ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓄᑦ ᐊᖓᔪᖄᕆᔭᐅᓚᐅᖅᓯᒪᔪᖅ ᑳᑎ ᑕᐅᑐᖏ ᐃᓱᒪᓚᐅᖅᐳᖅ ᒐᕙᒪᓕᕆᓂᕐᒧᑦ ᐱᓕᕆᒃᑲᓐᓂᕆᐊᕐᓂᕐᒥᓄᑦ ᓄᓇᕗᒥ ᖃᓄᐃᓕᐅᖅᑕᐅᒋᐊᖃᖅᑐᑦ ᐱᔾᔪᑎᒋᓪᓗᒋᑦ, ᐃᓱᒪᒋᓚᐅᕐᒪᒋᑦ ᐱᓕᕆᐊᕆᔭᐅᖏᓗᐊᕐᓂᖏᓐᓄᑦ.
ᐊᑎᒥᓂᒃ ᐃᓕᓯᖃᑕᐅᓚᐅᖅᐳᖅ ᑲᖏᖅᖠᓂᖅ ᐅᐊᖕᓇᖓᓄᑦ/ᐃᒡᓗᓕᒑᕐᔪᖕᒧᓪᓗ ᐊᒃᑐᐱᕆ 30-ᒥ ᓄᓇᕗᒥ ᓂᕈᐊᕐᓇᐅᓕᖅᑎᓪᓗᒍ, ᐱᔫᒥᓴᐅᑎᓕᕆᓕᖅᖢᓂᓗ, ᐊᒃᓱᕈᖅᑎᑕᐅᓚᐅᖅᖢᓂᓗ ᓰᑐᕆᒃ ᐊᐅᑐᒧᑦ ᓵᓚᒃᓴᓕᓚᐅᖅᐳᖅ ᓂᕈᐊᖅᑕᐅᓪᓗᓂ.
ᑕᐅᑐᖏ ᐅᖃᓚᐅᖅᐳᖅ ᐱᓕᕆᐊᒃᓴᖅᑕᖃᒻᒪᕆᖕᓂᖓᓄᑦ ᓄᓇᕗᑦ ᒐᕙᒪᒃᑯᖏᑦ.
ᐅᖃᓚᐅᖅᖢᓂᓗ ᑭᒃᑯᑐᐃᓐᓇᐃᑦ ᐃᖅᑲᓇᐃᔭᖅᑎᑕᐅᖃᑦᑕᓕᖅᐸᑕ ᑕᒪᒃᑯᐊ ᐊᔪᕈᑎᖃᖅᑐᑦ ᖃᓄᑐᐃᓐᓇᖅ ᑎᒥᒥᒍᑦ ᐱᓕᕆᑎᑕᐅᓂᖅᓴᐅᓕᕐᓂᐊᖅᐳᑦ ᑕᒪᓐᓇ ᐅᖃᐅᓯᕆᔭᐅᓗᐊᖅᓯᒪᖏᒻᒪᑦ.
“ᐃᒡᓗᓕᕆᓂᖅ ᑕᒪᓐᓇ ᐱᒻᒪᕆᐅᑎᑉᐸᕋᑦᑕᐅᒃ,” ᐅᖃᓚᐅᖅᐳᖅ ᑕᐅᑐᖏ.
“ᐃᓄᐃᑦ ᐅᕙᑉᑎᖓᓐᓄᐊᓚᐅᕋᒪ ᑕᑯᖃᑦᑕᓚᐅᖅᖢᖓᓗ ᐃᒡᓗᒥᐅᖃᑎᒌᑦ ᐊᒥᓲᓗᐊᕐᓂᖏᓐᓄᑦ ᐃᓂᒃᓴᖃᖏᑦᑐᑦ 11 ᐃᒡᓗᖃᖅᑐᑦ ᐊᑕᐅᓯᕐᒥᒃ ᒪᕐᕉᖕᓂᒃ ᐃᒡᓗᑕᖃᖅᑐᒥᐅᑕᐃᑦ.
