Skip to content

Hᐊᒻᓚᒃᑯᑦ ᑐᓂᐅᖅᑲᐃᔪᑦ ᑐᒡᓕᐊᒍᑦ ᒐᕙᒪᑐᖃᒃᑯᓐᓂᙶᖅᑐᓂᒃ ᑮᓇᐅᔭᓂᒃ ᑐᓂᐅᖅᑲᐅᑕᐅᓯᒪᔪᑦ ᐊᖏᕈᑎᒃᑯᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑎᒍᑦ

1702vouz
ᑲᖏᖅᖠᓂᕐᒥ ᖃᑉᑎᕆᔨᒃᑯᑦ ᑐᓂᐅᖅᑲᐃᓚᐅᖅᑐᑦ ᓂᐅᕕᕈᑎᓂᒃ ᐊᑐᓂ ᐃᒡᓗᒋᔭᐅᔪᓄᑦ ᓂᕿᑖᕈᑕᐅᔪᓐᓇᖁᑉᓗᒋᑦ ᐊᒻᒪᓗ ᐃᑲᔫᑕᐅᖁᑉᓗᒋᑦ ᓵᓚᖃᕋᓱᖕᓂᕐᒧᑦ ᓄᕙᒡᔪᐊᕐᓂᖅ−19-ᒥᒃ ᓴᓇᑦᑕᐃᓕᐊᕈᓯᐅᓵᖅᑐᒥ, ᕕᕗᐊᕆ 13-ᒥ. ᐊᔾᔨ ᒪᑯᓯ ᐅᐊᐃᔭᑦᒥᙶᖅᑐᖅ

ᐊᑐᓂ ᐃᒡᓗᒋᔭᐅᔪᑦ ᑐᓂᔭᐅᓚᐅᖅᑐᑦ ᓂᐅᕕᕈᑎᒃᑲᓐᓂᕐᓂᒃ ᐱᖁᑎᑖᕈᑎᓄᑦ ᓂᕿᑖᕈᑎᓄᓪᓗ ᐊᒻᒪᓗ ᓴᓗᒻᒪᖅᓴᐅᑎᓄᑦ ᐃᑲᔫᑕᐅᖁᑉᓗᒋᑦ ᓂᕿᑖᕆᐊᓕᖕᓄᑦ, ᐊᒻᒪᓗ ᓄᓇᖅᑲᑎᒌᑦ ᐋᓐᓂᐊᓕᖁᓇᒋᑦ ᖃᓄᐃᙱᑦᑐᓐᓇᖁᑉᓗᒋᓪᓗ ᓵᓚᖃᕋᓱᒃᑎᓪᓗᒋᑦ ᓄᕙᒡᔪᐊᕐᓂᖅ-19-ᒥᒃ ᑲᖏᖅᖠᓂᕐᒥ ᓴᓇᑦᑕᐃᓕᐅᕌᓂᓵᖅᑐᒥ ᕕᕗᐊᕆ 13-ᒥ.

Hᐊᒻᓚᒃᑯᑦ ᑎᑎᕋᕐᕕᖓᓂᒃ ᑐᑭᒧᐊᒃᑎᑦᑎᔨ ᑎᐅᕆᓐ ᕕᓕᓐ ᐅᖃᖅᖢᓂ Hᐊᒻᓚᒃᑯᑦ ᖃᐅᔨᒪᑎᑦᑎᓚᐅᕐᒪᑕ ᓂᐅᕕᕈᑎᒃᓴᓂᒃ ᐱᑎᑦᑎᒃᑲᓐᓂᕐᓂᐊᕐᓂᕐᒥᓄᑦ ᒐᕙᒪᑐᖃᒃᑯᓐᓂᙶᖅᑐᓂᒃ ᑮᓇᐅᔭᓂᒃ ᓯᕗᓪᓕᖅᐹᑦ ᑐᓂᐅᖅᑲᐅᑕᐅᓚᐅᖅᓯᒪᔪᑦ ᑕᖅᑭᐅᓚᐅᖅᑐᒥ.

ᐅᖃᖅᖢᓂ ᑮᓇᐅᔭᖅᑖᖑᓚᐅᖅᑐᒃᑯᑦ ᑕᒡᕘᓇ, Hᐊᒻᓚᒃᑯᑦ ᑲᑎᒪᔨᖏᑦ ᐃᓱᒪᓕᐅᓚᐅᕐᒪᑕ ᑐᑭᖃᕐᓂᖅᓴᐅᓇᔭᕐᓂᖓᓄᑦ ᑐᓂᐅᖅᑲᐃᓇᔭᕐᓂᕐᒧᑦ ᐊᑕᐅᑦᑎᒃᑯᐊᓘᙱᑦᑐᖅ ᓄᖑᑕᐅᑲᐅᑎᒋᖁᓇᒋᑦ.

