25 ᓄᑕᖅᑲᑦ Hᐊᑭᖅᑎᑯᓗᐃᑦ ᖁᖓᔮᑲᑕᑦᑎᐊᓕᓚᐅᖅᑐᑦ Hᐊᑭᒋᐊᖃᑦᑕᓕᓵᖅᑎᓪᓗᒋᑦ ᓄᑖᓂᒃ ᐊᓐᓄᕌᒃᓴᖏᓐᓂᒃ ᑐᓂᔭᐅᑉᓗᑎᒃ ᐃᓗᐃᑦᑐᒃᑯᑦ ᑲᓇᑕᒥ Hᐊᑭᕕᒡᔪᐊᖅᑎᒃᑯᑦ ᑲᑐᔾᔨᖃᑎᒌᖏᓐᓂᒃ ᐊᒻᒪᓗ ᐃᑲᔪᖅᓯᒪᓂᖓᓄᑦ ᓄᓇᖓᑕ ᐳᑭᖅᑕᓕᖓ, ᐃᓱᒪᓕᕆᓂᕐᒧᓪᓗ ᐃᑲᔪᕆᐊᖅᑎᖓ ᐊᒻᒪᓗ ᓄᓇᖓᓂᒃ Hᐊᑭᖅᑎᐊᓛᓂᒃ ᑲᒪᔨᒃᑯᑦ ᑲᑐᔾᔨᖃᑎᒌᒃᑯᑦ.
ᑐᕌᒐᕆᔭᐅᔪᓂᒃ ᑕᐅᑐᕐᕉᖅᑕᐅᔪᓂᒡᓗ ᑮᓇᐅᔭᖅᑖᕐᕕᒃ ᐱᒋᐊᖅᑎᑕᐅᓚᐅᖅᑐᖅ ᑲᓇᑕᒥ Hᐊᑭᕕᒡᔪᐊᖅᑐᓕᕆᔨᒃᑯᑦ ᑲᑐᔾᔨᖃᑎᒌᒃᑯᖏᓐᓄᑦ 1999-ᒥ Hᐊᑭᖅᑎᕐᔪᐊᑦ ᐃᑲᔪᖃᑕᐅᔪᓐᓇᖁᑉᓗᒋᑦ Hᐊᑭᕐᓂᒃᑯᑦ.
ᐅᑉᓗᒥᒧᑦ, 80,000 ᐅᖓᑖᓃᑦᑐᑦ ᑮᓇᐅᔭᓕᐅᖅᑎᐅᓗᐊᙱᑦᑐᓂᙶᖏᑦᑐᑦ ᓄᑕᖅᑲᑦ 34-ᓂᒃ ᓄᓇᓕᕐᔪᐊᓂᒃ ᐃᑲᔫᓯᐊᖅᑖᖅᓯᒪᔪᑦ ᑕᒡᕘᓇ ᐃᑲᔫᑎᒃᑯᑦ ᑐᓂᔭᐅᖃᑦᑕᖅᖢᑎᒃ ᐃᓗᐃᑦᑐᒃᑯᑦ ᐊᓐᓄᕌᒃᓴᓂᒃ Hᐊᑭᕐᓂᒃᑯᑦ, ᐃᑲᔫᑕᐅᖃᑦᑕᕐᒥᔪᖅ ᓄᑖᙳᖅᑎᕆᓂᒃᑯᑦ ᓇᑉᐸᖅᑎᕆᓂᒃᑯᓪᓗ 100-ᖏᓐᓃᑦᑐᓂᒃ ᓄᑖᓂᒃ Hᐊᑭᕝᕕᖕᓂᒃ ᓯᐊᕐᕆᔮᕐᕕᖕᓂᒃ ᓄᓇᕐᔪᐊᕐᒥ.
