ᐅᓖᐱᑲ ᑲᓪᓗᒃ ᐊᒥᓱᓂᒃ ᐅᑭᐅᓂᒃ ᐃᑲᔪᕋᓱᒃᓯᒪᔪᖅ ᐃᓄᖕᓂᒃ ᐊᒃᓱᕈᕐᓇᖅᑐᒃᑰᖅᓯᒪᔪᓂᒃ, ᐊᒻᒪᓗ ᐅᖃᐅᔾᔨᒋᐊᖅᑎᓂᒃ ᐊᑐᐃᓐᓇᕈᖅᑎᑦᑎᒃᑲᓐᓂᕈᒪᔪᖅ ᓇᓂᓗᒃᑖᖅ. ᒫᓐᓇᓵᖑᓚᐅᖅᑐᖅ ᐃᓱᒪᒋᔭᖃᐅᔭᓚᐅᖅᑐᖅ ᐱᐊᓂᒃᓯᒪᔭᖏᓐᓂᒃ ᐱᓕᕆᐊᕆᓯᒪᔭᖏᓐᓂᒃ ᐊᒻᒪᓗ ᓱᓇᑦ ᑲᒪᒋᔭᐅᒃᑲᓐᓂᕆᐊᖃᕐᒪᖔᑕ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ: ᑕᖅᑭᓂᒃ ᖄᖏᓵᖅᑐᓂᒃ, ᑲᔪᓯᑎᑦᑎᑦᑎᐊᓚᐅᖅᑐᑎᑦ ᐳᑭᖅᑕᓕᒃᑯᑦ ᒪᓕᒐᑎᒍᑦ ᒪᓕᒃᑎᑦᑎᑦᑎᐊᕈᓐᓇᓕᖅᖢᒋᑦ ᐃᓄᐃᑦ ᐊᕐᓇᐃᑦ ᓄᑕᖅᑲᓪᓗ ᐱᑦᑎᐊᖅᑕᐅᓂᖅᓴᐅᔪᓐᓇᖅᓯᖁᑉᓗᒋᑦ, ᐊᒻᒪᓗ ᒐᕙᒪᑐᖃᒃᑯᑦ ᐊᔭᐅᖅᑐᖅᖢᒋᑦ ᓴᓂᕐᕙᐃᑎᖦᖢᒋᑦ ᑮᓇᐅᔭᓂᒃ ᑕᓪᓕᒪᓄᑦ ᐊᕐᓇᕐᓄᑦ ᕿᒫᕝᑯᒃᓴᓄᑦ ᐃᓄᐃᑦ ᓄᓇᖓᑦᑯᑦ ᓄᓇᖓᓂᒃ. ᖃᓄᖅ ᑕᐃᒪᓐᓇᐃᓕᐅᖅᑎᑦᑎᓚᐅᖅᐱᑦ?
ᐅᓖᐱᑲ ᑲᓪᓗᒃ: ᐸᐅᒃᑑᑎᒃᑯᑦ ᐊᒥᓱᒻᒪᕆᐊᓗᖕᓂᒃ ᐅᑭᐅᓂᒃ ᕿᒫᕝᕕᒃᑖᖁᔨᓯᒪᑉᓗᑎᒃ ᐊᔭᐅᖅᑐᐃᓯᒪᔪᑦ. ᑭᖑᓪᓕᖅᐹᒥ ᐊᕐᕌᒍᑕᒫᖅᓯᐅᑎᑉᑎᓐᓂᒃ ᑲᑎᒪᓂᕐᒥᒃ, ᓄᕙᒡᔪᐊᕐᓂᖅᑕᖃᓚᐅᙱᑎᓪᓗᒍ ᓱᓕ, ᑲᑎᒪᖃᑎᖃᕋᑉᑕ ᒐᕙᒪᑐᖃᒃᑯᑦ ᒥᓂᔅᑕᒡᒍᑎᖏᓐᓂᒃ ᐅᖃᐅᑎᓚᐅᖅᓯᒪᔭᖅᐳᑦ ᕿᒫᕝᕕᑦ ᓴᖅᑭᑎᑕᐅᔭᕆᐊᓕᖕᓂᒃ ᓯᕗᓪᓕᖅᐸᐅᑎᓯᒪᒐᑉᑎᒍᑦ. ᒥᓂᔅᑑᖃᑕᐅᔪᖅ ᐅᖃᓚᐅᖅᓯᒪᔪᖅ ᑕᒪᓐᓇ ᓯᕗᓪᓕᖅᐸᐅᑎᓯᒪᒍᑉᓯᐅᒃ, ᐃᑲᔪᕐᓂᐊᖅᐸᒋᑦ ᕿᒫᕝᕕᒃᑖᕈᓐᓇᖁᓗᓯ... ᔭᓄᐊᕆᒥᐅᖅᑰᖅᑐᖅ, ᑲᑎᒪᖃᑎᖃᓚᐅᖅᑐᒍᑦ ᖃᑉᓯᑲᓪᓚᖕᓂᒃ ᒥᓂᔅᑕᓂᒃ ᐅᖃᐅᑎᔭᐅᑉᓗᑕᓗ ᕿᒫᕝᕕᖕᓂᒃ ᐱᑎᑦᑎᓂᐊᕐᓂᕋᖅᖢᑎᒃ. ᑕᒪᓐᓇ ᑐᓴᒐᒃᓴᑦᑎᐊᕚᓘᓚᐅᖅᑐᖅ.
