ᐃᓱᒪᓕᐅᕆᓂᖅ ᐅᖓᕙᕆᐊᖅᑕᐅᓂᖓᓂ ᔮᓐ ᓕᓐᑎᐅᓪ ᐃᖅᑲᐅᒪᔭᐅᓂᖓᓂ (JLM) ᑳᓪᒻ ᐃᐊ ᐃᕐᙳᓯᖓᓐᓂ ᐃᓐᓇᕐᓄᑦ ᐊᖑᑎᓄᑦ ᕼᐋᑭᒧᑦ ᓵᓚᖃᕋᓱᐊᕐᓂᐅᔪᒥ ᐃᓚᖃᕐᓂᕐᒧᑦ ᖃᔅᓯᒐᓚᖕᓂ ᐊᔪᙱᓐᓂᐅᔪᓄᑦ−ᐱᕙᓪᓕᐊᑎᑕᐅᓂᖏᓐᓄᑦ ᐱᙳᐊᕆᐅᖅᓴᓂᐅᔪᒥᒃ ᐊᓕᐊᓇᐃᒋᔭᐅᑦᑎᐊᓚᐅᖅᐳᖅ ᒪᒃᑯᒃᑐᓄᑦ ᐊᑎᓕᐅᕆᓯᒪᔪᓄᑦ ᐊᕐᕕᐊᓂ ᕼᐋᑭᖅᑎᕋᓛᖑᔪᓄᑦ ᑕᖅᑭᐅᓚᐅᖅᑐᒥ.
ᐋᖅᑭᒃᓱᐃᔨᐅᔪᖅ JLM−ᒥ, ᒋᓖᓴᓐ ᐅᑉᐸᕼᐅᐊᒃ, ᐅᖃᓚᐅᖅᐳᖅ ᐱᕈᖅᑎᑦᑎᓇᓱᐊᕐᓇᖅᓯᓚᐅᕐᒪᑦ ᓵᓚᖃᕋᓱᐊᕐᓂᐅᔪᒥ ᐊᒻᒪᓗ ᐋᖅᑭᒡᓗᒍ ᓄᓇᓕᓕᒫᓄᑦ ᖃᓄᐃᓐᓂᐅᔪᒧᑦ ᑐᓂᓯᓗᑎᒃ ᐱᓪᓚᕆᐅᓂᐅᔪᒥ ᓄᑕᖅᑲᓄᑦ.
ᐅᖃᓚᐅᖅᐳᖅ ᐊᐅᓚᑦᑎᓂᕐᒥ ᐅᓪᓗᓄᑦ−ᐱᖓᓱᓄᑦ ᐱᙳᐊᕆᐅᖅᓴᓂᐅᔪᓂᑦ ᒪᓕᒃᓴᑲᐅᑎᒋᔪᒥ JLM−ᒥ ᐱᓕᕆᑦᑎᐊᕐᓂᖃᓚᐅᖅᐳᖅ ᓄᓇᓕᖕᓂ, ᐊᒻᒪᓗ ᓄᑕᖅᑲᓂᒃ ᓯᑯᒧᐊᖅᑎᑦᑎᓚᐅᖅᐳᖅ ᐆᒻᒪᕆᒃᓯᒪᑎᓪᓗᒋᑦ ᐱᓇᓱᐊᕈᓯᐅᑉ ᓄᙳᐊᓂ ᓵᓚᖃᕋᓱᐊᕐᓂᐅᓚᐅᖅᑐᒧᑦ.
