Skip to content

ᐊᖏᖃᑎᒌᖕᓂᖅ ᐊᖏᖃᑎᒌᔾᔮᙱᓐᓂᕐᒧᑦ

ᖃᐅᔨᓴᕈᑕᐅᖃᑦᑕᖅᓯᒪᔪᑦ ᐊᒻᒪᓗ ᐃᓕᖅᑯᓯᑐᖃᑎᒍᑦ ᐃᓄᐃᑦ ᖃᐅᔨᒪᔭᑐᖃᖏᑦ ᒪᓕᒍᑎᔪᓐᓃᕐᒥᔫᒃ ᓴᖅᑭᑎᑕᐅᖅᑳᖅᑎᓪᓗᒍ ᑎᑎᕋᖅᑕᐅᕙᓪᓕᐊᔪᖅ ᐊᐅᓚᑦᑎᓂᕐᒧᑦ ᐸᕐᓇᐅᑎ ᓇᓄᐃᑦ ᒥᒃᓵᓄᑦ ᓴᖅᑭᑎᑦᑎᔪᑦ ᓄᓇᕗᑦ ᒐᕙᒪᒃᑯᖏᑦ ᑕᒡᕙᓂ ᑕᖅᑭᖅ ᐱᒋᐊᓕᓵᖅᑎᓪᓗᒍ.

Gabriel Nirlungayuk of Rankin Inlet challenges science to explain why predictions for the Western Hudson Bay and Baffin Bay polar bear populations were so wrong in Rankin Inlet on Nov. 23, 2018. Darrell Greer/NNSL photo
Gabriel Nirlungayuk of Rankin Inlet challenges science to explain why predictions for the Western Hudson Bay and Baffin Bay polar bear populations were so wrong in Rankin Inlet on Nov. 23, 2018. Darrell Greer/NNSL photo

ᐸᕐᓇᐅᑎ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᐊᑐᖁᔨᓯᒪᔪᖅ ᓇᓄᕐᓂᒃ ᐊᐅᓚᑦᑎᓂᒃᑯᑦ, ᐅᖃᖅᓯᒪᑉᓗᓂ ᓇᓄᐃᒡᒎᖅ ᓱᖏᐅᑎᕙᓪᓕᐊᖕᒪᑕ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪᓗ ᐊᒥᓱᙳᖅᐸᓪᓕᐊᓂᖏᑦ ᐅᓗᕆᐊᓇᖅᓯᒍᑕᐅᑉᓗᑎᒃ ᐃᓄᖕᓄᑦ.
ᒪᕐᕉᒃ ᐃᓅᔪᓐᓃᓚᐅᖅᑑᒃ ᑭᕙᓪᓕᕐᒥ ᐅᑭᐅᖅ – ᐃᐅᕆᓐ ᒋᐊᓐᔅ ᐊᕐᕕᐊᕐᒥᐅᑕᖅ ᐊᒻᒪᓗ ᑎᐅᕈᓪ ᖃᐅᓐᓇᖅ ᓇᐅᔮᕐᒥᐅᑕᖅ – ᑕᐃᒪᐃᑦᑐᖃᕆᐅᖅᑐᖅ ᓇᓄᕐᒧᑦ ᐅᒋᐊᖅᑕᐅᓂᒃᑯᑦ ᐃᓅᔪᓐᓃᖅᑐᓂᒃ 18 ᐅᑭᐅᑦ ᐃᓗᐊᓂ.
ᐃᓄᐃᑦ ᐅᖃᖃᑦᑕᖅᑐᑦ ᓇᓄᐃᑦ ᐊᒥᓱᙳᖅᐸᓪᓕᐊᓂᖏᓐᓄᑦ ᓇᓄᖃᕐᕕᐅᔪᓂᒃ (9 ᓇᓄᖃᕐᕖᑦ 13-ᖑᔪᓂᒃ), ᖃᐅᔨᓴᖅᑏᑦ ᐅᖃᖅᓯᒪᑉᓗᑎᒃ ᐊᑕᐅᓰᓐᓇᕉᖅ ᓇᓄᖃᕐᕕᐅᔪᖅ ᐊᒥᓱᙳᖅᐸᓪᓕᐊᕝᕕᐅᔪᖅ.