ᓴᖅᑭᓯᒪᓕᖅᑎᓪᓗᒍ ᐊᓯᐅᔨᔭᐅᓯᒪᔪᑦ ᐃᓄᐊᖅᑕᐅᓯᒪᔪᓪᓗ ᐊᕐᓇᐃᑦ ᐃᑲᔫᑎᖓ, ᒪᓕᒐᑦ ᓴᖅᑭᓚᐅᖅᓯᒪᔪᑦ ᑲᑎᒪᔪᓂᒃ ᑕᒪᑐᒪ ᒥᒃᓵᓄᑦ ᖃᐅᔨᒋᐊᖅᓂᖃᖅᑎᓪᓗᒋᑦ, ᐊᒻᒪᓗ ᐊᒥᒐᕐᓂᖏᓐᓄᑦ ᕿᒫᕝᕕᑦ ᕿᒫᕝᕕᐅᓇᔭᖅᑐᑦ ᐊᕐᓇᕐᓄᑦ ᐋᓐᓂᖅᑎᖅᑕᐅᕙᒃᑐᓄᑦ. ᑕᐃᒪᐃᒻᒪᑦ ᒪᓕᒐᓕᕆᓂᒃᑯᑦ ᐅᓂᑉᑳᓕᐅᓚᐅᖅᑐᒍᑦ ᐊᒻᒪᓗ ᐃᖢᐊᖏᓕᐅᕈᑕᐅᔪᑦ ᓴᖅᑭᑦᑐᑦ, ᐅᖃᐅᓯᕆᓚᐅᖅᑕᖅᐳᑦ ᐳᑭᖅᑕᓖᑦ ᑭᒡᒐᖅᑐᐃᔨᖓᓄᑦ (ᐳᕆᓐᑕ) ᓚᑭᒧᑦ. ᑕᐃᒪᐃᒻᒪᑦ ᐱᓕᕆᖃᑎᒋᔭᖅᐳᑦᑕᐅᖅ, ᐱᓕᕆᐊᕆᔪᒪᑉᓗᒍ ᑐᑭᒧᐅᒪᖃᑎᒌᒍᑎ ᐊᒻᒪᓗ ᐱᓕᕆᖃᑎᒌᒍᒪᑉᓗᑕ ᐱᐅᓯᕚᓪᓕᖁᑉᓗᒍ ᒪᓕᒐᖅ ᐅᑭᐅᖅᑕᖅᑐᒥ, ᐃᓄᐃᑦ ᓄᓇᖓᑦᓂ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ: ᑖᑉᑯᐊ ᑕᒡᕙ ᒪᕐᕉᒃ ᐱᒻᒪᕆᐊᓗᐃᑦ ᐱᐊᓂᒃᓯᒪᔭᓯ. ᓇᓗᓇᖅᑑᔭᓚᐅᙱᑉᐹ ᐊᔭᐅᖅᑐᐃᕌᓂᒍᓐᓇᖅᓯᒪᓕᖅᑎᓪᓗᓯ ᐱᒻᒪᕆᐊᓗᖕᓂᒃ ᐱᓕᕆᕝᕕᖕᓂᒃ − ᐳᑭᖅᑕᓕᒃᑯᓐᓂᒃ ᐊᒻᒪᓗ ᒐᕙᒪᑐᖃᒃᑯᓐᓂᒃ − ᓴᖅᑭᑎᑦᑎᔪᓐᓇᕐᓂᕐᒧᑦ ᑐᑭᖃᑦᑎᐊᖅᑐᓂᒃ ᐱᓕᕆᐊᖃᕈᓐᓇᕐᓂᕐᒧᑦ, ᐅᕝᕙᓘᓐᓃᑦ ᐊᔭᐅᖅᑐᐃᖏᓐᓈᓗᒋᐊᖃᓚᐅᖅᐱᓯ ᓇᓗᓇᕈᑕᐅᔪᓂᒃ ᐊᖏᕋᔭᕐᒪᖔᑕ?
ᐅᓖᐱᑲ ᑲᓪᓗᒃ: ᐃᓱᒪᔪᖓᓕ, ᐱᓗᐊᖅᑐᒥ ᕿᒫᕝᕕᒃᑯᑦ, ᐅᖃᐅᓯᖃᖃᑦᑕᖅᓯᒪᒐᑉᑕ ᒐᕙᒪᑐᖃᒃᑯᑦ ᑐᓂᓯᖃᑦᑕᕐᒪᑕ ᒥᓕᔭᖏᓐᓃᑦᑐᓂᒃ ᕿᒫᕝᕕᖕᓄᑦ ᐊᓪᓚᖓᔪᑦ ᓄᓇᖏᓐᓂᒃ. ᐅᖃᐅᑎᒐᑉᑎᒍᑦ ᐊᓪᓚᖓᔪᒃᑯᑎᑐᑦ ᓄᓇᕗᑦ ᐋᖅᑭᒃᓱᖅᓯᒪᙱᒻᒪᑕ ᐅᑭᐅᖅᑕᖅᑐᒥ, ᑕᐃᒪᐃᒻᒪᑦ ᑮᓇᐅᔭᖅᑖᖅᑎᑕᐅᖃᑦᑕᓚᐅᙱᖦᖢᑕ. 70%-ᒋᔭᖏᑦ ᓄᓇᓖᑦ ᐃᓄᐃᑦ ᓄᓇᖓᑦᓂ ᕿᒫᕝᕕᒃᑕᖃᙱᑦᑐᑦ ᐊᒻᒪᓗ ᐱᑦᑎᐊᕈᑎᖃᑦᑕᙱᑦᑐᑦ ᐊᒥᓲᓂᖅᐹᖑᓯᒪᑉᓗᑎᒃ ᑕᒫᓂ ᐅᑭᐅᖅᑕᖅᑐᒥ. ᑕᒪᓐᓇ ᓴᖅᑭᑏᓐᓇᖃᑦᑕᓚᐅᖅᑕᖅᐳᑦ. ᐊᒃᓱᓪᓘᓐᓃᑦ ᑐᓴᖅᑕᐅᓚᐅᕋᑉᑕ.
