ᖁᕕᐊᓱᒡᕕᒃ ᑎᑭᓵᓕᓚᐅᖅᐳᖅ ᐃᒡᓗᓕᒑᕐᔪᖕᒧᑦ ᑕᒪᑐᒪᓂ ᐊᕐᕌᒎᔪᒥ, ᐊᒻᒪ ᓵᓐᑕ ᑲᓛᓯ ᐱᔾᔪᑎᖃᓚᐅᖅᐳᖅ ᐃᑲᔪᕐᓂᕐᒥ ᓄᓇᓕᖕᓂ ᐸᐃᕆᕝᕕᖕᓂ ᐅᑎᕐᓂᖏᓐᓂ ᐱᓕᕆᓂᖏᓐᓄᑦ ᐊᒻᒪ ᑐᙵᓵᕆᒃᑲᓐᓂᕐᓂᖏᓐᓂ ᓱᕈᓯᕐᓂᑦ.
ᓯᓐᑎ ᑎᓕᓐ ᑳᒻᓘᑉᔅ, ᐳᕆᑎᔅ ᑲᓚᒻᐱᐊᒥ, ᑐᓂᓯᓯᒪᕗᑦ ᓵᓐᑕᒥ ᐃᑲᔪᖅᓱᐃᓂᕐᒥ ᐅᑭᐅᖅᑕᖅᑐᒥ ᓄᓇᓕᐅᔪᓂ ᑕᐃᒪᙵᓂ ᐱᒋᐊᓚᐅᕋᒥ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᒃᓴᕋᓛᓂᑦ ᐊᕐᕌᒍᑦ ᑕᓪᓕᒪᐅᓕᖅᑐᓂ, ᐊᒻᒪᓗ, ᑕᐃᑲᓂᓗᒃᑖᒥ, ᖁᖓᑎᑦᑎᓯᒪᕗᖅ ᐊᒥᓱᓄᑦ ᑮᓇᓄᑦ ᓱᕈᓯᕐᓂ ᐊᒻᒪ ᐃᓄᑐᖃᕐᓂ ᑭᕙᓪᓕᕐᒥ.
ᑎᓕᓐ ᐅᖃᓚᐅᖅᐳᖅ ᑐᓴᕋᒥ ᐸᐃᕆᕝᕕᒃ ᐃᒡᓗᓕᒑᕐᔪᖕᒥ ᐋᖅᑭᐅᒪᑎᑕᐅᑦᑎᐊᖅᓯᒪᙱᓐᓂᖓᓂ ᐊᒻᒪ ᐸᖅᑭᔭᐅᑦᑎᐊᕐᓇᓂ, ᖃᓄᐃᓕᐊᕆᐊᖃᖅᑑᔮᓚᐅᖅᐳᖅ ᐅᑎᖅᑎᑦᑎᓂᖓᓂ ᐃᖏᕐᕋᑦᑎᐊᕐᓂᖓᓄᑦ.
ᐅᖃᓚᐅᖅᐳᖅ ᖃᐅᔨᒋᐊᓚᐅᖅᐳᖅ ᕕᑭ ᑕᓇᔪᖕᒧᑦ ᐃᒡᓗᓕᒑᕐᔪ`ᖕᒥ ᐊᒻᒪ ᕿᓚᒻᒥᐅᔪᒥ ᐱᒋᐊᖅᑎᑦᑎᓚᐅᖅᐳᑦ.
“ᕕᑭ ᐊᐱᕆᓚᐅᖅᐸᕋ ᑭᓱᓂ ᐱᔭᕆᐊᖃᕐᓂᖏᓐᓂ ᐸᐃᕆᕝᕕᖕᒥ ᐊᒻᒪᓗ ᐃᓕᓐᓂᐊᕐᕕᖕᒥ ᐊᒻᒪ, ᑭᓱᓕᒫᓂᒃ ᐅᖃᐅᑎᓪᓗᓂᖓ ᐱᔭᕆᐊᖃᕐᓂᖏᓐᓂ ᓲᕐᓗ ᐱᙳᐊᕐᓂ, ᐃᓕᓐᓂᐊᕈᑕᐅᔪᓂ ᐱᙳᐊᕐᓂᑦ ᐊᒻᒪᓗ ᐃᓗᓪᓕᖅᓯᒪᔪᓂ ᓂᕐᔪᑎᙳᐊᓂ ᒥᑭᑦᑑᑎᑯᓗᖕᓂ ᐊᓕᐊᓇᐃᒋᔭᐅᕐᔪᐊᖅᑐᓂ,” ᐅᖃᓚᐅᖅᐳᖅ ᑎᓕᓐ.
ᑎᓕᓐ ᐅᑭᐅᖅᑕᖅᑐᒥ ᑲᓇᑕᒥ ᐱᓕᕆᐊᒃᓴᕋᓛᑦ ᓇᒃᓯᐅᔾᔨᖃᑦᑕᖅᓯᒪᕗᑦ ᖁᕕᐊᓱᒡᕕᖕᒥ ᖁᕕᐊᓲᓯᐊᓂ ᓱᕈᓯᕐᓄᑦ ᐃᒡᓗᓕᒑᕐᔪᖕᒧᑦ ᑕᐃᒪᙵᓂᐸᓗᒃ ᐅᓪᓗᕐᒥ ᓯᕗᓪᓕᖅᐹᖓᓂ ᐊᐅᓚᑕᐅᓂᖏᓐᓂ.
