ᐱᔾᔪᔾᔨᑉᓗᓂ ᓇᒡᓕᒍᓱᖕᓂᒃᑯᑦ ᐃᑲᔪᕈᒪᓂᒃᑯᑦ ᐱᕚᓪᓕᕐᓇᖅᑐᒻᒪᕆᐊᓗᒃ ᐊᒻᒪᓗ, ᐃᓚᖏᑦᑎᒍᑦ ᒪᒪᖅᑐᒻᒪᕆᐊᓘᑉᓗᑎᒃ.
ᑎᐅᕆᓐᔅ ᑐᑐ ᐃᖅᑲᐅᒪᑉᓗᒍ Hᐊᑭᕕᒡᔪᐊᓲᑦ ᒥᒃᓵᓄᑦ ᑲᑎᒪᔩᑦ ᑲᑎᒪᔨᐅᖃᑎᖏᑦ ᐊᑐᐊᑦᔪᐊᖅ ᐊᒃᓴᕐᓂᖅ ᐊᒻᒪᓗ Hᐃᒪᔅ ᑕᑎ Hᐊᒻᓚᒃᑯᑦ ᓄᓇᒃᑰᕈᑎᓕᕆᕝᕕᖓᓃᕋᐅᔭᖅᖢᑎᒃ ᑲᖏᖅᖠᓂᕐᒥ ᐱᙳᐊᖅᑐᓕᕆᔨᒃᑯᑦ ᓴᓇᔨᖏᓐᓂᒃ ᓴᓇᔪᓂᒃ ᑕᐅᑐᒃᖢᑎᒃ ᑲᖏᖅᖠᓂᐅᑉ ᓯᐊᕐᕆᔮᕐᕕᖓᓂᒃ ᓯᑯᓕᕆᔾᔪᑎᒥᒃ ᒫᑦᓯ 24-ᒥ.
ᐊᒃᓴᕐᓂᖅ ᐊᒻᒪᓗ ᑕᑎ ᓂᑲᓪᓗᖓᑉᓗᑎᒃ ᐅᖃᐅᓯᖃᐅᔭᖅᖢᑎᒃ ᖃᐅᒃᐸᑦ Hᐊᑭᕕᒡᔪᐊᕋᔭᓕᓚᐅᕐᓂᖏᓐᓄᑦ ᓄᕙᒡᔪᐊᕐᓂᖅ ᓴᖅᑭᓚᐅᙱᑉᐸᑦ ᐊᒻᒪᓗ ᐅᔾᔨᖅᑐᖁᔭᐅᓕᓚᐅᖅᑎᓪᓗᒋᑦ ᓯᐊᒻᒪᒃᐸᓪᓕᐊᖁᓇᒍ.
ᐊᒃᓴᕐᓂᖅ ᐅᖃᖅᖢᓂ Hᐊᑭᕕᒡᔪᐊᖅᑎᑦᑎᔩᑦ ᓄᓇᒥᓂᒃ ᐃᑲᔪᕋᔪᖕᒪᑕ Hᐊᑭᕕᒡᔪᐊᓕᕌᖓᑕ, ᑕᐃᒪᐃᒻᒪᑦ ᐱᔾᔪᑎᒃᓴᖃᙱᑦᑐᑦ ᐃᑲᔪᕋᓱᒐᔭᙱᓐᓂᕐᒧᑦ ᐃᓚᒌᖕᓂᒃ ᓄᓇᓕᖕᒥ, Hᐊᑭᕕᒡᔪᐊᕐᓂᐅᔪᖅ ᑲᔪᓯᔾᔮᙱᒃᑲᓗᐊᖅᑎᓪᓗᒍ ᑕᒡᕙᓂ ᐅᑭᐅᒥ.
“ᐲᑦᓴᓕᐅᖅᑎᑦᑎᔪᒪᑉᓗᑕ ᐃᓱᒪᓕᐅᓕᓚᐅᖅᑐᒍᑦ ᐊᒻᒪᓗ ᐊᐱᖅᓱᑲᑕᒃᖢᑕ ᑭᒃᑯᑦ ᐃᓚᒌᒃ ᐲᑦᓴᑖᖅᑎᑕᐅᓇᔭᕐᒪᖔᑕ, ᐅᕝᕙᓘᓐᓃᑦ ᒪᕐᕉᖕᓂᒃ, ᐃᓱᒪᒋᓗᒋᑦ ᖃᓄᖅ ᐃᓄᒋᐊᒃᑎᒋᓂᖏᓐᓄᑦ,” ᑕᐃᒪᓐᓇ ᐅᖃᖅᖢᓂ ᐊᒃᓴᕐᓂᖅ.
“ᑕᐃᒪᐃᒻᒪᑦ ᑎᑭᓴᐃᓕᓚᐅᖅᑐᒍᑦ 22-ᓂᒃ ᐲᑦᓴᓂᒃ ᓵᑦ ᐳᕆᐅᓪᒥ ᓯᐊᕐᕆᔮᕐᕕᒃᑖᓵᖑᔪᒥᒃ ᓂᕿᑖᕐᕕᓕᒃ ᐊᑭᖃᖅᖢᒋᑦ ᐃᒻᒪᖄ $950.00-ᒥᒃ, ᐊᒻᒪᓗ ᑐᓂᐅᖅᑲᐅᑎᒋᑉᓗᒋᑦ 18-ᓄᑦ ᐃᓚᒌᖕᓄᑦ ᐲᑦᓴᓂᒃ ᑎᑭᓴᐃᒐᔪᙱᑦᑐᒃᓴᐅᔪᓄᑦ.