ᐳᑭᖅᑕᓕᓕᕆᓂᒃᑯᓪᓕ, ᑲᑎᒪᖃᑎᒋᔭᕆᐊᖃᖃᑦᑕᓚᐅᖅᑕᖅᐳᑦ ᐊᒻᒪᓗ ᑐᑭᓯᑎᑦᑎᒋᐊᖅᐸᒃᖢᑕ − ᑲᔪᓰᓐᓇᖅᑐᒃᑯᑦ... ᓄᑖᒥᒃ ᒥᓂᔅᑕᑖᕌᖓᑕ, ᐃᓕᓐᓂᐊᖅᑎᑦᑎᒋᐊᒃᑲᓐᓂᖅᐸᒃᖢᑕ ᖃᓄᐃᑦᑑᖕᒪᖔᑦ ᐅᑭᐅᖅᑕᖅᑐᒥ.
ᐊᑐᖅᑕᐅᔪᓐᓇᖅᑐᓂᒃ ᐱᑕᖃᙱᑦᑐᒍᑦ ᐅᖃᐅᔾᔨᒋᐊᖅᑎᓄᑦ ᓇᓂᕈᓘᔭᖅ, ᐊᒥᓲᓂᖅᓴᓂᒃ ᒥᑭᔪᓂᒃ ᓄᓇᓕᖕᓂᒃ. ᕿᒫᕝᕕᒃᑕᖃᙱᑦᑐᖅ. ᐃᒥᓗᐊᖃᑦᑕᖅᑐᓪᓗ ᐃᑲᔪᖅᑕᐅᕝᕕᒃᑕᖃᙱᑦᑐᑦ. ᑕᒪᒃᑯᐊ ᐃᓄᖕᓄᑦ ᓇᐅᒃᑰᕈᑕᐅᓲᑦ ᐃᑲᔪᖅᑕᐅᔾᔪᑎᒋᔭᕆᐊᖃᖅᑕᖏᑦ ᐊᑐᐃᓐᓇᐅᙱᑦᑐᑦ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ: ᑲᓇᑕᒥ ᖃᓄᐃᓕᒋᐊᕈᑎᒃᑯᑦ ᐸᕐᓇᐅᑎ ᑭᖑᓪᓕᖅᐹᒃᑯᑦ ᐅᓂᑉᑳᓕᐊᖅ ᑲᓇᑕᒥ ᖃᐅᔨᒋᐊᖅᑎᓄᑦ ᐊᓯᐅᔨᔭᐅᓯᒪᔪᓄᑦ ᐃᓄᐊᖅᑕᐅᓯᒪᔪᓄᓪᓗ ᓄᓇᖃᖅᑳᖅᑐᓄᑦ ᐊᕐᓇᕐᓄᑦ ᓂᕕᐊᖅᓵᖑᔪᓄᓪᓗ ᓂᕆᐅᒋᔭᐅᓚᐅᖅᑐᖅ ᓴᖅᑭᑎᑕᐅᓂᐊᕐᓂᖓᓄᑦ ᔫᓐ 2020-ᒥ. ᖃᓄᖅ ᐃᓱᒪᒋᕕᐅᒃ ᑭᖑᕙᕆᐊᖅᓯᒪᓂᖓᓄᑦ ᖃᓄᐃᓕᒋᐊᕈᑎᒃᑯᑦ ᐸᕐᓇᐅᑎ, ᒐᕙᒪᒃᑯᑦ ᐅᖃᖅᓯᒪᑉᓗᑎᒃ ᑭᖑᕙᖅᓯᒪᖕᒪᑦ ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ ᐊᒻᒪᓗ ᐅᖃᖃᑎᒌᒃᑲᓐᓂᕆᐊᖃᕐᓂᖏᓐᓄᑦ ᐅᖃᖃᑎᖃᕐᓗᑎᒃ ᓄᓇᖃᖅᑳᖅᓯᒪᔪᓂᒃ ᑎᒥᐅᔪᓂᒃ?
