ᖃᑉᓰᓐᓇᐅᔪᑦ ᐱᓕᕆᖃᑎᒌᒃᑐᑦ ᐃᑲᔪᖅᑐᒻᒪᕆᐊᓗᐃᑦ ᓄᓇᖅᑲᑎᒌᖕᓂᒃ ᐃᓚᒌᖕᓂᒃ ᐃᑲᔪᖅᑕᐅᔭᕆᐊᓕᖕᓂᒃ, ᓂᕆᑎᑦᑎᓚᐅᕐᒥᔪᑦ ᐃᓕᓐᓂᐊᖅᑐᓂᒃ ᐅᑉᓗᕈᒥᑕᖅᑎᑦᑎᑎᓪᓗᑎᒃ ᐃᓕᓐᓂᐊᖅᑐᓂᒃ ᑕᒪᐃᓐᓂᒃ ᐱᖓᓱᓂᒃ ᐃᓕᓐᓂᐊᕐᕕᖕᒥᙶᖅᑐᓂᒃ ᑲᖏᖅᖠᓂᕐᒥ. ᑭᓕ ᑲᓛᒃ−ᓕᓐᓂᐅᓪ − ᐃᓚᐅᖃᑕᐅᔪᖅ ᐃᑲᔪᖅᑐᓂᒃ, ᐱᖃᑕᐅᑉᓗᓂ ᐱᓕᓐᑕ ᐅᒡᔪᒃ, ᐊᒫᓐᑕ ᐃᑦᓯᖅ, ᑎᐅᕋ ᑭᓕᒥᓐᑦ ᐊᒻᒪᓗ ᑐᕆᕗ ᓄᐊᑦᒪᓐ − ᐅᖃᓚᐅᖅᑐᖅ ᐃᑲᔪᖅᑐᖅᑕᐅᑦᑎᐊᓚᐅᖅᑐᒡᒎᖅ Hᐊᒻᓚᒃᑯᑦ ᕿᑎᒃᑐᓕᕆᔨᒃᑯᖏᓐᓄᑦ.
ᐅᖃᖅᖢᓂ ᐃᐳᕈ ᐅᐊᑦᓚᓐ ᐱᒋᐊᖅᑎᑦᑎᖅᑳᓚᐅᕐᒪᑦ ᓂᕿᑖᖅᑎᑦᑎᔪᒪᓂᕐᒧᑦ ᐱᓕᕆᐊᒥᒃ ᐃᒻᒪᖄ ᐊᕐᕕᓂᓖᑦ ᐱᓇᓱᐊᕈᓰᑦ ᑐᖔᓂ ᑲᑎᑦᑎᑉᓗᓂ ᑐᓂᕐᕈᑎᓂᒃ ᓄᓇᓕᖕᒥ ᐃᓚᒌᑦ ᐃᑲᔪᖅᑕᐅᔭᕆᐊᓖᑦ ᐃᑲᔪᖅᑕᐅᔪᓐᓇᖁᑉᓗᒋᑦ.
“ᐃᑲᔪᕈᒪᓕᓚᐅᖅᑐᖓ ᐊᑭᓕᖅᑐᖅᑕᐅᓇᖓ ᑕᒡᕘᓇ ᐊᒻᒪᓗ ᑕᐃᑲᙵᑦ ᑕᐃᒪᓐᓇ ᐱᓕᕆᓕᓚᐅᖅᑐᒍᑦ ᐱᓇᓱᐊᕈᓯᑕᒫᑦ ᐃᑲᔫᑎᓂᒃ ᑮᓇᐅᔭᖅᑖᖅᓯᒪᑉᓗᑕ ᐊᒡᓂᒍ ᐃᒍ ᐅᔭᕋᖕᓂᐊᖅᑐᓕᕆᔨᒃᑯᓐᓂᒃ ᐊᒻᒪᓗ Hᐊᒻᓚᒃᑯᓐᓂᒃ,” ᑕᐃᒪᓐᓇ ᐅᖃᖅᖢᓂ ᓕᓐᑎᐅᓪ, “ᒫᓐᓇ ᑐᓂᐅᖅᑲᐃᖃᑦᑕᖅᑐᒍᑦ 30-ᓂᒃ ᓂᕿᓂᒃ ᑲᑎᑕᐅᓯᒪᔪᓂᒃ ᐱᓇᓱᐊᕈᓯᑕᒫᑦ ᐃᓚᒌᖕᓄᑦ ᐃᑲᔪᖅᑕᐅᔭᕆᐊᓕᖕᓄᑦ (ᐃᓚᒌᑦ ᐊᑎᖏᑦ ᖃᐃᑕᐅᕙᒃᑐᑦ ᐳᑭᖅᑕᓕᒃᑯᑦ ᖁᕕᐊᓱᖕᓇᒥ ᐊᑎᕐᓂᒃ ᑲᑎᓯᒪᖃᑦᑕᖅᑕᖏᓐᓂᒃ ᐅᕝᕙᓘᓐᓃᑦ ᓄᓇᑉᑎᓐᓂᒃ ᓂᕿᑖᕐᕕᖕᒥ) ᐃᓗᓕᖃᖅᖢᒋᑦ ᓴᓗᒻᒪᖅᓴᐅᑎᓂᒃ ᐊᒻᒪᓗ ᓂᐅᕕᕈᑎᒥᒃ ᓄᓇᑉᑎᓐᓂᒃ ᓂᐅᕕᕐᕕᖕᒥ ᓂᕿᓂᒃ ᓂᐅᕕᕈᓐᓇᖁᑉᓗᒋᑦ.
