ᖃᒪᓂ’ᑐᐊᕐᒥ ᐊᖑᓇᓱᒃᑎᒃᑯᑦ ᑲᑎᒪᔨᖏᑦ ᐸᕐᓇᐃᔪᑦ ᓯᕗᓪᓕᖅᐹᒃᑯᑦ ᐊᕐᕙᒐᓱᖕᓂᐊᓂᕐᒧᑦ ᐊᐅᔭᖅ.
“ᐱᒋᐊᖅᑎᑦᑎᔪᒪᒐᑉᑕ ᐊᕐᕙᒐᓱᒍᓐᓇᕐᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᕕᓕᐱ ᐳᑐᒥᕋᖅᑐᖅ, ᑲᑎᒪᔨᐅᖃᑕᐅᔪᖅ ᖃᒪᓂ’ᑐᐊᕐᒥ ᐊᖑᓇᓱᒃᑎᒃᑯᓐᓄᑦ ᑎᒃᑯᐊᖅᑕᐅᓯᒪᑉᓗᓂ ᑲᒪᔨᐅᓂᐊᕐᓂᕐᒧᑦ ᖃᒪᓂ’ᑐᐊᕐᒥ ᐊᕐᕙᒐᓱᖕᓂᕐᒧᑦ ᑲᒪᒋᔭᐅᓂᐊᖅᑐᓂᒃ, ᐅᖃᒃᑲᓐᓂᖅᖢᓂᓗ, “ᑕᒪᓐᓇ ᑲᔪᓰᓐᓇᕐᒪᑦ.”
ᖃᒪᓂ’ᑐᐊᖅ ᓄᓇᕗᒥ ᓄᓇᖁᑎᒋᔭᐅᔪᑑᑎᓪᓗᒍ ᓄᓇᓪᓚᑦᑖᕐᒥ ᓄᓇᓕᑑᖕᒪᑦ ᐊᕐᕙᒐᓱᒃᓯᒪᙱᑦᑐᓂᒃ.
“ᓯᕗᓪᓕᖅᐹᑦᑎᐊᕐᒥ ᑕᐃᒪᐃᓕᐅᕋᓱᒃᑐᒍᑦ ᓄᓇᕗᒥ ᐊᕐᕙᒐᓱᖃᑦᑕᓕᓚᐅᖅᓯᒪᑎᓪᓗᒋᑦ,” ᑕᐃᒪᓐᓇ ᐅᖃᖅᖢᓂ ᐳᑐᒥᕋᖅᑐᖅ.
ᐸᕐᓇᐃᓚᐅᖅᓯᒪᔫᒐᓗᐊᑦ ᐅᐱᕐᖔᖑᓚᐅᖅᓯᒪᔪᖅ, ᑭᓯᐊᓂ ᓄᕙᒡᔪᐊᕐᓂᖅᑕᖃᓕᓚᐅᖅᑎᓪᓗᒍ ᑲᔪᓯᓚᐅᙱᒻᒪᑦ, ᑕᐃᒪᓐᓇ ᐅᖃᖅᖢᓂ ᐳᑐᒥᕋᖅᑐᖅ.
“ᐊᓯᔾᔨᓚᐅᖅᑐᖅ, ᐊᑯᓂᕈᔫᒐᓗᐊᖅ, ᑲᑎᒪᒐᔪᒃᓯᓚᐅᕋᑉᑕ. ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓖᑦ ᖃᓱᒋᐊᖅᑕᐅᖕᒪᑕ, ᐊᔭᐅᖅᑐᐃᒃᑲᓐᓂᓕᓚᐅᖅᑐᒍᑦ ᐊᖑᓇᓱᒃᑎᒃᑯᑦ ᑲᑎᒪᔨᖏᓪᓗ.”
ᐋᓐᓂᐊᖃᙱᑦᑐᓕᕆᓂᒃᑯᑦ ᒪᓕᒃᑕᐅᔭᕆᐊᓖᑦ ᑕᐃᒪᐅᑎᓪᓗᒋᑦ ᓄᓇᕗᒥ ᖃᓱᒋᐊᖅᑕᐅᓯᒪᔪᑦ, ᑭᕙᓪᓕᕐᒥ ᐆᒪᔪᓕᕆᔨᒃᑯᑦ ᑲᑎᒪᔨᖏᑦ ᐅᖃᐅᔾᔨᓯᒪᓕᓚᐅᖅᑐᑦ ᑲᔪᓯᒋᐊᕈᓐᓇᕐᓂᑉᑎᓐᓄᑦ ᐸᕐᓇᐅᑎᒃᑯᑦ ᐊᕐᕙᒐᓱᒍᓐᓇᕐᓂᕐᒧᑦ.
“ᖃᐅᔨᒪᓚᐅᙱᑦᑐᒍᑦ ᑲᔪᓯᓂᐊᕐᒪᖔᑦ ᑭᓯᐊᓂ ᐊᖏᖅᑕᐅᑐᐊᕋᑉᑕ ᑭᕙᓪᓕᕐᒥ ᑲᑎᒪᔨᒃᑯᓐᓄᑦ, ᐱᓕᕆᓪᓚᕆᓕᓚᐅᖅᑐᒍᑦ, ᑮᓇᐅᔾᔭᒃᓴᕋᓱᓕᖅᖢᑕ, ᐸᕐᓇᓕᖅᖢᑕᓗ,” ᑕᐃᒪᓐᓇ ᐅᖃᖅᖢᓂ. “ᐱᓕᕆᕐᔪᐊᕐᓇᖅᑐᖅ ᐱᒋᐊᓕᓵᖅᖢᑕ ᑭᓯᐊᓂ ᐅᐱᓐᓇᖅᑐᖅ ᓄᓇᓪᓚᑦᑖᕐᒥ ᓄᓇᖁᑎᓖᑦ ᑕᐃᒪᐃᑦᑐᓕᕆᓇᓱᖕᒪᑕ.
“ᑕᒪᓐᓇ ᓯᕗᓪᓕᖅᐹᓪᓚᕆᒃ ᖃᒪᓂ’ᑐᐊᕐᒥᐅᑕᓄᑦ.”