ᐅᓖᐱᑲ ᑲᓪᓗᒃ: ᖁᕕᐊᒋᓚᐅᙱᑕᖅᐳᑦ ᑭᖑᕙᕆᐊᖅᑕᐅᓯᒪᓂᖓ ᑭᓯᐊᓂ ᐱᓕᕆᖃᑎᖃᓪᓚᕆᒃᓯᒪᔪᒍᑦ ᑎᒥᒋᔭᐅᔪᓪᓗ. ᐃᓄᖕᓂᒃ ᐱᓕᕆᖃᑎᒌᒃᑐᓂᒃ ᑲᑎᒪᔨᖃᖅᑐᒍᑦ ᑲᑎᒪᖃᑦᑕᖅᑐᑦ ᐱᓇᓱᐊᕈᓯᑕᒫᒃᑯᑦ ᖃᓄᐃᓕᒋᐊᕈᒪᓂᕐᒧᑦ ᐸᕐᓇᐃᔪᑦ. ᐱᓕᕆᖃᑎᖃᖃᑦᑕᕐᒥᔪᒍᑦ ᐃᓄᐃᑦ ᑕᐱᕇᒃᑯᑦ ᑲᓇᑕᒥᒃᑯᓐᓂᒃ. ᑕᐃᒪᑐᖅ ᕿᓚᒻᒥᐅᔪᒃᑯᑦ ᖃᓄᐃᓕᒋᐊᕈᑕᐅᓂᐊᖅᐳᖅ ᒐᕙᒪᒃᑯᑎᒍᑦ ᑕᒪᓐᓇᐃᓛᒃ ᐱᓕᕆᐊᖑᓂᖓ ᐱᖓᓱᓂᒃ ᐅᑭᐅᓂᒃ ᑕᒪᐃᓐᓄᑦ ᐱᓕᕆᐊᖑᓯᒪᖕᒪᑦ ᐊᒃᓱᕈᖅᖢᑎᒃ, ᐱᓗᐊᖅᑐᒥ ᐃᓚᒌᑯᓗᐃᑦ ᐅᖃᓪᓚᒃᑎᑕᐅᓚᐅᖅᑎᓪᓗᒋᑦ. ᐊᒃᓱᕈᕐᓇᓚᐅᖅᑐᖅ ᐅᖃᐅᓯᖃᒃᑲᓐᓂᕆᐊᖃᖅᓗᓂ ᖃᓄᐃᑦᑐᒃᑰᕈᑕᐅᓚᐅᖅᑐᓂᒃ ᐃᓚᐃᖅᑎᓪᓗᒋᑦ. ᑕᒪᒃᑯᐊ ᖃᓄᐃᑦᑐᒃᑰᕈᑕᐅᓚᐅᖅᑐᑦ ᓴᖅᑭᓚᐅᖅᓯᒪᔪᑦ ᑕᐃᑉᓱᒪᓂᑐᖃᖅ, ᐃᓚᖏᑦ, ᐊᒻᒪᓗ ᐊᑐᖅᑕᐅᔪᓐᓇᖅᑐᓂᒃ ᐃᑲᔫᑎᓂᒃ ᐱᑕᖃᙱᑦᑐᖅ ᓄᓇᓕᖕᓂᒃ ᓄᓇᒥᓄᑦ ᐅᑎᕌᖓᒥᒃ ᐅᖃᓪᓚᒋᐊᖅᑐᖅᓯᒪᖅᑳᖅᖢᑎᒃ.
ᑕᐃᒪᐃᒻᒪᑦ ᐊᔭᐅᖅᑐᐃᖏᓐᓇᖅᑐᖓ ᓄᓇᓕᖕᓂᒃ ᐅᖃᐅᔾᔨᒋᐊᖅᑎᖃᖃᑦᑕᖁᑉᓗᒍ ᐱᔨᑦᓯᕋᕈᓐᓇᖅᑐᓂᒃ ᓲᕐᓗ ᐱᒋᐊᖅᑎᑦᑎᓚᐅᕋᑉᑕ ᖃᒪᓂ’ᑐᐊᕐᒥ ᐃᒻᒪᖄ 35 ᐅᑭᐅᑦ ᐱᐊᓂᒃᓯᒪᓕᖅᑐᑦ ᑲᒪᒋᐊᕈᓐᓇᖁᑉᓗᒋᑦ, ᐱᒋᐊᕐᓂᖏᓐᓂᒃ, ᓄᑕᖅᑲᑦ ᖁᓄᔪᕐᓂᐊᖅᑕᐅᖃᑦᑕᓚᐅᖅᑎᓪᓗᒋᑦ ᖃᑉᓯᑲᓪᓚᐅᖕᒪᑕ ᐃᒃᓯᕋᕐᔪᐊᓄᑦ ᖁᓄᔪᕐᓂᐊᖅᑕᐅᓯᒪᓂᑰᔪᑦ. ᖃᐅᔨᓕᓚᐅᖅᑐᒍᑦ ᐊᑐᖅᑕᐅᔭᕆᐊᓖᑦ ᐊᒥᓲᖕᒪᑕ ᓄᓇᑉᑎᓐᓂᒃ. ᓈᓚᐅᑎᐊᓛᒃᑰᓚᐅᖅᓯᒪᔪᒍᑦ ᐅᖃᐅᓯᖃᖅᖢᑕᓗ ᖃᓄᖅ ᖁᓄᔪᕐᓂᐊᖅᑕᐅᓯᒪᓂᑰᔪᑦ ᐊᒃᑐᖅᑕᐅᓯᒪᓂᖃᖃᑦᑕᕐᒪᖔᑕ ᐊᒻᒪᓗ ᐃᓄᐃᑦ ᐅᖃᓪᓚᒋᐊᖅᑐᖃᑦᑕᓕᓚᐅᖅᑐᑦ... ᓇᒧᓗᒃᑖᓕᓚᐅᖅᑐᒍᑦ ᐅᖃᐅᔾᔨᒋᐊᕈᓐᓇᖅᑐᑦ ᒥᒃᓵᓄᑦ. ᐃᓅᑉᓗᑕ ᐃᓱᒪᖃᑦᑕᕋᑉᑕ ᒪᒥᓴᕐᓂᖅ ᐃᓗᐃᑦᑐᒃᑯᑦ ᑲᒪᒋᔭᐅᔪᓐᓇᕐᓂᖓᓄᑦ, ᒪᒥᓴᖅᑎᑦᑎᔪᓐᓇᙱᓐᓇᑉᑕ ᐃᓚᐃᓐᓇᖏᓐᓂᒃ ᖃᑕᙳᑎᒋᔭᐅᔪᓂᒃ. ᒪᒥᓴᕈᑎᒃᓴᓂᒃ ᐊᑐᐃᓐᓇᕈᖅᑎᑦᑎᔭᕆᐊᖃᖅᑐᒍᑦ ᐊᖑᑎᓄᑦᑕᐅᖅ, ᑕᐃᒪᐃᒻᒪᑦ ᐊᖑᑎᓂᒃ ᓄᑲᑉᐱᐊᕐᓂᒡᓗ ᐱᓕᕆᖃᑎᒌᒍᑎᓂᒃ ᐃᑲᔫᑎᓂᒃ ᐱᑕᖃᖅᑐᒍᑦ ᐸᐅᒃᑑᑎᒃᑯᓐᓂᒃ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ: ᐱᔾᔪᑎᒋᑉᓗᒋᑦ ᐊᔾᔨᒌᙱᑦᑑᑕᐅᔪᑦ ᑕᐃᑉᓱᒪᓂᑐᖃᖅ ᐊᒻᒪᓗ ᐅᑉᓗᒥᒧᑦ ᖃᓄᐃᑦᑐᒃᑰᕈᑕᐅᓯᒪᔪᒃᑯᑦ, ᐊᒥᓱᑦ ᐃᓄᐃᑦ ᐅᒃᐱᕈᓱᖃᑦᑕᙱᒻᒪᑕ ᐳᑭᖅᑕᓕᖕᓂᒃ ᐊᒻᒪᓗ ᒐᕙᒪᑐᖃᒃᑯᓐᓂᒃ. ᑕᒪᓐᓇ ᐊᓯᔾᔨᕋᓱᒋᕕᐅᒃ? ᐅᕝᕙᓘᕝᕙ ᖃᓄᖅ ᐱᓕᕆᖃᑎᒌᒍᓐᓇᖅᓯᓇᔭᖅᐸᑦ?
