16-ᖑᔪᒥ ᐊᕐᕌᒍᑕᒫᒥ ᐹᓐᑲᐃᒃᒥ ᐅᓪᓛᕈᒻᒥᑕᖅ ᐅᐸᒃᑎᑦᑎᓚᐅᖅᐳᖅ ᐅᓄᓛᖑᔪᓂ ᐃᓄᖕᓂᑦ ᒫᓐᓇᒧᑦ ᑎᑭᖦᖢᒍ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓄᑦ (VSS) ᐃᒡᓗᓕᒑᕐᔪᖕᒥ ᑕᖅᑭᐅᓚᐅᖅᑐᒥ.
ᐅᓪᓛᕈᒻᒥᑕᖅ ᐋᖅᑭᒃᑕᐅᓯᒪᒐᔪᒃᐳᖅ ᓇᒡᓕᒍᓱᖕᓇᐅᔪᒥ ᐅᓪᓗᖓᓄᑦ, ᑭᓯᐊᓂ ᑕᒪᑐᒪᓂ ᐊᕐᕌᒎᔪᒥ ᖃᓄᐃᓕᐅᕐᓂᖓᓂ ᐅᖓᕙᕆᐊᖅᑕᐅᔭᕆᐊᖃᓚᐅᖅᐳᖅ ᑭᓯᐊᓂ ᕕᕈᐊᕆ 23-ᖑᕐᒪᑦ ᓂᒡᓚᓱᕐᔪᐊᕐᓂᐅᔪᒧᑦ ᑭᕙᓪᓕᓕᒫᖅ ᐊᑐᓚᐅᖅᑕᖓᓂ ᑲᒪᕐᒥᒐᓚᖕᒥ ᕕᕈᐊᕆᒥᑦ.
ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓄᑦ ᐃᓕᓴᐃᔨ ᒐᓚᓐ ᐳᕌᑯᓪᐹᖕᒃ ᐅᖃᓚᐅᖅᐳᖅ ᐅᓪᓛᕈᒻᒥᑕᖅ ᐅᖓᕙᕆᐊᖅᑕᐅᓚᐅᖅᐳᖅ ᐃᑲᕐᕋᓄᑦ ᒪᕐᕉᖕᓄᑦ ᑕᒪᑐᒪᓂ ᐊᕐᕌᖑᒥ, ᐱᒋᐊᖅᖢᓂ 8:30 ᐅᓪᓛᒃᑯᑦ 10:30-ᖑᕋᓱᐊᕐᓂᖓᓄᑦ ᐅᓪᓛᒃᑯᑦ
ᐅᖃᓚᐅᖅᐳᖅ ᐃᑲᕐᕋᒃᑲᓐᓂᐅᔪᖅ ᑐᓂᓯᓂᖃᓚᐅᖅᐳᖅ ᑐᐊᕕᙱᓐᓂᖅᓴᐅᔪᒥ ᖃᓄᐃᓕᐅᕐᓂᐅᔪᒧᑦ, ᐃᓄᓕᒫᓄᑦ ᐊᓕᐊᓇᐃᒋᔭᐅᔫᔮᖅᖢᓂ.
“90-ᐸᓗᖕᓂ ᓄᑕᖅᑲᓂᑦ ᐃᓕᓐᓂᐊᕐᕕᖕᒥ ᐅᓪᓛᕈᒻᒥᑕᖅᑐᓄᐊᓚᐅᖅᐳᑦ, ᐊᒻᒪᓗᑦᑕᐅᖅ ᓱᓕᒃᑲᓐᓂᖅ 80-ᓂ 90-ᓄᑦ ᓄᓇᓕᖕᓂᑦ,” ᐅᖃᓚᐅᖅᐳᖅ. “ᐊᖓᒧᖅᑳᓂᑦ ᐊᒻᒪ ᐃᓄᑐᖃᕐᓂᑦ ᐃᓕᓐᓂᐊᕐᕕᖕᒦᕋᐅᔭᖅᑐᖃᓚᐅᕆᕗᖅ, ᑕᒪᓐᓇ ᑕᑯᒥᓇᓚᐅᖅᐳᖅ. ᐃᓕᓐᓂᐊᕐᕕᐊᕈᓯᕐᓂ ᖃᐅᔨᒋᐊᖅᐸᒃᖢᑎᒃ ᐅᓪᓛᕈᒻᒥᑕᖅ ᓱᓕ ᐱᓕᕆᐊᖑᑎᓪᓗᒍ.”