ᒋᐳᕆᐅᓪ ᓂᕐᓗᖓᔪᖅ ᐆᒪᔪᓕᕆᔨᒃᑯᓐᓄᑦ ᓄᓇᕗᑦ ᑐᙵᕕᒃᑯᑦ ᑎᒥᖓᓂ ᐊᖓᔪᖅᑳᖑᓚᐅᖅᑐᖅ, ᐅᖃᖅᖢᓂ ᐊᒥᓲᓂᖅᓴᒡᒎᖅ ᐃᓄᐃᑦ ᐃᖢᐊᖏᓕᐅᕈᑎᖃᙱᑦᑐᑦ ᓇᓐᓄᒍᑕᐅᕙᒃᑐᓂᒃ ᑭᓯᐊᓂ ᓈᒻᒪᒃᓴᙱᑦᑐᑦ ᒪᓕᒐᕐᒥᒃ ᐊᕐᓇᓪᓗᐃᑦ ᐊᖑᓴᓪᐃᓪᓗ ᒥᒃᓵᓄᑦ ᐃᒪᓐᓇ ᐅᖃᖅᓯᒪᔪᒥᒃ ᒪᕐᕉᒎᖅ ᐱᖓᓲᔪᓂᒃ ᓇᓐᓄᒃᑕᐅᔪᓂᒃ ᐊᖑᓴᓪᓘᔭᕆᐊᓖᒃ. ᓄᓇᓖᑦ ᐃᓚᖓᒍᑦ ᖃᓄᐃᓕᔭᐅᖃᑦᑕᖅᓯᒪᔪᑦ ᓇᓐᓄᒃᓯᒪᓂᕐᒧᑦ ᐊᒥᓲᓗᐊᖅᑐᓂᒃ ᐊᕐᓇᓪᓗᕐᓂᒃ, ᑕᐃᒪᓐᓇ ᐅᖃᖅᖢᓂ.
"ᐊᕐᓇᓪᓗᕐᒥᒃ ᓇᓐᓄᒃᑐᖃᖅᑎᓪᓗᒍ ᐅᖓᑕᐅᔾᔨᓂᒃᑯᑦ – ᐅᒃᐱᕈᓱᒃᑐᖓ 1.5 ᓇᓐᓄᒍᑎᒃᑯᑦ ᐅᖓᑕᐅᔾᔨᔪᖃᕌᖓᑦ – ᓄᓇᓕᒃ ᐊᑭᓕᒐᒃᓴᖃᓕᖅᖢᓂ ᐊᒻᒪᓗ ᓇᓐᓄᒍᑎᖏᑦ ᓇᑲᑕᐅᕙᒃᖢᑎᒃ ᐅᑭᐅᖑᓂᐊᖅᑐᒃᑯᑦ," ᓂᕐᓗᖓᔪᖅ ᑕᐃᒪᓐᓇ ᐅᖃᖅᖢᓂ. "ᓄᓇᕗᒥ ᑕᐃᒪᐃᓕᐅᖅᑐᑑᕙᒃᑐᑦ ᐊᓯᖏᑦ ᓄᓇᓖᑦ ᑕᐃᒪᐃᓕᐅᖅᐸᙱᖦᖢᑎᒃ.
ᓂᕐᓗᖓᔪᖅ ᐅᖃᖅᖢᓂ ᓄᓇᓖᒡᒎᖅ ᓂᐅᕕᐊᒃᓴᖃᕈᒪᓯᒪᔪᑦ ᓇᓄᕋᕐᓂᒃ ᐊᒻᒪᓗ ᑕᑯᑎᑦᑎᔪᒪᓯᒪᑎᓪᓗᒋᑦ ᓄᓇᕐᔪᐊᕐᒥ ᓇᓄᐃᑦ ᒥᒃᓵᓄᑦ ᐊᐅᓚᑦᑎᓂᒃᑯᑦ ᐸᕐᓇᐅᑎᒥᒃ ᓴᙱᒃᑎᑉᐹᓪᓕᕈᑕᐅᔪᖅ ᖃᓄᐃᓕᒋᐊᕈᒪᓂᕐᒧᑦ.
