ᐊᑭᓕᖅᑐᖅᑕᐅᓇᑎᒃ ᐃᑲᔪᕆᐊᖅᑏᑦ ᓯᕗᓕᖅᑎᖃᖅᖢᑎᒃ ᕕᑭ ᑕᓄᔭᕐᒥᒃ ᐃᑲᔪᕈᓐᓇᓚᐅᖅᑐᑦ ᐃᓐᓇᑐᖃᕐᓂᒃ ᓄᓇᓕᖕᒥ ᓂᕿᑖᖅᑎᑦᑎᓪᓗᑎᒃ ᓂᕿᑖᕐᕕᒃᑖᓵᖑᔪᒥ ᐱᓇᓱᐊᕈᓯᐅᓚᐅᖅᑐᒥ ᐃᒡᓗᓕᒑᕐᔪᖕᒥ.
ᓂᕿᑖᕐᕕᒃ ᐃᑲᔪᖅᑐᖅᑕᐅᔪᖅ Northern Canada Mini Project−ᑯᓐᓄᑦ ᓂᕿᓂᒃ ᑐᓂᓯᖃᑦᑕᖅᑎᓪᓗᒋᑦ ᐊᒻᒪᓗ ᑯᐊᐸᒃᑯᓐᓂᒃ ᐊᑮᑦᑐᖅᓯᕝᕕᐅᔪᓐᓇᖅᑐᒥᒃ ᐋᖅᑭᒃᓯᓯᒪᕙᒃᑎᓪᓗᒋᑦ.
ᑕᒡᕘᓇ ᐃᑲᔫᓯᐊᖅᑖᖅᑎᑦᑎᔨᒃᑯᓐᓂᙶᖅᑐᖅ ᓯᓐᑎ ᑎᓕᓐ ᐅᖃᐅᓯᒪᔪᖅ ᓂᕿᑖᕐᕕᒃᑯᑦ ᓂᕿᑖᖅᑎᑦᑎᔨᑐᐃᓐᓇᐅᙱᒻᒪᑕ ᑭᓯᐊᓂᓕ ᐃᑲᔫᑕᐅᓇᓱᓲᑦ ᖃᐅᔨᒪᔪᓐᓇᖅᓯᖁᑉᓗᒋᑦ ᐃᑲᔪᖅᑕᐅᔭᕆᐊᓕᖕᓂᒃ ᐊᒻᒪᓗ ᐱᕕᒃᓴᖃᖅᑎᑦᑎᔪᒪᓂᕐᒧᑦ ᓄᓇᓕᖕᓂᒃ ᖃᐅᔨᒋᐊᕐᕕᒋᖃᑦᑕᕈᒪᑉᓗᒋᓪᓗ ᖃᓄᐃᓕᕐᒪᖔᑕ.
ᐅᖃᖅᖢᓂ ᐊᑐᓂ ᐃᓐᓇᖁᑎᓖᑦ ᐃᒡᓗᒥᐅᖃᑎᒌᑦ ᓄᓇᓕᖕᒥ ᐃᑲᔪᖅᑕᐅᓚᐅᖅᑐᑦ ᐱᓇᓱᐊᕈᓯᐅᓵᖅᑐᒥ, ᐅᖃᖅᖢᓂᓗ ᐃᓐᓇᑐᖃᐃᑦ ᖁᕕᐊᓱᑦᑎᐊᓚᐅᕐᒪᑕ ᓂᕿᒃᑯᑦ ᐃᑲᔪᖅᑕᐅᓂᕐᒥᓄᑦ ᑐᙵᓵᖅᑕᐅᑉᓗᑎᒡᓗ ᐅᐸᒃᑕᐅᖃᑦᑕᓚᐅᕐᒪᑕ.
“ᑲᓇᑕᒥᐅᑦ ᐃᑲᔪᖅᑑᑎᖃᑦᑕᕐᒪᑕ ᐊᒃᓱᕈᕐᓇᖅᑐᖃᓕᕌᖓᑦ ᐊᒻᒪᓗ ᐃᑲᔪᖅᑐᐃᓯᒪᔪᒍᑦ ᓂᕿᑖᕐᕕᖕᒥ ᐃᒡᓗᓕᒑᕐᔪᖕᒥ ᑳᖃᑦᑕᖁᔨᙱᓐᓂᕐᒧᑦ ᓂᕿᖃᑦᑎᐊᖅᑎᑦᑎᔪᒪᖃᑦᑕᕐᓂᕐᒧᓪᓗ ᓄᓇᕗᒥ Hᐊᒻᓚᒋᔭᐅᔪᓂᒃ ᑲᓇᑕᐅᑉ ᐅᑭᐅᖅᑕᖅᑐᖓᓂᒃ,” ᑕᐃᒪᓐᓇ ᐅᖃᖅᖢᓂ ᑎᓕᓐ.