“ᓂᕿᑖᖅᑎᑦᑎᖃᑦᑕᖅᑎᓪᓗᑕ, ᐅᔾᔨᕈᓱᓕᓚᐅᕋᑉᑕ ᓂᕆᑎᑦᑎᔭᕆᐊᖃᕐᓂᑉᑎᓐᓄᑦ ᓄᑕᖅᑲᓂᒃ ᐃᓕᓐᓂᐊᕈᓐᓃᖅᓯᒪᔪᓂᒃ, ᐆᒃᑐᕋᓕᓚᐅᖅᑐᒍᑦ ᐊᐃᕆᓕ 24-ᒥ ᐅᑉᓗᕈᒥᑕᖅᑎᑦᑎᔪᒪᓂᕐᒧᑦ ᓄᑕᖅᑲᓂᒃ ᐃᓕᓐᓂᐊᖃᑕᐅᕙᒃᑐᓂᒃ ᐱᖓᓱᓂᒃ ᐃᓕᓐᓂᐊᕐᕕᑉᑎᓐᓂᒃ ᑲᖏᖅᖠᓂᕐᒥ.
“ᑐᓂᐅᖅᑲᐃᓚᐅᖅᑐᒍᑦ 180-ᓂᒃ ᐅᑉᓗᕈᒥᑕᒐᒃᓴᓂᒃ. ᐋᖅᑭᒃᓯᓯᒪᓚᐅᖅᑐᒍᑦ ᐊᐃᒃᖠᖃᑦᑕᖁᑉᓗᒋᑦ 10-ᒥ ᐅᑉᓛᒃᑯᑦ 11-ᒧᑦ, ᑭᓯᐊᓂ ᓄᖑᕈᑎᓚᐅᖅᑐᒍᑦ 10:55-ᒥ ᐊᒻᒪᓗ ᖃᐃᔪᖃᒃᑲᓐᓂᓚᐅᖅᖢᓂ ᐃᒻᒪᖄ ᖁᓕᓂᒃ ᑭᖑᓂᐊᓂ, ᑕᐃᒪᐃᒻᒪᑦ ᐋᖅᑭᒃᓱᐃᔪᒫᓕᖅᑐᒍᑦ 200-ᓂᒃ ᐊᒻᒪᓗ, ᐱᒋᐊᕐᓗᑕ ᑕᒡᕙᓂ ᐱᓇᓱᐊᕈᓯᕐᒥ, ᒪᕐᕈᐃᖅᑕᕐᓗᑕ ᐱᓇᓱᐊᕈᓯᑕᒫᑦ ᑕᐃᒪᐃᓕᐅᖅᑎᑦᑎᖃᑦᑕᕐᓂᐊᖅᖢᑕ, ᑐᒡᓕᐊᖑᓕᕌᖓᑦ ᐊᒻᒪᓗ ᓯᑕᒫᖑᓕᕌᖓᑦ.
“ᑮᓇᐅᔭᓂᒃ ᓈᒻᒪᒃᑐᓂᒃ ᐱᑕᖃᖅᑐᒍᑦ ᑕᒪᓐᓇ ᑲᔪᓯᑎᑦᑐᓐᓇᖁᑉᓗᒍ ᐃᒻᒪᖄ ᐊᕐᕕᓂᓕᖕᓂᒃ ᐱᓇᓱᐊᕈᓯᕐᓂᒃ ᐊᒻᒪᓗ, ᑕᐃᒪᐃᓕᐅᒃᑲᓐᓂᕆᐊᖃᕈᑉᑕ ᑭᖑᓂᐊᓂ, ᖃᐅᔨᒋᐊᕐᓂᐊᖅᑐᒍᑦ ᖃᓄᐃᓕᐅᕆᐊᖃᕐᓂᐊᕐᒪᖔᑉᑕ ᑕᒪᓐᓇ ᑲᔪᓯᔪᓐᓇᖁᑉᓗᒍ.”
ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᓄᓇᓕᖕᒥ ᖃᓄᐃᙱᑦᑐᓐᓇᖁᑉᓗᒋᑦ ᐃᑲᔫᑎ, ᑐᓂᓯᓚᐅᖅᑐᖅ $15,000-ᒥᒃ ᑐᓂᕐᕈᑕᐅᒐᔪᒃᑐᖅ ᐃᓕᓐᓂᐊᕐᕕᖕᓄᑦ ᐅᑉᓛᕈᒥᑕᕈᑕᐅᔪᓐᓇᖁᑉᓗᒋᑦ ᐊᒻᒪᓗ/ᐅᕝᕙᓘᓐᓃᑦ ᑕᒧᓗᒐᒃᓴᓄᑦ ᐃᑲᔫᑎ Hᐊᒻᓚᐅᔪᓄᑦ ᐊᑐᒐᒃᓴᑦ ᓂᕿᖃᖅᑎᑦᑎᔪᓐᓇᕐᓂᕐᒧᑦ.