"ᒐᕙᒪᒃᑯᑦ ᐱᓕᕆᐊᖏᑦᑎᒍᑦ ᖃᐅᔨᓴᕐᓂᖃᖃᑦᑕᖅᑎᓪᓗᒋᑦ ᓇᓄᕐᓂᒃ – ᐊᑭᑐᔪᒻᒪᕆᐊᓗᒃ ᖃᐅᔨᓴᐃᓂᖅ ᐊᒻᒪᓗ ᑭᖑᕙᖅᓯᒪᖃᑦᑕᖅᖢᑎᒃ ᐃᓛᓐᓂᒃᑯᑦ ᖁᓕᓂᒃ ᐊᕙᑎᓄᑦ ᐅᑭᐅᓄᑦ," ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᐃᓄᐃᑦ ᑕᒪᐃᓐᓂᖅᑲᔭᖅ ᓄᓇᓕᖕᓂᒃ ᑕᑯᒐᔪᖕᓂᖅᓴᐅᓕᕐᓂᖏᓐᓄᑦ ᓇᓄᕐᓂᒃ.
ᓂᕐᓗᖓᔪᖅ ᐅᖃᖅᖢᓂ ᐃᓄᐃᑦ ᓂᙵᐅᒪᔪᒻᒪᕆᐊᓘᓕᓚᐅᕐᓂᖏᓐᓄᑦ ᒪᕐᕉᒃ ᑭᕙᓪᓕᕐᒥ ᐃᓅᔪᓐᓃᓚᐅᖅᑎᓪᓗᒋᑦ ᐊᐅᔭᖅ ᐊᒻᒪᓗ ᐃᓱᒪᓕᖅᖢᑎᒃ ᖃᓄᑎᒋ ᓇᓄᐃᑦ ᓴᐳᓐᓂᐊᖅᑕᐅᓂᐊᕐᓂᖏᓐᓄᑦ. ᐅᖃᖅᖢᓂ ᐃᓄᐃᑦ ᐱᔪᓐᓇᐅᑎᖃᕐᒪᑕ ᐃᖕᒥᓂᒃ ᓴᐳᓐᓂᐊᕈᓐᓇᕐᓂᕐᒧᑦ ᐊᒻᒪᓗ ᒥᐊᓂᖅᓯᔪᓐᓇᕐᓂᕐᒧᑦ ᐱᖁᑎᖏᓐᓂᒃ ᑭᓯᐊᓂ, ᐊᕐᓇᓪᓗᕐᒥᒃ ᓇᓄᕐᒥᒃ ᐱᑕᕈᑎᒃ, ᐊᑭᓖᔭᕆᐊᖃᖅᑎᑕᐅᓕᕋᔭᖅᖢᑎᒃ.
ᓂᕐᓗᖓᔪᖅ ᐅᖃᖅᖢᓂ 13-ᖑᔪᒡᒎᖅ ᓇᓄᖃᕐᕕᒃᑯᑦ ᑭᒡᓕᖃᕐᕕᐅᔪᑦ ᓇᓗᓇᐃᔭᖅᑕᐅᓯᒪᔪᑦ ᖃᐅᔨᓴᕈᑕᐅᔪᒃᑯᑦ ᐱᔾᔪᑎᓖᑦ ᐊᕐᓇᓪᓗᕐᓂᒃ ᖁᖓᓯᕈᓯᖅᑕᐅᓯᒪᔪᓂᒃ.
"ᐃᓄᐃᑦ ᖃᐅᔨᒪᖕᒪᑕ ᑕᒪᕐᒥᒃ ᓇᓄᐃᑦ ᑭᒡᓕᖃᕈᓐᓇᙱᓐᓂᖏᓐᓄᑦ ᐊᒻᒪᓗ ᐅᐸᒍᑎᔭᒻᒪᑕ ᓂᕿᖃᖅᑐᓄᑦ, ᓂᕿᖃᖅᑐᓃᓐᓂᖅᓴᐅᓲᑦ," ᑕᐃᒪᓐᓇ ᐅᖃᖅᖢᓂ. "ᓇᒧᙵᐅᓂᐊᕈᑎᒃ, ᐅᖓᓯᒃᑐᒧᙵᐅᑐᐃᓐᓇᕆᐊᓖᑦ." ᓂᕐᓗᖓᔪᖅ ᑕᑯᓚᐅᖅᓯᒪᑉᓗᓂ ᐊᖑᓴᓪᓗᕐᒥ ᓇᓗᓇᐃᒃᑯᑦᑎᖅᑕᐅᓯᒪᔪᒥᒃ ᕋᓴᒥ ᕿᑭᖅᑖᓗᖕᒧᑦ ᑎᑭᑦᑐᕕᓂᕐᒥᒃ.
