ᓇᖕᒥᓂᖃᖅᑎᐅᔪᖅ ᑲᖏᖅᖠᓂᕐᒥ ᖁᕕᐊᒋᔭᐅᓂᖅᐹᖑᖃᑕᐅᔫᑉ ᓂᐅᕕᕐᕕᐅᑉ ᒪᑐᓯᓕᖅᑐᖅ ᑭᖑᓪᓕᖅᐹᒃᑯᑦ ᓂᐅᕕᕐᕕᖕᒥᓂᒃ ᐊᒻᒪᓗ ᓴᓇᖃᑦᑕᔾᔮᕈᓐᓃᖅᖢᓂ ᒫᓐᓇᐅᔪᖅ ᐱᒋᐊᕐᓗᒍ.
ᕋᓐ ᕈᑦᔅ ᓇᖕᒥᓂᖃᖅᑎᐅᖃᑕᐅᓚᐅᖅᑐᖅ ᐱᒋᐊᓕᓵᖅᑎᓪᓗᒍ ᑲᑎᕝᕕᒃ − ᓂᐅᕕᕐᕕᐊᓛᖅ ᐃᓚᖓ ᓂᕿᑖᕐᕕᐅᑉᓗᓂ ᐃᓚᖓᓗ ᐱᖁᑎᑖᕐᕕᐅᑉᓗᓂ − ᑎᓯᐱᕆ 1999-ᒥ.
ᓇᖕᒥᓂᖃᖅᑎᐅᓚᐅᖅᑐᑦ Hᐊᐅᕗᑦ ᐊᒻᒪᓗ ᔪᐃᓯ ᒍᕆᓐ, ᓵᓐ ᒥᓕ ᐊᒻᒪᓗ ᓄᓕᐊᕆᓚᐅᖅᑕᖓ ᓵᓐᑎᐅᓪ, ᐊᒻᒪᓗ ᕈᑦᔅ ᐊᒻᒪᓗ ᓄᓕᐊᕆᓚᐅᖅᑕᖓ ᒍᕋᑎ. ᐅᑭᐅᓂᒃ ᖄᖏᖅᐸᓪᓕᐊᔪᓂᒃ ᕋᓐ ᓵᓐ, ᓵᓐᑎᐅᓪ ᐊᒻᒪᓗ Hᐊᐅᕗᑦ ᓇᖕᒥᓂᖃᕈᑎᖏᓐᓂᒃ ᓂᐅᕕᖃᑦᑕᓕᓚᐅᖅᑐᖅ. ᓇᖕᒥᓂᖃᖅᑏᑦ ᓂᐅᕕᕐᕕᒃ ᒪᑐᑎᓪᓗᒍ ᐅᑯᐊᖑᓚᐅᖅᑐᑦ ᕈᑦᔅ, ᔪᐃᔅ ᒍᕆᓐ ᐊᒻᒪᓗ ᐸᓂᖓ, ᔪᑎ ᑯᓱᒐᖅ.
ᕈᑦᔅ ᐅᖃᖅᖢᓂ ᖃᐅᔨᒪᓚᐅᕋᒥᒎᖅ ᓴᓇᖃᑦᑕᕈᓐᓃᕆᐊᖃᓕᕐᓂᕐᒥᓄᑦ, ᓂᐅᕕᕐᕕᓕᕆᔨᐅᖃᑦᑕᓕᕋᒥ 40 ᐅᑭᐅᓂᖅᑲᔭᖅ, ᐸᒡᕕᒍᓱᒃᓴᕋᐃᓗᐊᓕᕋᒥᒎᖅ ᑲᒪᖃᑦᑕᕆᐊᒃᓴᖅ ᐃᓄᖕᓂᒃ.
ᐅᖃᖅᖢᓂᓗ ᐅᐱᒍᓱᑦᑎᐊᖅᑐᕉᖅ ᖃᓄᖅ ᐃᓄᐃᑦ ᕿᒃᓵᖕᓂᖃᓚᐅᕐᒪᖔᑕ ᑲᑎᕝᕕᒃ ᒪᑐᓂᐊᕐᓂᖓᓄᑦ.
“ᐱᖃᑎᖓᑦᑕᐅᖅ ᐃᓱᒪᓕᐅᕈᑎᒐᓄᑦ ᐊᒃᑐᖅᓯᓂᖃᖅᓯᒪᔪᖅ ᓄᕙᒡᔪᐊᕐᓂᖅ ᐊᒻᒪᓗ ᒪᑐᐊᖅᓯᒪᔭᕆᐊᖃᖃᑦᑕᕐᓂᖅ ᓂᐅᕕᕐᕕᖕᒥ. ᑕᖃᒋᑦᑎᐊᓕᓚᐅᕋᑉᑯ ᑕᒪᓐᓇ ᖃᐅᔨᒪᓕᖅᖢᖓᓗ ᓄᖅᑲᕆᐊᖃᓕᕐᓂᒻᓂᒃ,” ᑕᐃᒪᓐᓇ ᐅᖃᖅᖢᓂ ᕈᑦᔅ.