"ᑕᐃᓚᐅᑲᒃᐸᕗᑦ ᑳᓪᒻ ᐃᐊᒧᑦ ᕼᐋᑭᒧᑦ ᐅᓪᓗᖏᓐᓂᑦ, ᐊᔪᙱᓐᓂᐅᔪᓄᑦ−ᐱᕙᓪᓕᐊᑎᑕᐅᓂᖓᓐᓂ ᐱᙳᐊᕆᐅᖅᓴᓂᐅᔪᓄᑦ ᐊᔪᕐᓇᕈᓐᓃᖅᑎᑕᐅᓪᓗᓂ ᐱᓕᕆᖃᑎᒌᖕᓂᐅᔪᒥ ᑳᓪᒻ ᐃᐊᒃᑯᓐᓂᑦ, ᓄᓇᕗᒻᒥ ᕼᐋᑭᒧᑦ ᐊᒻᒪ ᐅᑭᐅᖅᑕᖅᑐᒥ ᑲᑎᙵᓂᕆᔭᐅᔪᓄᑦ," ᐅᖃᓚᐅᖅᐳᖅ ᐅᑉᐸᕼᐅᐊᒃ.
"ᑕᒪᓐᓇ ᐱᒻᒪᕆᐅᕐᔪᐊᓚᐅᖅᐳᖅ ᓄᑕᖅᑲᓄᑦ ᐊᕐᕕᐊᓂ ᕼᐋᑭᓅᖅᑐᓄᑦ, ᐊᒻᒪᓗ ᑕᒪᕐᒥᓕᒫᖓᓂ ᐊᑯᕐᓂᖃᑦᑎᐊᓚᐅᖅᐳᑦ ᓯᑯᒦᓐᓂᖏᓐᓂ ᐊᑐᐃᓐᓇᖃᕐᓂᖏᓐᓂ ᐱᙳᐊᕆᐅᖅᓴᓂᐅᔪᓂᑦ.
"ᑕᐅᑐᒃᑕᑐᐊᖃᑲᐃᓐᓇᓚᐅᖅᐳᑦ ᐊᔪᙱᓐᓂᐅᔪᓄᑦ, ᐊᒃᓱᕈᓚᐅᖅᐳᑦ ᐱᐅᓯᒋᐊᖅᑎᑦᑎᓂᖏᓐᓄᑦ ᓯᐊᕐᕆᔮᕈᓐᓇᕐᓂᖏᓐᓂ, ᐸᒃᒥ−ᐱᓕᕆᓂᕐᒧᑦ ᐊᒻᒪ ᐃᓯᖅᑎᑦᑎᓇᓱᐊᕐᓂᕐᒧᑦ ᐊᔪᙱᓐᓂᐅᔪᓂᑦ.
"ᐃᓕᓴᐃᔨᒋᓚᐅᖅᑕᕗᑦ ᔅᑳᑦ ᕗᐊᑳᓐ ᐅᐃᓂᐸᐃᒡᒥᐅᑕᖅ, ᔫᓂᐊᖑᕙᓚᐅᖅᓯᒪᔪᖅ ᐊᒻᒪ ᐃᓐᓇᕐᓄᑦ ᐊᖑᑎᓄᑦ ᐱᙳᐊᖅᑎᐅᓪᓗᓂ. ᐊᒻᒪᓗ ᐱᓕᕆᑦᑎᐊᕐᓂᖃᕐᔪᐊᓚᐅᖅᐳᖅ.
"ᔅᑳᑦ ᐃᓯᖅᑎᑦᑕᐃᓕᒪᔨᐅᖕᒥᔪᖅ, ᑕᐃᒫᒃ ᒪᒃᑯᒃᑐᑦ ᐃᓯᖅᑎᑦᑕᐃᓕᒪᔨᐅᔪᑦ ᐆᒻᒪᕆᒃᓯᒪᓚᐅᖅᐳᑦ ᐃᓕᑦᑎᓂᐊᕐᓂᖏᓐᓄᑦ ᑕᐃᒪᐃᑦᑑᔪᒧᑦ ᐊᒻᒪᓗ ᐊᓕᐊᓇᐃᒍᓱᖕᓂᖃᑦᑎᐊᓚᐅᖅᐳᑦ."
