖃᕋᑉᑕ ᐊᒻᒪᓗ, ᒎᑎ ᐱᓕᕆᔾᔪᑎᙱᒃᑯᑉᑎᒍᑦ, ᐃᓅᓯᕆᔭᕆᐊᖃᖅᑕᑉᑕ ᓇᑉᐸᖓ ᐱᑕᖃᙱᒻᒪᑦ. ᐅᕙᑉᑎᓐᓂᒃ ᐱᓕᕆᓇᓱᖃᑦᑕᕆᐊᖃᖅᑐᒍᑦ ᐊᑐᐃᓐᓇᕈᖅᑎᖃᑦᑕᕐᓗᑕ ᒎᑎᒧᑦ ᐃᓅᓯᑉᑎᓐᓂᒃ.”

ᐳᓪᓚᑦ ᐅᖃᖅᖢᓂ ᑐᒃᓯᐊᕐᕕᖕᒥᒎᖅ ᖃᓄᐃᓕᐅᕈᑕᐅᓲᑦ ᑲᑦᑐᕐᔫᒥᓯᒪᓕᓚᐅᕐᒪᑕ ᓄᕙᒡᔪᐊᕐᓂᖅ ᓴᖅᑭᖅᑳᖅᑎᓪᓗᒍ. ᓄᓇᖅᑲᑎᒌᑦ ᐃᑎᖅᑕᙱᓐᓂᖅᓴᐅᓕᖅᖢᑎᒃ ᑐᒃᓯᐊᕐᕕᖕᒧᑦ − ᒪᒃᑯᒃᑐᑦ ᐃᒻᖏᖅᑎᖏᑦ ᐃᑎᖅᑕᖃᑦᑕᓚᐅᖅᑑᒐᓗᐊᑦ.

ᐱᔭᕆᐊᑐᓂᖅᓵᓗᒎᖅ ᐊᔪᕿᖅᑐᐃᔨᐅᓇᓱᒃᖢᓂ ᓄᓇᓕᖕᒥ ᐃᓄᐃᑦ ᐊᒥᓲᓂᖏᑦ 50 ᐅᖓᑖᓅᕆᐊᖃᙱᑎᓪᓗᒋᑦ ᓄᕙᒡᔪᐊᕐᓂᖅ -19-ᑯᑦ ᒪᓕᒃᑕᐅᔭᕆᐊᓖᑦ ᐱᔾᔪᑎᒋᑉᓗᒋᑦ, ᑕᐃᒪᓐᓇ ᐅᖃᖅᖢᓂ.

ᑭᓯᐊᓂᓕ, ᓈᓚᐅᑎᐊᓛᒃᑯᑦ ᐊᔪᕿᖅᑐᐃᖃᑦᑕᖅᑐᖅ ᐊᒥᓱᑦ ᓄᓇᖅᑲᑎᒌᑦ ᑐᓵᖃᑦᑕᖅᖢᑎᒃ.

ᑕᐃᒪᑐᖅ, ᒎᑎ ᓂᐱᒥᓂᒃ ᓈᓚᐅᑎᒃᑰᖅᑎᑦᑎᓯᒪᓕ ᐃᓄᖕᓄᑦ ᐅᕙᒻᓄᓪᓗ,” ᑕᐃᒪᓐᓇ ᐅᖃᖅᖢᓂ. “ᐃᓱᒪᔪᒪᖃᑦᑕᕋᒪ ᒪᒃᑯᒃᑐᑦ ᓴᓪᓕᕐᒥᐅᑕᑦ ᐅᒃᐱᕐᓂᒃᑯᑦ ᖃᓄᐃᙱᑦᑎᐊᖁᑉᓗᒋᑦ ᑭᓯᐊᓂ, ᐅᖃᖅᑲᐅᒐᒪᑎᑐᑦ, ᐱᔭᕆᐊᑐᓂᖅᓴᐅᓕᕐᒪᑦ ᐊᔪᕿᖅᑐᐃᓇᓱᒃᖢᓂ ᒎᑎᐅᑉ ᐅᖃᐅᓯᒃᓴᖏᑦ ᑐᓴᖅᑕᐅᑎᓐᓇᓱᒃᖢᒋᑦ.”

