ᐱᙳᐊᓕᕐᓕᑦ!
ᑲᖏᖅᖠᓂᖅ
ᕼᐋᑭᕈᒻᒪᐅᓂᕐᒥ ᑎᑭᐅᑎᓚᐅᖅᐳᖅ ᖁᑦᑎᓛᖓᓂ ᐅᐃᒻᒪᖕᓂᖃᓚᐅᖅᐳᖅ ᖁᓕᓂᑦ ᐱᙳᐊᖅᑎᐅᔪᓄᑦ ᓵᓚᒌᕋᓱᐊᖅᑎᓪᓗᒋᑦ ᑎᒥᒧᑦ−ᐊᒃᑐᐃᓂᖃᕈᓐᓇᖅᑐᒥ ᓇᓄᕐᒥ ᓵᖓᓐᓂ ᒥᔾᔨᑦ-ᔫᕕᓇᐃᔪᓪ ᓵᓚᖃᕋᓱᐊᕐᓂᐅᔪᒥ ᕕᕈᐊᕆ 15-18−ᒧᑦ ᑲᖏᖅᖠᓂᕐᒥ.
ᓵᓚᖃᕋᓱᐊᕐᓂᐅᔪᖅ ᓴᖅᑭᔮᖅᑎᑦᑎᓚᐅᖅᐳᖅ ᐱᙳᐊᕐᓂᐅᔪᓂ ᒪᕐᕉᖕᓂ ᐊᕕᒃᑐᖅᓯᒪᓂᐅᔪᓂᑦ ᑲᖏᖅᖠᓂᕐᒥ, ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᒥ ᒥᔾᔨᑦ ᑲᑎᙵᓂᐅᔪᓂ ᐱᙳᐊᖅᑎᓂᑦ ᓄᓇᕗᒻᒥ, ᐊᕐᕕᐊᑦ, ᑎᑭᕋᕐᔪᐊᖅ ᐊᒻᒪ ᐃᒡᓗᓕᒑᕐᔪᒃ ᓵᓚᖃᕋᓱᐊᖅᖢᑎᒃ ᐅᐊᖕᓇᒥ ᐊᕕᒃᑐᖅᓯᒪᓂᐅᔪᒥ ᐊᒻᒪ ᐃᖃᓗᐃᑦ, ᓴᓪᓕᖅ, ᓇᐅᔮᑦ, ᑲᖏᖅᖠᓂᕐᒥ ᐅᔭᕋᑦ ᒥᔾᔨᑦ ᐱᙳᐊᖅᑏᑦ ᐊᒻᒪ ᖃᒪᓂᑦᑐᐊᕐᒥ ᓵᓚᒌᕋᓱᐊᖅᖢᑎᒃ ᓂᒋᕐᒥ ᐊᕕᒃᑐᖅᓯᒪᓂᐅᔪᒥ.
ᑭᖑᓪᓕᖅᐹᑦ ᖃᓄᐃᓕᖓᓂᐅᔪᓂ ᓵᓚᖃᕋᓱᐊᕐᓂᐅᔪᒥ ᖃᐅᔨᒪᔭᐅᓚᐅᙱᓚᑦ ᑐᓴᒐᒃᓴᓕᐊᖑᓐᓇᖅᓯᑎᓪᓗᒍ.
ᖃᐅᔨᓇᓱᐊᕐᓂᖅ ᐳᓚᕋᖅᐳᖅ ᑲᖏᖅᖠᓂᕐᒧᑦ
ᑲᖏᖅᖠᓂᖅ
ᑲᓇᑕᒥ ᖃᐅᔨᓇᓱᐊᕐᓂᖅ ᐊᓯᐅᖅᑲᔪᓄᑦ ᐊᒻᒪ ᐃᓄᐊᖅᑕᐅᓯᒪᔪᓄᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᐊᒻᒪ ᓂᕕᐊᖅᓵᓄᑦ (MMIWG) ᓄᓇᓕᖕᓂ ᑐᓵᑎᑦᑎᓂᖃᖅᐳᑦ ᑲᖏᖅᖠᓂᕐᒥ ᑕᒪᑐᒪᓂ ᐱᓇᓱᐊᕈᓯᐅᔪᒥ ᕕᕈᐊᕆ 20-22−ᒧᑦ ᓯᓂᒃᑕᕐᕕᖕᒥ ᑐᔪᕐᒥᕕᖕᒥ 8:30 ᐅᓪᓛᒃᑯᑦ 5 ᐅᓐᓄᙳᕋᓱᐊᕐᓂᖓᓄᑦ.