“ᐊᕕᒃᑐᓚᐅᖅᑕᖅᐳᑦ ᒪᕐᕉᓕᖓᔪᒃᑯᑦ ᐊᑑᑎᖃᒃᑲᓐᓂᕈᓐᓇᖁᑉᓗᒍ ᓄᓇᖅᑲᑎᒌᖕᓄᑦ.” ᑕᐃᒪᓐᓇ ᐅᖃᖅᖢᓂ ᕕᓕᓐ.

“ᖃᑉᑎᕆᔨᒃᑯᑦ, ᐱᓕᕆᖃᑎᖃᑦᑎᐊᖅᑐᐊᓗᐃᑦ Hᐊᒻᓚᒃᑯᓐᓂᒃ ᑕᒡᕘᓇ, ᑐᓂᐅᖅᑲᐃᔨᐅᑉᓗᑎᒃ ᓂᐅᕕᕈᑎᓂᒃ ᐊᑐᓂ ᐃᒡᓗᒋᔭᐅᔪᓄᑦ ᐱᓇᓱᐊᕈᓯᐅᓚᐅᖅᑐᒥ, ᑕᐃᒪᓐᓇᑦᑎᐊᖅ ᑐᓂᐅᖅᑲᐅᑕᐅᓚᐅᖅᑐᑎᑐᑦ ᑎᓯᐱᕆᐅᓚᐅᖅᑐᒥ ᐊᒻᒪᓗ ᐊᖏᓂᖅᓴᒥᒃ ᑐᓂᐅᖅᑲᐃᓯᒪᓚᐅᖅᖢᑎᒃ ᔭᓄᐊᕆ ᕿᑎᐊᓂ.

“ᐊᑐᓂ ᐃᒡᓗᒋᔭᐅᔪᑦ ᓄᓇᓕᖕᒥ ᑐᓂᔭᐅᓚᐅᖅᑐᑦ $525-ᒥᒃ ᓂᐅᕕᕈᑎᒃᑯᑦ.

“ᓯᕗᓪᓕᖅᐹᖅ ᓂᐅᕕᕈᑎᒃᓴᖅ Hᐊᒻᓚᒃᑯᓐᓂᙶᓪᓚᑦᑖᓚᐅᖅᑐᖅ $170 ᑎᓯᐱᕆᐅᑉ ᐱᒋᐊᕐᕕᖓᓂᒃ. ᑮᓇᐅᔭᖅᑖᓕᓚᐅᕐᒥᒐᑉᑕ ᒪᒃᐱᕐᒪᑦ, ᐊᒻᒪᓗ ᑕᐃᑲᙵᑦ ᑮᓇᐅᔭᖅᑖᖅᑎᑦᑎᓕᓚᐅᖅᑐᒍᑦ ᔭᓄᐊᕆᒥ ᐊᒻᒪᓗ ᕕᕗᐊᕆᒥ $525-ᒥ ᐊᑐᓂ ᐃᒡᓗᒋᔭᐅᔪᑦ. ᑕᒪᓐᓇ ᒐᕙᒪᑐᖃᒃᑯᓐᓂᙶᖅᑐᖅ ᑮᓇᐅᔭᖅ ᓄᓇᕗᑦ ᑐᙵᕕᒃᑯᑦ ᑎᒥᖓᒍᑦ ᖃᐃᑕᐅᔪᖅ ᐊᒻᒪᓗ ᑕᐃᑲᙵᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓂᒃ.

“ᑐᓂᐅᖅᑲᐅᑕᐅᔪᑦ ᐃᒡᓗᒋᔭᐅᔪᓄᑦ Hᐊᒻᓚᒃᑯᓐᓂᙶᖅᑐᑦ ᓂᕿᑖᕈᑎᒃᓴᐃᑦ ᑮᓇᐅᔭᖅᑖᕈᑎᒃᑯᑦ ᐊᖏᕈᑎᒃᑯᑦ Hᐊᒻᓚᒃᑯᓐᓄᑦ ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ.”

