ᐊᖑᑦ ᓂᐱᖅᑯᖅᑐᔾᔪᑎᒥᒃ ᑎᒍᒥᐊᖃᑦᑕᓚᐅᖅᑐᖅ ᐃᓂᒥᓄᑦ ᐅᑎᖅᑐᖅ ᑕᖅᑭᐅᓚᐅᖅᑐᒥ ᑲᖏᖅᖠᓂᕐᒥ − ᐊᒻᒪᓗ ᐱᐅᒃᓴᑦᑎᐊᓚᐅᖅᑐᒃᓴᐅᔪᖅ ᓄᑖᓂᒃ ᑕᑯᔭᒥᓂᒃ.
ᐊᔾᔨ ᐳᔾᔫᑦ ᑯᓱᒐᕐᒥᙶᖅᑐᖅ
ᐊᒥᓱᓂᒃ ᐅᑭᐅᓂᒃ ᔫᓯ ᑯᓱᒐᐅᓚᐅᖅᑐᖅ ᑕᑯᒐᔪᖕᓇᓚᐅᖅᑐᖅ Hᐊᑭᑦᑐᓂᒃ ᑲᖏᖅᖠᓂᕐᒥ, ᐊᒥᓱᓂᒃ ᐃᑲᕐᕋᓂᒃ -30-ᐅᑎᓪᓗᒍ ᓂᒡᓕᓇᖅᑐᐊᓗᖕᒥ Hᐊᑭᑦᑐᓃᖃᑦᑕᓚᐅᕐᒪᑦ ᖃᐅᔨᓴᐅᑎᒥᒃ ᑲᒪᔨᐅᑉᓗᓂ Hᐊᑭᑦᑐᓂᒃ ᓄᑕᐅᙱᑦᑐᒥ ᓯᐊᕐᕆᔮᕐᕕᐅᓚᐅᖅᑐᒥ ᑲᖏᖅᖠᓂᕐᒥ ᐃᓄᖕᓂᒃ ᑐᓴᐅᒪᑎᑦᑎᔨᐅᑉᓗᓂᓗ, ᑐᓴᕐᓈᖅᐸᒃᖢᓂ ᐊᒻᒪᓗ ᑎᑉᓯᓵᕆᕙᒃᖢᓂ Hᐊᑭᕕᒡᔪᐊᖅᑎᓪᓗᒋᑦ ᐊᒻᒪᓗ ᐱᙳᐊᖃᑕᐅᕙᒃᖢᓂ ᐊᖑᑎᓂᒃ Hᐊᑭᖅᑎᓂᒃ ᐃᓐᓇᕐᓂᒃ.
ᐊᒻᒪᓗ, ᑕᖅᑭᐅᓚᐅᖅᑐᒥ, ᐃᓕᑕᕆᔭᐅᔾᔪᑎ ᓇᓗᓇᐃᒃᑯᑕᖅ ᓴᖅᑭᑎᑕᐅᓚᐅᖅᑐᖅ ᓂᐱᖃᐅᓯᖃᕐᕕᒃ ᐃᒡᓗᑕᖅ ᑕᐃᔭᐅᔾᔪᑎᑖᖅᖢᓂ ᔫᓯ ᑯᓱᒐᕐᒥᒃ ᐅᐱᒋᔪᒪᑉᓗᒍ.
ᔫᓯ ᑯᓱᒐᐅᑉ ᐃᕐᓂᖓ, ᐳᔾᔫᑦ ᑯᓱᒐᖅ, ᐅᖃᖅᖢᓂ ᐊᓈᓇᖓ, ᓇᓕ ᑯᓱᒐᖅ, ᐊᖏᓚᐅᕐᒪᑦ ᑲᖏᖅᖠᓂᐅᑉ ᕿᑎᒃᑐᓕᕆᔨᖓᓄᑦ ᑕᐃᕕᑎ ᑲᓛᒃᒧᑦ ᐃᓕᑕᕆᔭᐅᔾᔪᑎ ᐃᓕᔭᐅᖁᑉᓗᒍ ᓄᑖᒥ ᓯᐊᕐᕆᔮᕐᕕᖕᒥ.
