ᐊᕐᕕᐊᓂ ᒪᐃᔭ ᔫ ᓴᕕᑲᑖᖅ ᓄᑲᖅᖠᖅ ᓴᕆᒪᓱᒃᑐᖅ ᖃᓄᖅ ᐊᕐᕕᐊᕐᒥᐅᑦ ᑲᒪᑦᑎᐊᖅᑎᒋᓯᒪᖕᒪᖔᑕ ᓄᕙᒡᔪᐊᕐᓂᖅ -19-ᒥᒃ ᓴᖅᑭᑦᑐᐊᓘᓚᐅᖅᑎᓪᓗᒍ ᓄᓇᖓᓂ, ᐊᒻᒪᓗ ᓴᕆᒪᓱᖕᓂᖅᓴᐅᔪᖅ Hᐊᒻᓚᒃᑯᑦ ᓴᓇᔨᖏᑦᑕ ᐱᓕᕆᓯᒪᓂᖏᓐᓂᒃ ᓄᕙᒡᔪᐊᕐᓂᒃᑯᑦ.
ᐊᒃᓱᕈᕐᓇᖅᑐᒃᑰᕈᑕᐅᓯᒪᔪᖅ Hᐊᒻᓚᒃᑯᓐᓄᑦ, ᐃᓱᒪᒋᑉᓗᒍ ᐊᕐᕕᐊᑦ ᐊᒃᑐᖅᑕᐅᖃᑕᐅᓂᖅᐹᖑᓯᒪᖕᒪᑦ ᓄᓇᓕᖕᓂᒃ ᐃᓄᒋᐊᖕᓂᖏᑦ ᒪᓕᒃᖢᒋᑦ ᑲᓇᑕᒥ.
ᓴᕕᑲᑖᖅ ᐅᖃᖅᖢᓂ ᐃᓄᐃᑦ ᓯᕗᓕᖅᑎᑦᑎᐊᕙᐅᓯᒪᓪᓚᕆᖕᒪᑕ ᑕᐃᒪᐃᑦᑐᒃᑰᖅᑎᓪᓗᒋᑦ ᐊᒻᒪᓗ ᐅᐃᒪᔮᕌᓗᙱᖦᖢᑎᒃ.
ᐅᖃᖅᖢᓂ Hᐊᒻᓚᒃᑯᑦ ᐅᖃᐅᔾᔨᒋᐊᖅᓯᒪᐃᓐᓇᕐᒪᑕ ᐃᓄᖕᓂᒃ ᓴᐃᒪᖁᔨᑉᓗᑎᒃ ᐊᒻᒪᓗ ᑭᐅᔭᐅᑦᑎᐊᖃᑦᑕᖅᓯᒪᔪᑦ.
“ᐃᓄᐃᑦ ᐱᓕᕆᕐᔪᐊᖅᓯᒪᔪᑦ ᐊᒻᒪᓗ ᐆᒃᑑᑎᒃᓴᑦᑎᐊᕙᒻᒪᕆᐊᓗᐃᑦ ᑕᐃᒪᐃᑦᑐᒃᑰᖅᑎᓪᓗᑕ,” ᑕᐃᒪᓐᓇ ᐅᖃᖅᖢᓂ ᓴᕕᑲᑖᖅ.
“Hᐊᒻᓚᒃᑯᑦ ᐱᓕᕆᔨᖏᑦ ᐊᑭᖃᙱᑦᑐᒥᒃ ᐅᑉᓛᕈᒥᑕᖅᑐᖅᑎᑕᐅᓲᑦ ᐅᑉᓛᑕᒫᒃᑯᑦ ᖃᐅᔨᒪᖁᑉᓗᒋᑦ ᖁᔭᒋᔭᐅᓂᖏᓐᓄᑦ, ᐱᒻᒪᕆᐅᓂᖅᐹᖑᖕᒪᑕ ᒫᓐᓇᐅᔪᖅ ᐃᒪᖅᑕᖃᑦᑕᖅᑎᓪᓗᒋᑦ ᐊᒻᒪᓗ ᐊᓇᖅᑕᐅᑎᒃᑯᑦ ᑲᒪᖃᑦᑕᖅᑎᓪᓗᒋᑦ ᐅᖃᐅᔾᔨᓯᒪᑎᓪᓗᑕ ᐃᓅᖃᑎᑉᑎᓐᓂᒃ ᐊᒡᒐᖕᒥᓂᒃ ᐃᕐᒥᒐᔪᒃᓯᒋᐊᖃᕐᓂᖏᓐᓄᑦ.