“ᖃᐅᔨᓚᐅᖅᑐᖓ ᐃᒡᓗᓕᒑᕐᔪᒃ ᓂᕿᑖᕐᕕᒃᑕᖃᙱᓐᓂᖓᓄᑦ ᐅᖃᖃᑎᖃᖅᖢᖓ ᐊᓇ ᓖᔅᒪᓐᒥᒃ, ᒋᓕᓐ ᐳᕋᑯᐸᐃᖕᒃᒥᒃ ᐊᒻᒪᓗ ᕕᑭ ᑕᓄᔭᕐᒥᒃ, ᑕᐃᒪᐃᒻᒪᑦ ᑕᐃᑉᑯᐊ ᐃᑲᔪᖅᑕᐅᔭᕆᐊᓖᑦ ᑭᒡᓕᖃᖅᑐᒃᑯᑦ ᖃᓄᖅᑑᕈᑎᒃᓴᖃᖃᑦᑕᖅᑐᑦ ᐃᑲᔪᖅᑕᐅᔪᒪᑎᓪᓗᒋᑦ.
“ᐃᓕᑕᖅᓯᓯᒪᒐᒪ ᑕᒪᕐᒥᒃ ᐅᑭᐅᖅᑕᖅᑐᒥ ᓄᓇᓖᑦ ᓂᕿᑖᕐᕕᖃᖃᑦᑕᙱᒻᒪᑕ, ᓂᕿᑖᕐᕕᖕᒥᒃ ᑲᒪᒋᔭᐅᕙᒃᑐᒥᒃ, ᐃᑲᔪᖅᑐᖅᑕᐅᔪᒥᒃ ᐅᕝᕙᓘᓐᓃᑦ ᑮᓇᐅᔭᓕᖅᑐᖅᑕᐅᓯᒪᔪᒥᒃ Hᐊᒻᓚᖏᓐᓄᑦ ᐅᕝᕙᓘᓐᓃᑦ ᓴᙱᓂᖃᖅᑐᒧᑦ ᑎᒥᐅᔪᒧᑦ ᓲᕐᓗ Food Bank Canada-ᑎᑐᑦ, ᑕᐃᒪᐃᒻᒪᑦ, ᓂᕿᖃᖅᑎᑦᑎᓇᓱᐊᖃᑦᑕᕐᓂᖅ ᓂᕿᖃᐃᓐᓇᖃᑦᑕᙱᑦᑐᓂᒃ ᐃᓄᖕᓂᒃ ᐃᒡᓗᒥᐅᖃᑎᒌᖕᓂᒃ ᐊᒃᓱᕈᕐᓇᖅᑐᒃᑰᕈᑕᐅᓲᖅ ᐃᓚᒌᖕᓄᑦ ᓯᓚᓕᕆᔭᖏᓐᓄᓪᓗ, ᐃᑲᔪᕋᓱᒃᐸᒃᑐᑦ ᐃᓚᖏᑦ ᐃᖕᒥᓂᒃᑕᐅᖅ ᐊᒃᓱᕈᕐᓇᖅᑐᒃᑰᖅᓯᒪᔪᒃᓴᐅᑉᓗᑎᒃ.
“ᑕᐃᒪᐃᒻᒪᑦ ᐃᑲᔪᕆᐊᖃᖃᑦᑕᕐᓂᖅ ᐊᓯᖏᓐᓂᒃ ᐃᓄᖕᓂᒃ ᐊᒃᓱᕈᕐᓇᖅᑐᒃᑰᕈᑕᐅᔪᓐᓇᖅᑐᖅ ᐃᓱᒫᓘᑕᐅᔪᓐᓇᖅᑐᕐᓗ ᐃᒡᓗᒥᐅᖃᑎᒌᖕᓄᑦ ᑲᒪᓇᓱᒃᑎᓪᓗᒋᑦ ᓂᕿᑦ ᐊᑭᑐᔫᓂᖏᓐᓄᑦ ᐅᑭᐅᖅᑕᖅᑐᒥᐅᑕᐅᑉᓗᓂ.”
ᑎᓕᓐ ᐅᖃᖅᖢᓂ ᓄᕙᒡᔪᐊᕐᓂᖅᑕᖃᓕᖅᑎᓪᓗᒍ ᐊᒃᓱᕈᕐᓇᖅᑐᒃᑰᕈᑕᐅᙱᒻᒪᑦ ᖃᑉᓗᓈᑦ ᓄᓇᖏᓐᓄᑐᐃᓐᓇᖅ.