ᐊᔪᕆᖅᓱᐃᕙᒃᑐᑦ ᐃᓚᐅᖃᑕᐅᔪᓂ ᐊᕐᕕᐊᓂ ᕼᐋᑭᖅᑎᕋᓛᓄᑦ ᐱᓕᕆᐊᖓᓐᓂ ᐃᑲᔪᓚᐅᖅᐳᑦ ᕗᐊᑳᓐᒥ ᐊᐅᓚᑦᑎᓂᖏᓐᓂ ᓯᑯᒥᑦ ᐱᓕᕆᓂᐅᔪᓂᑦ, ᐊᒻᒪᓗ ᐱᓚᐅᕆᕗᑦ ᐃᑲᔪᕈᑎᒃᓴᐅᓇᔭᖅᑐᓂ ᐊᐅᓚᑦᑎᓂᕐᒧᑦ ᐱᓕᒻᒪᒃᓴᑦᑎᐊᕐᓂᖅᓴᐅᔪᓂᑦ ᐅᑭᐅᓕᖕᓄᑦ ᑲᑎᙵᓂᕆᔭᖏᓐᓄᑦ.
ᐅᑉᐸᕼᐅᐊᒃ ᐅᖃᓚᐅᖅᐳᖅ 85−ᐸᓗᖕᓂ ᒪᒃᑯᒃᑐᓂ ᐊᕐᕕᐊᓂ ᐱᙳᐊᖅᑎᐅᔪᓂᑦ ᐱᕚᓪᓕᕈᑎᖃᓚᐅᖅᐳᑦ ᐱᙳᐊᕆᐅᖅᓴᓂᐅᔪᓂᑦ.
ᐅᖃᓚᐅᕆᕗᖅ ᐃᓕᑦᑎᓂᖅ ᐊᓕᐊᓇᐃᓐᓂᐅᓗᓂ ᐱᙳᐊᖅᑏᑦ ᑕᐅᑐᒃᑕᑐᐊᖃᑲᐃᓐᓇᖅᑎᓪᓗᒋᑦ ᐊᔪᙱᓐᐅᓂᔪᓄᑦ ᐱᕙᓪᓕᐊᑎᑕᐅᓂᖏᓐᓄᑦ, ᐊᒻᒪᓗ ᕗᐊᑳᓐ ᒪᒃᑯᒃᑐᓂ ᐱᓕᕆᑏᓐᓇᓚᐅᖅᐸᖏᑦ ᐊᒻᒪᓗ ᐃᓚᐅᑎᑦᑏᓐᓇᓚᐅᖅᐳᖅ ᐊᑐᓂ ᐱᓕᕆᓂᐅᔪᒥᑦ .
"ᑲᒪᓚᐅᖅᐳᖓ ᖃᓄᖅ (ᕗᐊᑳᓐ) ᑐᓂᓯᓂᖓᓂ ᐊᑐᓂ ᐱᙳᐊᕆᐅᖅᓴᓂᐅᔪᒥ ᖃᔅᓯᒐᓚᖕᓄᑦ ᐱᓕᖅᑭᒃᑕᕐᓂᐅᔪᓄᑦ ᓄᑕᕋᓕᒫᓂᒃ ᐱᔭᒃᓴᖃᐃᓐᓇᖅᑎᑕᐅᓪᓗᑎᒃ ᐊᑐᓂ ᐱᓕᕆᓂᐅᔪᒥᑦ, ᑕᑯᕙᓚᐅᙱᑦᑎᐊᖅᐳᑎᑦ ᓄᑕᖅᑲᒥ ᓯᑯᒥ ᓇᖏᑐᐃᓐᓇᖅᑐᒥ, ᖃᓄᐃᓕᐅᕐᓇᓂ.
"ᑕᒪᕐᒥᑦᑎᐊᖅ ᒪᒃᑯᒃᑐᑦ ᐱᙳᐊᖅᑎᕗᑦ ᐊᓕᐊᓇᐃᒋᔭᖃᑦᑎᐊᓚᐅᖅᐳᑦ ᐱᓕᕆᓂᓕᒫᓂᑦ, ᐊᒻᒪᓗ ᐊᑯᓂᒍᓱᒃᐳᑦ ᐱᙳᐊᕆᐅᖅᓴᓂᐅᔪᒥᑦ ᐅᑎᓛᕐᓂᖓᓂ ᐊᕐᕌᒎᓂᐊᖅᑐᒥᑦ.