“ᐅᐱᒍᓱᓚᐅᖅᑐᖓ ᖃᑉᓯᑦ ᑎᑎᕋᐅᓯᖃᑦᑎᐊᓚᐅᕐᓂᖏᓐᓄᑦ ᓂᐅᕕᕐᕕᐅᑉ ᒥᒃᓵᓄᑦ. ᓱᓕᔪᒃᑯᑦ ᑕᐃᒪᓐᓇᓗᐊᖅ ᓂᐅᕕᕐᕕᒃᐳᑦ ᐱᐅᒋᔭᐅᓇᓱᒋᓚᐅᙱᒃᑲᓗᐊᕋᑉᑯ ᐊᒻᒪᓗ ᑭᖑᓂᖃᖅᑎᑕᐅᓂᐊᕋᓱᒋᓚᐅᙱᒃᑲᓗᐊᕋᑉᑯ ᑕᐃᒪᓐᓈᓗᒃ.
“ᐊᓕᐊᓇᐃᓚᐅᖅᑐᖅ ᐃᓄᐃᑦ ᖁᔭᓐᓇᒦᖃᑦᑕᖅᑎᓪᓗᒋᑦ ᑐᙵᓱᒃᑎᑦᑎᑎᓪᓗᒋᑦ. ᐊᓕᐊᓇᐃᑦᑐᐊᓘᓚᐅᖅᑐᖅ.”
ᕈᑦᔅ ᐅᖃᖅᖢᓂ ᓂᕈᐊᖅᖠᕆᐊᖃᖃᑦᑕᕐᓇᕐᒪᑦ ᑭᒃᑯᓐᓂᒃ ᐃᑲᔫᓯᐊᖅᑖᖅᑎᑦᑎᓂᐊᕐᓂᕐᒧᑦ ᓄᓇᑉᑎᓐᓂᒃ ᒥᑭᔪᒥᒃ ᓇᖕᒥᓂᖃᖅᑎᐅᑉᓗᓂ, ᑭᓯᐊᓂ ᐃᑲᔪᕆᐊᖃᕐᓇᖅᑐᖅ ᐊᖏᔪᓂᒃ ᖃᓄᐃᓕᐅᖅᑎᑦᑎᔪᓂᒃ ᑲᖏᖅᖠᓂᕐᒥ.
ᐅᖃᖅᖢᓂ ᐃᓛᓐᓂᒃᑯᑦ ᐅᐊᓗᐊᖑᓕᖃᑦᑕᖅᑐᖅ ᖃᓄᐃᓕᐅᖅᑎᑦᑎᕈᓘᔭᖅᐸᒃᑐᑦ ᑕᒪᕐᒥᒃ ᓄᓇᓕᖕᒥ ᖃᐃᖃᑦᑕᓕᕌᖓᑕ ᑐᒃᓯᕋᖅᖢᑎᒃ penny sale−ᑎᑦᑎᓂᐊᕐᓂᕐᒧᑦ ᐊᒻᒪᓗ ᐊᓯᖏᓐᓄᑦ, ᑭᓯᐊᓂ ᑐᓂᓯᔭᕆᐊᖃᕐᓇᖅᑐᖅ.
“ᐊᖏᕐᓗᓂ ᐊᑕᐅᓯᕐᒧᑦ ᐋᒃᑳᕈᒪᓐᓇᙱᒻᒪᑦ ᐊᓯᖏᓐᓄᑦ ᑕᐃᒪᐃᒻᒪᑦ ᑕᒪᕐᒥᒃ ᐊᖏᖃᑦᑕᓚᐅᖅᑕᒃᑲ ᐃᓚᐃᓐᓈᕈᒪᓐᓇᖃᑦᑕᙱᒻᒪᑦ.
“ᐊᑕᐅᓯᖅ ᐊᒃᓱᕈᕐᓇᖅᑐᒃᑰᕈᑎᒋᒐᔪᒃᑕᕋ ᓂᐅᕕᕐᕕᒃᑯᑦ ᐱᔾᔪᑎᖃᖅᑐᖅ ᓴᓇᔨᑉᑎᓐᓄᑦ, ᐱᓗᐊᖅᑐᒥ ᐅᓐᓄᒃᑯᑦ ᓴᓇᔨᐅᖃᑦᑕᖅᑐᓄᑦ. ᐅᑉᓗᒃᑯᑦ ᓴᓇᔩᑦ ᖃᓄᐃᙱᑦᑎᐊᖃᑦᑕᓚᐅᖅᑐᑦ, ᑭᓯᐊᓂ ᐅᓐᓄᒃᑯᓪᓕ ᓴᓇᔩᑦ ᐱᓇᓱᐊᕈᓯᐅᑉᓗ ᓄᙳᐊᓂ ᓴᓇᔩᑦ ᐊᒃᓱᕈᕐᓇᕐᓂᖅᐹᖑᖃᑦᑕᓚᐅᖅᑐᑦ ᓴᓇᔨᖃᑦᑎᐊᕋᓱᒃᑲᓗᐊᖅᖢᓂ.