“ᐃᒡᓗᑭᒃᓴᕐᓂᖅ ᐃᓱᒪᒃᑯᑦ ᐃᖢᐃᓪᓕᐅᕈᑕᐅᖕᒪᑦ, ᐃᓅᓯᕐᒧᓪᓗ ᐊᒻᒪ ᐱᕈᖅᐸᓪᓕᐊᓪᓗᓂ ᐊᑐᖅᑕᐅᒋᐊᖃᖅᑐᓄᑦ ᓄᑕᖃᓄᑦ, ᑕᐃᒪ ᓄᑕᖃᓂᒃ ᑕᑯᑉᓗᖓ ᑕᐃᒪᓐᓇ ᐃᒡᓗᖃᖅᑐᒦᑦᑐᓂᒃ, ᖃᐅᔨᒪᕗᖓ ᐃᑲᔪᖏᓐᓇᑉᑎᒍ ᑕᒪᓐᓇ ᐋᖅᑭᒃᓱᖅᑕᐅᒋᐊᖃᕐᒪᑦ.
“ᐃᓱᒪᒃᑯᑦ ᐃᖢᐃᓪᓕᐅᕈᑎᖃᕐᓂᖅ ᑕᒪᓐᓇ ᓄᓇᕗᒥ ᐱᕈᖅᐸᓪᓕᐊᕗᖅ ᐊᒥᓲᓗᐊᖅᑐᑦ ᒪᒃᑯᒃᑐᑦ ᓂᕆᐅᒋᔭᒃᓴᖃᖏᒻᒪᑕ ᓯᕗᓂᒃᓴᒧᑦ, ᐊᒻᒪ ᓂᕆᐅᒋᔭᖃᖅᑎᑦᓯᒋᐊᖃᖅᖢᑕᓗ, ᐊᒻᒪ ᐊᒃᓱᕈᕈᑎᒋᖏᓐᓇᕐᓂᐊᖅᐸᕗᑦ ᐊᓯᖏᑦ ᑲᓇᑕᒥᐅᑕᐃᑦ ᐃᖢᐊᖅᑐᒦᓐᓂᖅᓴᐅᖕᒪᑕ ᒪᒃᑯᒃᑐᖁᑎᖏᓐᓄᑦ.”
ᐅᐸᒃᕕᒃᓴᖃᖏᓐᓂᖏᑦ
ᑕᐅᑐᖏ ᐅᖃᓚᐅᖅᐳᖅ ᐊᒥᓱᑦ ᐃᓄᐃᑦ ᐅᖃᖃᑦᑕᕐᒪᑕ ᓂᕈᐊᒐᒃᓴᐅᖁᔭᐅᑉᓗᖓ ᓄᓇᕗᒥ ᒪᓕᒐᓕᐅᖅᑎᓄᑦ ᓵᕕᒃᓴᖃᖃᑦᑕᖏᓐᓂᕐᒥᖕᓄᑦ ᓄᓇᓕᖕᓂ ᖃᓄᐃᓕᐅᕆᐊᖁᔨᓕᒑᖓᒥᒃ.
ᐅᖃᓚᐅᖅᖢᓂᓗ ᑎᑎᕋᖃᑦᑕᕋᓗᐊᖅᖢᑎᒃ ᐃᑲᔪᖅᑕᐅᒍᒪᑉᓗᑎᒃ ᖃᓄᐃᓕᐅᕆᐊᖁᔨᑉᓗᑎᒃ, ᐊᒻᒪᓗ ᑭᐅᔪᖃᕈᓐᓇᕋᓂ.