ᐅᓖᐱᑲ ᑲᓪᓗᒃ: ᑕᐃᒪᐃᒻᒪᑦ ᐳᑭᖅᑕᓕᒃᑯᑦ ᐱᓕᕆᖃᑎᒌᓐᓇᕈᒪᔭᖅᐳᑦ, ᐅᒃᐱᕆᔭᐅᖃᑦᑕᙱᓯᒪᓂᖏᓐᓄᑦ ᐊᒥᓱᓂᒃ ᐅᑭᐅᓂᒃ. ᑕᐃᑉᓱᒪᓂ, ᐳᑭᖅᑕᓖᑦ ᐃᒪᓐᓈᖅᑐᖅᑕᐅᔪᒃᓴᐅᑉᓗᑎᒃ ᒐᕙᒪᑐᖃᒃᑯᓐᓄᑦ − ᐅᕙᑉᑎᓐᓂᒃ ᐊᐃᒃᖠᖃᑦᑕᓚᐅᖅᑐᑦ ᐊᖓᔪᖅᑳᑉᑎᓐᓂᒃ ᑎᒍᑉᓗᓂᑎᒍᑦ ᐊᒻᒪᓗ ᐃᓕᓐᓂᐊᕆᐊᖅᑎᖦᖢᓂᑎᒍᑦ. ᐳᑭᖅᑕᓖᑦ ᑐᖁᑎᕆᔭᖅᑐᓚᐅᖅᓯᒪᔪᑦ ᕿᒻᒥᕐᓂᒃ. ᑕᐃᒪᐃᒻᒪᑦ ᐅᒃᐱᕆᔭᐅᔪᓐᓃᖅᓯᒪᔫᔭᖅᑐᑦ. ᐊᓯᖏᑦᑎᑐᑦ ᐱᔨᑦᓯᕋᖅᑕᐅᔾᔪᑎᒃᑯᑦ ᓄᓇᓕᖕᓂᒃ − ᐃᓕᓐᓂᐊᕐᕕᑦ, ᐳᑭᖅᑕᓕᒃᑯᑦ, ᐃᓄᓕᕆᔨᒃᑯᑦ − ᑖᑉᑯᐊ ᑕᒡᕙ ᐃᓚᐅᖃᑕᐅᑎᑦᑎᔭᕆᐊᓖᑦ ᓄᓇᓕᖕᓂᒃ ᐃᓄᐃᑦ ᖃᓄᐃᒃᓴᙱᓐᓂᖅᓴᐅᔪᓐᓇᖅᓯᖁᑉᓗᒋᑦ ᑖᑉᑯᓄᙵ ᐅᐸᒍᑎᔭᕆᐊᒃᓴᖅ.
ᐅᖃᐅᓯᖃᕋᔪᖕᒥᔪᒍᑦ ᐳᑭᖅᑕᓕᒃᑯᓐᓄᑦ ᐅᖃᓗᒃᖢᓂ ᑭᐅᓯᖃᑦᑕᖅᑐᑦ ᒥᒃᓵᓄᑦ. ᖃᓄᖅ ᐊᓪᓛᖃᑦᑕᕐᒪᖔᑕ ᒫᓐᓇᐅᔪᖅ ᐅᖃᓗᒃᑯᒪ ᖃᒪᓂ’ᑐᐊᕐᒦᓪᓗᖓ, ᐃᖃᓗᖕᒥᐅᑕᓄᑦ ᑭᐅᔭᐅᓇᔭᖅᑐᖅ ᐊᒻᒪᓗ ᐅᕙᖓ ᐅᑕᖅᑭᓕᕐᓗᖓ. ᐃᓛᒌᑦ ᐱᑦᑎᐊᕈᑎᙱᑎᓪᓗᒋᑦ, ᐱᑦᑎᐊᕈᑎᙱᑦᑐᑦ ᐱᒋᐊᓪᓚᒍᓐᓇᕐᒪᑕ ᓱᑲᔪᒃᑯᑦ. ᑕᐃᒪᐃᒻᒪᑦ ᐅᖃᓗᒡᕕᐅᖃᑦᑕᕐᓂᖏᑦ ᐱᐅᓯᕚᓪᓕᖅᑕᐅᔭᕆᐊᓖᑦ, ᐊᕐᓇᐃᑦ ᐃᑲᔪᖅᑕᐅᔪᓐᓇᖃᑦᑕᖁᑉᓗᒋᑦ ᒫᓐᓇᑲᐅᑎᒋ, ᓄᑕᕋᑯᓗᐃᓪᓗ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ: ᐅᖃᖅᑲᐅᒐᕕᑦ ᓴᖅᑭᑎᑦᑎᒃᑲᓐᓂᕈᒪᒐᕕᑦ ᐅᖃᐅᔾᔨᒋᐊᖅᑎᓂᒃ ᓄᓇᓕᖕᓂᒃ, ᓱᓇᓂᒃ ᐱᓕᕆᐊᖃᕈᒪᑉᓗᑎᑦ ᐃᓱᒪᒋᔭᖃᒃᑲᓐᓂᖅᐱᑦ ᐸᐅᒃᑑᑎᒃᑯᑎᒍᑦ 2021 ᐃᓗᐊᓂ?
