ᐃᓱᒪᒃᑯᑦ ᐋᓐᓂᐊᕐᓂᖅ ᐱᔾᔪᑎᒋᑉᓗᒍ, ᐊᒥᓱᑦ ᐊᖑᑎᑦ ᐅᑭᐅᖅᑕᖅᑐᒥ ᐋᓐᓂᐊᓲᑦ ᓂᐱᖃᕐᓇᑎᒃ. ᑕᐃᒪᐃᒻᒪᑦ ᓄᓇᖃᖅᑳᖅᓯᒪᔪᑦ ᐊᖑᑎᑦ ᑲᑎᓚᐅᖅᑐᑦ ᓴᖅᑭᑎᑦᑎᓇᓱᒃᖢᑎᒃ ᖃᓄᖅᑑᕈᑎᒃᓴᒥᒃ ᐃᓄᑑᖃᑦᑕᖁᓇᒋᑦ ᐊᒻᒪᓗ ᐃᓱᒪᒃᑯᑦ ᐋᓐᓂᐊᖅᑐᑦ ᑲᒪᒋᔭᐅᔪᓐᓇᖁᑉᓗᒋᑦ ᓇᓂᓯᓇᓱᒃᖢᑎᒃ ᓴᙱᒃᑎᒍᑎᒃᓴᓂᒃ ᐃᓕᖅᑯᓯᑐᖃᑎᒍᑦ ᖃᐅᔨᒪᔭᐅᔪᒃᑯᑦ ᐃᑲᔪᕈᓐᓇᕈᒪᑉᓗᑎᒃ ᐃᖕᒥᒃᑯᓪᓗ.
ᓴᖅᑭᑎᑕᐅᓚᐅᖅᑐᑦ ᑲᑐᔾᔨᖃᑎᒌᑦ 2018-ᒥ, ᖃᒪᓂ’ᑐᐊᕐᒥ ᐊᖑᑎᑦ ᑲᑐᔾᔨᖃᑎᒌᑦ ᓴᖅᑭᑎᑕᐅᓚᐅᖅᑐᑦ ᖁᕝᕙᖅᑎᕆᔪᒪᓂᕐᒧᑦ ᐊᖑᑎᓂᒃ ᐃᒃᐱᖕᓂᒃᑯᑦ ᖃᓄᐃᑎᑦᑐᓐᓇᖁᑉᓗᒋᑦ. ᑕᐃᒪᐃᓕᐅᕐᓂᐊᖅᑎᓪᓗᒋᑦ, ᐅᖃᖃᑎᒌᖃᑦᑕᖅᑐᑦ ᐱᑦᑎᐊᕈᑎᓂᒃᑯᑦ ᐅᖃᖃᑎᒌᒍᓐᓇᖅᓯᓂᕐᒥᒃ, ᐃᓕᓐᓂᐊᖅᑎᑦᑎᕙᒃᑐᑦ ᐃᓕᖅᑯᓯᑐᖃᑎᒍᑦ ᖃᐅᔨᒪᓂᕆᔭᐅᔪᓂᒃ ᒪᒃᑯᒃᑐᓄᑦ ᐊᒻᒪᓗ ᓄᓇᒧᙵᐅᔾᔪᑎᒃᓴᖃᙱᑦᑐᑦ ᓄᓇᒧᙵᐅᔾᔭᐅᕙᒃᖢᑎᒃ.
