ᐃᓕᒌᑦ ᑲᓇᑐᕆᐅᖑᓂᕋᖅᑕᐅᔪᑦ ᓵᓚᒃᓴᖅᓚᐅᖅᐳᑦ ᑲᖏᖅᖠᓂᕐᒥ

ᓵᓚᐅᓚᐅᙱᓚᑦ ᑳᓇᑐᕆᐅᒃᑯᑦ ᖃᖏᖅᖠᓂᕐᒥ ᕼᐋᑭᖅᑐᐊᓘᑎᓪᓗᒋᑦ, 12-7-ᖑᓚᐅᖅᐳᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ ᐱᙳᐊᖅᑲᑎᖃᖅᑎᓪᓗᒋᑦ ᒫᔾᔨ 4-ᒥ.

ᐊᕐᕌᒍᓕᒫᖅ ᓱᖏᐅᑎᓇᓱᓚᐅᖅᐳᑦ, ᕼᐋᑭᖅᑎᒐᓴᖏᑦ ᓴᖅᑭᖃᑦᑕᓚᐅᖏᓐᓂᖏᓐᓄᑦ ᐊᒃᓃᑯ ᐄᒍᒃᑯᓐᓄᑦ ᐃᖅᑲᓇᐃᔭᕐᓂᖏᓐᓄᑦ ᐅᔭᕋᒃᑕᕐᕕᖓᓐᓂ ᖃᒪᓂ’ᑐᐊ ᖃᓂᒋᔮᓂ ᖃᖏᖅᖠᓂᐅᓪᓘᓐᓃᑦ ᓯᓚᑖᓃᑦᑐᒥ.

ᐋᓐᑐᕈ ᓯᒻᔅ ᐊᖓᔪᖅᑳᕆᔭᐅᖏᓐᓇᓚᐅᖅᐳᖅ ᑳᓇᑐᕆᐅᒃᑯᑦ ᐃᓕᒌᖏᓐᓄᑦ, ᐱᔪᓐᓇᕐᓂᖏᓪᓗ ᐊᔾᔨᒌᓚᐅᙱᓚᑦ ᑕᐃᒪᙵᓕᒫᖅ ᕼᐋᑭᕈᓐᓇᑐᐊᕌᖓᒥᒃ.

ᑕᐃᒪᐃᑦᑐᒐᓚᐅᓚᐅᖅᑐᒡᒎᖅ ᕼᐋᑭᖅᑎᒐᓚᐃᑦ ᐱᙳᐊᖅᑎᖃᑦᑎᐊᙲᓐᓇᕐᓂᖏᓐᓄᑦ M&T, A&K ᐊᒻᒪᓗ KIA-ᑯᓐᓂ.

“ᐅᔭᕋᒃᑕᕆᐊᕐᕕᖕᒦᑦᑐᖃᒐᔪᓚᐅᕐᓂᖓᓄᑦ ᐊᕐᕌᒍᓕᒫᖅ ᕼᐋᑭᕕᒡᔪᐊᖅᑎᓪᓗᒋᓪᓗ, ᑭᓯᐊᓂ ᐱᙳᐊᖅᑎᓪᓗᒋᑦ ᓇᓪᓕᐊᑐᐃᓐᓇᖅ ᓇᓗᓇᓚᐅᙱᓚᖅ ᐱᔪᓐᓇᕐᓂᖏᑦ”,” ᓯᒻᔅ ᐅᖃᓚᐅᖅᐳᖅ. “ᐃᖅᑲᓇᐃᔮᖃᖅᑐᒐᓴᐅᓂᖏᓐᓄᑦ, ᐊᑐᐃᓐᓇᖅᑕᖃᑲᑕᖏᔾᔪᑎᒋᕚ, ᐅᓐᓄᑕᒫᑦ ᕼᐋᑭᖅᐸᒃᑎᓪᓗᒋᑦ.”

ᓯᒻᔅ ᐅᖃᓚᐅᖅᑐᖅ ᑭᖑᓪᓕᖅᐹᖅᓱᓕᒑᑎᓪᓗᒋᑦ ᑲᔪᓯᓇᔭᖅᑐᒃᓴᐅᓇᔭᓚᐅᖅᑐᑦ ᑭᒡᓕᐅᔪᒧᑦ ᐱᖓᓱᓄᑦ ᐱᙳᐊᕐᓂᐅᔪᓄᑦ M&T ᐊᒻᒪ A&K ᕼᐋᑭᖅᑎᑕᖃᐅᓚᐅᖏᓐᓂᖓᓄᑦ ᑲᔪᓯᑦᑎᐊᓚᐅᖏᑦᑐᑦ.

ᐅᖃᓚᐅᖅᐳᖅ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᒃᑯᓐᓄᑦ ᑳᓇᑐᕆᐅᒃᑯᓐᓄᓪᓗ ᕼᐋᑭᖅᑏᑦ ᕿᓚᒻᒥᐅᓚᐅᕐᓂᖏᓐᓄ ᐱᙳᐊᖅᑎᑕᖃᐅᑦᑎᐊᖏᓐᓂᖓᓄᑦ ᑭᖑᓪᓕᖅᐹᖅᓱᕈᔪᓕᖅᑎᓪᓗᒋᑦ.