“ᑐᓂᕐᕈᑕᐅᓚᐅᖅᑐᑦ ᐃᓄᑑᑉᓗᑎᒃ ᓄᑕᖅᑲᓂᒃ ᐱᕈᖅᓴᐃᔪᓄᑦ ᐊᓈᓇᐅᔪᓄᑦ ᐊᑖᑕᐅᔪᓄᓪᓗ, ᐃᓚᒌᖕᓄᑦ ᓄᑕᕋᕆᐊᒃᑐᓄᑦ, ᐊᒻᒪᓗ ᐃᑲᔪᖅᑕᐅᔭᕆᐊᓕᖕᓄᑦ ᐃᓚᒌᖕᓄᑦ.”
ᑎᐅᕆᓐᔅ ᑐᑐ ᐃᖅᑲᐅᒪᑉᓗᒍ Hᐊᑭᑦᑐᓂᒃ ᑲᒪᔩᑦ ᑲᑎᒪᔨᕋᓛᑦ ᐃᑲᔪᖃᑦᑕᖅᑐᑦ ᖃᑉᓯᑲᓪᓚᖕᓂᒃ ᖃᓄᐃᓕᐅᕈᑕᐅᔪᓂᒃ ᐅᑭᐅᑉ ᐃᓗᐊᓂ. ᐊᒃᓴᕐᓂᖅ ᐅᖃᖅᖢᓂ ᑲᑎᒪᔨᕋᓛᑦ ᑐᓂᓯᓇᓱᖃᑦᑕᕐᒪᑕ $10,000-ᒧᑦ ᑎᑭᖦᖢᒍ ᐅᑭᐅᑉ ᐃᓗᐊᓂ, ᐊᖏᓂᖅᓴᖅ ᑐᓂᕐᕈᑕᐅᓲᖅ Hᐊᑭᖅᑎᐊᓛᓄᑦ.
ᐅᖃᖅᖢᓂ ᑕᒪᓐᓇ ᐱᔾᔪᑎᒋᑉᓗᒍ, ᐃᑲᔪᕋᓱᖕᓂᕐᒨᖓᔪᖅ ᐱᕕᒃᓴᖃᕈᓐᓇᖁᑉᓗᒋᑦ ᑲᖏᖅᖠᓂᕐᒥ Hᐊᑭᖅᑎᐊᓛᑦ, ᐊᒻᒪᓗ ᐱᓕᕆᓇᓱᖃᑦᑕᖅᑐᑦ ᐊᓯᖏᑦᑎᒍᑦᑕᐅᖅ ᓄᓇᓕᖕᒥ, ᓲᕐᓗ ᑲᖏᖅᖠᓂᐅᑉ ᓂᕿᑖᕐᕕᖓᓂᒃ.
“ᐊᔾᔭᖅᑐᓚᐅᖅᑕᒃᑲ ᑕᒪᕐᒥᒃ 22 ᐲᑦᓴᐃᑦ ᐃᓚᒌᖕᓄᑦ ᐊᒻᒪᓗ ᑕᒪᓐᓇ ᑲᒪᒋᓚᐅᖅᑕᕋ 25 ᒥᓂᑦᓂᖅᑲᐃ.
“ᓵᑦ ᐳᕆᐅᓪ ᐲᑦᓴᓕᐅᕈᓐᓇᖃᑦᑕᕐᒪᑦ 8-ᓂᒃ ᐊᑕᐅᑎᒃᑯᑦ, ᑕᐃᒪᐃᒻᒪᑦ ᐊᕐᕕᓂᓕᖕᓂᒃ ᐊᔾᔭᖅᑐᐃᔪᓇᖃᑦᑕᓚᐅᖅᑐᖓ ᐊᒻᒪᓗ ᐊᔾᔮᓂᒃᑳᖓᑉᑭᑦ ᐊᕐᕕᓂᓕᒃᑲᓐᓃᑦ ᐱᐊᓂᒃᓯᒪᓕᖃᑦᑕᖅᖢᑎᒃ.
“ᐊᓯᖓᑦᑕᐅᖅ, ᐊᑎᕐᒥᓂᒃ ᐅᖃᐅᓯᐅᖁᔨᙱᑦᑐᖅ, 13-ᓂᒃ ᐲᑦᓴᓂᒃ ᑐᓂᓯᓚᐅᖅᑐᖅ ᑐᓂᐅᖅᑲᐅᑕᐅᖁᑉᓗᒋᑦ ᐱᓇᓱᐊᕈᓯᐅᓚᐅᖅᑐᒥ.
“ᐳᕆᐅᓪ ᓯᕗᓂᑐᖄᓂ ᐅᖃᐅᑎᓯᒪᓚᐅᙱᑕᕋ, ᑭᓯᐊᓂ ᐃᓱᒪᓚᐅᖅᑐᖓ 13-ᓂᒃ ᐲᑦᓴᓕᐅᕈᓐᓇᖅᐸᑦ, ᑕᐃᒪᓕ 22-ᓂᒃ ᐲᑦᓴᓕᐅᕈᓐᓇᕐᓂᐊᖅᑐᖅ.”