ᐅᖃᖅᖢᓂ ᐊᓈᓇᖓᒎᖅ ᐅᖃᐅᔾᔨᓚᐅᖅᑐᖅ ᑲᓛᒃᒥᒃ ᐅᐱᒍᓱᒃᑲᒥ ᐃᓕᑕᕆᔭᐅᖕᒪᑦ ᐅᐃᒋᓚᐅᖅᑕᖓ.
“ᐊᖏᕐᒪᑦ ᐊᓈᓇᒐ ᓇᔭᒃᑲ ᑐᓴᖅᑎᓚᐅᖅᑕᒃᑲ, ᐊᒻᒪᓗ ᖁᕕᐊᓱᑦᑎᐊᓚᐅᖅᑐᑦ ᐊᒻᒪᓗ ᖁᔭᓕᓪᓚᕆᓚᐅᖅᑐᑦᑕᐅᖅ,” ᑕᐃᒪᓐᓇ ᐅᖃᖅᖢᓂ ᐳᔾᔫᑦ.
“ᖁᔭᓐᓇᒦᓪᓚᑦᑖᖅ ᐃᓕᖕᓄᑦ, ᑎᐅᕈᓪ, ᓴᓇᔭᐅᑎᓚᐅᕋᖕᓂ − (ᑎᐅᕈᓪ ᒍᕆᐅᕐ ᒥᐊᓂᖅᓯᔨᐅᖃᑦᑕᓚᐅᕐᒪᑦ ᐱᙳᐊᖅᑐᓂᒃ Hᐊᑭᕐᓂᒃᑯᑦ ᐅᑭᐅᖅᑕᖅᑐᒥ ᑕᐃᑉᓱᒪᓂ ᔫᓯ ᐃᓅᔪᓐᓃᖅᑎᓪᓗᒍ ᐊᒻᒪᓗ ᑐᓴᖅᑎᑦᑎᑉᓗᓂ ᒋᐅᕆ ᕕᕕᐊᓐᒥᒃ Hᐊᑭᕐᓂᒃᑯᑦ ᐊᖓᔪᖅᑳᕆᔭᐅᓚᐅᖅᑐᒥᒃ ᐊᒻᒪᓗ ᑲᑎᒪᔨᖏᓐᓂᒃ, ᐊᖏᓚᐅᖅᓯᒪᔪᑦ ᐃᓕᑕᕆᔭᐅᔾᔪᑎᑖᖁᑉᓗᒍ) − ᐊᒻᒪᓗ ᑕᐃᕕᑎᒥᒃ (ᑲᓛᒃ) ᐃᓕᐅᖅᑲᐃᓚᐅᕐᒪᑦ ᐃᓕᑕᕆᔭᐅᔾᔪᑎᒥᒃ ᐃᒡᓗᑕᕐᒧᑦ ᓄᑖᒥ ᓯᐊᕐᕆᔮᕐᕕᖕᒥ.”
ᐳᔾᔫᑦ ᐅᖃᖅᖢᓂ ᐃᓕᑕᕆᔭᐅᔾᔪᑎ ᐃᖅᑲᐃᓐᓇᓪᓚᕆᖕᒪᑦ.
ᐅᖃᖅᖢᓂ ᐃᖅᑲᐅᒪᔪᕉᖅ ᐊᑖᑕᖓ ᓯᕗᓪᓕᖅᐹᒥ ᐅᖃᐅᓯᖃᖃᑦᑕᓕᕐᒪᑦ ᑐᓴᕐᓈᖅᑎᑦᑎᖃᑦᑕᕈᒪᑉᓗᓂ Hᐊᑭᑦᑐᓂᒃ ᐊᒻᒪᓗ ᖃᐅᔨᓇᓱᓕᖅᖢᓂ ᓂᐱᖅᑯᖅᑐᔾᔪᑎᖃᕐᒪᖔᑦ ᓄᑖᐅᙱᑦᑐᖅ ᓯᐊᕐᕆᔮᕐᕕᒃ.
“ᐅᕙᓄᑦ ᐅᖃᓚᐅᖅᓯᒪᔪᖅ ᐅᓐᓅᔫᑉ ᐃᓚᖓᓂᒃ ᓯᐊᕐᕆᔮᕐᕕᓕᐊᓚᐅᕐᓂᕐᒥᓄᑦ ᖃᐅᔨᓴᕆᐊᖅᑐᖅᖢᓂ ᓂᐱᖅᑯᖅᑐᔾᔪᑎᓂᒃ, ᐊᒻᒪᓗ ᓂᐱᖅᑯᖅᑐᔪᐊᓗᖕᓂᒃ ᑐᓴᕐᓇᕐᓂᖅᖢᓂ ᐊᒻᒪᓗ ᓂᐱᖅᑯᖅᑐᙱᓐᓂᖅᓴᐅᔪᓂᒃ.