“ᑕᐃᒪᐃᒻᒪᑦ, ᑕᐃᒪᓐᓇ ᐅᖃᐅᔾᔨᓂᐊᕈᑉᑕ, ᐃᒪᖅᑖᖅᑎᑦᑎᒃᑲᓐᓂᕆᐊᖃᖃᑦᑕᕐᓂᐊᖅᑐᒍᑦ, ᐊᒻᒪᓗ ᑕᑯᑎᑕᐅᓯᒪᔪᒍᑦ ᑕᒪᓐᓇ ᐊᑑᑎᖃᕐᒪᑦ ᐃᓄᐃᑦ ᐃᕐᒥᒐᔪᖕᓂᖅᓴᐅᓕᖅᑐᑦ ᐊᕐᕕᐊᓂ ᐃᒪᖅᑖᖅᑎᑦᑎᓂᖅᓴᐅᓕᕋᑉᑕ ᑕᐃᒪᐃᒐᔪᙱᓐᓂᖅᓴᐅᒐᓗᐊᖅᑎᓪᓗᑕ.”
ᓴᕕᑲᑖᖅ ᐅᖃᖅᖢᓂ Hᐊᒻᓚᒃᑯᓐᓂᒃ ᓴᓇᔨᖏᑦ ᐅᐱᓐᓇᓛᑦᑎᐊᒡᒎᖅ ᓄᕙᒡᔪᐊᕐᓂᖅ ᓄᓇᖓᓃᓕᖅᑎᓪᓗᒍ.
ᐅᖃᖅᖢᓂ ᐊᓯᖏᑦ ᓴᓂᕐᕙᖅᑕᐅᓯᒪᖕᒪᑕ ᐱᓕᕆᐊᖑᒐᔪᒃᑐᑦ ᓄᓇᖅᑲᑎᒌᑦ ᐱᔭᕆᐊᖃᖅᑕᖏᑦ ᓴᖅᑭᑦᑐᓐᓇᖁᑉᓗᒋᑦ, ᐊᒻᒪᓗ ᓱᓇᓗᒃᑖᑦ ᑐᓂᐅᖅᑲᐅᑕᐅᓲᑦ ᑭᖑᕙᖅᓯᒪᙱᖦᖢᑎᒃ ᐅᓗᕆᐊᓇᖅᑐᖃᙱᖦᖢᑎᒡᓗ.
“ᐅᔾᔨᖅᑐᑦᑎᐊᖅᑐᒍᑦ ᐊᒻᒪᓗ ᐃᓱᒪᒃᑯᑦ ᐅᓗᕆᓇᐅᖅᑐᒦᖁᔨᙱᖦᖢᑕ ᐋᖅᑭᒃᓯᓯᒪᐃᓐᓇᖅᑐᒍᑦ ᓇᐅᒃᑯᓗᒃᑖᖅ ᐱᓕᕆᐊᕆᔭᒃᑯᑦ.
“ᖃᖓᑐᐃᓐᓇᒃᑯᑦ, ᐊᕐᕕᓂᓕᐅᔪᑦ ᐃᒥᖅᑕᐅᑏᑦ ᓄᓇᒃᑰᕈᑏᑦ ᐊᐅᓪᓛᖏᓐᓇᖅᑐᑦ. ᓴᓇᖃᑦᑕᖅᑐᑦ ᐃᒻᒪᖄ 14-ᓂᒃ ᐃᑲᕐᕋᓂᒃ ᐅᑉᓗᑕᒫᒃᑯᑦ ᓴᓇᔨᖏᑦ ᐊᒥᖅᑳᕈᑎᕙᒃᖢᑎᒃ ᐅᑉᓘᑉ ᐃᓗᐊᓂ.