"ᑕᐃᒪᐃᒻᒪᑦ (ᖃᐅᔨᓴᖅᑏᑦ) ᖃᐅᔨᒪᑦᑎᐊᕋᔭᖅᑐᑦ ᐊᕐᓇᓪᓗᐃᑦ ᑭᒡᓕᖃᕐᕕᖏᓐᓂᒃ ᖁᖓᓯᕈᓯᖅᓯᒪᓂᖏᑦ ᒪᓕᒃᖢᒋᑦ, ᑭᓯᐊᓂ ᖃᐅᔨᓴᕈᑕᐅᓯᒪᔪᒃᑯᑦ ᑎᑎᕋᑦᑎᐊᖅᓯᒪᙱᖦᖢᑎᒃ ᐊᖑᓴᓪᓗᐃᑦ ᒥᒃᓵᓄᑦ," ᑕᐃᒪᓐᓇ ᐅᖃᖅᖢᓂ.
ᓂᕐᓗᖓᔪᖅ ᐅᖃᖅᖢᓂ ᓇᓄᖃᖃᑦᑕᖅᓯᒪᓕᕋᑉᑕ ᐃᒻᒪᖄ 600,000 ᐅᑭᐅᓂᒃ ᐊᒻᒪᓗ ᓯᓚᖓ ᐊᓯᔾᔨᖅᓯᒪᓪᓚᕆᒃᖢᓂ ᑕᐃᒪᙵᓂ ᐅᑉᓗᒥᒧᑦ. ᐅᖃᖅᖢᓂ ᐅᑉᓗᒥᒧᑦ, ᐃᓄᐃᑦ ᑕᑯᓯᒪᙱᑦᑐᑦ ᓈᒻᒪᙱᑦᑐᒃᑯᑦ ᓇᓄᐃᑦ ᐊᒃᑐᖅᑕᐅᓯᒪᓂᖏᓐᓄᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᒍᑦ, ᑭᓯᐊᓂ ᐳᓚᕋᖅᑐᓕᕆᓂᖅ "ᐊᓯᐊᒎᕈᓐᓇᕐᒥᔪᖅ."
ᐅᖃᖅᖢᓂ ᑰᒡᔪᐊᓕᐊᓚᐅᖅᓯᒪᒐᒥᒎᖅ ᐊᑕᐅᓰᖅᖢᓂ ᐳᓚᕋᖅᑐᓕᕆᔨᒃᑯᑦ ᓄᓇᒃᑰᕈᑎᖓᒍᑦ ᓇᓄᕐᓂᒃ ᑕᑯᔭᖅᑐᓕᕋᒥᒃ, ᓇᓄᕉᖅ ᓇᓚᑲᑕᑐᐃᓐᓇᓚᐅᖅᓯᒪᔪᖅ ᓄᓇᒃᑰᕈᑎᒧᑦ ᐅᐸᒃᑕᐅᒐᓗᐊᕋᒥ.