“ᐅᔾᔨᕈᓱᒃᖢᓂᓗ ᐱᙳᐊᖅᑎᓂᒃ ᓯᑯᒥ ᑐᓴᕐᓈᖅᑎᑦᑎᑎᓪᓗᒍ ᐊᒻᒪᓗ ᐅᖃᖅᖢᓂ ᓂᐱᖅᑯᖅᑐᔪᓂᒎᖅ ᑐᓴᕐᓈᖅᑎᑦᑎᑉᓗᓂ ᐱᙳᐊᖅᑐᑦ ᓱᑲᓂᖅᓴᒃᑯᑦ ᐱᙳᐊᖃᑦᑕᓕᓚᐅᖅᑐᑦ. ᐊᒻᒪᓗ ᓱᑲᐃᓐᓂᖅᓴᓂᒃ ᑎᑕᒃᖢᓂ ᐱᙳᐊᖅᑐᑦ ᓱᑲᐃᓐᓂᖅᓴᒃᑯᑦ ᐱᙳᐊᓕᖅᐸᒃᖢᑎᒃ.
“ᐅᖃᓚᐅᖅᑐᖅ ᑎᑉᓯᓇᖃᑦᑕᓚᐅᕐᒪᑕᓘᓐᓃᒡᒎᖅ, ᑭᓯᐊᓂ ᐃᖕᒥᓂᒃ ᐱᕕᒃᓴᖃᕈᓐᓇᓚᐅᕋᒥ ᓂᐱᖅᑯᖅᑐᔪᓂᒃ ᑐᓴᕐᓈᕈᓐᓇᕈᓐᓇᕐᓂᕐᒧᑦ, ᑕᒪᓐᓇ ᖁᕕᐊᒋᑦᑎᐊᓚᐅᕐᒪᒍ, Hᐊᑭᑦᑐᓂᒡᓗ ᑕᐅᑐᒃᖢᓂ.
“ᐅᕙᒻᓄᑦ ᐊᒥᓱᐃᖅᑕᖅᖢᓂ ᐅᖃᖃᑦᑕᓚᐅᖅᑐᖅ ᖁᕕᐊᒋᔭᖃᓪᓚᕆᖕᓂᕋᖅᖢᓂ Hᐊᑭᑦᑐᓂᒃ ᑕᐅᑐᒃᖢᓂ, ᐊᒻᒪᓗ ᓇᓕᐊᒃᑰᒥᐊᕋᓗᐊᖅᐸᑦ ᐃᓐᓇᐃᑦ Hᐊᑭᖅᑎᓪᓗᒋᑦ, ᐃᓐᓇᐅᓂᖅᓴᓪᓘᓐᓃᑦ ᐅᕝᕙᓘᓐᓃᑦ ᓄᑕᖅᑲᑦ, ᑕᒪᐃᓐᓂᒃ ᖁᕕᐊᒋᔭᖃᓚᐅᖅᑐᖅ.
“ᑕᐃᒪᑐᖅ ᐃᓕᑕᕆᔭᐅᔾᔪᑎ ᐱᐅᓯᕚᓪᓕᕈᑕᐅᓂᐊᖅᐳᖅ ᓄᑖᒧᑦ ᓯᐊᕐᕆᔮᕐᕕᖕᒧᑦ ᐊᒻᒪᓗ ᓴᖅᑭᑎᑦᑎᓗᓂ ᖃᑉᓯᓂᒃ ᖁᕕᐊᓇᖅᑐᓂᒃ ᐃᖅᑲᐅᒪᔾᔪᑎᓂᒃ ᑕᒪᐃᓐᓄᑦ ᐃᓄᖕᓄᑦ ᐃᖅᑲᐅᒪᔪᓄᑦ ᖃᓄᖅ ᐊᑖᑕᒐ ᖁᕕᐊᒋᔭᖃᓚᐅᕐᒪᖔᑦ Hᐊᑭᕐᓂᕐᒥᒡᓗ.”