ᐊᖓᔪᖅᑳᑦ ᑭᕙᓪᓕᕐᒥ ᓴᓚᐅᓱᖕᓂᖅᓴᐅᓂᐊᓕᖅᑐᑦ ᓄᑕᕋᖏᑦ ᐃᓕᓐᓂᐊᕐᕕᖕᓄᑦ ᐅᑎᕐᓂᐊᓕᑕᐃᓐᓇᕐᒪᑕ ᑕᒡᕙᓂ ᑕᖅᑭᕐᒥ ᐱᒋᐊᓕᓵᖅᑐᒃᑯᑦ.
ᓯᕗᓪᓕᖅᐹᒥ ᐃᓕᓐᓂᐊᕐᓂᐊᓕᖅᑐᑦ ᑕᓪᓕᒪᓂᒃ ᑕᖅᑭᓂᒃ ᐃᓕᓐᓂᐊᕈᓐᓃᓚᐅᖅᑎᓪᓗᒋᑦ ᓄᕙᒡᔪᐊᕐᓂᖅ-19 ᐃᓱᒫᓗᑕᐅᓕᓚᐅᖅᑎᓪᓗᒍ ᓯᐊᒻᒪᒃᐸᓪᓕᐊᓇᔭᕐᓂᖓ ᓄᓇᕗᓗᒃᑖᒥ ᐃᓕᓐᓂᐊᕐᕕᑦ ᒪᑐᓚᐅᖅᑐᑦ ᒫᑦᓯᒥ.
ᓄᕙᒡᔪᐊᕐᓂᖅ -19 ᑕᖃᙱᑐᐊᖅᐸᑦ ᓄᓇᕗᒥ, ᑕᒪᕐᒥᒃ ᐃᓕᓐᓂᐊᕐᕕᑦ ᒪᑐᐃᕐᓂᐊᖅᑐᑦ ᐃᓕᓐᓂᐊᓕᕐᓗᑎᒃ ᐅᑉᓗᑕᒫᒃᑯᑦ.
ᑯᑎ ᐸᓐᑐᕐ/ᐅᑭᐅᖅᑕᖅᑐᒥ ᑐᓴᒐᒃᓴᓕᕆᔨᒃᑯᓐᓂᙵᖅᑐᖅ ᐊᔾᔨ
ᑭᓯᐊᓂ, ᐊᓯᔾᔨᖅᓯᒪᔪᖃᕐᓂᐊᖅᑐᖅ ᑲᒪᒋᔭᐅᔪᓐᓇᖁᑉᓗᒋᑦ ᐃᓱᒫᓘᑕᐅᔪᑦ ᓯᐊᒻᒪᖁᓇᒍ ᓄᕙᒡᔪᐊᕐᓂᖅ - 19.
ᒪᓕᒃᖢᒋᑦ ᑐᑭᓯᒋᐊᕈᑎᒃᓴᑦ ᖃᐃᑕᐅᓯᒪᔪᑦ ᒐᕙᒪᒃᑯᑦ ᐃᓕᓐᓂᐊᖅᑐᓕᕆᔨᒃᑯᖏᓐᓄᑦ, ᐊᖓᔪᖅᑳᑦ ᐸᕐᓇᒃᓯᒪᔭᕆᐊᖃᕐᓂᐊᖅᑐᑦ ᐃᓕᓐᐊᓂᕐᕕᑦ ᒪᑐᐃᕐᓂᐊᕐᓂᖏᓐᓄᑦ ᐅᑯᐊ ᒪᓕᒃᑕᐅᔭᕆᐊᖃᕐᓗᑎᒃ: “ᓴᓗᒪᓂᖅᓴᐅᓇᓱᒋᐊᓖᑦ ᐱᔪᓐᓇᕐᓂᓗᒃᑖᒃᑯᑦ, ᖃᓂᒌᒃᑑᑎᓗᐊᖅᑕᐃᓕᓗᑎᒃ; ᐊᒥᓱᑦ ᐃᓄᐃᑦ ᐱᓕᕆᖃᑎᒌᓗᐊᖅᑕᐃᓕᓗᑎᒃ ᓲᕐᓗ ᐱᙳᐊᕐᓂᒃᑯᓪᓗ, ᑲᑎᓗᒃᑖᖃᑦᑕᕐᓂᖏᓐᓄᓪᓗ ᐃᓕᓐᓂᐊᖅᑐᑦ, ᐃᖃᐃᓕᓴᕐᓂᒃᑯᓪᓗ, ᐊᓯᖏᑦᑎᒍᓪᓗ.”