“ᑕᒪᕐᒥᒃ ᒪᒃᑯᒃᑐᑦ ᐊᖑᑎᑦ ᐊᖑᓇᓱᒍᑎᓂᒃ ᐱᖁᑎᖃᕈᓐᓇᙱᒻᒪᑕ ᐊᒻᒪᓗ ᐊᖑᑎᓂᒃ ᐃᑲᔪᕋᓱᖕᓂᕐᒧᑦ ᑎᒥᖁᑎᒋᔭᐅᑎᓪᓗᑕ ᐊᖑᓇᓱᒍᔾᔨᔪᓐᓇᖃᑦᑕᖅᓯᒪᔪᒍᑦ ᐊᒻᒪᓗ ᓂᕿᑖᖅᑎᑦᑎᕙᒃᖢᑕ ᐃᓚᖏᓐᓂᒃ,” ᑕᐃᒪᓐᓇ ᑐᑭᓯᑎᑦᑎᒋᐊᖅᖢᓂ ᖃᒪᓂ’ᑐᐊᕐᒥ ᐊᖑᑎᑦ ᑲᑐᔾᔨᖃᑎᒌᒃᑯᖏᑦᑕ ᑲᑎᒪᔨᖓ Hᐃᐅᕈᑦ ᐳᑐᒥᕋᖅᑐᖅ. “ᓄᓇᒧᙵᐅᔾᔨᖃᑦᑕᖅᓯᒪᖕᒥᔪᒍᑦ ᐅᐃᒡᒐᖅᓯᒪᔪᓂᒃ ᐊᖑᓇᓱᒍᑎᖃᙱᒃᑳᖓᑕ. ᑕᐃᒪᓐᓇ ᑲᑎᒪᔨᕗᑦ ᐃᑲᔪᕈᓐᓇᖃᑦᑕᖅᑐᑦ ᐃᑲᔪᖅᑕᐅᔭᕆᐊᓕᖕᓂᒃᑕᐅᖅ.”
ᑐᕌᒐᕆᔭᐅᔪᖅ, ᒪᓕᒃᖢᒍ ᐳᑐᒥᕋᖅᑑᑉ ᐅᖃᐅᓯᖓ, ᓇᓗᓇᐃᖅᓯᔪᓐᓇᕐᓂᖅ ᖃᓄᖅ ᓴᙱᓂᖏᓐᓂᒃ ᑕᑯᑎᑦᑎᔪᓐᓇᕈᒪᓂᕐᒧᑦ ᐃᓕᖅᑯᓯᑐᖃᖅᐳᑦ ᐊᓯᔾᔨᖅᓯᒪᓪᓚᕆᒃᑎᓪᓗᒍ ᐅᑭᐅᖅᑕᖅᑐᒥ − ᐊᒻᒪᓗ ᐱᒋᐊᕐᕕᐅᔪᓐᓇᖅᑐᖅ ᑕᑯᒋᐊᕐᓂᖅ ᓄᓇᑉᑎᓐᓂᒃ ᐊᒻᒪᓗ ᐃᓚᒌᖕᓂᒃ.
“ᐊᒥᓲᔪᒍᑦ ᐃᓐᓇᐅᓂᖅᓴᐅᔪᒍᑦ, ᑐᑭᓯᐅᒪᒐᑉᑕ ᖃᓄᖅ ᓄᓇ ᐊᑐᐃᓐᓇᕈᖅᑎᑦᑎᔪᓐᓇᕐᒪᖓᑦ ᐊᒻᒪᓗ ᑕᒪᓐᓇ ᐃᓚᐅᖃᑕᐅᑎᑦᑎᔪᖅ ᐃᓕᖅᑯᓯᑐᖃᑎᒍᑦ ᓄᓇᒥᒃ ᐊᑐᕈᓐᓇᕐᓂᕐᒧᑦ ᐊᒻᒪᓗ ᖃᓄᐃᓕᐅᕈᑕᐅᔪᓐᓇᖅᑐᓂᒃ ᐊᑐᕈᓐᓇᕐᓂᕐᒧᑦ,” ᑕᐃᒪᓐᓇ ᐅᖃᖅᖢᓂ. “ᐃᓕᖅᑯᓯᑐᖃᖅᐳᑦ ᐊᒻᒪᓗ ᐱᒻᒪᕆᐅᑎᑕᖅᐳᑦ ᐊᓯᔾᔨᖅᐸᓪᓕᐊᖕᒪᑕ ᑭᓯᐊᓂ ᖃᐅᔨᒪᔪᒍᑦᑕᐅᖅ ᐊᒻᒪᓗ ᑐᑭᓯᐅᒪᑉᓗᑕ ᐃᓚᑉᑕ ᐅᑉᓗᒥᒧᑦ ᑎᑭᐅᑎᓯᒪᖕᒫᑎᒍᑦ ... ᑎᑎᕋᕐᕕᒃᐳᑦ ᓄᓇᒥᑦᑐᖅ. ᖃᐅᔨᒪᓂᕆᔭᐅᔪᑦ ᑐᓂᕐᕈᑎᒋᔪᒪᔭᖅᐳᑦ ᑕᐃᑉᑯᓄᙵ ᑕᐃᒪᐃᑦᑐᓕᕆᓯᒪᙱᑦᑐᓄᑦ ᐊᒻᒪᓗ ᑕᐃᒪᐃᑦᑐᓕᕆᔪᒪᔪᓄᑦ.”