ᓂᕆᐅᓇᙱᑦᑐᓂᒃ ᐊᒻᒪᓗ ᐃᓚᓐᓂᒃᑯᑦ ᖁᒃᓴᓪᓚᖕᓇᖅᑐᓂᒃ ᓇᐅᒃᑰᕈᑕᐅᓯᒪᖕᒥᔪᖅ ᐅᑭᐅᖅᑕᖅᑐᒥ ᓄᓇᓕᖕᓄᑦ.
“ᑕᐃᒪᐃᒻᒪᑦ, ᑐᓴᕋᑉᑕ ᐃᒡᓗᓕᒑᕐᔪᒃ ᓂᕿᑖᕐᕕᖃᙱᓐᓂᖓᓄᑦ ᐃᓱᒪᓕᐅᓕᓚᐅᖅᑐᒍᑦ ᐃᑲᔪᕈᒪᑉᓗᑕ ᐃᒡᓗᓕᒑᕐᔪᖕᒥᐅᑕᓂᒃ ᐃᓄᖕᓂᒃ ᓇᓂᓯᑉᓗᑕ ᐃᑲᔪᕈᓐᓇᖅᑐᓂᒃ ᒪᕐᕉᓕᖓᔪᒃᑯᑦ.
“ᓂᕿᓂᒃ ᓇᒃᓯᐅᔾᔭᐅᔪᓐᓇᖃᑦᑕᖅᑐᑦ ᓄᓇᓕᐅᔪᖅ ᑎᑎᖅᑲᖅᑖᕐᕕᒃᑯᑦ ᑐᓂᐅᖅᑲᐅᑕᐅᓂᐊᖅᑐᓂᒃ ᐃᓄᖕᓄᑦ ᓂᕿᑖᕆᐊᓕᖕᓂᒃ, ᐅᕝᕙᓘᓐᓃᑦ, ᓄᓇᓕᖕᓄᑦ ᐊᓂᔪᓐᓇᐃᓪᓕᑎᑕᐅᓯᒪᔪᓕᖕᓄᑦ ᑕᐃᒪᐃᑦᑐᒃᑰᕐᓇᖅᓯᖕᒪᑦ, ᑐᓂᓯᔪᓐᓇᖃᑦᑕᖅᑐᑦ ᖃᓄᑐᐃᓐᓇᖅ ᐊᖏᑎᒋᔪᒥᒃ ᑮᓇᐅᔭᒥᒃ ᐃᓕᓯᓗᑎᒃ ᑯᐊᐸᒃᑯᑦ ᑮᓇᐅᔭᖃᕐᕕᖓᒍᑦ ᐃᒡᓗᓕᒑᕐᔪᖕᒥ.
“ᑐᓂᕐᕈᑕᐅᔪᑦ ᑕᐃᒪᐅᓕᖅᑎᓪᓗᒋᑦ, ᕕᑭ ᑕᓄᔭᖅ ᓇᓗᓇᐃᔭᐃᔪᓐᓇᖅᓯᓇᔭᖅᑐᖅ ᑭᒃᑯᑦ ᓂᕿᑖᕆᐊᖃᕐᒪᖔᑕ ᓂᕿᑖᖅᑎᓪᓗᓂᒋᓪᓗ ᐱᔪᓐᓇᕐᓂᓗᒃᑖᒃᑯᑦ ᑐᓂᕐᕈᑕᐅᓯᒪᔪᑦ ᐊᑐᕐᓗᒋᑦ. ᐱᓇᓱᐊᕈᓯᐅᓵᖅᑐᒥ ᐃᑲᔪᕐᓂᖅᓴᐅᓚᐅᖅᑐᑦ ᐃᓐᓇᑐᖃᕆᔭᐅᔪᓂᒃ, ᐊᓂᔪᓐᓇᙱᓐᓂᖅᓴᐅᖃᑦᑕᕐᒪᑕ. ᖃᓄᐃᓕᐅᖅᑎᑦᑎᕈᓘᔭᖃᑦᑕᖅᑐᒍᑦ ᑲᑎᑦᑎᑦᑎᕙᒃᖢᑕ ᐃᓄᖕᓂᒃ ᖁᕕᐊᓱᒃᑎᑦᑎᓇᓱᒃᐸᒃᖢᑕ ᐅᕝᕙᓘᓐᓃᑦ ᓄᑕᖅᑲᓃᖃᑕᐅᕙᒃᖢᑕ ᐃᓕᓐᓂᐊᕐᕕᖕᒥ.