ᐊᓯᖓᑦᑕᐅᖅ ᐊᖏᔪᖅ ᐊᓯᔾᔨᖅᑕᐅᓯᒪᔪᖅ ᐊᖓᔪᖅᑳᑦ ᐃᓕᓐᓂᐊᕐᕕᖕᒧᑦ ᐃᑎᖅᑕᐅᓕᔭᕆᐊᖃᕐᓂᐊᖅᑐᑦ. ᐊᖓᔪᖅᑳᕆᔭᐅᔪᑦ ᐃᓕᓐᓂᐊᕐᕕᖕᒧᑦ ᐃᑎᕆᐊᖃᖅᐸᑕ ᓱᓇᑐᐃᓐᓇᕐᒥᒃ ᐱᔾᔪᑎᖃᕐᓗᑎᒃ ᐋᖅᑭᒃᓯᔭᕆᐊᓖᑦ ᓯᕗᓂᑐᖄᓂ, ᒐᕙᒪᒃᑯᑦ ᐃᓕᓐᓂᐊᖅᑐᓕᕆᔨᒃᑯᖏᑦᑕ ᒪᓕᖁᔭᖏᑦ ᒪᓕᒡᓗᒋᑦ.
“ᐊᖓᔪᖅᑳᑦ ᐊᒻᒪᓗ ᒥᐊᓂᖅᓯᔨᒋᔭᐅᔪᑦ ᐃᓕᓐᓂᐊᕐᕕᖕᒧᑦ ᐃᑎᖅᑕᐃᓕᔭᕆᐊᖃᕐᓂᐊᖅᑐᑦ ᓄᑕᕋᒥᓂᒃ ᐊᐃᒃᖠᕐᓗᑎᒃ ᐊᔾᔭᖅᓯᓗᑎᒡᓘᓐᓃᑦ ᐊᒻᒪᓗ ᒪᓕᒋᐊᓖᑦ ᒫᓐᓇᐅᔪᖅ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ ᒪᓕᖁᔭᐅᔪᓂᒃ,” ᐅᖃᓕᒫᕐᓗᒋᑦ ᐅᖃᐅᓯᒃᓴᕆᔭᐅᔪᑦ ᒐᕙᒪᒃᑯᑦ ᐃᑭᐊᖅᑭᕕᖓᓂᒃ.
ᐊᒻᒪᓗᑦᑕᐅᖅ ᐊᖓᔪᖅᑳᑦ ᐃᓕᓐᓂᐊᕐᕕᖕᒨᖅᑕᐃᓕᑎᓪᓗᒋᑦ, ᓄᑖᓂᒃ ᒪᓕᒃᑕᒃᓴᓂᒃ ᐱᑕᖃᕐᓂᐊᖅᑐᖅ ᐃᓕᓐᓂᐊᖅᑐᑦ ᖃᓂᒌᒃᑑᑎᓗᐊᖁᓇᒋᑦ, ᐊᒻᒪᓗᑦᑕᐅᖅ ᓴᓗᒪᑎᑦᑎᔭᕆᐊᖃᕐᓗᑎᒃ ᓱᓇᓂᒃ ᐊᑐᖅᑕᐅᕙᒃᑐᓂᒃ.
ᒪᓕᒃᖢᒋᑦ ᓇᓗᓇᐃᒃᑯᑕᑦ ᓴᖅᑭᔮᖅᑐᑦ ᐊᒻᒪᓗ ᐅᖃᖃᑎᒌᒍᑕᐅᓯᒪᔪᑦ ᓄᓇᕗᒥ ᐋᓐᓂᐊᖃᕐᓇᙱᑦᑐᓕᕆᔨᕐᔪᐊᕐᓗ, ᐃᓕᓐᓂᐊᖅᑐᓕᕆᔨᒃᑯᑦ ᐅᖃᖅᓯᒪᔪᑦ ᓄᑕᖅᑲᑦ ᐊᒃᑐᖅᑕᐅᙱᓐᓂᖅᓴᐅᔪᓐᓇᕐᒪᑕ ᓄᕙᒡᔪᐊᕐᓂᖅ - 19-ᒧᑦ ᐊᒻᒪᓗ ᓯᐊᒻᒪᒃᑎᕆᙱᓐᓂᖅᓴᐅᔪᓐᓇᖅᖢᑎᒃ ᐊᓯᒥᓄᑦ.