ᐊᒻᒪᓗ, ᐸᐃᕆᕝᕕᒃ ᓯᕗᓪᓕᐅᔾᔭᐅᑎᑕᐅᓂᖃᒐᓚᓚᐅᖅᑎᓪᓗᒋᑦ ᑕᒪᑐᒪᓂ ᐊᕐᕌᒎᔪᒥ, ᖁᕕᐊᓱᒡᕕᖕᒥ ᖁᕕᐊᓲᓯᐊᑦ ᑕᐃᑲᓃᒃᑲᓐᓂᕐᓂᐊᖅᐳᑦ ᓱᕈᓯᕐᓄᑦ.
ᑎᓕᓐ ᐅᖃᓚᐅᖅᐳᖅ ᑐᓂᕐᕈᓯᐊᖃᕐᓂᖏᓐᓂ ᑲᓇᑕᓕᒫᒥ ᑲᑎᙵᓂᕆᔭᖓᓂ ᐊᒻᒪᓗ, ᑕᑯᒑᖓᒥᒃ ᐱᔭᕆᐊᖃᕐᓂᐅᔪᒥ, ᐃᖏᕐᕋᓯᑲᐅᖅᑐᖅᑎᑦᑎᕙᒃᐳᖅ.
ᐅᖃᓚᐅᖅᐳᖅ ᓱᓕ ᐊᒥᓱᓂᒃ ᑎᑭᑦᑐᖃᒃᑲᓐᓂᓕᒑᔪᖅ ᐃᒡᓗᓕᒑᕐᔪᖕᒧᑦ ᐃᑲᔪᕐᓂᕐᒧᑦ ᐸᐃᕆᕝᕕᖕᒧᑦ, ᐊᒻᒪᓗ ᐱᒋᐊᒃᑲᓐᓂᕐᓂᐊᖅᐳᖅ ᐱᓕᕆᒃᑲᓐᓂᕐᓂᐅᔪᒥ ᔭᓄᐊᕆᒥ ᖁᕕᐊᓱᒡᕕᖕᒥ ᑎᑎᖅᑲᓄᑦ ᑐᐊᕕᕐᓇᕐᓂᐅᔪᒥ ᐊᓂᒍᕈᓂ ᑲᓇᑕᒥ ᑎᑎᖅᑲᕐᓂᐊᕐᕕᖓᓂ.
“ᑭᓱᓕᒫᑦ ᐅᖃᐅᓯᐅᕌᓂᒃᐸᑕ ᐊᒻᒪ ᐱᔭᕇᕐᓗᓂ, ᐊᐅᓪᓚᖅᑎᑦᑎᓯᒪᓂᐊᖅᐳᒍᑦ $10,000−ᑐᖅᑐᐸᓗᖕᓂ ᐱᖁᑎᓂᑦ ᑕᐃᑯᖓ ᐱᒋᐊᓕᓵᖅᑐᓄᑦ ᐃᓕᓐᓂᐊᕐᕕᐊᕈᓯᕐᒥ ᐊᒻᒪ ᐸᐃᕆᕝᕕᖕᒧᑦ ᐃᒡᓗᓕᒑᕐᔪ`ᒥ.
“ᓇᒃᓯᐅᔾᔨᓚᐅᖅᐳᒍᑦ ᖁᕕᐊᓲᓯᐊᒃᓴᓂ 400−ᓄᑦ ᓱᕈᓯᕐᓄᑦ ᓯᕗᓪᓕᖅᐹᒥ ᐊᕐᕌᒎᔪᒥ ᑕᐃᒪᐃᓕᐅᓕᓵᖅᑎᓪᓗᖓ ᐊᒻᒪ ᒫᓐᓇ 4,500 ᐅᖓᑖᓄᐊᕈᔾᔨᕗᒍᑦ. ᐊᔪᕐᓇᖅᐳᖅ ᐅᒃᐱᕈᓱᖕᓂᕐᒥ. ᑲᑎᓪᓗᒍ, ᒫᓐᓇᒧᑦ ᑎᑭᖦᖢᒍ ᐊᕐᕌᒍᓄᑦ ᑕᓪᓕᒪᓄᑦ, ᐊᐅᓪᓚᖅᑎᑦᑎᓯᒪᕗᒍᑦ 17,542−ᓂ ᖁᕕᐊᓱᒡᕕᖕᒧᑦ ᖁᕕᐊᓲᓯᐊᒃᓴᓂ ᐅᑭᐅᖅᑕᖅᑐᒥ ᓱᕈᓯᕐᓄᑦ.”
ᐅᖃᓚᐅᖅᐳᖅ ᓱᕈᓰᑦ ᖁᕕᐊᓲᓯᐊᒥᓂᒃ ᐱᒍᑎᒃ, ᑕᐃᒪᑐᖅ, ᖃᐅᔨᒪᓂᐊᖅᐳᑦ ᐃᓱᒪᒋᔭᐅᓂᖏᓐᓂ ᐊᒻᒪ ᐅᔾᔨᕆᓂᖏᓐᓂ ᐃᓄᖕᓂ ᑕᖅᑳᓂ ᓄᓇᕐᔪᐊᕌᓗᖕᒥ ᓇᒡᓕᒍᓱᒃᑐᓂ.
“ᐃᓱᒪᔪᒪᓲᖑᕗᖓ, ᒪᒃᑯᖕᓂᖅᓴᐅᔪᓂ ᑕᒪᑐᒪᓂ ᑐᑭᖃᙱᑦᑐᒥ ᐊᕐᕌᒎᔪᒥ, ᖁᕕᐊᓲᓯᐊᒥᓂᒃ ᐱᒍᑎᒃ, ᖃᐅᔨᒪᓂᐊᖅᐳᑦ ᓵᓐᑕᐅᑉ ᐳᐃᒍᖅᓯᒪᙱᓐᓂᖓᓐᓂ.”