“ᐊᖏᓂᖅᐹᖅ ᐃᖅᑲᐅᒪᖃᑦᑕᕆᐊᖃᕐᓇᖅᑐᖅ ᓇᖕᒥᓂᖃᖅᑎᐅᓂᐊᕐᓗᓂ ᑲᖏᖅᖠᓂᕐᒥ ᑐᓴᐅᒪᔭᐅᔭᕆᐊᖃᕐᓇᖅ ᐊᒻᒪᓗ ᐃᑲᔪᕆᐊᖃᖃᑦᑕᕐᓂᖅ ᖃᓄᐃᓕᐅᖅᑎᑦᑎᕙᒃᑐᓂᒃ ᐱᓕᕆᕐᔪᐊᖅᐸᒃᑐᓂᒡᓗ. ᐃᑲᔪᖃᑦᑕᖅᖢᓂ ᓄᓇᓕᖕᒥ ᐱᔪᓐᓇᕐᓂᓗᒃᑖᒃᑯᑦ, ᐅᑎᕐᕕᐅᑦᑎᐊᕐᓇᖃᑦᑕᖅᑐᖅ.
“ᐃᑲᔪᖅᑐᐃᖃᑦᑕᕆᐊᖃᕐᓇᖅᑐᖅ ᓄᓇᓕᖕᒥ.”
ᕈᑦᔅ ᐅᖃᖅᖢᓂ ᓱᓇᑐᐃᓐᓇᑦᑎᐊᕐᒥᒎᖅ ᐊᐃᑦᑖᕈᓱᖕᓂᖃᙱᑦᑐᖅ ᕿᒪᐃᓂᐊᕐᓂᕐᒥᓄᑦ ᑲᖏᖅᖠᓂᕐᒥ.
15-ᓂᒃ ᐅᑭᐅᓂᒃ Hᐊᑭᖅᑐᓂᒃ ᒥᐊᓂᖅᓯᖃᑦᑕᓚᐅᖅᓯᒪᔪᖅ ᑲᖏᖅᖠᓂᕐᒥ ᐊᒻᒪᓗ ᐊᕙᑎᓂᒃ ᐅᑭᐅᓂᒃ ᒥᑭᓂᖅᓴᓂᒃ Hᐊᑭᖅᑎᓂᒃ ᑲᒪᖃᑦᑕᓚᐅᖅᖢᓂ ᐅᖃᖅᖢᓂᓗ ᐊᓯᖏᓐᓂᒃ ᐱᙳᐊᕐᓂᐅᕙᒃᑐᓂᒃ Hᐊᑭᕐᓂᐅᑉ ᐊᓯᐊᒍᑦ ᐱᕚᓪᓕᖅᑎᑦᑎᓯᒪᔪᖃᙱᑦᑐᖅ ᓂᐅᕕᕐᕕᖕᒥᓄᑦ.
“ᖃᓄᖅ ᐊᒃᑐᖅᓯᓂᖃᖅᓯᒪᓂᖓ ᐅᐱᓐᓇᓪᓚᕆᒃᑐᖅ. ᐱᓇᓱᐊᕈᓯᕐᒥ ᑮᓇᐅᔭᓕᐅᕋᔪᓚᐅᖅᑐᖓ $30,000-ᒥᒃ $35,000-ᒧᑦ ᓂᐅᕕᐊᒃᑯᑦ, Hᐊᑭᕕᒡᔪᐊᖅᑎᓪᓗᒋᑦ ᐱᓇᓱᐊᕈᓯᐅᑉ ᓄᙳᐊᓂ ᑮᓇᐅᔭᓕᐅᕐᓂᖃᖃᑦᑕᖅᖢᖓ $75,000-ᒥᒃ.
“ᐃᓄᐃᑦ ᑕᒫᓂ ᐱᐅᒋᔭᖃᓪᓚᕆᖕᒪᑕ Hᐊᑭᕐᓂᕐᒥᒃ ᐊᒻᒪᓗ Hᐊᑭᑦᑐᓂᒃ ᑕᐅᑐᒋᐊᖅᑐᖃᑦᑕᖅᑐᑦ ᑕᐅᑐᒋᐊᖅᑐᕋᔪᒃᖢᑎᒃ ᐱᙳᐊᖅᑐᓂᒃ.
“ᓄᓇᑦᑎᐊᕚᓗᒃ ᐊᒻᒪᓗ ᓄᓇᒋᑉᓗᒍ ᐱᐅᔪᓪᓚᕆᒃ.”