“ᐃᓄᐃᑦ ᐃᑲᔪᖅᑕᐅᒋᐊᖃᓪᓚᕆᖕᒪᑕ ᓂᕈᐊᖅᑕᐅᓯᒪᔪᓂᑦ, ᐱᓗᐊᖅᑐᒥᒃ ᐊᑭᑐᔪᓂᒃ ᐊᑭᓕᖅᑐᐃᒋᐊᖃᖅᑎᓪᓗᒋᑦ ᐃᓅᓇᓱᐊᖅᖢᑎᒃ ᐊᑭᔪᓂᒡᓗ ᐊᑭᓕᖅᑐᐃᑉᓗᑎᒃ ᐃᖏᕐᕋᒋᐊᖃᖃᑦᑕᕐᒪᑕ.
“ᐃᓅᒐᓗᐊᕈᕕᑦ ᐃᓅᖏᒃᑲᓗᐊᕈᕕᓪᓘᓐᓃᑦ. ᐊᖅᑯᑎᖃᖏᓐᓇᑉᑕ, ᑕᐃᒪᓐᓇ ᐊᑭᓕᖅᑐᐃᒋᐊᖃᖅᐳᒍᑦ ᐊᑭᑐᔪᒥᓂᒃ ᐊᒥᓱᒻᒪᕆᐊᓗᖕᓂᒃ ᑮᓇᐅᔭᐃᔭᖅᐳᒍᑦ ᑎᖕᒥᓲᓄᑦ ᐊᓯᖃᖏᓐᓂᖏᓐᓄᑦ ᑎᖕᒥᓲᖅᑎᑦ, ᐊᒻᒪ ᒫᓐᓇ, ᑐᑭᓯᕗᖓ, ᑎᖕᒥᓲᖃᖅᑐᑦ ᑕᒫᓂ ᐊᑐᕐᓂᖃᖏᓕᕐᒪᑕ ᑲᑎᖅᓱᐃᒍᑎᓂᒃ ᑎᖕᒥᓲᒃᑰᕈᑎᒃᓴᓂᒃ ᐊᑭᓖᖏᓪᓗᓂ ᐃᖏᕐᕋᔪᓐᓇᕈᑎᓂᒃ ᑖᒃᑯᐊ Aeroplan−ᒥᒃ.
“ᑕᐃᒪ, ᐄ, ᑕᒪᓐᓇᓗ ᑕᒡᕙ ᐃᓱᒪᓕᐅᕈᑎᒋᓚᐅᖅᐸᕋ ᓂᕈᐊᖅᑕᐅᓇᓱᐊᕈᑎᒋᔾᔪᑎᒋᓚᐅᖅᑕᕋ.”
ᑕᐅᑐᖏ ᐃᒡᓚᓚᐅᖅᐳᖅ ᖃᐅᔨᒪᓚᐅᕐᒪᖔᑦ ᓂᕈᐊᖅᑕᐅᓂᐊᕐᓂᕐᒥᓄᑦ ᓂᕈᐊᕐᓇᐅᓕᖅᑎᓪᓗᒍ ᐊᒃᑐᐱᕆ 30-−ᒥ ᐅᖃᖅᖢᓂᓗ ᓂᕈᐊᕐᓂᖅ ᐊᑎᖃᖅᑎᑕᐅᒐᔭᕐᒪᑦ “ᖃᖓᑕᓂᖅ” ᑐᓐᖓᓇᖏᒻᒪᑦ ᖃᖓᑕᐃᓐᓇᕐᓇᕐᒪᑦ ᑭᓯᐊᓂ ᓂᕈᐊᕈᑎᑦ ᓈᓴᖅᑕᐅᓯᒪᑦᓯᐊᓕᖅᐸᑕ.
ᐅᖃᓚᐅᖅᖢᓂᓗ ᓵᓚᒃᓴᕈᒪᓐᓇᑦᓯᐊᖅᑐᖅ ᐃᒃᐱᒋᓐᓇᕐᒪᑦ, ᐆᒻᒪᑎᒃᑯᑦ ᐊᒻᒪ ᐃᓱᒪᒃᑯᑦ, ᓂᕈᐊᖅᑕᐅᒍᕕᑦ ᐃᑲᔪᕈᓐᓇᕐᓂᐊᖅᐳᑎᑦ ᐃᓅᖃᑎᖕᓂᒃ ᓂᕈᐊᖅᑕᐅᕕᒋᔭᕐᓂ, ᑕᒪᓐᓇ ᐱᒻᒪᕆᐅᑎᑦᖢᓂᐅᒃ.