$24 ᒥᓕᔭᓐ ᐅᖓᑖᓂ ᑮᓇᐅᔭᓂᒃ ᑐᓂᕐᕈᑎᖃᖅᓯᒪᔪᑦ ᓄᓇᕐᔪᐊᕐᒥ Hᐊᑭᖅᑎᒃᑯᑦ ᐃᑲᔫᑎᒃᑯᑦ ᐅᑉᓗᒥᒧᑦ ᑎᑭᖦᖢᒍ, ᑐᕌᒐᕆᔭᐅᔪᓂᒃ ᑕᐅᑐᕐᕉᖅᑕᐅᔪᓂᒡᓗ ᓴᖅᑭᑎᑦᑎᔪᓐᓇᖅᓯᒪᑉᓗᑎᒃ.
ᐳᑭᖅᑕᓕᒃᑯᑦ, ᓯᕗᓕᖅᑎᖃᖅᖢᑎᒃ ᐳᑭᖅᑕᓕᒃ ᑎᓂᔅ ᒪᓐᕈᒥᒃ, ᐊᒻᒪᓗ ᐃᓱᒪᓕᕆᓂᕐᒧᑦ ᐅᐃᕆᓯᒪᔪᓂᒡᓗ ᐃᑲᔪᕆᐊᖅᑎᒥᒃ ᐳᕆᑦᓂ Hᐅᒻᒥᒃ, ᐱᓕᕆᖃᑎᖃᓚᐅᖅᑐᑦ ᓇᐅᔮᕐᒥᐅᑦ Hᐊᑭᖅᑎᖏᑦᑕ ᑲᑐᔾᔨᖃᑎᒌᒃᑯᖏᓐᓂᒃ ᐊᒻᒪᓗ ᐆᒃᑐᖅᖢᑎᒃ ᑲᓇᑕᒥ Hᐊᑭᕕᒡᔪᐊᖅᑏᑦ ᑲᑐᔾᔨᖃᑎᒌᒃᑯᖏᓐᓄᑦ ᑐᕌᒐᕆᔭᐅᔪᓄᑦ ᑕᐅᑐᕐᕉᖅᑕᐅᔪᓄᓪᓗ ᑮᓇᐅᔭᖅᑖᕈᑕᐅᕙᒃᑐᒃᑯᑦ. ᑐᕌᒐᕆᓚᐅᖅᑕᖓ ᐊᓐᓄᕌᖅᑖᖅᑎᑦᑎᔪᒪᑉᓗᑎᒃ 25-ᓂᒃ ᒪᒃᑯᒃᑐᓂᒃ ᓇᐅᔮᕐᒥᐅᓂᒃ Hᐊᑭᒍᓐᓇᕋᔭᓚᐅᙱᑦᑐᓂᒃ ᐃᓕᑦᑎᔪᓐᓇᕋᔭᓚᐅᙱᑦᑐᓂᒡᓗ ᑕᒪᑐᒥᙵ ᕿᑎᒍᑕᐅᕙᒃᑐᒃᑯᑦ.
ᒪᓐᕈ ᐅᖃᖅᖢᓂ ᐳᑭᖅᑕᓕᕕᓂᕉᖅ ᐊᑐᕚ ᓯᓚᑖᓂ ᓄᓇᓕᒃ, ᓯᐅᕙᐃᓐ ᓕᒧᐃᓐ, ᐅᖃᐅᔾᔨᔨᒋᓚᐅᖅᑕᖓ ᑕᒪᑐᒪ ᐃᑲᔫᑎᐅᑉ ᒥᒃᓴᓄᑦ, ᑕᐃᒪᐃᒻᒪᑦ ᐱᓕᕆᖃᑎᖃᕆᐊᓚᐅᖅᑐᖅ Hᐅᒻᒥᒃ ᑐᒃᓯᕋᐅᑎᒥᒃ ᓴᖅᑭᑎᑦᑎᔪᓐᓇᕈᒪᑉᓗᑎᒃ ᐊᓐᓄᕌᖅᑖᖅᑎᑦᑎᔪᒪᓂᕐᒧᑦ ᑕᐃᒪᓐᓂᒃ ᓇᐅᔮᓂ ᐃᓕᓐᓂᐊᕐᕕᖕᓂᒃ ᐱᓕᕆᖃᑎᖃᕐᓗᑎᒃ ᓇᐅᔮᑦ ᐃᓕᓐᓂᐊᕐᕕᒋᔭᖏᓐᓂᒃ, ᐃᓱᒪᓕᕆᔨᒃᑯᓐᓂᒃ, ᓄᓇᓕᖕᒥᓗ ᕿᑎᒃᑐᓕᕆᔨᒃᑯᓐᓂᒃ Hᐊᒻᓚᒃᑯᓐᓂᓗ.
