ᐃᓄᐃᑦ ᐊᕐᕕᐊᓂ ᐱᓕᕆᖃᑎᒌᑦᑎᐊᖅᑐᑦ ᑲᔪᓯᑦᑎᐊᕈᓐᓇᕈᒪᑉᓗᑎᒃ ᐊᒃᓱᕈᕐᓇᖅᑐᖅ ᑕᒡᕙᐅᒐᓗᐊᖅᑎᓪᓗᒍ ᐱᔾᔪᑎᒋᑉᓗᒍ ᓄᕙᒡᔪᐊᕐᓂᖅ − 19, ᑕᐃᒪᓐᓇ ᐅᖃᖅᑐᖅ Hᐊᒻᓚᒃᑯᑦ ᑐᑭᒧᐊᒃᑎᑦᑎᔨᖓ.
ᓯᑎᕝ ᐃᖕᓚᓐ ᐅᖃᖅᖢᓂ Hᐊᒻᓚᒃᑯᑦ, ᐃᖕᒥᒃᑯᑦ, ᖃᓄᑐᐃᓐᓇᖅ ᐱᓕᕆᓇᓱᒃᓯᒪᔪᑦ ᐃᓄᐃᑦ ᐊᒃᓱᕈᕐᓇᖅᑐᒃᑰᖅᑐᑦ ᐊᒃᓱᕈᕐᓇᙱᓐᓂᖅᓴᐅᔪᒃᑯᑦ ᐃᓅᓇᓱᐊᕈᓐᓇᖁᑉᓗᒋᑦ.
ᐅᖃᖅᖢᓂ ᐱᓕᕆᖃᑎᒌᖕᓂᒃᑯᒡᒎᖅ ᐱᓕᕆᓯᒪᓪᓚᕆᒃᑐᑦ ᐅᔾᔨᖅᑐᖁᔨᓂᒃᑯᑦ ᐊᒻᒪᓗ ᑕᐃᒪᑐᖅ ᕿᓚᒻᒥᐅᔪᒃᑯᑦ, ᐃᓅᓯᕆᓚᐅᖅᑕᑉᑎᓐᓄᑦ ᐅᑎᕈᓐᓇᖅᓯᓂᐊᖅᐳᒍᑦ.
“ᓄᓇᖅᑲᑎᕗᑦ ᐱᓕᕆᑦᑎᐊᖅᑐᒻᒪᕆᐊᓗᐃᑦ ᑕᒪᑐᒥᙵ ᑲᒪᓇᓱᒃᖢᑎᒃ,” ᑕᐃᒪᓐᓇ ᐅᖃᖅᖢᓂ ᐃᖕᓚᓐ. “ᐅᐱᓐᓇᖅᑐᒻᒪᕆᐊᓗᒃ. ᐃᓄᐃᑦ ᐱᓕᕆᖃᑕᐅᑦᑎᐊᖅᑐᑦ ᓄᓇᖅᑲᑎᒌᑦ, ᓂᐅᕕᕐᕖᑦ, Hᐊᒻᓚᒃᑯᑦ ᐊᒻᒪᓗ ᐊᔾᔨᒌᙱᑦᑑᑕᐅᔪᑦ ᓄᓇᕗᒥ ᒐᕙᒪᒃᑯᑦ ᐱᓕᕆᕝᕕᖏᑦ.
“Hᐊᒻᓚᒃᑯᑦ ᐊᔾᔭᖅᑐᐃᓚᐅᖅᑐᑦ 640−ᓂᒃ ᓴᓗᒻᒪᖅᓴᐅᑎᓂᒃ ᒪᕐᕉᒃ ᐱᓇᓱᐊᕈᓰᒃ ᐱᐊᓂᒃᓯᒪᓕᖅᑑᒃ, ᐊᑕᐅᓯᖅ ᐊᑐᓂ ᐃᒡᓗᒋᔭᐅᔪᓄᑦ, ᐊᒻᒪᓗ, ᑕᒡᕙᓂ ᐱᓇᓱᐊᕈᓯᕐᒥ, ᑐᓂᐅᖅᑲᐃᓂᐊᖅᑐᒍᑦ 300-ᓂᒃ 400-ᓄᑦ ᓂᕿᒃᓴᕆᔭᐅᓂᐊᖅᑐᓂᒃ ᐃᓄᖕᓄᑦ ᐱᔭᕆᐊᖃᖅᑐᓄᑦ.
