ᓄᑕᖅᑲᑦ Fun Cup Hᐊᑭᕕᒡᔪᐊᖅᑎᑕᐅᓚᐅᕐᒪᑕ ᑲᔪᓯᓂᖃᑦᑎᐊᓚᐅᖅᑐᖅ ᕕᕗᐊᕆ 5-ᒥ 7-ᒧᑦ ᐱᓇᓱᐊᕈᓯᐅᑉ ᓄᙳᐊᓂ, ᐊᒻᒪᓗ ᐱᐅᔫᓚᐅᖅᑐᖅ ᒪᕐᕉᓕᖓᔪᒃᑯᑦ Hᐊᑭᖅᑎᐅᓂᐊᖅᑐᑦ ᐋᖅᑭᒃᓯᒪᖁᔭᐅᑎᓪᓗᒋᑦ ᓄᑕᖅᑲᑦ Hᐊᑭᒍᓐᓇᓚᐅᕐᒪᑕ ᐃᖕᒥᓂᒃ ᐊᔪᙱᓐᓂᕆᔭᒥᓂᒃ ᐊᑐᕐᓗᑎᒃ, ᑕᐃᒪᓐᓇ ᐅᖃᖅᖢᓂ ᑲᖏᖅᖠᓂᕐᒥ ᕿᑎᒃᑐᓕᕆᔨ.
ᑕᐃᕕᑎ ᑲᓛᒃ ᐅᖃᖅᖢᓂ Hᐊᑭᖅᑎᓪᓗᒋᒡᒎᖅ ᐃᑎᖅᑎᑦᑎᔪᑦ ᖃᓂᒌᒃᑑᑎᔪᒻᒪᕆᐊᓘᖃᑦᑕᓚᐅᕐᒪᑕ, ᐊᑐᓂ ᓄᑕᖅᑲᑦ ᖁᕕᐊᓱᑦᑎᐊᖅᖢᑎᒡᓗ ᐊᒻᒪᓗ ᕿᑎᑦᑎᐊᖅᖢᑎᒃ ᓯᐊᕐᕆᔭᑦᑎᐊᖅᖢᑎᒡᓗ ᐊᓇᐅᓕᒐᕐᒥᒃ ᐱᓯᒪᙱᒃᑲᓗᐊᖅᑎᓪᓗᒋᑦ ᑕᒪᓐᓇ ᑕᑯᑎᑦᑎᓚᐅᖅᑐᖅ ᒥᐊᓂᖅᓯᔨᐅᖃᑎᖓᑕᓗ ᐅᖃᐅᓯᕆᖃᑦᑕᖅᓯᒪᔭᖓ ᐊᒥᓱᓂᒃ ᐅᑭᐅᓂᒃ ᒪᕐᕉᓕᖓᔪᒃᑯᑦ Hᐊᑭᖅᑎᑦᑎᖃᑦᑕᕈᒪᓂᕐᒧᑦ ᐱᐅᔫᖕᒪᑦ ᐊᐅᓪᓛᑦᑎᐊᖅᖢᓂᓗ.
ᐅᖃᖅᖢᓂ 2020-ᒥ Fun Cup Hᐊᑭᕕᒡᔪᐊᕐᓂᐊᕐᓂᐅᓚᐅᖅᑐᖅ Hᐊᑭᕕᒡᔪᐊᕐᓂᐅᓂᐊᓚᐅᕐᒪᑦ ᑭᖑᓪᓕᖅᐹᒃᑯᑦ ᐱᓇᓱᐊᕈᓯᐅᑉ ᓄᙳᐊᒍᑦ ᒫᑦᓯᒥ ᑭᓯᐊᓂ, ᓄᕙᒡᔪᐊᕐᓂᖅᑕᖃᓕᖅᑎᓪᓗᒍ, ᖁᔭᓈᖅᑕᐅᓕᓚᐅᕐᒪᑦ ᐊᒻᒪᓗ ᑖᒻᓇᑐᐊᖑᓂᐊᓚᐅᖅᖢᓂ ᒥᑭᓐᓂᖅᓴᓄᑦ Hᐊᑭᕕᒡᔪᐊᕐᓂᐅᓂᐊᖅᑐᖅ ᐅᑭᐅᑉ ᐃᓗᐊᓂ ᑲᔪᓯᓂᖃᓚᐅᙱᑦᑐᖅ ᑲᖏᖅᖠᓂᕐᒥ.