ᑲᓇᑕᒥ ᖃᐅᔨᓇᓱᐊᕐᓂᖅ ᐊᓯᐅᖅᑲᔪᓄᑦ ᐊᒻᒪ ᐃᓄᐊᖅᑕᐅᓯᒪᔪᓄᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᐊᒻᒪ ᓂᕕᐊᖅᓵᓄᑦ ᐱᓕᕆᐊᒃᓴᖓ ᕿᒥᕐᕈᓂᕐᒧᑦ ᐊᒻᒪ ᐅᓂᒃᑳᕆᓂᕐᒧᑦ ᐱᓕᕆᔾᔪᓯᐅᔪᒥ ᐱᔾᔪᑕᐅᔪᓂᑦ ᖃᓄᐃᑦᑐᑐᐃᓐᓇᑦᑎᐊᓂ ᐋᓐᓂᖅᓯᕆᓂᐅᔪᒥ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ, ᓂᕕᐊᖅᓵᓄᑦ ᐊᒻᒪ LGBTQ2S ᐃᓄᖕᓄᑦ ᑲᓇᑕᒥ ᕿᒥᕐᕈᓗᑎᒃ ᐊᑐᖅᑕᐅᓂᐅᕙᒃᑐᓂᑦ ᐊᒻᒪᓗ ᐊᑖᓂ ᐱᔾᔪᑕᐅᔪᓄᑦ.
ᐱᓕᕆᐊᒃᓴᖓ ᐃᓚᖃᕆᕗᖅ ᕿᒥᕐᕈᐊᕐᓂᕐᒥ ᐱᓪᓚᕆᐅᔪᓂ ᐊᑐᖅᑕᐅᕙᒃᑐᓂ ᐊᒻᒪ ᐊᑐᐊᒐᓂᑦ ᐊᑐᓕᖅᑎᑕᐅᓯᒪᔪᓂ ᑭᐅᓂᕐᒧᑦ ᐋᓐᓂᖅᓯᕆᓂᐅᔪᓂ ᐊᑐᖅᑕᐅᓯᒪᔪᓂ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᐊᒻᒪ ᓂᕕᐊᖅᓵᓄᑦ, ᐃᓚᖃᖃᑕᐅᔪᒥ ᐳᕿᖅᑕᓕᖕᓄᑦ ᖃᐅᔨᓴᐃᓂᐅᔪᓂ ᐊᑐᖅᑕᐅᕙᒃᑐᓂᑦ ᐊᒻᒪᓗ ᑭᐅᓂᐅᔪᓂᑦ, ᐃᓚᒋᔭᐅᓪᓗᓂ ᐆᒥᖓ ᐃᓄᓕᒫᓄᑦ ᖃᐅᔨᓴᐃᓂᐅᔪᒥᑦ.
ᑲᒥᓴᓇᐅᔪᑦ ᑐᓵᓂᐊᖅᐳᑦ ᑕᒪᒃᑭᓂ ᐅᓂᒃᑳᖅᑐᐊᖑᔪᓂ ᐊᓯᐅᖅᑲᔪᓄᑦ ᐊᒻᒪᓗ ᐃᓄᐊᖅᑕᐅᓂᑯᓄᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᐊᒻᒪ ᓂᕕᐊᖅᓵᓄᑦ, ᐋᓐᓂᖅᓯᖅᑕᐅᕙᖕᓂᑯᓂ ᐆᒪᔪᓄᑦ, ᐊᒻᒪᓗ LGBTQ2S ᐃᓄᑐᐃᓐᓇᕐᓄᑦ ᐊᑐᖅᓯᒪᔪᓂ ᐋᓐᓂᖅᓯᕆᓂᐅᔪᒥᑦ, ᐃᓚᖃᖅᑐᒥ ᑕᐃᒃᑯᐊᖑᔪᓂ ᑐᖁᓂᐅᔪᑦ ᐃᖅᑲᖅᑐᐃᕕᑎᒍᑦ ᐱᕐᕈᓗᐊᕿᓂᐅᓂᕋᖅᓯᒪᔪᓄᑦ ᐃᒻᒥᓃᕐᓂᕐᒧᓪᓘᓐᓃᑦ, ᓇᓗᓇᐃᖅᑕᐅᓗᓂᓘᓐᓃᑦ ᐃᓱᒪᓕᐊᖑᔪᓐᓇᙱᓐᓂᖓᓂ.