“ᐱᓯᒪᖕᒥᔪᒍᑦ $45,000-ᓂᒃ ᐊᑭᓕᖕᓂᒃ ᐱᙳᐊᒐᒃᓴᓂᒃ ᑎᑭᓐᓂᐊᖅᑐᓂᒃ ᑐᓂᐅᖅᑲᐅᑕᐅᓂᐊᖅᑐᓂᒃ ᓄᑕᖅᑲᓄᑦ ᓄᓇᓕᖕᒥ ᓄᖅᑲᖓᙱᔾᔪᑎᒃᓴᖏᓐᓂᒃ ᐊᖏᕐᕋᐅᒪᓗᑎᒃ, ᐊᒻᒪᓗ ᑐᓂᐅᖅᑲᐃᕙᓪᓕᐊᓂᐊᖅᖢᑕ ᓴᓗᒻᒪᖅᓴᐅᑎᒃᓴᓂᒃ.
“Bingo-ᖅᑎᑦᑎᓚᐅᕐᒥᔪᒍᑦ ᐃᓄᐃᑦ ᐅᖓᓯᒌᒃᑎᓐᓇᓱᒃᖢᒋᑦ ᑲᔪᓯᓂᖃᑦᑎᐊᓚᐅᖅᑐᖅ, ᑕᐃᒪᐃᓕᐅᖅᑎᑦᑎᒃᑲᓐᓂᕆᐊᕈᒫᖅᑐᒍᑦ ᕿᓚᒻᒥᐅᔪᒃᑯᑦ.”
ᐃᖕᓕᓐ ᐅᖃᖅᖢᓂ Hᐊᒻᓚᒃᑯᑦ ᑮᓇᐅᔭᓂᒃ ᐊᑐᖅᓯᒪᓪᓚᕆᓕᕐᒪᑕ ᓵᓚᖃᕋᓱᒃᖢᑎᒃ ᓄᕙᒡᔪᐊᕐᓂᕐᒥᒃ - 19−ᒥᒃ, ᑕᐃᒪᐃᓕᐅᕋᓱᐃᓐᓇᕐᓂᐊᖅᖢᑎᒡᓗ ᐱᔭᕆᐊᖃᕐᓂᓕᒫᖏᓐᓂᒃ.
ᐅᖃᖅᖢᓂ Hᐊᒻᓚᒃᑯᑦ ᐱᓕᕆᔨᖏᑦ ᓴᕆᒪᓱᑦᑎᐊᖅᓯᒪᖕᒪᑕ ᐊᒻᒪᓗ ᖁᕕᐊᓱᑦᑎᐊᖅᖢᑎᒃ ᑕᑯᖃᑦᑕᕋᒥᒃ ᖃᓄᖅ ᐊᕐᕕᐊᕐᒥᐅᑕᑦ ᑲᒪᒋᐊᖅᓯᒪᓂᖏᓐᓄᑦ ᓄᕙᒡᔪᐊᕐᓂᖅ ᐱᔾᔪᑎᒋᑉᓗᒍ.
“ᓄᓇᕗᑦ ᒐᕙᒪᒃᑯᖏᑦ ᑐᓂᓯᓯᒪᔪᑦ $90,000-ᒥᒃ − ᑕᒪᓐᓇ ᐱᐅᔪᒻᒪᕆᐊᓗᒃ − ᑕᒪᓐᓇ ᓂᕿᑖᕈᑎᓄᑦ ᐃᓕᓯᒪᔭᖅᐳᑦ.