"ᖃᐅᔨᒪᖕᒪᑦ ᐱᑕᖅᑕᐅᓇᓱᔾᔮᙱᓐᓂᕐᒥᓄᑦ, ᑭᓯᐊᓂ ᑕᐃᒪᐃᑦᑐᖃᕐᓂᖅᐸᑦ ᖁᑦᑎᒃᑐᒥ ᐅᑭᐅᖅᑕᖅᑐᒥ ᓇᓄᖅ ᕿᒪᓯᓇᔭᖅᑐᖅ ᐃᓄᖕᒥᒃ ᑕᑯᑐᐊᕈᓂ," ᑕᐃᒪᓐᓇ ᐅᖃᖅᖢᓂ, ᐅᖃᖅᖢᓂᓗ ᓇᓄᐃᑦ ᓄᓇᓕᖕᒧᙵᐅᕙᖕᒪᑕ ᓂᕿᒃᓴᖅᓯᐅᖅᖢᑎᒃ. "ᑕᐃᒪᐃᒻᒪᑦ ᓱᓕᔫᔪᓐᓇᖅᑐᖅ ᐳᓚᕋᖅᑐᓕᕆᓂᖅ ᑰᒡᔪᐊᕐᒥ ᐊᒻᒪᓗ ᓇᓄᐃᑦ ᐊᒥᓱᙳᖅᐸᓪᓕᐊᓂᖏᓐᓄᑦ... ᖃᐅᔨᒪᒐᒥᒃ ᐱᑕᖅᑕᐅᔾᔮᙱᓐᓂᖏᓐᓄᑦ."
ᓂᕐᓗᖓᔪᖅ ᐅᖃᖅᖢᓂ ᓇᓚᐅᑦᑖᖅᑕᐅᓯᒪᔪᒡᒎᖅ ᖃᐅᔨᓴᖅᑎᓄᑦ ᓇᓄᐃᑦ ᐊᒥᓲᓂᖏᓐᓄᑦ ᑕᓯᐅᔭᕐᔪᐊᑉ ᑲᓇᖕᓇᖓᓂ ᐊᒻᒪᓗ Baffin Bay-ᒥ, ᐱᓗᐊᖅᑐᒥ ᐊᑯᓐᓂᖓᓂ 2000 ᐊᒻᒪᓗ 2018-ᒥ, ᓈᒻᒪᙱᑦᑑᓯᒪᔪᑦ ᐊᒻᒪᓗ ᖃᐅᔨᓴᖅᑏᑦ ᓇᓗᓇᐃᖅᓯᔭᕆᐊᓖᑦ ᖃᓄᖅ ᑕᒻᒪᕐᓂᕐᒪᖔᕐᒥᒃ.
ᓂᕐᓗᖓᔪᖅ ᐅᖃᖅᖢᓂ ᖃᐅᔨᓴᖅᑏᒡᒎᖅ ᑕᒪᐃᓐᓄᑦ ᑐᕌᖓᓇᓱᒋᓐᓈᑐᐃᓐᓇᖃᑦᑕᕐᒪᑕ ᐃᓄᖕᓂᒃ ᑕᒻᒪᖅᓯᒪᓂᕋᐃᑉᓗᑎᒃ, ᐃᒪᓐᓇ ᑕᐃᑉᓗᓂᒋᑦ "ᐃᓅᖃᑎᒌᒃᑐᓂᒃ ᐊᑭᕋᖅᑐᐃᓂᒃᑯᑦ."
"ᖃᐅᔨᒪᓚᐅᕆᑦᑎ (ᐃᓄᐃᑦ) ᐅᑭᐅᖅᑕᖅᑐᒥᐅᑕᐅᒐᑉᑕ ᓱᖏᐅᑎᔪᓐᓇᖅᖢᑕᓗ ᐊᒻᒪᓗ ᓱᖏᐅᑎᔪᓐᓇᐃᓐᓇᖃᑦᑕᕐᓂᐊᖅᖢᑕ ᓱᓇᑐᐃᓐᓇᕐᓄᑦ ᑎᑭᑕᐅᔭᕌᖓᑉᑕ ᑭᓯᐊᓂᓕ, ᐃᒻᒪᖄ ᑎᑭᑦᑐᖃᑳᓪᓛᓗᖕᓂᖅᐸᑦ ᓯᓚᑐᐃᓐᓇᕐᒥᙶᖅᑐᒥ ᐅᕝᕙᓘᓐᓃᑦ ᑕᐃᒪᐃᕐᓚᒃᑐᒥ. "ᐅᕙᒻᓄᓪᓕ, ᑕᒪᔾᔭ ᑕᒡᕙ ᐃᓅᖃᑎᒌᒃᑐᓂᒃ ᐊᑭᕋᖅᑐᕐᓂᐅᔪᖅ ᐊᓯᖏᓐᓄᑦ ᐃᓄᖕᓄᑦ."





Pop-up banner image