“ᐃᒡᓗᓕᒑᕐᔪᖕᒧᐊᖅᓯᒪᓪᓗᖓ, ᑕᒪᕐᒥᒃ ᐃᓐᓇᑐᖃᐃᑦ ᒪᒃᑯᒃᑐᓪᓗ ᖃᐃᖃᑦᑕᓚᐅᕐᒪᑕ ᐅᖃᖅᖢᑎᒡᓗ ᑕᒪᒃᑯᐊ ᐱᖁᑎᑦ ᓄᓇᓕᖕᓂ ᓄᑕᐅᖏᓗᐊᓕᕐᒪᑕ, ᐃᒡᓗᓕᒑᕐᔪᒃ ᐊᑭᔪᑎᓂᒃ ᓴᓇᕕᐅᓚᐅᖅᓯᒪᖏᒻᒪᑦ ᑕᐃᒪᖓᓂᑦ 1999−ᒥᑦ.
“ᐊᖏᕐᕋᖏᓐᓄᐊᖃᑦᑕᓚᐅᕋᒪ ᐊᑐᓂ ᐅᖃᓪᓗᕆᒃᓴᖃᑎᒋᑉᓗᒋᓪᓗ, ᐊᒻᒪ ᐱᓕᕆᐊᒃᓴᖃᒻᒪᕆᒃᐳᖓ.
“ᓂᕈᐊᖅᑕᐅᓚᐅᖅᖢᖓ, ᐊᑐᓂ ᐱᓕᕆᔨᓂᒃ ᐊᔾᔨᒌᖏᑦᑐᓂ ᒐᕙᒪᒃᑯᑦ ᑎᑎᕋᕐᕕᖏᓐᓂ, ᐅᖃᓪᓚᖃᑎᒋᓚᐅᖅᐸᒃᑲ ᒐᕙᒪᒃᑯᓐᓂ ᐱᓕᕆᔨᑦ ᐅᖃᐅᑎᑉᓗᒋᓪᓗ ᐃᑲᔪᕆᐊᖅᑐᖅᓯᒪᓂᕋᖅᖢᖓ, ᑭᓯᐊᓂ, ᐊᒻᒪᓗ, ᐃᑲᔪᖅᑕᐅᒍᒪᓂᐊᖅᖢᖓᑦᑕᐅᖅ.
“ᐃᓄᐃᑦ, ᒐᕙᒪᒃᑯᑦ ᐱᓕᕆᔨᖏᓐᓂᒃ ᑲᑕᒃᑎᑦᓯᓯᒪᒐᔪᖕᒪᑕ ᐊᓯᖏᓐᓂᒃ ᐱᔾᔪᑎᖃᖅᑐᒃᓴᐅᑎᓪᓗᒋᑦ ᐱᐊᓂᒍᓐᓇᖏᔾᔪᑎᒋᔭᒥᓂᒃ ᐱᓕᕆᐊᒥᖕᓂᒃ, ᐊᒻᒪ ᒪᓕᒐᓕᐅᖅᑎᑦ ᐊᒻᒪ ᒐᕙᒪᒃᑯᑦ ᐱᓕᕆᔨᖏᑦ ᐱᓕᕆᖃᑎᒌᑦᓯᐊᕆᐊᖃᖅᐳᑦ ᑕᐃᒪᓐᓇ ᑲᔪᓯᑦᓯᐊᕐᓂᐊᕈᑉᑕ.”