“ᓴᓇᔨᖏᑦ ᑭᐳᖃᑎᒌᖅᑳᕐᓇᑎᒃ, ᓴᓇᔨᑕᖃᖅᑐᖅ ᐊᖑᒻᒥᒃ ᐊᓪᓚᖅᑎᕆᔨᐅᔪᒥᒃ ᓄᓇᒃᑰᕈᑎᒥᒃ ᐋᓐᓂᐊᕐᓇᖅᑐᖃᖁᓇᒍ ᓄᓇᒃᑰᕈᑎ, ᑯᒡᕕᕕᖓᒍᑦ ᓇᕿᑦᑕᐅᑎᖓᓄᑦ ᐅᒃᑯᐊᑉ ᑎᒍᒻᒥᕝᕕᖓᓄᑦ, ᐊᖁᖃᑦᑕᖅᑑᑉ ᓴᖑᒋᐊᕈᑎᖓᓄᑦ ᐊᒻᒪᓗ ᓇᑭᖅᓯᒋᐊᕈᑎᖓᓄᑦ − ᓴᓗᒻᒪᖅᓴᖅᑕᐅᑦᑎᐊᓲᑦ ᓱᓇᓗᒃᑖᑦ ᐊᒻᒪᓗ ᐋᓐᓂᐊᖅᑖᕈᑕᐅᖁᓇᒋᑦ ᐊᓪᓚᖅᑎᖅᑕᐅᓲᑦ ᐊᖁᓐᓂᐊᖅᑐᖅ ᖃᓄᐃᖁᓇᒍ.”
ᓴᕕᑲᑖᖅ ᐅᖃᖅᖢᓂ ᑲᑉᐱᐊᓱᒃᑐᑦ ᑕᐃᒪᐅᔪᒡᒎᖅ ᐊᕐᕕᐊᓂ ᑭᓯᐊᓂ, Hᐊᒻᓚᒃᑯᑦ ᐅᖃᐅᔾᔪᐃᑦᑎᐊᖃᑦᑕᖅᑎᓪᓗᒋᑦ ᐊᒻᒪᓗ ᐃᓄᖕᓂᒃ ᐅᐃᒻᒪᖁᔨᖃᑦᑕᙱᑎᓪᓗᒋᑦ, ᐋᖅᑭᐅᒪᑎᑦᑎᕈᓘᔭᖅᑐᑦ ᑕᒪᐃᓐᓂᖅᑲᔭᖅ.
ᐅᖃᖅᖢᓂ ᑲᑉᐱᐊᓱᖕᓂᖅ ᐅᓗᕆᐊᓇᖅᑑᔪᓐᓇᕐᒥᖕᒪᑦ ᐋᓐᓂᐊᕆᔭᐅᔪᑎᑐᑦ, ᑕᐃᒪᐃᒻᒪᑦ ᐅᐃᒻᒪᒃᑎᑦᑎᑦᑕᐃᓕᓇᓱᒃᑐᑦ ᐃᓄᖕᓂᒃ.
“ᓈᒻᒪᒃᑐᒃᑰᖅᓯᒪᔪᒍᑦᑕᐅᖅ ᐊᒥᓲᓂᖅᓴᑦ ᓴᓇᔨᕗᑦ ᓴᓇᔭᖅᑐᐃᓐᓇᕐᒪᑕ ᐅᑉᓗᑕᒫᒃᑯᑦ. ᖃᐅᔨᒪᔪᑦ ᖃᓄᖅ ᐱᒻᒪᕆᐅᑎᒋᖕᒪᖔᑦ ᐱᓕᕆᐊᖓ ᐃᓄᖕᓄᑦ.
“ᓄᕙᒡᔪᐊᕐᓂᖅ ᓯᕗᓪᓕᖅᐹᒃᑯᑦ ᓴᖅᑭᓚᐅᖅᓯᒪᑎᓪᓗᒍ, ᐃᓚᖏᑦ ᐃᓄᐃᑦ ᐃᓄᖕᓃᑦᑕᐃᓕᔭᕆᐊᖃᓕᓚᐅᕐᒪᑕ, ᑭᓯᐊᓂ ᑕᒪᓐᓇ ᐊᓂᒎᑎᓯᒪᓕᖅᑐᖅ.”