ᐹᓪ ᐳᓪᓚᑦ ᓴᓪᓕᕐᒥᐅᑕᖅ ᐊᔪᕿᖅᑐᐃᔨᙳᖅᑐᖅ ᑲᖏᖅᖠᓂᕐᒥ ᐊᔪᕿᖅᑐᐃᔨᙳᖅᑎᑦᑎᑉᓗᓂ ᐊᕐᕕᐊᕐᒥᐅᑦ ᐊᔪᕿᖅᑐᐃᔨᖓ ᓗᓯ ᓇᑦᓯᖅ ᔪᓚᐃ 23-ᖑᓚᐅᖅᑐᒥ.

ᐳᓪᓚᑦ ᐅᖃᖅᖢᓂ ᓄᕙᒡᔪᐊᕐᓂᖅ -19 ᐊᓯᔾᔩᓯᒪᖕᒪᑦ ᐃᓅᓯᕆᔭᐅᔪᓂᒃ ᓄᓇᕐᔪᐊᕐᒥ ᐱᒻᒪᕆᐊᓗᒃᑯᑦ 2020-ᒥ.

ᐅᖃᖅᖢᓂ ᐃᓄᐃᑦ ᓄᓇᕐᔪᐊᕐᒥᐅᑕᑦ ᓂᕆᐅᖕᓂᖃᓚᐅᙱᒻᒪᑕ ᓴᖅᑭᓐᓂᐊᖅᑐᒥᒃ ᐊᒻᒪᓗ ᑕᐃᒪᐃᓐᓂᖅᓴᐅᑉᓗᓂ ᒥᑭᓐᓂᖅᓴᓂᒃ ᓄᓇᓕᖕᓂᒃ.

ᖃᐅᔨᒪᔪᒍᑦ ᓄᕙᒡᔪᐊᕐᓂᖅ ᑕᐃᒪᐅᖕᒪᑦ ᐊᒻᒪᓗ ᐊᒃᑐᖅᓯᓯᒪᖕᒪᑦ ᐃᓄᖕᓂᒃ. ᖃᐅᔨᒪᔪᒍᑦ ᐃᓅᔪᓐᓃᖅᑐᖃᖃᑦᑕᖅᓯᒪᖕᒪᑦ ᐊᒻᒪᓗ ᐃᓚᒋᔭᐅᔪᑯᓗᐃᑦ ᐃᓅᔪᓐᓃᖃᑦᑕᖅᓯᒪᖕᒪᑕᑦᑕᐅᖅ.

ᖃᓄᖅ ᑕᒪᓐᓇ ᑲᒪᒋᓂᐊᖅᐱᑎᒍᑦ? ᐃᓱᒪᓇᓱᒋᐊᒃᓴᕐᓘᓐᓃᑦ ᐊᒃᓱᕈᕐᓇᖅᑐᖅ ᑎᑭᑦᑐᐊᓘᓐᓂᖅᐸᑦ ᓄᓇᑉᑎᓐᓄᑦ, ᑭᓯᐊᓂ ᖃᐅᔨᒪᔭᕆᐊᖃᖅᑐᒍᑦ ᑕᐃᒪᐃᑳᓪᓚᒍᓐᓇᕐᓂᑉᑎᓐᓄᑦ.

ᐊᒃᓱᕈᕐᓇᖅᑐᐊᓗᒃ, ᖃᐅᔨᒪᔪᖓ, ᑭᓯᐊᓂ ᑕᒪᓐᓇ ᓱᓕᔪᖅ ᓱᓕᔪᒃᑯᓪᓗ ᐅᔾᔨᖅᑐᕆᐊᖃᖅᑐᒍᑦ.”

ᐳᓪᓚᑦ ᐅᖃᖅᖢᓂ ᐊᔪᕿᖅᑐᐃᔨᙳᕋᒥᒎᖅ ᐱᓕᕆᐊᒃᓴᖏᑦ ᐃᓚᕚᓪᓕᖅᑐᑦ.