“Hᐊᑭᕕᒡᔪᐊᕐᓂᐊᙱᓕᖅᑎᓪᓗᒋᑦ ᓄᑖᒥ ᓯᐊᕐᕆᔮᕐᕕᒃᑖᓵᖑᔪᒥ ᖁᕕᐊᓱᒍᓐᓂᕈᑕᐅᓚᐅᖅᑐᖅ ᓄᑕᖅᑲᓄᑦ, ᐊᒻᒪᓗ Hᐊᑭᖅᑎᖔᕐᓂᐊᓕᓚᐅᖅᑕᕋᓗᐊᒃᑲ ᓄᕕᐱᕆᐅᓚᐅᖅᑐᒥ ᑭᓯᐊᓂ ᐃᓄᐃᑦ ᐊᓂᑦᑕᐃᓕᑎᑕᐅᓕᓚᐅᖅᓯᒪᖕᒪᑕ ᐊᒻᒪᓗ ᖁᔭᓈᕆᐊᖃᓕᕐᒥᒋᑉᓗᒍ,” ᑕᐃᒪᓐᓇ ᐅᖃᖅᖢᓂ ᑲᓛᒃ.
“ᐊᓕᐊᓇᐃᒍᓱᒃᑐᖓ Hᐊᑭᖅᑎᑦᑎᔨᐅᒐᒪ ᒥᐊᓂᖅᓯᔨᐅᒐᒪ ᓄᑕᖅᑲᓂᒃ ᖁᓕᖏᓗᐊᖅᑐᓂᒃ ᐅᑭᐅᓕᖕᓂᒃ ᑐᖔᓂᓗ. ᐊᔪᕈᓐᓃᖅᐸᓪᓕᐊᔪᒻᒪᕆᐊᓗᐃᑦ ᐊᒻᒪᓗ ᐅᑉᓘᑉ ᓄᙳᐊᓂ ᐊᓕᐊᓇᐃᓐᓂᖅᐹᖑᓲᖅ ᒥᐊᓂᖅᓯᔨᐅᑉᓗᓂ ᐊᔪᕈᓐᓃᖅᐸᓪᓕᐊᔭᖏᑦ ᐊᑐᕈᓐᓇᕌᖓᒋᑦ ᐱᙳᐊᓪᓚᑦᑖᖅᖢᓂ.
“ᖁᕕᐊᓱᒍᒪᑐᐃᓐᓇᖅᑐᑦ, ᐄ, ᑭᓯᐊᓂ ᐱᒡᒍᓴᐅᔾᔪᐊᕐᓂᒃᑯᑦᑕᐅᖅ. ᐊᒃᓱᕈᖅᖢᑎᒃ ᐱᙳᐊᓲᑯᓗᐃᑦ ᐊᒻᒪᓗ ᐱᓇᓱᑦᑎᐊᓲᑦ ᐊᔪᙱᓐᓂᓂ ᐊᑐᖅᖢᒋᑦ ᑕᐃᒪᐃᓕᐅᖅᑐᑯᓗᖕᓂᒃ ᑕᑯᔪᒪᓐᓇᖃᑦᑕᕐᒪᑦ.”
ᐅᑭᐅᖅ ᖃᓄᕈᓘᔮᕐᓇᖃᑦᑕᖅᓯᒪᖕᒪᑦ ᐊᒃᓱᕈᕐᓇᖅᑑᖃᑦᑕᖅᓯᒪᑉᓗᓂᓗ ᕿᑎᒃᑐᓕᕆᓂᒃᑯᑦ ᑲᖏᖅᖠᓂᕐᒥ, ᑕᐃᒪᐃᑦᑐᒃᑰᖅᓯᒪᖕᒪᑕᑦᑕᐅᖅ ᐊᒥᓱᑦ ᓄᓇᓖᑦ ᑲᓇᑕᒥ.
ᑲᓛᒃ ᐅᖃᖅᖢᓂ ᓄᑕᖅᑲᒡᒎᖅ ᐃᓕᖅᑯᓯᖏᑦ ᐱᙳᐊᖅᑎᑕᐅᖃᑦᑕᖅᖢᑎᒃ ᐊᒻᒪᓗ ᓱᓇᓗᒃᑖᑦ ᓄᖅᑲᖅᑎᑕᐅᑎᓪᓗᒋᑦ ᐃᓕᖅᑯᓯᖏᑦ ᐊᓯᔾᔨᑦᑎᐊᓲᑦ.