ᑲᑐᔾᔨᖃᑎᒌᑦ ᓴᖅᑭᑎᑕᐅᓚᐅᕋᓗᐊᖅᑎᓪᓗᒋᑦ ᐃᑲᔪᕈᒪᓂᕐᒧᑦ ᐊᖑᑎᓂᒃ ᐃᖢᐊᖏᓕᐅᕈᑎᓕᖕᓂᒃ ᐃᖅᑲᖅᑐᐃᔪᓕᕆᓂᒃᑯᑦ, ᐃᑲᔪᖅᑐᖅᑕᐅᓯᒪᑉᓗᑕ ᐃᒪᓐᓈᖅᑐᖅᑕᐅᓯᒪᑉᓗᑕᓗ ᐃᓵᒃᓯᒪᒋᑦ ᐃᓅᓯᕐᒧᑦ ᑲᑎᒪᔨᓄᑦ, ᐃᑲᔫᑏᑦ ᐱᕈᖅᐸᓪᓕᐊᓯᒪᔪᑦ ᐅᑭᐅᓂᒃ ᖄᖏᖅᓯᒪᔪᓂᒃ ᐃᓚᐅᖃᑕᐅᑎᑦᑎᔪᓐᓇᖅᓯᓂᕐᒧᑦ ᑭᒃᑯᑐᐃᓐᓇᕐᓂᒃ ᐊᖑᑎᓂᒃ ᓄᓇᓕᖕᒥ ᐃᑲᔪᖅᑕᐅᔪᒪᔪᓂᒃ. ᑲᑐᔾᔨᖃᑎᒌᒃᑯᑦ ᐊᑎᓕᐅᖅᑕᐅᖃᑕᐅᓯᒪᓕᖅᑐᑦ ᑎᒥᖁᑎᒋᔭᐅᔪᑦ ᐊᑎᓕᐅᖅᑕᐃᕝᕕᖓᒍᑦ ᐊᕐᕕᓂᓕᖕᓂᒃ ᑲᑎᒪᔨᖃᖅᖢᑎᒃ, ᐅᑯᐊᖑᔪᑦ ᐳᑐᒥᕋᖅᑐᖅ, ᐱᓱ ᖁᐃᓇᖕᓇᖅ, ᓴᕐᓕ ᑕᐅᑐᐊᕐᔪᒃ, ᓛᕐᔅ ᖃᖅᑲᖅ, ᔭᐃᒥ ᑲᑕᓗᒃ ᐊᒻᒪᓗ ᔭᔅᑕᓐ ᔨᓐᑭᓐᔅ, ᑲᑎᒪᖃᑦᑕᖅᑐᑦ ᖃᑉᓰᑲᓪᓚᒃᖢᑎᒃ ᑕᖅᑭᐅᑉ ᐃᓗᐊᓂ.