ᐊᔪᐃᓐᓇᕆᐊᒃᑲᓐᓂᕐᓂᖅ ᑐᓵᑎᑕᐅᔪᖅ ᑭᕙᓪᓕᕐᒥ ᑐᔪᕐᒥᕕᖓᓂ
ᑲᖏᖅᖠᓂᖅ /ᑭᕙᓪᓕᖅ
ᒪᓕᒐᓂᒃ ᓴᐳᓐᓂᐊᖅᑎ ᓯᓐᑎᐊ ᑎᑭᓐᔅ ᓴᖅᑭᓚᐅᖅᐳᖅ ᓄᓇᕗᒻᒥ ᐃᖅᑲᖅᑐᐃᕖᑦ ᖁᑦᑎᖕᓂᖅᐹᖓᓂ ᑐᒡᓕᐊᓂ ᕕᕈᐊᕆ 13−ᒥ ᑭᒡᒐᖅᑐᐃᓂᕐᒥ ᒐᕙᒪᑐᖃᒃᑯᓐᓂ ᐊᔪᐃᓐᓇᕆᐊᒃᑲᓐᓂᕐᓂᕐᒧᑦ 2016−ᒥ ᐃᓱᒪᓕᐊᖑᔪᕕᓂᕐᒧᑦ ᓇᓗᓇᐃᖅᓯᓚᐅᖅᑐᒥ ᑭᕙᓪᓕᕐᒥ ᑐᔪᕐᒥᕕᖕᒥ ᑲᖏᖅᖠᓂᖅ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕐᕕᐅᓂᖓᓂ ᐅᕘᓇ 2007−ᒥ ᐊᓪᓚᓄᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᐊᕐᕕᐅᖃᑕᐅᔪᓄᑦ ᐊᑭᓕᐅᑎᐅᓇᔭᖅᑐᒧᑦ ᐊᖏᕈᑎᒥᒃ.
ᒐᕙᒪᑐᖃᒃᑯᑦ ᑭᐅᓕᐅᑎᕗᑦ ᑲᓇᑕ ᑲᒪᒋᔭᖃᓚᐅᙱᒻᒪᑕ ᑐᔪᕐᒥᕕᐅᑉ ᐊᐅᓚᑕᐅᓂᖓᓄᑦ ᑲᖏᖅᖠᓂᕐᒥ 1985−ᒥ 1995−ᒧᑦ, ᓯᕈᓯᖏᓪᓗ ᑕᐃᑲᓂ ᑐᔪᕐᒥᓚᐅᖅᑐᓄᓪᓗ, ᑐᑭᖃᖅᖢᓂ ᑭᐅᒪᙱᓐᓂᖓᓂ ᓈᒻᒪᒋᔭᐅᔪᓄᑦ ᐱᔭᕆᐊᓕᖏᓐᓂ ᐃᓚᐅᖃᑕᐅᓂᕐᒧᑦ ᐊᐅᓪᓚᖅᑎᑕᐅᓪᓗᑎᒃ ᐃᓕᓐᓂᕆᐊᕐᓂᐅᔪᓄᑦ ᐊᑭᓕᐅᑎᐅᓇᔭᖅᑐᒧᑦ ᐊᖏᕈᑎᖓᓐᓂ.