“ᐃᓕᓐᓂᐊᕐᕕᑦ ᐊᐅᓚᑕᐅᖕᒪᑕ ᒪᓕᒃᖢᑎᒃ ᓴᓗᒪᑎᑦᑎᒍᑎᓂᒃ, ᐋᖅᑭᒃᓱᖅᑕᐅᓯᒪᔪᓪᓗ ᒪᓕᒃᑕᒃᓴᑦ ᐃᓕᓐᓂᐊᖅᑐᓄᑦ ᓴᓇᔨᓄᓪᓗ, ᐊᒻᒪᓗ ᒪᓕᒃᑕᒃᓴᑦ ᓄᖅᑲᖓᓚᐅᐱᓪᓚᒍᑎᒃᓴᑦ. ᓯᐊᒻᒪᒃᑎᕆᑦᑕᐃᓕᔾᔪᑏᑦ ᐊᐅᓚᑕᐅᔪᓐᓇᖅᑐᑦ ᐊᔪᕐᓇᙱᓐᓂᖅᓴᒃᑯᑦ.”
ᖃᒪᓂ’ᑐᐊᕐᒥᐅᑦ ᓯᕗᓪᓕᖅᐸᐅᔪᑦ ᐃᓕᓐᓂᐊᕐᕕᖕᓂᒃ ᒪᑐᐃᖅᑐᓂᒃ.
ᖃᒪᓂ’ᑐᐊᖅ ᓯᕗᓪᓕᖅᐸᐅᓯᒪᔪᖅ ᑭᕙᓪᓕᕐᒥ ᐃᓕᓐᓂᐊᖅᑐᓂᒃ ᐅᑎᖅᑐᖃᖅᑎᓪᓗᒍ ᐱᒋᐊᕈᑎᖓ ᐊᒐᓯ 7-ᒦᖦᖢᓂ.
ᑎᑎᕋᖅᓯᒪᔪᒥ ᓄᓇᓕᐅᑉ Facebook-ᖓᓂ, Hᐊᓚᓐ ᑎᒥᐅᑐᕐ, ᐃᓕᓐᓂᐊᕐᕕᖕᒥ ᐃᓱᒪᑕᖅ ᕆᑦᓱ ᐊᕐᓇᒪᒃ ᐃᓕᓐᓂᐊᕐᕕᖕᒥ, ᐅᖃᓚᐅᖅᑐᖅ ᐊᖓᔪᖅᑳᕆᔭᐅᔪᑦ ᐃᓕᓐᓂᐊᓕᓵᖅᑐᓄᑦ ᐃᑎᕈᓐᓇᕐᒪᑕ ᐃᖃᐃᓕᓴᕐᕕᖕᒧᑦ ᑎᑭᓪᓗᒍ ᑕᐃᑲᓂ ᓴᓇᔨᓄᑦ ᑐᙵᓵᖅᑕᐅᓇᔭᖅᖢᑎᒃ ᐊᒻᒪᓗ ᐃᓕᓐᓂᐊᖅᑐᑦ ᐃᓕᓐᓂᐊᕐᕕᖕᒥᓄᙵᐅᔾᔭᐅᓕᕋᔭᖅᖢᑎᒃ ᐃᓕᓐᓂᐊᖅᑎᑦᑎᔨᒥᓄᑦ.
“ᐊᓯᖏᑦ ᐊᖓᔪᖅᑳᕆᔭᐅᔪᑦ ᐃᑎᖅᑎᑦᑐᓐᓇᙱᓐᓇᑉᑎᒍᑦ ᐃᓕᓐᓂᐊᕐᕕᖕᒧᑦ. ᓴᓇᔩᑦ ᐃᒪᓐᓈᖅᑐᖅᑎᓐᓂᐊᖅᑕᖅᐳᑦ ᓄᑕᖅᑲᓄᑦ ᐃᓕᓐᓂᐊᕐᕕᖏᓐᓄᑦ ᑎᑭᑦᑐᓐᓇᖁᑉᓗᒋᑦ,” ᑕᐃᒪᓐᓇ ᑎᑎᕋᖅᓯᒪᔪᖅ.