“ᐅᑉᓗᒥᒧᑦ, ᐊᑐᖅᓯᒪᔪᒃᓴᐅᔪᒍᑦ $150,000-ᒥᒃ ᓴᓗᒻᒪᖅᓴᐅᑎᓄᑦ, ᓂᕿᓄᑦ ᐊᒻᒪᓗ ᐱᙳᐊᓄᑦ ᐊᒻᒪᓗ ᖃᓄᐃᓕᐅᕈᑎᒃᓴᓄᑦ ᓄᑕᖅᑲᓄᑦ. ᖃᐅᔨᒪᔪᒍᑦ ᐃᑲᔫᑎᒃᓴᓂᒃ ᓴᖅᑭᑦᑐᖃᒃᑲᓐᓂᕐᓂᐊᕐᓂᖓᓄᑦ. ᓇᓗᓇᙱᑦᑐᖅ ᑕᒪᓐᓇ.
“ᓄᓇᕗᑦ ᑐᙵᕕᒃᑯᑦ ᑐᓂᓯᓯᒪᖕᒥᔪᑦ $50,000-ᒥᒃ ᐊᑐᓂ ᓄᓇᓕᖕᓄᑦ − ᑐᑭᓯᐅᒪᔭᒃᑯᑦ ᑐᓂᐅᖅᑲᐅᔪᒪᔭᖓ ᒫᓐᓇᑲᐅᑎᒋ − ᐃᓚᖓᒍᑦ ᓈᒻᒪᓗᐊᖅᑑᔭᓚᐅᙱᑦᑐᖅ ᐊᖏᓂᖅᓴᐅᔪᓄᑦ ᓄᓇᓕᖕᓄᑦ ᓲᕐᓗ ᐊᕐᕕᐊᓄᑦ.
“ᒥᑭᓂᖅᓴᓪᓚᕆᖕᒥᒃ ᑐᓂᔭᐅᓯᒪᔪᒍᑦ ᓄᓇᓖᑦ ᐃᓄᒋᐊᖕᓂᖏᑦ ᒪᓕᒃᖢᒋᑦ, ᑭᓯᐊᓂ ᑕᒪᓐᓇ ᐋᖅᑭᒃᑕᐅᖁᓂᐊᖅᑕᖅᐳᑦ ᓯᕗᓂᒃᓴᒥ. ᐊᒻᒪᓗ ᐅᑕᖅᑭᔪᒍᑦ ᓱᓕ ᖃᓄᐃᓕᐅᕐᓂᐊᕐᒪᖔᑕ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᑦ ᓄᓇᖃᖅᑳᖅᓯᒪᔪᓄᑦ ᓄᓇᓕᖕᓂᒃ ᐊᒻᒪᓗ ᑐᓴᕈᒥᓇᖅᑐᖅ ᑕᒪᑐᒪ ᒥᒃᓵᓄᑦ ᕿᓚᒻᒥᐅᔪᒃᑯᑦ.”
ᐃᖕᓕᓐ ᐅᖃᖅᖢᓂ ᐅᔾᔨᕐᓇᖅᑐᕉᖅ ᐃᓄᐃᑦ ᑕᒪᕐᒥᒃ, ᑕᒪᕐᒥᒃ ᑎᒥᖁᑎᒋᔭᐅᔪᑦ, ᐱᓕᕆᓇᓱᖕᒪᑕ ᒫᓐᓇᐅᔪᖅ, ᑕᒪᓐᓇᒎᖅ ᐅᐱᓐᓇᖅᑐᒻᒪᕆᐊᓗᒃ.