ᑕᐅᑐᖏ ᐅᖃᓚᐅᖅᐳᖅ Walter Morey ᐊᒻᒪ ᒥᐅᕆ ᑕᑎ ᐃᑲᔪᓪᓚᕆᓚᐅᕐᒪᑎᒃ ᓂᕈᐊᖅᑕᐅᓇᓱᐊᖅᑎᓪᓗᒍ.
ᐅᖃᓚᐅᖅᖢᓂ Morey ᑲᒪᒋᔭᖃᖅᖢᓂ ᑕᒪᐃᓐᓂᒃ ᑮᓇᐅᔭᓂᒃ ᐅᖃᑦᓯᐊᖃᑦᑕᓚᐅᖅᖢᓂᓗ ᑭᐅᓪᓗᓂ ᐊᐱᕆᔭᐅᒑᖓᒥ, ᐊᒻᒪ ᑕᑎ “ᐃᓐᓄᕆᑦᓯᐊᖅᖢᓂ” ᓂᕈᐊᖅᑕᐅᓇᓱᐊᖃᑕᐅᑎᓪᓗᖓ.
“ᓴᓐᖏᔪᓂᒃ, ᐊᔾᔨᒌᖏᑦᑐᓂᒡᓗ, ᓂᕈᐊᖅᑕᐅᔪᖃᖅᐳᖅ ᓂᕈᐊᕐᓇᐅᓚᐅᖅᑐᒥ.
“ᒪᕐᕉᓚᐅᖅᐳᑦ ᒪᐃᔭᐅᓚᐅᖅᓯᒪᔪᒃ, ᒪᕐᕉᒡᓗ ᓄᓇᕗᑦ ᑐᓐᖓᕕᒃᑯᑦ ᑎᒥᖓᓐᓄᑦ ᐊᖓᔪᖄᕆᔭᐅᓚᐅᖅᓯᒪᔪᒃ ᐊᓯᖏᓪᓗ ᓄᓇᓕᖕᓂ ᐱᓕᕆᔨᑦ ᓂᕈᐊᖅᑕᐅᓇᓱᐊᖅᑐᑦ, ᐊᒻᒪ ᓴᓐᖏᓕᕈᑎᖃᖅᓯᒪᓚᐅᖅᐳᓪᓗ ᐊᑐᓂ ᐃᓕᓐᓂᐊᕆᐊᖅᑎᑕᐅᓯᒪᑎᓪᓗᑕ, ᑕᒪᓐᓇ ᓇᓗᓇᐃᒃᑯᑕᑦᓯᐊᖑᑉᓗᓂ ᐱᑦᓯᐊᕐᓂᐊᕐᓂᕐᒧᑦ.
“ᑕᒪᑉᑕ ᐊᓯᔾᔩᒍᒪᑉᓗᑕ ᒐᕙᒪᒃᑯᓐᓂᒃ, ᐊᒻᒪ ᓴᓐᖏᔪᒥᒃ ᓯᕗᓕᖅᑎᖃᖁᓪᓗᑕ ᑕᐃᒪᖓᓗᒃᑖᖅ, ᖁᕕᐊᓇᑦᓯᐊᒻᒪᕆᖕᓂᐊᖅᐳᖅ ᐱᓕᕆᖃᑎᒌᒡᓗᓂ.
“ᐱᐅᔪᒻᒪᕆᐅᓪᓗᑎᒡᓗ ᐱᓕᕆᖃᑎᒋᓂᐊᖅᑕᒃᑲ, ᐱᔨᑦᓯᕋᕐᓗᑕ ᐃᓄᖏᓂᒃ ᐆᒻᒪᑎᑦᑎᓐᓂᑦ ᐱᑦᓯᐊᕐᓗᒋᑦ, ᑕᐃᒪᓐᓇ, ᐅᑭᐅᑦ ᑕᓪᓕᒪᐅᓂᐊᖅᑐᑦ, ᐱᐅᔪᓂᒃ ᓴᖅᑭᑦᑐᖃᕐᓂᐊᖅᐳᑦ ᓄᓇᕗᒥ.”