ᓴᕕᑲᑖᖅ ᐅᖃᖅᖢᓂ ᐱᐅᙱᓐᓂᖅᐹᖅ ᐊᓂᒎᑎᓯᒪᓕᖅᑑᔭᕐᓂᖓᓄᑦ ᐊᕐᕕᐊᓂ.
ᐅᖃᖅᖢᓂ ᐃᓄᐃᑦ ᒪᓕᑦᑎᐊᕋᓱᖕᒪᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒪᓕᖁᔭᖏᓐᓂᒃ ᐊᒻᒪᓗ ᐅᑉᓗᑕᒫᒃᑯᑦ ᐱᐅᓯᕙᓪᓕᐊᖏᓐᓇᖅᖢᑎᒃ ᓄᓇᓕᖕᒥ.
“ᓈᓴᐅᑎᑦ ᐊᓯᔾᔨᑲᑕᒃᑑᒐᓗᐊᑦ ᑭᓯᐊᓂ ᖃᑉᓰᓐᓇᕈᖅᐸᓪᓕᐊᔪᑦ.
“ᖁᕕᐊᓱᒃᑐᒍᑦ ᑎᑭᕋᕐᔪᐊᕐᒥᐅᑦ ᑲᖏᖅᖠᓂᕐᒥᐅᓪᓗ ᐋᓐᓂᐊᖅᑐᖁᑎᖏᑦ ᑲᒪᒋᔭᐅᑦᑎᐊᖅᓯᒪᖕᒪᑕ, ᑭᓯᐊᓂ ᐆᒃᑑᑎᖃᕈᓐᓇᙱᑦᑐᒍᑦ ᓄᕙᒡᔪᐊᕐᓂᖅ -19-ᑯᑦ ᐊᒃᑐᖅᑕᐅᓯᒪᔪᓂᒃ ᑕᐃᑉᑯᓇᓂ ᓄᓇᓕᖕᓂᒃ ᖃᓄᐃᑦᑐᒃᑰᖅᓯᒪᓂᑉᑎᓐᓄᑦ ᐊᕐᕕᐊᓂ.
“ᓄᕕᐱᕆ 30-ᒥ, ᐊᕐᕕᐊᓂ 53 ᖃᓄᐃᑦᑐᓐᓃᓚᐅᖅᑐᑦ. ᑲᖏᖅᖠᓂᕐᒥ ᑎᑭᕋᕐᔪᐊᕐᒥᓗ ᐋᓐᓂᐊᓚᐅᖅᑐᑦ ᑲᑎᒃᑯᒃᑎᒃ, ᑖᑉᓱᒧᙵ ᓈᓴᐅᑎᒧᑦ ᖃᓂᑉᐸᓪᓕᐊᙱᓪᓚᕆᒃᑐᑦ ᑭᓯᐊᓂ, ᐄ ᓄᕙᒡᔪᐊᕐᓂᖅ ᓄᖅᑲᖅᑎᑕᐅᓯᒪᔫᔭᖅᑐᖅ ᑕᐃᑉᑯᓇᓂ ᓄᓇᓕᖕᓂ.
“ᐊᔪᕐᓇᙱᓐᓂᖅᓴᖅ ᒥᑭᔪᓂᒃ ᑲᒪᒋᐊᕐᓂᐊᕐᓗᓂ ᐊᖏᔫᓂᖅᓴᐅᔪᓂᐅᖓᓂᒃ.”
ᓴᕕᑲᑖᖅ ᐅᖃᖅᖢᓂ Hᐊᒻᓚᒃᑯᑦ ᐸᕐᓇᐃᓯᒪᖕᒪᑕ ᑲᔪᓯᑎᑦᑎᔪᒪᑉᓗᑎᒃ ᐱᓕᕆᐊᕆᓯᒪᔭᒥᓂᒃ ᐅᑉᓗᒥᒧᑦ ᓵᓚᖃᕋᓱᒃᑎᓪᓗᒋᑦ ᓄᕙᒡᔪᐊᕐᓂᕐᒥᒃ, ᐊᒻᒪᓗ ᑕᒪᓐᓇ ᐃᓚᐅᖃᑕᐅᑎᑦᑎᔪᖅ ᓂᕿᒃᓴᓂᒃ ᐊᔾᔭᖅᑐᐃᖃᑦᑕᕐᓂᕐᒧᑦ ᑕᒪᓐᓇ ᖁᕕᐊᒋᔭᐅᑦᑎᐊᖃᑦᑕᕐᒪᑦ.