ᐅᖃᖅᖢᓂ ᐃᓕᓐᓂᐊᖅᑎᑕᐅᒃᑲᓐᓂᕆᐊᖃᕋᒥ ᑭᓯᐊᓂ, ᓄᕙᒡᔪᐊᕐᓂᖅ -19 ᑕᐃᒪᐅᑎᓪᓗᒍ ᐊᔪᕐᓇᖅᓯᓂᖅᓴᐅᖕᒪᑦ ᑲᑎᖃᑎᖃᕋᓱᖕᓂᐊᕐᓗᓂᓘᓐᓃᑦ ᐊᔪᕿᖅᑐᐃᔨᓂᒃ ᖃᓄᖅᑑᖃᑎᒋᔪᓐᓇᕈᒪᑉᓗᒋᑦ ᓯᕗᒻᒧᐊᒃᐸᓪᓕᐊᓂᐊᖅᑎᓪᓗᒍ.

ᐊᓯᖏᓐᓂᒃ ᓄᓇᓕᖕᓂᒃ ᐊᔪᕿᖅᑐᐃᔭᖅᑐᖃᑦᑕᕐᓂᐊᕐᒥᔪᖓ, ᓲᕐᓗ ᑲᑎᑎᑦᑎᔭᖅᑐᕐᓗᖓ, ᑯᕝᕕᕆᔭᖅᑐᕐᓗᖓ, ᐊᒻᒪᓗ ᐊᓯᖏᑦ ᐱᓕᕆᐊᒃᓴᑦ ᑕᐃᒪᐅᔪᑦ ᓲᕐᓗ ᐸᐸᑐᕆᐊᖃᕐᓂᖅ ᑎᑎᕋᖅᓯᒪᔪᓂᒃ ᑐᒃᓯᐊᕐᕕᐅᔪᓂᒃ ᐅᑭᐅᑉ ᓄᙳᐊᓄᑦ.

ᓱᑲᐃᓪᓕᒋᐊᕆᐊᒃᓴᖅ ᐃᓱᒪᔮᙱᑦᑐᖓ, 71-ᓂᒃ ᐅᑭᐅᖃᓕᕋᓗᐊᖅᑎᓪᓗᖓ, ᑭᓯᐊᓂ ᒎᑎᐅᑉ ᐊᖏᕐᕋᐅᖁᓕᖅᐹᖓ. ᓴᙱᒃᑎᑉᐸᓪᓕᐊᑐᐃᓐᓇᖅᑑᔭᖅᑐᖓᓘᓐᓃᑦ ᒫᓐᓇᐅᔪᖅ.

ᑕᒪᓐᓇ ᑲᒪᒋᔪᓐᓇᕋᔭᙱᑕᕋ ᐅᕙᖓᑐᐊᖑᒍᒪ ᖁᔭᓐᓇᒦᕈᒪᔪᖓ ᐃᓄᖕᓂᒃ ᐊᔪᕿᖅᑐᐃᔨᙳᖅᑎᑦᑎᓚᐅᖅᑐᓂᒃ ᑲᖏᖅᖠᓂᕐᒥ ᓄᕙᒡᔪᐊᕐᓂᖅ ᑕᐃᒪᐅᒐᓗᐊᖅᑎᓪᓗᒍ, ᐱᓗᐊᖅᑐᒥ ᓘᓯ ᓇᑦᓯᖅ.

ᑕᒪᐃᓐᓂᒃ ᐃᓄᖕᓂᒃ ᖁᔭᓐᓇᒦᕈᒪᔪᖓ ᐅᕙᒻᓂᒃ ᐃᑲᔪᖅᑐᐃᓯᒪᔪᓂᒃ, ᐱᓗᐊᖅᑐᒥ ᓄᓕᐊᕋ, ᐃᒪᓕ ᐅᕙᒻᓂᒃ ᓇᖏᖃᑎᖃᐃᓐᓇᕐᒪᑦ ᖁᕕᐊᓇᖅᑐᒃᑯᑦ ᖁᕕᐊᓇᙱᑦᑐᒃᑯᓪᓘᓐᓃᑦ. ᓇᒡᓕᒋᕙᒋᑦ.”