ᐅᕘᓇ ᓯᕗᓪᓕᖅᐸᐅᔪᒥ 2016−ᒥ ᒪᓕᒋᐊᓕᖓᓐᓂ, ᐃᓕᓐᓂᐊᖅᑎᐅᔪᑦ ᑐᔪᕐᒥᓚᐅᖅᑐᓂ ᑭᕙᓪᓕᖅ ᑐᔪᕐᒥᕕᖓᓐᓂ ᐊᕐᕌᒍᓄᑦ ᖁᓕᓄᑦ ᐱᔪᓐᓇᕋᔭᕐᓂᖓᓂ ᐊᑭᓕᖅᓱᖅᑕᐅᓂᖏᓐᓂ ᒐᕙᒪᑐᖃᒃᑯᓐᓂ ᐅᕘᓇ ᐊᑭᓕᐅᑎᐅᓇᔭᖅᑐᒧᑦ ᐊᖏᕈᑎᐅᔪᒥᑦ.
ᐱᖓᓱᓂ ᐃᖅᑲᖅᑐᐃᔨᐅᔪᓂ ᑐᓵᓚᐅᖅᐳᑦ ᒐᕙᒪᑐᖃᒃᑯᓐᓂ. ᐅᓪᓗᓕᐅᖅᓯᒪᙱᑦᑐᑦ ᐃᓱᒪᓕᐊᕆᓂᐊᖅᑕᖓᓐᓄᑦ.
ᐃᒪᖓᓂᒃ ᒥᐊᓂᖅᓯᔨᓄᑦ ᐊᐱᖅᓱᕐᓂᐅᔪᓂ ᐱᒋᐊᖅᐳᑦ
ᑲᖏᖅᖠᓂᖅ
ᐊᐱᖅᓱᕐᓂᐅᔪᑦ ᐱᒋᐊᓚᐅᖅᐳᑦ ᐃᓂᐅᔪᓄᑦ ᑲᓇᑕᒥ ᐃᒪᖓᓂᒃ ᒥᐊᓂᖅᓯᔨᓄᑦ ᓯᒡᔭᖓᓂ ᓴᐳᔾᔨᐅᔪᓄᑦ ᐅᒥᐊᖓᓐᓄᑦ ᐱᓕᕆᕝᕕᖓᓐᓂ ᑲᖏᖅᖠᓂᕐᒥ ᐱᓇᓱᐊᕈᓯᐅᓚᐅᖅᑐᒥ.
ᐱᓕᕆᕝᕕᐅᔪᖅ ᐊᐅᓚᑕᐅᓂᐊᖅᐳᖅ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓂᑦ ᐅᑭᐅᖅᑕᖅᑐᒥ ᓄᓇᓕᐅᔪᓂᑦ.
ᒪᒃᑯᒃᑐᐃᑦ ᓯᕗᓪᓕᖓᓂ ᓯᕗᓕᐅᖅᑎᖃᕐᓂᐊᖅᐳᑦ ᐱᓕᕆᓕᒪᔪᓂ ᐃᒪᖓᓂᒃ ᒥᐊᓂᖅᓯᔨᐅᔪᒥᑦ.
ᓯᕗᓪᓕᖅᐹᖓᓂ ᐱᓕᒻᒪᒃᓴᕐᓂᐅᔪᖅ ᓂᕈᐊᖅᑕᐅᔪᓂ ᑐᒃᓯᕋᖅᑐᓄᑦ ᐃᓚᖃᕐᓂᐊᖅᐳᖅ ᑲᓇᑕᐅᑉ ᕿᓂᕐᓂᕐᒧᑦ−ᐊᒻᒪ−ᓴᐳᔾᔨᓂᕐᒧᑦ ᐱᓕᕆᔾᔪᓯᖓᓐᓂ, ᕿᓂᕐᓂᕐᒧᑦ ᐊᑐᖅᑕᐅᕙᒃᑐᓂᑦ, ᐅᒥᐊᓕᕆᓂᕐᒧᑦ, ᐃᒪᕐᒥᐅᑕᓂ ᓯᕗᓪᓕᖅᐹᒥ ᐃᓅᓕᓴᐃᓂᐅᔪᓂᑦ ᐊᒻᒪ ᓈᓚᐅᑎᒃᑯᑦ ᐋᔩᖃᑎᒌᖕᓂᕐᒧᑦ.