ᐅᖃᖅᖢᓂ ᑕᒪᓐᓇ ᐃᓱᒫᓘᑕᐅᓇᔭᖅᑐᓂᒃ ᑲᑦᑐᖅᑎᑦᑎᓯᒪᔪᖅ ᐊᒥᓱᓄᑦ ᐃᓚᒌᒃᑐᓄᑦ, ᖃᐅᔨᒪᑉᓗᑎᒃ ᓄᑕᕋᖏᑦ ᑳᔾᔮᙱᓕᕐᓂᖏᓐᓄᑦ.
“ᖃᐅᔨᒪᒐᑉᓯ, ᐅᒡᓚᕋᕈᑎᔪᓐᓇᐃᓪᓕᓯᒪᖕᒪᑕ ᓄᓇᑉᑎᓐᓂᒃ ᐊᑯᓂᐅᓕᖅᑐᖅ ᐊᒻᒪᓗ ᑕᒪᓐᓇ ᐊᒃᓱᕈᕐᓇᖅᑐᒃᑰᕈᑕᐅᓯᒪᔪᖅ ᐊᒥᓱᓄᑦ ᐃᓄᖕᓄᑦ.
“ᒪᕐᕉᒃ ᐱᓇᓱᐊᕈᓰᒃ ᑐᖔᓂ, ᖁᕕᐊᓱᒡᕕᐅᖅᑳᕐᓇᓂ, ᑐᓂᐅᖅᑲᐃᓯᒪᓕᕈᒪᓂᐊᖅᑐᒍᑦ ᐊᑐᓂ ᐃᒡᓗᒋᔭᐅᔪᓄᑦ ᓄᑕᖅᑲᓄᑦ ᐃᑲᔫᑎᒃᓴᓂᒃ ᐊᒻᒪᓗ ᐃᓐᓇᕐᓄᑦ ᓱᓪᓗᐊᕈᑎᒃᓴᓂᒃ ᐱᓕᕆᔾᔪᑎᒃᓴᓂᒡᓗ.
“ᐃᓄᐃᑦ ᐊᕐᕕᐊᓂ ᐅᐱᓐᓇᖅᑐᒻᒪᕆᐊᓗᐃᑦ ᐊᒻᒪᓗ ᐱᓕᕆᑦᑎᐊᖅᑐᐊᓗᐃᑦ. ᑖᑉᑯᐊ ᑕᒡᕙ ᓯᕗᓕᖅᑎᐅᔪᑦ ᓵᓚᖃᕋᓱᖕᓂᕐᒧᑦ ᓄᕙᒡᔪᐊᕐᓂᕐᒥᒃ, ᓵᓚᒋᕙᓪᓕᐊᔭᖅᐳᑦ ᓵᓚᒋᔭᕆᐊᓖᑦ ᐊᑐᓂᐅᓈᖅᑎᖅᖢᒋᑦ.
“ᖁᔭᓐᓇᒦᕈᒪᔭᒃᑲ ᐊᕐᕕᐊᕐᒥᐅᑕᑦ ᐱᓕᕆᕐᔪᐊᖅᓯᒪᓂᖏᓐᓄᑦ. ᐱᓕᕆᕐᔪᐊᖅᓯᒪᓂᖏᑦ ᐅᔾᔨᕐᓇᖅᑐᑦ.
“ᐊᒻᒪᓗ, ᑕᒪᕐᒥᒃ ᐃᓄᐃᑦ ᖁᔭᓐᓇᒦᕈᒪᔭᒃᑲ, ᓇᒥᕐᒥᐅᑕᐅᒐᓗᐊᖅᐸᑕ ᓄᓇᕐᔪᐊᕐᒥ, ᐅᕙᑉᑎᓐᓂᒃ ᐃᓱᒪᖃᑦᑕᕐᒪᑕ ᑐᒃᓯᐊᕐᓂᒃᑯᑦ ᐊᕐᕕᐊᕐᒥᐅᑕᓂᒃ.”