ᐅᖃᖅᖢᓂ ᐅᖃᖃᑎᖃᕈᓐᓇᖅᑐᑎᑦ ᐃᓕᓐᓂᐊᖅᑎᑦᑎᔨᓂᒃ, ᐊᖓᔪᖅᑳᓂᒃ, ᒥᐊᓂᖅᓯᔨᓂᒃ ᐅᕝᕙᓘᓐᓃᑦ ᑭᓇᑐᐃᓐᓇᕐᒥᒃ ᐃᓚᐅᖃᑕᐅᓂᓕᖕᒥᒃ − ᓄᑕᖅᑲᑦ ᐋᖅᑭᒃᓱᕈᔾᔭᐅᓯᒪᖃᑦᑕᕆᐊᓖᑦ ᐃᓕᓐᓂᐊᕐᕕᒃᑯᑦ, ᐃᑲᔫᑎᒃᑯᓪᓗ ᖃᓄᐃᓕᐅᖅᑎᑕᐅᖃᑦᑕᕐᓂᐊᕐᓂᕐᒥᒃ ᐊᒻᒪᓗ ᑲᑎᖃᑦᑕᕐᓗᑎᒃ Hᐊᑭᖃᑦᑕᕐᓗᑎᒡᓗ ᐅᕝᕙᓘᓐᓃᑦ ᖃᓄᑐᐃᓐᓇᖅ ᕿᑎᒃᑐᓕᕆᓂᒃᑯᑦ ᑲᑎᖃᑎᖃᖃᑦᑕᕈᓐᓇᖁᑉᓗᒋᑦ ᐃᓚᓐᓈᒥᓂᒃ.
“ᑕᐃᒪᐃᑦᑐᖃᖃᑦᑕᕆᐊᓖᑦ. ᐱᑕᖃᖁᔨᔪᒻᒪᕆᐊᓘᓲᑦ, ᐱᓇᓱᐊᕈᒪᔪᑦ, ᐊᒻᒪᓗ ᐱᕙᓪᓕᐊᓂᖃᓲᑦ ᑕᒡᕘᓇ. ᓄᑕᖅᑲᕗᑦ ᓱᖏᐅᑎᕙᓪᓕᐊᓯᒪᑎᓪᓗᒋᑦ ᑕᑯᑎᑕᐅᓯᒪᔪᒍᑦ ᖃᓄᖅ ᐱᕕᒃᓴᖃᖅᑎᑕᐅᑦᑎᐊᕐᓂᑉᑎᓐᓄᑦ ᑲᖏᖅᖠᓂᕐᒥ ᑕᐃᒪᐃᑦᑐᓂᑐᐃᓐᓇᖅ ᐱᑕᖃᖃᑦᑕᕐᓂᖓᓄᑐᐃᓐᓇᐅᙱᑦᑐᖅ, ᑭᓯᐊᓂᓕ ᑕᐃᒪᐅᖕᒪᑕᑦᑕᐅᖅ ᐊᓯᖏᑦ ᖃᓄᐃᓕᐅᕈᑎᒃᓴᑦ ᑲᔪᓯᕙᓪᓕᐊᔪᑦ.
“ᑲᓇᑕᒥ ᑕᑯᒋᐊᖅᖢᓂ ᐊᒥᓱᑦ ᓯᐊᕐᕆᔮᕐᕕᑦ ᒪᑐᐃᖓᙱᑦᑐᑦ. ᐊᒥᓱᑦ ᓄᑕᖅᑲᑦ ᒫᓐᓇᐅᔪᖅ Hᐊᑭᖃᑦᑕᙱᑦᑐᑦ, ᐅᕝᕙᓘᓐᓃᑦ ᐊᒥᓱᓂᒃ ᐊᓯᖏᓐᓂᒃ ᐱᙳᐊᕈᑕᐅᕙᒃᑐᓂᒃ. ᑕᒪᓐᓇ ᐊᒃᓱᕈᕐᓇᖅᑐᒃᑰᕈᑕᐅᓲᖅ ᓄᑕᕋᑉᑎᓐᓄᑐᐃᓐᓇᐅᙱᑦᑐᖅ, ᑭᓯᐊᓂᓕ ᖃᑕᙳᑎᒌᖑᔪᓄᑦᑕᐅᖅ. “ᖃᓄᕈᓘᔭᖅ ᑭᓇᐅᖕᒪᖔᕐᒥᒃ ᓇᓗᓕᐅᖅᑲᓕᓲᑦ, ᑭᓇᐅᓂᕆᔭᖏᑦ, ᑕᒪᓐᓇ ᐃᓅᑦᑎᐊᕐᓇᕈᓐᓃᕈᑕᐅᓲᖅ.”