ᐅᓖᐱᑲ ᑲᓪᓗᒃ: ᑕᒪᓐᓇ ᐊᔭᐅᖅᑐᕈᑎᒌᓐᓇᖃᑦᑕᖅᑕᖅᐳᑦ, ᖃᐅᔨᒪᔪᖓ ᐱᑕᖃᕆᐊᖃᓪᓚᕆᖕᒪᑦ ᐅᖃᐅᔾᔨᒋᐊᖅᑎᓂᒃ. ᖃᒪᓂ’ᑐᐊᕐᒥ, ᓄᓇᓕᖕᒥ ᐅᖃᐅᔾᔨᒋᐊᖅᑎᑕᖃᖅᑐᖅ ᐅᖃᖃᑎᒋᔭᐅᔪᓐᓇᖅᖢᑎᑦ ᐅᖃᐅᓯᖅ ᐃᖢᐊᕆᔭᐃᑦ ᐊᑐᕐᓗᒍ. ᓴᓇᔨᕗᑦ ᐃᓕᓐᓂᐊᕐᕕᓕᐊᓲᑦ ᐅᖃᐅᔾᔨᒋᐊᖅᑐᖅᖢᑎᒃ ᖃᓄᖅ ᐊᒃᑐᖅᑕᐅᑦᑎᐊᕐᓇᖃᑦᑕᕐᒪᖔᑦ ᐊᒻᒪᓗ ᖃᓄᖅ ᐊᒃᑐᖅᑕᐅᓂᕐᓗᖃᑦᑕᕐᒪᖔᑕ, ᑕᐃᒪᐃᓕᐅᖅᑕᐅᒍᕕᑦ, ᖃᐅᔨᒪᓂᐊᕋᕕᑦ ᓈᒻᒪᙱᓐᓂᖓᓄᑦ ᐊᒻᒪᓗ ᐅᖃᐅᓯᕆᔪᓐᓇᕋᔭᕋᖕᓂ. ᐃᖅᑲᖅᑐᐃᕝᕕᒃᑯᓐᓂᒃ ᑐᓂᔭᐅᖃᑦᑕᖅᑐᒍᑦ; ᐱᕋᔭᒃᓯᒪᓂᑰᔪᑦ ᐅᖃᐅᔾᔪᖅᑕᐅᔪᓐᓇᖃᑦᑕᖅᑐᑦ ᐅᖃᖃᑎᒋᔭᐅᔪᓐᓇᖃᑦᑕᖅᑐᑦ. ᑕᒡᕙᑐᖅ ᑕᒪᕐᒥᒃ ᓄᓇᓖᑦ ᐅᖃᐅᔾᔨᒋᐊᖅᑎᖃᖃᑦᑕᕐᓂᕐᓕᑦ ᑕᐃᒪᐃᑦᑐᓂᒃ. ᑕᒪᓐᓇ ᐅᕙᑉᑎᓐᓄᑦ ᓈᒻᒪᒃᑑᓯᒪᔪᖅ ᐊᒻᒪᓗ ᐅᕙᒍᑦ ᐊᐅᓪᓛᖅᑎᑕᖅᐳᑦ. ᑲᑎᒪᔨᖃᖅᑐᖓ − ᐃᒃᓯᕙᐅᑕᕆᔭᐅᓯᒪᔪᖓ ᐊᒥᓱᓂᒃ ᐅᑭᐅᓂᒃ ᑕᐃᒪᙵᓂᒃ ᐱᒋᐊᓚᐅᖅᑎᓪᓗᒋᑦ ᐅᑉᓗᒥᒧᑦ − ᓄᓇᖅᑲᑎᒌᖕᓄᑦ ᐊᐅᓚᑕᐅᑎᑦᑕᕆᐊᖃᖅᑕᖅᐳᑦ. ᐊᑭᓕᖅᑐᖅᑕᐅᓇᑎᒃ ᐱᓕᕆᖃᑦᑕᖅᑐᑦ ᑮᓇᐅᔭᑦ ᖃᐃᑕᐅᔪᑦ ᐅᖃᐅᔾᔨᒋᐊᕈᓐᓇᕐᓂᕐᒧᑦ ᒪᒥᓴᕈᑕᐅᕙᖕᒪᑦ ᐃᓄᖕᓄᑦ. ᐱᓕᕆᔪᒪᓂᕐᒨᖓᔪᖅ. ᐱᓕᕆᕐᔪᐊᕐᓇᖃᑦᑕᖅᑐᖅ ᐃᓛᓐᓂᒃᑯᑦ. ᐅᒃᐱᕈᓱᒃᑐᖓ ᓇᖕᒥᓂᕆᔭᑐᑦ ᑲᒪᒋᔭᕆᐊᖃᕋᓱᒋᑉᓗᒍ. ᓂᕆᐅᒋᐊᖃᙱᓐᓇᑉᑕ ᒐᕙᒪᑐᖃᒃᑯᓐᓄᑦ ᑲᒪᒋᔭᐅᖁᓗᒍ ᖃᐅᔨᒪᙱᒐᔪᖕᒪᑕ ᖃᓄᐃᓕᐅᖅᐸᒃᑐᓂᒃ ᑕᒫᓂ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ: ᑕᐃᑉᓱᒪᓂ, ᓯᕗᓪᓕᖅᐸᐅᑉᓗᑎᑦ ᖁᓪᓕᒃᑯᑦ ᐊᕐᓇᐃᑦ ᑲᑎᒪᔨᖏᓐᓄᑦ ᐊᖓᔪᖅᑳᖑᓚᐅᖅᓯᒪᒐᕕᑦ. ᑲᑎᒪᔨᐅᓚᐅᖅᓯᒪᑉᓗᑎᓪᓗ ᓄᓇᑦᑎᐊᕐᒥ ᐊᕐᓇᐃᑦ ᑲᑎᒪᔨᖏᓐᓂᒃ, ᑲᓇᑕᒥ ᐱᕋᔭᒃᑎᑦᑎᑦᑕᐃᓕᒪᓂᕐᒧᑦ ᑲᑎᒪᔨᓂᒃ ᐊᒻᒪᓗ ᖁᓄᔪᕐᓂᐊᖅᑕᐅᖃᑦᑕᖅᑐᑦ ᐃᑲᔪᕆᐊᖅᑎᖏᓐᓄᑦ ᓄᓇᑦᑎᐊᕐᒥ. ᐱᓕᕆᔪᒪᓃᑦ ᐃᑲᔪᕈᒪᓃᑦ ᓇᑭᙶᖅᓯᒪᔪᖅ ᐅᓇ?
ᐅᓖᐱᑲ ᑲᓪᓗᒃ: ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᖅᑐᓂᙶᖃᑕᐅᒐᒪ ᐊᒻᒪᓗ ᐳᕙᒡᓗᒃᑐᓂᒃ ᐃᓚᐅᖃᑕᐅᓚᐅᖅᓯᒪᑉᓗᖓ ᓄᑕᕋᐅᑉᓗᖓ. ᕿᒪᐃᔭᕆᐊᖃᓚᐅᖅᓯᒪᔪᖓ ᐃᓚᒃᑲᓂᒃ ᓇᒡᓕᒌᒍᑎᑦᑎᐊᖅᑐᓂᒃ ᐃᓕᓐᓂᐊᕆᐊᖅᑎᑕᐅᒐᒪ ᖁᓕᖏᓗᐊᖅᑐᓂᒃ ᐅᑭᐅᖃᖅᖢᖓ, ᐋᓐᓂᕈᑎᒋᔫᔭᓚᐅᙱᑕᕋ ᐃᓕᓐᓂᐊᕈᒪᒃᑲᐅᓂᒻᓄᑦ. ᐃᓐᓇᕈᕋᒪ, ᐅᐃᑖᕋᒪ ᐊᒻᒪᓗ ᓄᑕᕋᖃᓕᖅᖢᖓ, ᐅᔾᔨᕈᓱᓕᓚᐅᖅᑐᖓ ᐃᓚᖏᑦ ᓄᑕᖅᑲᑦ ᐱᕈᖅᓴᓚᐅᕐᓂᖏᓐᓄᑦ ᐊᑦᑕᓇᖅᑐᓕᖕᒥᒃ ᐅᕙᑉᑎᑑᕐᓇᑎᒃ. ᐱᓗᐊᖅᑐᒥ ᐃᓱᒪᒋᑉᓗᒋᑦ ᓄᑕᖅᑲᑦ, ᐃᓚᒌᑦ ᐱᑦᑎᐊᕈᑎᖃᑦᑕᙱᑉᐸᑕ ᐊᖏᕐᕋᕆᔭᐅᔪᓂᒃ ᓴᐱᓕᖃᑦᑕᖅᑐᒃᓴᐅᓂᖏᑦ ᐃᓱᒪᒋᑉᓗᒋᑦ. ᐃᓱᒪᓕᐅᓕᓚᐅᖅᑐᖓ ᓂᐱᒋᔭᐅᔪᓐᓇᕐᓂᒻᓄᑦ [ᓄᖅᑲᓚᐅᐱᓪᓚᒃᖢᓂ ᕿᐊᓱᙳᓕᖅᖢᓂ]. ᐊᐃᑦᑖᖑᒐᓗᐊᖅ. ᑕᒪᓐᓇ ᐃᒃᐱᒋᓪᓚᕆᖃᑦᑕᕋᑉᑯ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ:ᐸᐅᒃᑑᑎᒃᑯᓐᓄᑦ ᐊᖓᔪᖅᑳᕆᔭᐅᓕᕋᕕᑦ 2014-ᒥ ᐅᑉᓗᒥᒧᑦ. ᖃᓄᖅ ᐊᑯᓂᐅᑎᒋᔪᖅ ᐊᑕᓂᐊᖅᑰᖅᐱᑦ ᑕᒡᕘᓇ ᐱᓕᕆᔪᒪᓂᒃᑯᑦ?