“ᖃᐅᔨᒪᔪᐃᓐᓇᐅᔪᒍᑦ ᖃᓄᐃᒋᖏᖦᖢᑎᒍᓪᓗ ᐊᐅᓚᑦᑐᓐᓇᙱᓐᓇᑦᑎᒍᑦ,” ᓯᒻᔅ ᐅᖃᖅᖢᓂ. “ᐱᓕᕆᔭᒃᓴᖃᕐᒪᑕ, ᑕᐃᒪᓐᓇ ᑭᓯᐊᓂᐅᓪᓗᓂᓗ. ᓄᓇᓕᑦᑎᓐᓄᑦ ᐱᐅᖕᒪᑦ.”

ᓯᒻᔅ ᐅᐱᒍᓱᓚᐅᕆᕗᖅ ᐊᓯᖏᓐᓂ ᐃᓕᒋᖏᑦᑕᖏᓐᓂᒃ ᕼᐋᑭᑦᑎᐊᓚᐅᕐᓂᖏᓐᓂᒃ, ᐱᙳᐊᖅᑎᖃᑦᑎᐊᖏᒃᑲᓗᐊᖅᑎᓪᓗᒋᑦ.

“ᕼᐋᑭᓚᐅᖅᐳᑦ ᐊᔪᙱᓐᓂᓕᒫᖏᓐᓂ - ᐱᙳᐊᖃᑎᒌᑦᑎᐊᓚᐅᖅᐳᑦ - ᑭᓯᐊᓂ ᐱᙳᐊᖅᑎᖃᑦᑎᐊᕐᓇᑎᒃ ᑕᖃᓇᕈᓐᓇᕐᒪᑦ. ᐊᑲᐅᓈᓚᐅᖅᑐᖅ ᐱᖓᓱᑦ ᕼᐋᑭᕈᓐᓇᖃᑎᖃᕈᓐᓇᖃᑦᑕᓚᐅᕐᒪᑕ ᐅᕙᑦᑎᓐᓂ ᓈᒪᓪᓚᕆᖏᒃᑲᓗᐊᖅᑎᓪᓗᒋᑦ.” ᐃᓚᖓᑦ ᕼᐋᑭᖅᑏᑦ ᐅᑎᕈᓐᓇᓛᖅᑐᒃᓴᐅᕗᑦ ᐊᕐᕌᒎᓛᖅᑐᒥ ᑲᖏᖅᖠᓂᐅᑉ ᐃᓐᓇᕐᓄᑦ ᐊᖑᑏᑦ ᕼᐋᑭᖅᑎᖏᑦ ᑖᒃᑯᐊᑦᑕᐃᓐᓇᐅᓪᓗᐊᑕᕐᓗᑎᒃ ᑕᓪᓕᒪᑦ ᐃᓕᒌᑦ, ᓯᒻᔅ ᐅᖃᓚᐅᖅᐳᖅ.

“ᐅᑭᐅᑦᑎᐊᕙᐅᓚᐅᖅᐳᖅ ᕼᐋᑭᖅᑎᓄᑦ, ᐅᖃᓚᐅᖅᑐᖅ.

ᐴᖅᑎᑦᑎᒃᑲᐅᓛᖑᓚᐅᖅᑐᑦ ᐱᖓᓱᑦ 2017-18-ᒥ ᐅᑯᐊᖑᓚᐅᖅᐳᑦ ᑕᐃᕕᑦ ᑲᓛᒃ (48-ᓂᒃ ᐃᓯᖅᑎᑦᑎᓪᓗᓂ, 58-ᖏᖅᓱᖅᖢᓂ ᐃᑲᔪᓚᐅᖅᑐᖅ ᐃᓯᖅᑎᑦᑎᔪᒥᒃ 106-ᖏᓐᓃᑦᑐᓂᒃ ᐴᖅᑎᑕᐅᔪᓂᒃ), ᑐᕆᔅᑎᓐ ᑎᐊᔅ (40-ᓂ ᐃᓯᖅᑎᑦᑎᓚᐅᖅᑐᖅ, 37-ᓂᐃᑲᔪᓚᐅᖅᑐᖅ ᐃᓯᖅᑎᑦᑎᔪᒥᒃ, 77-ᖏᓐᓃᑦᑐᓂᒃ ᐴᖅᑎᑕᐅᔪᓂᒃ) ᔮᓐ ᑭᙳᐊᑦᓯᐊᖅ (36-ᓂ ᐃᓯᖅᑎᑦᑎᓚᐅᖅᑐᖅ, 38-ᓂ ᐃᑲᔪᓚᐅᖅᑐᖅ ᐃᓯᖅᑎᑦᑎᔪᒥᒃ 74-ᖏᓐᓃᑦᑐᓂᒃ ᐴᖅᑎᑦᑎᔪᓂᒃ).