ᐳᕌᑯᓪᐹᖕᒃ ᐅᖃᓚᐅᖅᐳᖅ ᑕᒪᕐᒥᒃ ᓂᕆᓂᐊᖅᑕᒥᓂᑦ ᐱᓚᐅᖅᐳᑦ ᐃᓕᓐᓂᐊᕐᕕᐅᑉ ᓂᕿᓕᐅᕐᕕᖓᓂ ᐊᒻᒪ ᑐᕌᖅᖢᑎᒃ ᕿᑎᕐᕕᐊᓄᑦ ᐅᓪᓛᕈᒻᒥᑕᕐᓂᐊᖅᑕᒥᓄᑦ, ᐃᓚᖃᓚᐅᖅᑐᒥ ᐹᓐᑲᐃᒃ, ᐸᐃᑲᓐ, ᓵᓯᔾ, ᐃᒥᒐᒃᓴᖅ ᐊᒻᒪᓗ ᐊᔾᔨᒌᙱᑦᑐᓂ ᐸᐅᕐᙵᓂᑦ ᐊᒻᒪ ᐱᕈᖅᑐᓂᑦ ᓰᕐᓇᖅᑐᓂᑦ.
“ᕇᓇ ᐄᓴᓗᒃ ᓂᕿᓕᐅᖅᑎᒋᓚᐅᖅᐸᕗᑦ, ᑕᐃᒫᒃ ᐃᑉᐸᒃᓴᖓᓂ ᐅᓪᓛᕈᒻᒥᑕᕐᓂᐅᓂᐊᖅᑐᒥ ᐅᐸᓚᐅᖅᐳᖅ ᐊᒻᒪᓗ ᐆᑦᑎᓪᓗᓂᒋᑦ ᐸᐃᑲᓐᓕᒫᑦ ᐊᒻᒪ ᓵᓯᔾ ᐆᓇᖅᓯᑦᑎᑐᐃᓐᓇᕆᐊᖃᓚᐅᖅᐸᕗᑦ ᐃᒐᒧᑦ ᐅᓪᓛᖓᓂ,” ᐅᖃᓚᐅᖅᐳᖅ. “ᑕᐃᑲᓃᓕᓚᐅᖅᐳᖅ 6 ᐅᓪᓛᒃᑯᑦ ᐅᓪᓛᖓᓂ ᐅᓪᓛᕈᒻᒥᑕᕐᓂᐅᓂᐊᖅᑐᒥ ᐹᓐᑲᐃᒃᓕᐅᖅᐸᓪᓕᐊᓂᕐᒧᑦ, ᐊᒻᒪᓗ ᐊᓯᖏᓐᓂᑦ ᐃᖅᑲᓇᐃᔭᖅᑎᓂᑦ ᖃᐃᓪᓗᑎᒃ 7-ᒥ ᐅᓪᓛᒥ 8 ᐅᓪᓛᒧᑦ ᐃᑲᔪᕆᐊᖅᑐᕆᓪᓗᑎᒃᑕᐅᖅ.”
ᐃᖅᑲᓇᐃᔭᖅᑎᓕᒫᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ ᐊᑭᓕᖅᓱᖅᑕᐅᓇᑎᒃ ᐃᑲᔪᓚᐅᖅᐳᑦ ᐃᑲᔪᕐᓂᕐᒧᑦ ᐊᕐᕌᒍᑕᒫᒥ ᖃᓄᐃᓕᐅᕐᓂᐅᔪᒧᑦ, ᐳᕌᑯᓪᐹᖕᒃ ᐅᖃᓚᐅᖅᐳᖅ ᐱᓕᕆᑦᑎᐊᕕᒡᔪᐊᓚᐅᕐᓂᖓᓂ ᐃᓕᓐᓂᐊᖅᑎᓄᑦ, ᐃᖅᑲᓇᐃᔭᖅᑎᓄᑦ ᐊᒻᒪᓗ ᓄᓇᓕᖕᒥᐅᑕᔪᓄᑦᑕᐅᖅ.
ᐅᖃᓚᐅᖅᐳᖅ ᓂᕿᓕᐅᖅᑎ ᐄᓴᓗᒃ ᐃᑲᕐᕋᐸᓗᖕᓂ 8-ᓂ ᐱᓕᕆᓂᕐᒧᑦ ᐅᓪᓛᕈᒻᒥᑕᕐᒧᑦ, ᐊᓯᖏᓪᓗ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᑕ ᐃᖅᑲᓇᐃᔭᖅᑎᖏᓐᓂ ᐃᑲᔪᖃᑕᐅᒋᓪᓗᑎᒃᑕᐅᖅ.
“(ᐄᓴᓗᒃ) ᐊᐅᓚᑦᑎᔨᐅᓚᐅᖅᐳᖅ ᐊᒻᒪᓗ ᑲᒪᓇᕐᔪᐊᓚᐅᖅᐳᖅ,” ᐅᖃᓚᐅᖅᐳᖅ ᐳᕌᑯᓪᐹᖕᒃ. “ᐸᕐᓇᐃᓲᖑᒋᕗᖅ ᐅᓪᓛᕈᒻᒥᑕᕐᒧᑦ ᐱᓕᕆᐊᖑᔪᒧᑦ ᐊᒻᒪᓗ ᐱᓐᓇᕆᕙᕗᑦ ᕕᒃᑐᕐ ᓴᒻᒧᖅᑐᖅ ᐃᓕᓐᓂᐊᕐᕕᖓᓂ.”