ᐅᓖᐱᑲ ᑲᓪᓗᒃ:ᒪᕐᕉᖕᓂᒃ ᐅᑭᐅᓂᒃ ᓱᓕ ᐊᖓᔪᖅᑳᖑᔪᓐᓇᕋᒪ, ᑭᓯᐊᓂ ᐅᖃᐅᓐᓇᖃᑦᑕᖅᑐᖓ ᖃᖓ ᓄᖅᑲᕋᔭᕐᒪᖔᕐᒪ ᓇᓗᓂᒻᓄᑦ. ᐃᓄᐃᑦ ᐃᓅᓯᖏᓐᓂᒃ ᑲᒪᖃᑦᑕᖅᖢᓂ, ᖃᖓ ᓄᖅᑲᕐᓇᕐᒪᑦ, ᐃᑲᔪᕋᓱᒃᖢᒋᑦ? ᑭᓯᐊᓂ ᐱᓕᕆᔪᒪᔪᒻᒪᕆᐊᓗᖕᓂᒃ ᒪᒃᑯᒃᑐᓂᒃ ᑲᑎᒪᔨᖃᖅᑐᒍᑦ... ᑕᐃᒪᐃᒻᒪᑦ ᐸᐅᒃᑑᑎᒃᑯᑦ ᓯᕗᓂᒃᓴᖓ ᐱᐅᔫᔭᖅᑐᖅ ᐱᓕᕆᐊᒃᓴᖏᑦ ᑲᔪᓯᔪᓐᓇᖁᑉᓗᒋᑦ... ᐸᐅᒃᑑᑎᒃᑯᑦ ᐱᓕᕆᕐᔪᐊᖏᓐᓇᕐᓂᐊᖅᑐᑦ ᐃᓄᐃᑦ ᓂᐱᖏᑦ ᐱᔫᒥᒋᔭᖏᓪᓗ ᑐᓴᖅᑕᐅᔪᓐᓇᖁᑉᓗᒋᑦ ᓇᐅᒃᑯᓗᒃᑖᖅ ᒐᕙᒪᒃᑯᑎᒍᑦ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ: ᑭᒃᑯᑦ ᐊᕐᓇᐃᑦ ᐃᓅᓯᕐᓂᒃ ᐊᔭᐅᖅᑐᐃᓯᒪᕙᑦ ᐃᓕᖕᓂᒃ ᐊᒻᒪᓗ ᖃᓄᖅ ᐃᓕᖕᓂᒃ ᐃᓕᓐᓂᐊᖅᑎᑦᑎᓯᒪᕙᑦ?
ᐅᓖᐱᑲ ᑲᓪᓗᒃ: ᓴᙱᔪᒻᒪᕆᐊᓗᖕᒥᒃ ᐊᕐᓇᕐᒥᙶᕋᒪ. ᐊᓈᓇᒐ, 89-ᓂᒃ ᐅᑭᐅᖅᑖᓵᓚᐅᖅᑐᖅ. ᖁᕕᐊᓱᐃᓐᓇᓲᖅ − ᐱᓱᒍᑎᒦᖃᑦᑕᓕᕋᓗᐊᖅᖢᓂ ᐃᓄᖕᓂᒃ ᐃᑲᔪᕋᓱᒃᑲᐅᓛᖅ. ᐊᑖᑕᖃᓚᐅᖅᖢᖓᓗ ᐱᓕᕆᔪᒪᒃᑲᐅᔪᒥᒃ. ᐃᓅᕌᓂᓚᐅᖅᓯᒪᔪᖅ 28-ᓂᒃ ᐅᑉᓗᓂᒃ ᓄᓇᒥ 81-ᓂᒃ ᐅᑭᐅᖃᓕᖅᖢᓂ. ᐃᓅᓇᓱᐊᕐᓂᕐᒥᒃ ᐊᔪᙱᓐᓂᖃᓚᐅᖅᑐᖅ. ᐊᖓᔪᖅᑳᒃᑲ ᓴᙱᔫᔾᔪᑎᒋᓯᒪᖅᑰᖅᑕᒃᑲ ᐅᑉᓗᒥᒧᑦ ᑎᑭᖦᖢᒍ.
ᓄᓇᕗᒥ ᑐᓴᒐᒃᓴᓕᕆᔨᒃᑯᑦ: ᓱᓇᓕᕆᔪᒪᒃᑲᐅᕕᑦ ᑲᒪᑎᔨᐅᓂᖅᐱᑦ ᓯᓚᑖᒍᑦ? ᓱᓇᓕᕆᖃᑦᑕᖅᐱᑦ ᓱᓇᓂᒃ ᖁᕕᐊᒋᔭᖃᖅᐱᑦ?
ᐅᓖᐱᑲ ᑲᓪᓗᒃ: ᐃᑲᔪᖅᖢᖓ ᐃᕐᖑᑕᒃᑲᓂᒃ ᐊᒻᒪᓗ ᒪᕐᕉᖕᓂᒃ ᐃᓗᓕᖃᓕᖅᑎᓪᓗᖓ. ᓯᓚᒦᒍᒪᒃᑲᐅᔪᖓᑦᑕᐅᖅ ᐃᖃᓗᒐᓱᒃᖢᖓ. ᐃᕐᖑᑕᕋ ᓄᑲᑉᐱᐊᑯᓗᒃ ᐊᕿᒡᒋᖅᓯᐅᖃᑎᒋᖃᑦᑕᕐᒥᔭᕋ. ᑐᒃᑐᒐᓱᖃᑕᐅᖃᑦᑕᕐᒥᔪᖓ ᐅᑭᐊᒃᓵᒃᑯᑦ. ᑕᒪᒃᑯᐊ ᑕᒡᕙ ᖁᕕᐊᒋᔭᒃᑲ, ᓯᓚᒦᓐᓂᖅ ᓄᓇᒦᓐᓂᕐᓗ. ᓴᐃᒪᓇᖅᑑᖃᑦᑕᖅᑐᖅ.