ᐅᖃᖅᖢᓂ ᑮᓇᐅᔭᑦ ᑐᓂᕐᕈᑕᐅᒐᔪᖕᒪᑕ ᓄᓇᓕᖕᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ, ᑲᑎᒪᔩᑦ ᑐᓂᐅᖅᑲᐃᕙᒃᖢᑎᒃ ᑲᖏᖅᖠᓂᕐᒥ ᐃᓕᓐᓂᐊᕐᕕᖕᓄᑦ.
“ᑕᒪᕐᒥᒃ ᐊᑭᓕᖅᑐᖅᑕᐅᓇᑎᒃ ᐃᑲᔪᖅᑐᑦ ᐃᓕᓐᓂᐊᖅᑎᑦᑎᔨᐅᙱᑦᑐᑦ ᐊᒻᒪᓗ ᐃᑲᔪᖅᑐᖅᑕᐅᔪᑦ ᒥᐊᓂᖅᓯᔨᖏᓐᓄᑦ ᐃᑲᔪᖃᑕᐅᔪᓐᓇᖁᑉᓗᒋᑦ ᑕᒡᕘᓇ ᐃᑲᔫᑎᒃᑯᑦ, ᑕᐃᒪᐃᒻᒪᑦ ᖁᔭᓕᑦᑎᐊᖅᑐᒍᑦ ᑕᐃᑉᑯᓂᙵᑦᑕᐅᖅ.
“ᑐᓂᔭᐅᓚᐅᕐᒥᔪᖓ ᓇᑭᙶᕐᒪᖔᑦ ᖃᐅᔨᒪᓇᖓ $1,000-ᒥᒃ ᐊᑐᖅᑕᐅᖁᑉᓗᒍ pizza−ᑖᕈᑎᓄᑦ Slapshot ᓂᕿᑖᕐᕕᖕᒥ ᓯᐊᕐᕆᔮᕐᕕᖕᒥ ᑲᖏᖅᖠᓂᕐᒥ, ᑕᐃᒪᐃᒻᒪᑦ 24-ᖑᑎᓪᓗᒍ ᑐᓂᓯᓚᐅᖅᑐᒍᑦ 25-ᓂᒃ ᓂᐅᕕᕈᑎᓂᒃ ᐅᑉᓗᕈᒥᑕᕈᑎᓂᒃ ᐊᑐᖅᑕᐅᔪᓐᓇᖅᑐᑦ ᓂᐅᕕᕐᓂᕐᒧᑦ ᐊᖏᔪᒥᒃ pizza-ᒥᒃ ᐃᓚᒥᓄᑦ ᓂᕆᔭᐅᔪᒃᓴᓂᒃ.
“ᑕᒪᓐᓇ ᖁᕕᐊᓇᖅᑐᐊᓘᓚᐅᖅᑐᖅ. Pizza−ᑯᑦ ᐃᑲᔪᖅᓯᒪᔪᑦ ᑲᖏᖅᖠᓂᕐᒥ ᐱᒻᒪᕆᐊᓗᐃᑦ ᖁᕕᐊᒋᔭᐅᑦᑎᐊᖅᖢᑎᒡᓗ.
“ᖃᐅᔨᒪᙱᑦᑐᒍᑦ ᑭᒃᑯᑦ ᓂᐅᕕᕈᑎᑖᓚᐅᕐᒪᖔᑕ ᑭᓯᐊᓂ ᖃᐅᔨᒪᔪᒍᑦ ᖁᕕᐊᓱᒃᑐᑯᓘᓚᐅᖅᑐᒃᓴᐅᓂᖏᓐᓄᑦ ᐊᒻᒪᓗ ᐃᑲᔫᑕᐅᑉᓗᓂ ᓄᓇᑉᑎᓐᓂᒃ ᓇᖕᒥᓂᖃᖅᑐᒧᑦ, ᑕᐃᒪᐃᒻᒪᑦ ᓴᕆᒪᓱᑦᑎᐊᓚᐅᖅᑐᖓ ᖁᕕᐊᓱᑦᑎᐊᖅᖢᖓᓗ ᑕᒪᑐᒪ ᒥᒃᓵᓄᑦ − ᓴᕆᒪᓱᑦᑎᐊᕋᒪ ᐊᕐᓇᓂᒃ ᐃᑲᔪᖅᓯᒪᔪᓂᒃ ᓄᓇᑉᑎᓐᓂᒃ ᐃᑲᔪᖅᓯᒪᓪᓚᕆᒃᑐᑦ ᐊᓯᔾᔩᓂᕐᒧᑦ ᓄᓇᑉᑎᓐᓂᒃ.”