ᒐᕙᒪᒃᑯᑦ ᐃᓕᓐᓂᐊᖅᑐᓕᕆᔨᒃᑯᖏᑦ ᐋᒃᑳᓚᐅᖅᑐᑦ ᑭᕙᓪᓕᕐᒥ ᑐᓴᒐᒃᓴᓕᕆᔨᒃᑯᑦ ᐅᖃᖃᑎᖃᕈᒪᖕᒪᑕ ᐊᑐᓂ ᐃᓕᓐᓂᐊᕐᕕᑦ ᐃᓱᒪᑕᖏᓐᓂᒃ, ᐃᓚᐅᖃᑕᐅᑉᓗᒍ ᑎᐱᐅᑐᕐ.
ᐃᓕᓐᓂᐊᖅᑐᑦ ᖃᓂᒌᒃᑑᑎᖁᓇᒋᑦ ᐊᒻᒪᓗ ᐊᒥᓱᑦ ᐊᑕᐅᓯᕐᒥ ᑲᑎᖃᑦᑕᖁᓇᒋᑦ, ᐅᑉᓛᒃᑯᑦ ᐅᑉᓛᕈᒥᑕᕐᓂᐅᕙᒃᑐᑦ ᐃᓕᓐᐊᓂᕐᕕᖏᓐᓂᒃ ᐊᑐᓂ ᐅᑉᓛᕈᒥᑕᖅᑕᐅᖃᑦᑕᕐᓂᐊᓕᖅᑐᑦ. ᑎᐱᐅᑐᕐ ᐅᖃᖅᖢᓂᓗ ᐊᖓᔪᖅᑳᑦ ᓄᑕᕋᒥᓂᒃ ᐊᔾᔭᖅᓯᖁᓇᒋᑦ 8:15 ᑐᖔᓂ ᐅᑉᓛᒃᑯᑦ ᑕᐃᑲᓃᑦᑐᖃᔾᔮᙱᒻᒪᑦ ᐃᓕᓐᓂᐊᖅᑐᑦ ᐃᑎᖅᑎᑕᐅᔪᓐᓇᖁᑉᓗᒋᑦ.
“ᕿᓄᐃᓵᑦᑎᐊᖃᑦᑕᕐᓂᐊᖅᐳᓯ ᑕᒪᒃᑯᐊ ᐊᑐᕋᓱᓕᓵᖅᑎᓪᓗᑎᒍᑦ ᐱᔭᕆᐊᑐᔪᑦ ᐊᓯᔾᔨᖅᓯᒪᔪᑦ. ᓄᓇᖅᑲᑎᒌᑦ ᑐᓴᐅᒪᑎᑦᑎᐊᕋᓱᖃᑦᑕᕐᓂᐊᖅᑕᖅᐳᑦ, ᓄᑖᓂᒃ ᑐᑭᓯᒋᐊᕈᑎᒃᓴᓂᒃ ᖃᐃᑦᑎᔪᖃᖅᐸᓪᓕᐊᑎᓪᓗᒍ.”
ᓄᕙᒡᔪᐊᕐᓂᖅ ᐱᑕᖃᕋᓱᒋᔭᐅᓕᖅᐸᓪᓕ?
ᒫᓐᓇᐅᔪᖅ ᐃᓕᓐᓂᐊᕐᕕᑦ ᒪᑐᐃᕐᓂᐊᕐᓂᖏᑦ ᑐᙵᕕᓖᑦ ᓄᕙᒡᔪᐊᕐᓂᕐᒥᒃ ᐱᑕᖃᙲᓐᓇᕐᒪᑦ ᓄᓇᕗᒥ.
ᑭᓯᐊᓂᓕ, ᐃᓕᓐᓂᐊᖅᑐᓕᕆᔨᒃᑯᑦ ᖃᐅᔨᓴᕈᑎᓂᒃ ᓯᑕᒪᐅᓕᖓᔪᒃᑯᑦ ᐋᖅᑭᒃᓯᓯᒪᔪᑦ ᓄᕙᒡᔪᐊᕐᓂᕐᒥᒃ ᓴᖅᑭᑦᑐᖃᕋᔭᖅᐸᑦ. ᐃᓕᓐᓂᐊᕐᓇᐅᔪᖅ ᐱᒋᐊᕐᓂᖃᕐᓂᐊᖅᑐᖅ ᓯᕗᓪᓕᖅᐹᒃᑯᑦ, ᓲᕐᓗ ᓄᕙᒡᔪᐊᕐᓂᕐᒥᒃ ᐱᑕᖃᙱᖦᖢᓂ ᓄᓇᕗᒥ.