“ᑲᑎᒪᖃᑦᑕᖅᑐᒍᑦ ᐱᓇᓱᐊᕈᓯᑕᒫᑦ ᑲᑎᒪᖃᑎᒋᕙᒃᖢᒋᑦ ᑕᒪᕐᒥᒃ ᓂᐅᕕᕐᕖᑦ ᓄᓇᑉᑎᓐᓂᒃ ᐊᒻᒪᓗ ᑐᓴᕈᒥᓇᖅᑐᓂᒃ ᑐᓴᒐᒃᓴᖃᖃᑦᑕᖅᑐᖅ ᑕᒡᕘᓇ
“ᑕᒪᓐᓇ ᐅᔾᔨᖅᑐᑦᑎᐊᖅᑕᖅᐳᑦ ᐊᒻᒪᓗ Hᐊᒻᓚᒃᑯᑦ ᐊᒥᓱᓂᒃ ᓂᐅᕕᖅᓯᒪᔪᑦ ᐊᒡᒐᖕᓄᑦ ᓴᓗᒻᒪᖅᓴᐅᑎᓂᒃ, ᒪᑐᐊᕐᓂᒃ, ᐊᒡᒑᖕᓂᒃ, ᐊᓪᓚᕈᑎᓂᒃ ᐊᒻᒪᓗ ᐃᖂᑎᓂᒃ, ᐊᑐᕆᐊᓖᑦ ᐊᑐᐃᓐᓇᐅᖁᑉᓗᒋᑦ ᒫᓐᓇᐅᔪᖅ, ᐃᖢᐊᖏᓕᐅᕈᑎᖃᓕᕐᓂᖅᐸᑦ.
“ᑕᐃᒪᐅᖃᑦᑕᕐᒥᔪᑦ ᓄᓇᓕᖕᓂᒃ ᓈᓚᒍᓐᓇᙱᑦᑐᑦ, ᑭᓯᐊᓂ ᐊᓕᐊᓇᐃᒍᓱᒃᑐᖓ ᐅᖃᕈᓐᓇᕋᒪ ᐊᒥᓱᐃᓐᓇᐅᖕᒪᑕ ᑕᐃᒪᐃᑦᑐᑦ ᓄᓇᑉᑎᓐᓂᒃ, ᐊᒻᒪᓗ ᓄᓇᖅᑲᑎᕗᑦ ᐅᔾᔨᖅᑐᖅᑐᑦ, ᐃᑲᔪᖅᑐᑦ ᐊᒻᒪᓗ ᐃᖅᑲᐃᑎᑦᑎᕙᒃᑐᑦ ᐃᓅᖄᑎᒥᓂᒃ ᖃᓄᖅ ᑕᒪᓐᓇ ᐱᒻᒪᕆᐅᑎᒋᖕᒪᖔᑦ.
“8-ᓂᒃ ᓯᓚᒥ ᐱᙳᐊᕐᕕᖃᖅᑐᒍᑦ ᓯᓚᒥ ᐊᒻᒪᓗ ᐃᖏᕐᕋᔭᒃᖢᖓ ᐅᓐᓄᒥ ᐃᓚᖓᓂᒃ ᓄᓕᐊᕋᓗ ᐸᓂᒐᓗ ᑕᐃᑉᑯᓇᓂ ᐱᙳᐊᕐᕕᖕᓂᒃ ᐊᑕᐅᓯᕐᒥᒡᓘᓐᓃᑦ ᓄᑕᕋᖅᑕᖃᓚᐅᙱᑦᑐᖅ − ᑕᐃᒪᐃᖏᓐᓇᕈᓐᓇᙱᑦᑐᑦ, ᑭᓯᐊᓂ, ᓄᓇᓕᖕᒥ 1,100-ᓂᒃ ᓄᑕᕋᓕᖕᒥ ᐅᔾᔨᕐᓇᖅᑐᖅ ᐃᓄᐃᑦ ᐱᓕᕆᓇᓱᖕᒪᑕ ᐋᓐᓂᐊᓕᖁᔨᙱᖦᖢᑎᒃ.”