"ᐊᓕᐊᓇᐃᓚᐅᖅᐳᖅ ᑕᑯᓪᓗᓂ ᐱᓕᕆᖃᑎᒋᕙᒃᑕᑦᑎᓐᓂ ᑲᑎᖃᑎᒌᒃᖢᑎᒃ ᑕᒪᓐᓇ ᐱᔪᓐᓇᖅᑎᑕᐅᓂᖓᓂ – ᓄᓇᕗᒻᒥ ᕼᐋᑭᒥ ᐊᑭᓖᓪᓗᑎᒃ ᓯᑯᒦᓪᓚᕆᖕᓂᖏᓐᓂ ᐱᓕᕆᓂᐅᔪᓂᑦ, ᐅᖃᖃᑎᖃᕐᓂᕐᒧᑦ ᐊᑭᓕᐅᑎᓂᑦ ᐊᒻᒪᓗ ᕼᐋᑭᒧᑦ ᑭᐊᑎᖏᓐᓂᑦ ᓄᑕᖅᑲᑦ ᐱᓚᐅᖅᑕᖏᓐᓂ, ᑳᓪᒻ ᐃᐊᕐ ᐊᑭᓖᓪᓗᑎᒃ ᖃᖓᑦᑕᐅᑎᓂᑦ ᐃᓚᐅᖃᑕᐅᔪᓄᑦ ᐊᒻᒪ ᐅᑭᐅᖅᑕᖅᑐᒥ ᑲᑎᙵᓂᐅᔪᒥ ᐊᑭᓖᓪᓗᑎᒃ ᐊᒥᐊᒃᑯᖏᓐᓂ ᐊᑭᐅᔪᓄᑦ – ᐊᒻᒪᓗ ᑐᓂᓯᓪᓗᑎᒃ ᓄᑕᖅᑲᑦᑎᓐᓂ ᐅᓪᓗᓂᑦ ᐱᖓᓱᓂ ᕼᐋᑭᒧᑦ ᐊᓕᐊᓇᐃᒍᓱᖕᓂᐅᔪᒥ ᐊᒻᒪ ᐃᓕᑦᑎᓂᐅᔪᓂ ᐱᐅᒍᖅᓵᓕᔾᔮᙱᑕᖏᓐᓂᑦ.
"ᓂᕆᐅᒃᐳᒍᑦ ᑕᐃᒪᐃᓕᖓᐃᓐᓇᖅᑐᒥ ᐋᖅᑭᒃᓯᒪᓂᐅᔪᒥ ᐊᕐᕌᒍᓕᒫᒥ ᐃᖏᕐᕋᑎᑦᑎᓂᐊᕐᓂᕐᒧᑦ ᒫᓐᓇᐅᓕᖅᑐᒥ ᐊᒻᒪᓗ, ᐊᔪᕐᓇᙱᑉᐸᑦ, ᐅᖓᕙᕆᐊᕐᓗᒍ ᐃᓚᐅᑎᑦᑎᓗᓂ ᖃᒪᓂᑦᑐᐊᕐᒥᐅᑕᓂᑦ, ᑭᓯᐊᓂ ᐅᖃᓪᓚᖃᑎᖃᕆᐊᖃᕋᔭᖅᐳᖓ ᐱᓕᕆᖃᑎᒋᔪᓐᓇᕋᔭᖅᑕᑦᑎᓐᓂ ᑕᐃᑲᓂ ᓄᓇᓕᐅᔪᒥ ᐱᔪᒪᓇᔭᕐᓂᐅᔪᒥᑦ ᑲᒪᒋᔭᖃᕐᓂᕐᒧᑦ ᕿᑎᐊᓂ−ᕼᐋᑭᕐᓂᐅᔪᒥ ᐱᙳᐊᕆᐅᖅᓴᓂᐅᔪᒥ ᑕᐃᑲᓂ."