“ᑲᑎᒪᔩᑦ ᐱᒋᐊᓕᓵᖅᑎᓪᓗᒋᑦ, ᐊᐅᓚᑦᑎᔨᑦᑎᐊᕚᓗᖕᒥᒃ ᐱᓕᕆᔨᖃᓚᐅᖅᑐᒍᑦ ᐊᑎᖓ ᑭᐅᕆᓐ ᒪᑲᐅᕐᑦᓂ ᓄᓇᕗᒥ ᐃᖅᑲᖅᑐᐃᔪᓕᕆᔨᒃᑯᓐᓂᕐᒥᐅᑕᐅᓚᐅᖅᑐᖅ,” ᑕᐃᒪᓐᓇ ᐅᖃᖅᖢᓂ ᐳᑐᒥᕋᖅᑐᖅ. “ᑲᑎᒪᑎᑦᑎᖃᑦᑕᓚᐅᖅᑐᖅ ᑕᖅᑭᑕᒫᒃᑯᑦ ᐅᖃᓘᑎᒃᑯᑦ ᑲᑎᒪᖃᑎᒋᑉᓗᒋᑦ ᐊᖑᑎᑦ ᑲᑎᒪᔨᖏᑦ ᓄᓇᕗᒥ. ᐱᔪᓐᓇᖅᓯᖕᒥᒍᑉᑕ ᑕᐃᒪᑐᖅ ᑕᒪᓐᓇ ᐅᑎᖅᑎᒃᑲᓐᓂᕈᓐᓇᕈᒫᖅᐸᖅᐳᑦ ᐃᓱᒪᒃᓴᖅᓯᐅᑦᑎᐊᖅᑐᐊᓘᖃᑦᑕᓚᐅᕋᑉᑕ ᐃᓅᖃᑎᒌᒃᖢᑕ. ᐊᖑᑎᑦ ᑲᑐᔾᔨᖃᑎᒋᒃᑯᖏᑦ ᐃᑲᔪᒃᑲᓐᓂᕈᓐᓇᖅᑑᔭᕐᒪᑕ, ᓲᕐᓗ ᐊᕐᓇᐃᑦ ᑲᑐᔾᔨᖃᑎᒌᒃᑯᖏᑦᑎᑐᑦ, ᐸᐅᒃᑑᑎᒃᑯᑎᑐᑦ ᑲᓇᑕᒥ.”
ᑲᑐᔾᔨᖃᑎᒌᒃᑯᑦ ᐱᓕᕆᐊᕆᕙᒃᑕᖏᑦ ᐅᔾᔨᕆᔭᐅᓕᓚᐅᖅᑐᑦ ᖃᒪᓂ’ᑐᐊᑉ ᒪᓕᒐᓕᐅᖅᑎᖓᓄᑦ ᑯᕆᒃ ᓴᒪᐃᓕᒃᒧᑦ, ᖁᔭᓐᓇᒦᓚᐅᖅᑐᖅ ᐱᓕᕆᐊᖏᓐᓂᒃ ᒪᓕᒐᓕᐅᕐᕕᒃᑯᑦ ᒫᑦᓯ 10-ᒥ.
ᓯᒪᐃᓚᒃ ᐅᖃᖅᖢᓂ ᑲᑎᒪᔩᑦ ᐅᑉᓗᒃᑯᑦ ᓴᓇᕝᕕᖃᓗᒃᑖᕐᒪᑕ ᐊᒻᒪᓗ ᑲᑐᔾᔨᖃᑎᒌᒃᑯᓐᓂᒃ ᐊᐅᓚᑦᑎᑉᓗᑎᒃ ᐅᓐᓄᒃᑯᑦ ᐱᓇᓱᐊᕈᓯᐅᑉᓗ ᓄᙳᐊᓂ.
ᐅᖃᐅᓯᖃᓚᐅᕐᒥᔪᖅ ᖃᑉᓯᑲᓪᓚᖕᓂᒃ ᐱᓕᕆᐊᕆᕙᒃᑕᖏᓐᓂᒃ, ᓲᕐᓗ ᖁᓕᓂᒃ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᑐᓂᒃ, ᐊᒃᓱᕈᕐᓇᖅᑐᒃᑰᖃᑦᑕᖅᑐᓂᒡᓗ ᓄᑕᖅᑲᓂᒃ ᓂᕈᐊᖅᑕᐅᓚᐅᖅᑐᓂᒃ ᐳᑭᖅᑕᓕᖕᓄᑦ, ᐅᐃᒐᖅᓯᒪᔪᓂᒃ, ᐊᒻᒪᓗ ᐊᖑᑎᓂᒃ ᐊᖑᓇᓱᒍᑎᓂᒃ ᐱᑕᖃᙱᑦᑐᓂᒃ ᓄᓇᒧᙵᐅᔾᔨᓚᐅᕐᓂᖏᓐᓄᑦ.