ᐅᖃᖅᖢᓂ ᑕᒪᐃᓐᓂᒎᖅ ᐱᔭᕆᐊᖃᖅᑕᖏᓐᓂᒃ ᑲᑎᑦᑎᐊᓂᑦᑎᐊᓚᐅᖅᑐᑦ ᐊᒻᒪᓗ ᑐᒃᓯᕋᐅᑎ ᑐᓂᕐᕈᑎᒋᑉᓗᒍ, ᐃᑲᔫᑎᒃᑯᑦ ᐊᖏᖅᑕᐅᓕᓚᐅᖅᑐᑦ 25-ᖑᔪᑦ Hᐊᑭᖅᑎᑯᓗᐃᑦ ᐊᓐᓄᕌᖅᑖᕈᓐᓇᖁᑉᓗᒋᑦ ᐃᓗᐃᑦᑐᒃᑯᑦ.
“ᐃᓚᖏᑦ ᑎᑭᓚᐅᖅᑐᑦ ᐊᕐᕌᓂ ᐅᑭᐅᑉ ᓄᙳᕈᔪᐊᓂ ᑭᓯᐊᓂ ᐃᓗᐃᑦᑐᒃᑯᑦ ᑎᑭᓕᑕᐃᓐᓇᓚᐅᖅᑐᑦ ᖁᕕᐊᓱᒡᕕᐅᑉ ᖃᓂᒋᔭᖓᓂᒃ,” ᑕᐃᒪᓐᓇ ᐅᖃᖅᖢᓂ ᒪᓐᕈ.
“ᐊᑐᓚᐅᖅᑕᖅᐳᑦ ᐃᓕᓐᓂᐊᕐᕕᑦ ᐊᒻᒪᓗ ᕿᑎᒃᑐᓕᕆᔨᒃᑯᑦ ᓴᓇᔨᖏᑦ ᓇᓗᓇᐃᔭᐃᓂᕐᒧᑦ 24-ᓂᒃ ᐅᕝᕙᓘᓐᓃᑦ 25-ᓂᒃ ᓄᑕᖅᑲᓂᒃ ᐃᑲᔫᓯᐊᖅᑖᕆᐊᓕᖕᓂᒃ ᐊᓐᓄᕌᖅᑖᕈᑎᒃᓴᒃᑯᑦ, ᖃᓄᖅ ᐊᖏᑎᒋᔪᓂᒃ ᐱᑖᕆᐊᖃᕐᓂᖏᓐᓄᑦ ᓇᓗᓇᐃᔭᐃᑉᓗᑕ ᐊᒻᒪᓗ ᓈᒻᒪᒋᓇᔭᖅᑕᖏᓐᓄᑦ ᑎᑎᕋᖅᓯᒪᔪᑦ ᐊᐅᓪᓚᖅᑎᖦᖢᑎᒍᑦ ᑲᓇᑕᒥ Hᐊᑭᕕᒡᔪᐊᖅᑎᒃᑯᑦ ᑲᑐᔾᔨᖃᑎᒌᒃᑯᑦ ᑲᒪᔨᖓᓄᑦ ᑕᒡᕘᓇ ᐃᑲᔫᑎᒃᑯᑦ ᑕᐃᒪᓕ ᓇᒃᓯᐅᔾᔭᐅᓕᓚᐅᖅᑐᒍᑦ ᓈᒻᒪᒋᔭᐅᔪᓂᒃ ᐊᓐᓄᕌᒃᓴᕆᔭᐅᓂᐊᖅᑐᓂᒃ ᐃᓗᐃᑦᑐᒃᑯᑦ.