ᑕᐃᒪᓕ ᐅᒃᐱᕈᓱᒃᑐᖃᖅᐸᑦ ᓄᕙᒡᔪᐊᕐᓂᖅ -19-ᑕᖃᕐᓂᖓᓄᑦ ᑭᕙᓪᓕᕐᒥ. ᑐᒡᓕᐊᒍᑦ ᐱᓕᕆᓕᕋᔭᖅᑐᑦ. ᐊᓯᔾᔨᖅᑐᑑᓇᔭᖅᑐᖅ ᐊᖓᔪᒃᖡᑦ ᐊᒻᒪᓗ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑐᑦ ᐃᓕᓐᓂᐊᖃᑦᑕᓕᕋᔭᖅᑐᑦ ᒪᕐᕈᐃᓐᓇᕐᓂᒃ ᐅᑉᓗᓂᒃ ᐱᓇᓱᐊᕈᓯᑕᒫᑦ.
ᑕᐃᒪᓕ ᓄᕙᒡᔪᐊᕐᓂᖅ -19-ᓕᖕᒥᒃ ᖃᐅᔨᔭᐅᔪᖃᖅᐸᑦ ᓄᓇᓕᖕᒥ, ᓄᓇᓕᐅᔪᖅ ᐱᖓᔪᐊᒍᑦ ᐱᓕᕆᓕᕋᔭᖅᑐᖅ, ᐱᖓᓱᐃᓐᓇᕐᓂᒃ ᐅᑉᓗᓂᒃ ᐃᓕᓐᓂᐊᖃᑦᑕᓕᕋᔭᖅᑐᑦ ᓄᑲᖅᖡᑦ ᐊᒻᒪᓗ ᒪᕐᕈᐃᖅᑕᕐᓗᑎᒃ ᐱᓇᓱᐊᕈᓯᑕᒫᑦ ᐊᖓᔪᒃᖡᑦ ᐊᒻᒪᓗ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑐᑦ.
ᑕᐃᒪᓕ ᓄᓇᓕᖕᒧᑦ ᓯᐊᒻᒪᒐᔭᖅᐸᑦ ᓄᕙᒡᔪᐊᕐᓂᖅ -19, ᓲᕐᓗ ᐊᑕᐅᓯᐅᙱᑦᑐᖅ ᓄᕙᒡᔪᐊᕐᓂᕐᒥᒃ ᐋᓐᓂᐊᖅᑖᕐᓗᓂ, ᓯᑕᒪᖓ ᐊᑐᖅᑕᐅᓕᕋᔭᖅᑐᖅ ᐃᓕᓐᓂᐊᕐᕕᑦ ᒪᑐᔭᐅᓗᒃᑖᕋᔭᖅᑐᑦ ᓄᓇᓕᖕᒥ. ᐃᓱᒪᓕᐅᕈᑎᒃᓴᑦ ᐊᓯᔾᔨᕈᑎᒃᓴᓄᑦ ᓇᓕᐊᕐᓃᑦᑕᕆᐊᖃᕐᒪᖔᑦ ᓄᓇᓕᒃ ᐃᓱᒪᓕᐅᕈᑕᐅᓇᔭᖅᑐᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐊᖓᔪᖅᑳᕐᔪᐊᖓᓄᑦ ᐊᒻᒪᓗ ᐃᓄᓗᒃᑖᑦ ᑐᓴᖅᑎᑕᐅᓗᑎᒃ.
ᓯᕗᓪᓕᖅᐹᖅ ᐅᑉᓗᖅ ᐃᓕᓐᓂᐊᓕᕐᓂᐊᖅᑐᓄᑦ ᓄᓇᓕᖕᓂ
ᐊᕐᕕᐊᑦ - ᐊᒐᓯ 20
ᖃᒪᓂ’ᑐᐊᖅ - ᐊᒐᓯ 7
ᐃᒡᓗᓕᒑᕐᔪᒃ - ᐊᒐᓯ 11
ᓴᓪᓕᖅ - ᐊᒐᓯ 12
ᑲᖏᖅᖠᓂᖅ - ᐊᒐᓯ 14
ᓇᐅᔮᑦ - ᐊᒐᓯ 10
ᑎᑭᕋᕐᔪᐊᖅ - ᐊᒐᓯ 14
ᓄᓇᕗᒥ ᐃᓕᓐᓂᐊᖅᑐᓕᕆᔨᒃᑯᓐᓂᙶᖅᑐᖅ