“ᐊᐃᑦᑖᖑᒐᓗᐊᖅ, ᐊᓂᑦᑕᐃᓕᔭᕆᐊᖃᖃᑦᑕᕐᓂᖅ ᐊᑕᐅᓯᕐᒧᑦ ᐅᑭᐅᒧᑦ ᑎᑭᐅᑎᓯᒪᓕᕐᒪᑦ ᐊᒻᒪᓗ ᐃᓱᒪᒃᑯᑦ ᐊᒃᓱᕈᕐᓇᕈᑕᐅᕐᓚᓕᖅᖢᓂ, ᐱᓗᐊᖅᑐᒥ ᑕᐃᑉᑯᓄᙵ ᐱᔭᕆᐊᖃᖅᑕᒥᓂᒃ ᐱᔪᓐᓇᐃᓪᓕᓯᒪᖃᑦᑕᖅᑐᓄᑦ.”
ᑎᓕᓐ ᐅᖃᖅᖢᓂ Norther Canada Mini Project-ᑯᑦ ᐃᑲᔪᖅᑐᐃᖏᓐᓇᕋᓱᖕᓂᐊᖅᑐᑦ ᐃᒡᓗᓕᒑᕐᔪᖕᒥ ᓂᕿᑖᕐᕕᐅᕙᒃᑐᒥᒃ ᐅᔾᔨᕈᓱᓕᖅᑎᑦᑎᔪᓐᓇᖅᑎᓪᓗᒋᑦ ᐊᒻᒪᓗ ᖃᑉᓗᓇᓂᕐᒥᐅᑕᓂᒃ ᑐᓂᓯᕙᒃᑐᓂᒃ ᐃᑲᔪᖅᑎᑦᑎᓇᓱᖃᑦᑕᕐᓗᑎᒃ. ᐅᖃᖅᖢᓂ ᑕᐃᒪᑦᑕᐅᕉᖅ ᐊᓯᐊᒍᑦ ᑮᓇᐅᔾᔭᒃᓴᖅᑎᑦᑎᓇᓱᒍᓐᓇᖅᑐᖅ ᓂᕿᑖᕐᕕᒃᑯᑦ.
“ᐱᖓᔪᖓ ᐃᑲᔫᑎᒋᔪᓐᓇᖅᑕᕗᑦ ᐅᕙᖓ ᓇᒃᓯᐅᔾᔨᓗᖓ ᐊᒻᒪᓗ ᐱᒋᐊᖅᑎᑦᑎᓗᖓ ᓂᐅᕕᐊᒃᓴᖃᖅᑎᑦᑎᔪᓐᓇᕐᓂᕐᒧᑦ ᓄᓇᖓᓂᒃ ᐱᖁᑎᓂᒃ ᓇᒃᓯᐅᔾᔨᓗᖓ ᓂᐅᕕᕐᕕᖏᓐᓂᒃ ᐱᔪᓐᓇᙱᑕᖏᓐᓂᒃ ᐊᑭᑐᔪᐊᓗᒃᑯᑦ ᐊᑭᓖᙱᓪᓗᑎᒃ.
“ᐅᕙᒍᑦ ᑐᓂᓗᒋᑦ, ᓂᐅᕕᐊᒃᓴᖃᕐᓗᑎᒃ ᐊᒻᒪᓗ ᑕᒪᒃᑯᑎᒎᓇᖅ ᑮᓇᐅᔭᓕᐊᖏᑦ ᐊᑐᖅᑕᐅᑎᓪᓗᒋᑦ ᓄᓇᓕᐅᑉ ᐱᔭᕆᐊᖃᓪᓚᑦᑖᖅᑕᖏᓐᓄᑦ, ᓲᕐᓗ ᐊᐅᓚᑦᑎᔾᔪᑎᒃᓴᓄᑦ ᐋᖅᑭᐅᒪᑎᑦᑎᒍᑎᒃᓴᓄᓪᓗ ᓂᕿᑖᕐᕕᖕᒥ.
“ᑕᐃᒪᐃᒻᒪᑦ, ᐃᓅᓯᖅ ᐅᑎᕐᔫᒥᒃᐸᑦ ᖃᓄᐃᓐᓂᕆᓚᐅᖅᑕᖓᓄᑦ, ᐊᒻᒪᓗ Hᐊᒻᓚᒃᑯᑦ ᐊᖏᖃᑦᑕᕈᓐᓇᖅᓯᒃᐸᑕ ᓂᐅᕕᐊᒃᓴᖃᖃᑦᑕᕈᓐᓇᕐᓂᕐᒧᑦ, ᑕᒡᕙ ᐱᖓᔪᐊᒍᑦ ᐃᒡᓗᓕᒑᕐᔪᖕᒥᐅᑦ ᐃᑲᔪᖅᑕᐅᔪᓐᓇᖅᓯᓂᐊᖅᑐᑦ ᓂᕿᑖᕐᕕᖓᒍᓪᓗ.”