“ᐅᖃᓪᓚᒋᐊᖅᑐᖅᑐᒥᒃ ᑐᙵᓱᒃᑎᑦᑎᓚᐅᕐᒥᔪᑦ ᐃᓚᒌᑦ ᐱᑦᑎᐊᕈᑎᖃᑦᑕᕆᐊᖃᕐᓂᖏᑦᑕ ᒥᒃᓴᓄᑦ, ᒪᓕᒐᓕᕆᔨᒥᒃ ᐊᓕᓐ ᕆᒍᒥᒃ,” ᑕᐃᒪᓐᓇ ᐅᖃᖅᖢᓂ ᓯᒪᐃᓚᒃ. “ᑕᐃᒪᙵᓂ ᑲᑎᒪᔩᑦ ᓴᖅᑭᑎᑕᐅᓚᐅᖅᑳᖅᑎᓪᓗᒋᑦ ᐃᑲᔪᕋᓱᒃᓯᒪᓕᖅᑎᓪᓗᒋᓪᓗ ᐃᓄᖕᓂᒃ, ᐊᑕᐅᓯᖅ ᑲᒪᒋᔭᐅᖏᓐᓇᖅᑐᖅ ᐃᓚᐅᖃᑕᐅᑎᑕᐅᖏᓐᓇᖅᑐᖅ ᐱᓕᕆᐊᖏᓐᓄᑦ. ᐱᒻᒪᕆᐅᓂᖓ ᐃᓱᒪᒃᑯᑦ ᖃᓄᐃᙱᑦᑕᕆᐊᖃᕐᓂᕐᒧᑦ; ᖃᓄᐃᙱᒻᒪᓪᓗ ᐃᑲᔪᖅᑕᐅᔪᒪᓂᕋᕐᓗᓂ.
ᐃᓱᓕᑦᑎᔭᕆᐊᖃᕋᑉᑕ ᐃᓱᒪᒋᔭᐅᒐᔪᒃᑐᒥᒃ ᐊᖑᑎᑦ ᓂᑉᓕᖅᑕᐃᓕᔭᕆᐊᖃᕐᓂᖏᓐᓄᑦ; ᐊᖑᑎᓪᓗ ᐃᓱᒫᓘᑎᒥᓂᒃ ᐃᓗᒥᐅᑕᖃᑐᐃᓐᓇᕆᐊᖃᕐᓂᖏᓐᓄᑦ. ᑕᒪᓐᓇ ᐃᑲᔫᑕᐅᙱᒻᒪᑦ.”
ᐳᑐᒥᕋᖅᑐᖅ ᐅᖃᖅᖢᓂ ᑕᐃᑉᑯᐊ ᐃᑲᔪᖅᑕᐅᔪᒪᔪᑦ ᐃᓚᐅᖃᑕᐅᓕᕈᓐᓇᖅᑐᑦ ᖃᒪᓂ’ᑐᐊᑉ ᐊᖑᑎᑦ ᑲᑐᔾᔨᖃᑎᒌᒃᑯᖏᑦᑕ Facebook−ᖓᓂᒃ, ᐅᕝᕙᓘᓐᓃᑦ ᐅᐸᒍᑎᓗᓂ ᑲᑎᒪᔨᒧᑦ, ᓄᓇᒋᔭᖓ ᐊᖏᓗᐊᙱᒻᒪᑦ.
“ᐃᓱᒪᒃᑯᑦ ᖃᓄᐃᙱᑦᑕᕆᐊᖃᕐᓂᖅ ᐊᒻᒪᓗ ᐃᓅᑦᑎᐊᕈᒪᓂᖅ ᑐᕌᒐᕆᔭᐅᔪᓄᑦ ᐃᓚᐅᖃᑕᐅᔪᑦ ᑖᑉᑯᓂᙵ ᑲᑎᒪᔨᐅᔪᓂᒃ,” ᑕᐃᒪᓐᓇ ᐅᖃᖅᖢᓂ. “ᐱᒻᒪᕆᐊᓗᖕᓂᒃ ᐅᖃᐅᓯᖃᐃᓐᓇᖃᑦᑕᙱᑦᑐᒃᓴᐅᔪᒍᑦ, ᑭᓯᐊᓂ ᐃᑲᔪᖅᑑᑎᕙᒃᑐᒍᑦ ᑕᑯᑎᑦᑎᓂᒃᑯᑦ ᐊᒻᒪᓗ ᐅᕝᕙᓘᓐᓃᑦ ᐊᑐᖅᑕᐅᔪᓐᓇᖅᑐᓂᒃ ᐊᑐᐃᓐᓇᐅᑎᑦᑎᕙᒃᑐᒍᑦ ᓱᖏᐅᑎᔪᓐᓇᕐᓂᕐᒧᑦ ᐃᓄᐃᑦ ᐃᓱᒪᒃᑯᑦ ᖃᓄᐃᙱᔾᔪᑎᒃᓴᖏᓐᓂᒃ ᐊᒻᒪᓗ ᓇᓂᓯᓇᓱᒋᐊᖃᖅᑐᒍᑦ ᖃᓄᖅ ᐱᕈᖃᑎᒌᒍᓐᓇᕐᒪᖔᑉᑕ.