“ᑕᒪᓐᓇ ᐃᑲᔫᑎᒃᓴᑦᑎᐊᕙᒻᒪᕆᐊᓗᒃ ᓄᑕᖅᑲᑉᑎᓐᓄᑦ ᐊᒻᒪᓗ ᐃᑲᔪᖅᑏᑦ ᐱᔨᑦᓯᕋᑦᑎᐊᖅᑐᐊᓘᓚᐅᖅᑐᑦ. “ᐃᑲᔪᓪᓚᕆᓚᐅᖅᑐᑦ ᐱᔭᕆᐊᖃᖅᑕᖅᐳᑦ ᐱᔪᓐᓇᖁᑉᓗᒋᑦ ᐊᒻᒪᓗ ᓄᑕᖅᑲᑦ ᓈᒻᒪᒃᓴᕈᓐᓇᖁᑉᓗᒋᑦ ᐊᓐᓄᕌᖅᑖᒥᓂᒃ.
“ᓄᑕᖅᑲᑦ ᑕᒪᕐᒥᒃ ᓈᒻᒪᒃᓴᑦᑎᐊᖅᑐᐊᓘᔮᓚᐅᖅᑐᑦ ᐃᖢᐊᖏᓕᐅᕈᑎᑕᖃᖅᑑᔭᓚᐅᙱᑦᑐᖅ.”
Hᐅᒻ ᐅᖃᖅᖢᓂ ᐃᑲᔪᕆᐊᑲᐅᑎᒋᓕᓚᐅᖅᑐᕉᖅ ᒪᓐᕈ ᐊᐱᕆᖕᒪᒍ ᐃᑲᔪᕈᓐᓇᕐᒪᖔᕐᒥ.
ᐅᖃᓕᖅᖢᓂ ᐃᖕᒥᓂᒃ ᒪᓐᕈᓗ ᐋᖅᑭᒃᓱᐃᖃᑎᒌᓕᓚᐅᕐᓂᕐᒥᓄᑦ ᑕᒪᑐᒥᙵ ᑕᐃᑲᙵᑦ ᐱᒋᐊᖅᖢᒍ.
“ᖃᐅᔨᒪᓗᒃᑖᕐᓚᒃᑲᑉᑭᑦ ᑕᒪᕐᒥᒃ ᓄᑕᖅᑲᑦ ᑕᒡᕙᓂ ᓄᓇᓕᖕᒥ, ᑕᐃᒪᐃᒻᒪᑦ ᐃᑲᔪᕈᓐᓇᕋᓱᒋᓚᐅᕋᒪ,” ᑕᐃᒪᓐᓇ ᐅᖃᖅᖢᓂ Hᐅᒻ.
“ᓄᑕᖅᑲᑦ ᖁᕕᐊᓱᒃᑐᑯᓘᓚᐅᖅᑐᑦ ᐊᓐᓄᕌᖅᑖᖅᑐᓕᕋᒥᒃ.
“ᑮᓇᑯᓗᖏᑦ ᑕᑯᑉᓗᒋᑦ − ᖁᕕᐊᓱᒃᑐᑯᓘᓚᐅᖅᑐᑦ. ᐊᓕᐊᓇᐃᒍᓱᒃᑐᑯᓗᐃᑦ.
“ᐊᑎᕐᓂᒃ ᐱᓯᒪᔪᒍᑦ ᐊᕐᕌᒍ ᐊᓐᓄᕌᖅᑖᕆᐊᖃᕈᒫᖅᑐᓂᒃ, ᑕᐃᒪᐃᒻᒪᑦ ᐆᒃᑐᒃᑲᓐᓂᕈᒫᖅᑐᒍᑦ.”