ᕕᓕᓐ ᐅᖃᖅᖢᓂ ᐱᒻᒪᕆᐊᓗᒃᑯᒡᒎᖅ ᐅᖃᐱᓗᒃᑐᖃᖅᓯᒪᙱᑦᑐᖅ ᑕᒪᑐᒪ ᒥᒃᓵᓄᑦ ᐅᕝᕙᓘᓐᓃᑦ ᖃᓄᖅ ᑐᓂᐅᖅᑲᐅᑕᐅᓯᒪᓂᖓᓄᑦ ᖃᐅᔨᒪᔭᒃᑯᑦ ᐊᒻᒪᓗ ᐃᓄᐃᑦ ᓄᓇᓕᖕᒥ ᖁᔭᓕᓯᒪᑦᑎᐊᖅᑐᒡᒎᖅ ᑐᓂᔭᐅᓯᒪᓂᖏᓐᓂᒃ.

ᐅᖃᖅᖢᓂ ᓂᕿᑖᕈᑏᑦ ᐃᑲᔫᑎᒻᒪᕆᐊᓘᓂᖏᓐᓄᑦ ᐃᑲᔪᖅᑕᐅᔪᓐᓇᖁᑉᓗᒋᑦ ᐃᓚᒌᑦ ᓂᕿᖃᑦᑎᐊᕈᓐᓇᕐᓂᕐᒧᑦ ᓄᕙᒡᔪᐊᕐᓂᖅ ᑕᐃᒪᐅᑎᓪᓗᒍ ᐊᒻᒪᓗ Hᐊᒻᓚᒃᑯᑦ ᐱᓕᕆᐊᒃᓴᖓ, ᓄᓇᓕᖕᒥ ᒐᕙᒪᒋᔭᐅᑎᓪᓗᒋᑦ, ᐱᔨᑦᓯᕋᕋᓱᒋᐊᖃᖃᑦᑕᕐᒪᑕ ᐃᓄᖁᑎᒥᓂᒃ.

“ᐱᐅᔪᒃᑯᑦ ᐱᓕᕆᐊᖑᔪᑦ ᐱᕚᓪᓕᕈᑕᐅᓲᑦ ᓄᓇᓕᖕᒥ ᐊᒻᒪᓗ ᐃᓱᒪᒋᔭᒃᑯᑦ ᑕᒪᓐᓇ ᐱᐅᔫᓇᓱᒋᔭᕋ ᓄᓇᖅᑲᑎᕗᑦ ᖃᓄᐃᙱᑦᑎᐊᕈᓐᓇᖁᑉᓗᒋᑦ ᐃᓄᐃᑦ ᖁᔭᓕᓯᒪᑦᑎᐊᖅᑐᑦ.

“ᐅᐱᓐᓇᖅᑐᒻᒪᕆᐊᓗᒃ ᑕᐃᒪᐃᓕᐅᕈᑎᒋᓯᒪᔭᖅᐳᑦ ᐊᒻᒪᓗ ᖃᓄᖅ ᐊᑑᑎᖃᕐᓂᖓ, ᐃᓱᒪᒋᑉᓗᒋᓪᓗ ᑲᐱᔭᐅᓚᐅᖅᑐᑦ ᓴᓇᑦᑕᐃᓕᐅᕌᓂᒃᑐᒥ ᑐᒡᓕᐊᒍᑦ ᑕᐃᒪᐅᖕᒪᑕ.

“ᑕᒫᓂ ᑲᖏᖅᖠᓂᕐᒥ, ᐊᒻᒪᓗ ᓄᓇᕗᓗᒃᑖᒥ, ᐱᕕᒃᓴᖃᖅᑎᑕᐅᑦᑎᐊᖅᓯᒪᔪᐊᓘᔪᒍᑦ, ᐊᒻᒪᓗ ᐅᕙᖓ ᓇᖕᒥᓂᖅ ᖁᔭᓕᓯᒪᔪᖓ ᑲᐱᔭᐅᓚᐅᕋᑉᑕ ᐃᓄᐃᑦ ᓵᓚᖃᕋᓱᒍᓐᓇᕐᒪᑕ ᑕᒪᑐᒥᙵ ᓄᕙᒡᔪᐊᕐᓂᐊᓗᖕᒥᒃ.

“ᐃᓄᐃᑦ ᐅᑎᕈᒪᓕᑦᑎᐊᖅᑐᑦ ᐃᓅᓯᕆᓚᐅᖅᑕᒥᓄᑦ, ᐊᒻᒪᓗ ᑕᑯᔪᖓ ᐅᕙᑉᑎᓐᓂᒃ, ᓄᓇᖅᑲᑎᒌᖢᑕ ᑐᕌᖅᐸᓪᓕᐊᒐᑉᑕ ᑕᐃᑯᙵ ᐃᓅᓯᕆᓚᐅᖅᑕᑉᑎᓐᓄᑦ.”