“ᐊᑐᓂ ᐊᖑᑎᑦ ᓇᐅᒃᑰᖅᓯᒪᖕᒪᑕ ᐊᒻᒪᓗ ᐱᔭᕆᐊᖃᖅᑕᖏᑦ ᐊᔾᔨᒌᙱᑦᑑᑕᐅᖕᒪᑕ,” ᑕᐃᒪᓐᓇ ᐅᖃᒃᑲᓐᓂᖅᖢᓂ. “ᓴᙱᓂᖅᑖᖃᑦᑕᖅᑐᒍᑦ ᐊᔾᔨᒌᙱᑦᑑᑕᐅᔪᒃᑯᑦ ᐊᒻᒪᓗ ᐃᓕᑦᑎᕙᒃᑐᒍᑦ ᐃᓅᖃᑎᑉᑎᓐᓂᒃ. ᓄᓇᑐᐃᓐᓇᖅᖢᑕ, ᓴᙱᓂᖅᐳᑦ ᐱᔭᕆᐊᖃᖅᑕᖅᐳᓪᓗ ᓴᖅᑭᓲᑦ ᐃᓗᐃᑦᑐᒃᑯᕐᓚᒃ.”
ᓯᕗᓂᒃᓴᒥ ᐱᓕᕆᑎᑦᑎᖃᑦᑕᕐᓂᐊᖅᑐᒃᓴᐅᔪᑦ ᐃᓕᖅᑯᓯᑐᖃᑎᒍᑦ ᐃᓕᓐᓂᐊᖅᑎᑦᑎᓂᕐᒧᑦ ᓲᕐᓗ ᓂᒃᓯᓕᐅᕈᓐᓇᖅᓯᓂᕐᒧᑦ, ᑲᑭᕙᓕᐅᕈᓐᓇᖅᓯᓂᕐᒧᑦ ᐊᒻᒪᓗ ᐸᓇᓕᐅᕈᓐᓇᖅᓯᓂᕐᒧᑦ, ᑕᐃᒪᓐᓇ ᐅᖃᖅᖢᓂ.
“ᕿᓃᓐᓇᖃᑦᑕᖅᑐᒍᑦ ᖃᓄᖅ ᑲᑎᒪᔨᖁᑎᕗᑦ ᓈᒻᒪᒋᔭᐅᒃᑲᓐᓂᕋᔭᕐᒪᖔᑕ ᐊᑑᑎᖃᕐᓂᖅᓴᐅᔪᓐᓇᕋᔭᕐᒪᖔᑕ ᓄᓇᑉᑎᓐᓂ,” ᑕᐃᒪᓐᓇ ᐅᖃᖅᖢᓂ ᐳᑐᒥᕋᖅᑐᖅ. “ᒫᓐᓇᐅᔪᖅ ᐸᕐᓇᒃᑐᒍᑦ ᑲᑎᒪᖃᑎᖃᕈᒪᑉᓗᑕ ᒪᕐᕉᒃᑲᓐᓂᕐᓂᒃ ᑎᒥᐅᔪᓂᒃ ᓄᓇᑉᑎᓐᓂᒃ ᖃᐅᔨᓇᓱᒡᓗᑕ ᖃᓄᖅ ᐱᓕᕆᖃᑎᒌᒃᑲᓐᓂᕈᓐᓇᕋᔭᕐᒪᖔᑉᑕ ᐊᒻᒪᓗ ᐊᑑᑎᖃᕐᓂᖅᓴᐅᓕᕈᓐᓇᖁᑉᓗᑕ, ᐊᒻᒪᓗ ᑕᒪᓐᓇ ᐅᕙᑉᑎᓐᓄᑦ ᐊᓕᐊᓇᐃᑦᑐᐊᓗᒃ.”