ᑐᕌᕐᕕᒃ ᑐᔪᕐᒥᕕᑦ ᐅᑭᐅᖅᑕᖅᑐᒥ ᐊᖏᔪᒻᒪᕆᐊᓗᖕᒥ ᓄᑖᙳᕆᐊᖅᑎᑕᐅᓂᖃᖅᐳᖅ ᑲᖏᖅᖠᓂᕐᒥ ᑕᒪᑐᒪᓂ ᑕᖅᑭᐅᔪᒥ.
ᑐᔪᕐᒥᕕᒃ ᐊᒻᒪ ᓂᕆᕕᖓ ᒪᑐᓯᒪᓂᖃᓚᐅᖅᐳᖅ ᐋᒍᔅᑎ 8-ᒥ ᐊᒻᒪ ᓂᕆᐅᒋᔭᐅᕗᖅ ᒪᑐᓯᒪᒃᑲᓐᓂᕐᓂᐊᕐᓂᖓᓂ ᐱᓇᓱᐊᕈᓯᒃᑲᓐᓂᕐᒥ ᐋᖅᑭᒋᐊᖅᑕᐅᒃᑲᓐᓂᕐᓂᖃᖅᑎᓪᓗᒍ.
The Turaarvik Inns North hotel will be closed for about another week as extensive restorations take place to its kitchen, restaurant and 21 hotel rooms in Rankin Inlet. Darrell Greer/NNSL photo
ᑭᓴᕐᕕᒃ ᑯᐊᐸᒃᑯᑦ ᐊᐅᓚᑦᑎᔨᒋᓚᐅᑲᒃᑕᖓ ᒐᓚᓐ ᐅᑦᕗᑦ ᐅᖃᓚᐅᖅᐳᖅ ᓂᕆᕕᒃ ᐊᒥᐊᖅᑕᐅᒃᑲᓐᓂᖅᐳᖅ, ᐊᒻᒪ ᓄᑖᒥ ᓇᑎᓕᖅᑕᐅᓪᓗᓂ ᐊᒻᒪ ᓄᑖᖏᓐᓇᑦᑎᐊᓂᑦ ᑭᐳᓂᑦ ᐃᒃᓯᕙᐅᑕᓂᓪᓗ.
ᐅᖃᓚᐅᖅᐳᖅ ᐱᓕᕆᔾᔪᑎᖏᑦ ᐊᓂᑕᐅᓗᑎᒃ ᓂᕿᓕᐅᕐᕕᖕᒥ ᐊᒻᒪ ᓴᓗᒻᒪᖅᓴᖅᑕᐅᑦᑎᐊᕐᓂᐊᖅᖢᑎᒃ.
"ᑕᒪᒃᑭᑦᑎᐊᖅᑐᒥ ᓄᑖᙳᕆᐊᖅᑎᑕᐅᓂᐅᕗᖅ ᓂᕆᕕᐅᔪᒧᑦ ᓄᑖᖑᔪᒥ ᑕᐅᑦᑐᖃᓕᕐᓗᓂ ᐱᓕᕆᐊᖑᔪᑦ ᐱᔭᕇᖅᑕᐅᒃᐸᑕ," ᐅᖃᓚᐅᖅᐳᖅ ᐅᑦᕗᑦ.
"ᓄᑖᖑᖅᑰᔨᑦᑎᐊᓕᕐᓂᐊᖅᐳᖅ ᐱᓕᕆᐊᖑᔪᑦ ᐱᔭᕇᖅᑕᐅᒍᑎᒃ.
"ᐃᓱᒪᒋᔭᐅᓂᐅᔪᖅ ᐱᐅᓯᒋᐊᖅᑎᑦᑎᓂᕐᒧᑦ ᑕᐅᑐᒐᕆᔭᑦᑎᓐᓂ ᐊᒻᒪ ᑐᓂᓯᓂᕐᒧᑦ ᐃᓚᒋᔭᑦᑎᓐᓂ ᖁᕕᐊᓱᒍᑎᒃᓴᖃᕐᓂᕐᒧᑦ."
ᐅᑦᕗᑦ ᐅᖃᓚᐅᖅᐳᖅ ᑯᐊᐸᒃᑯᑦ ᐊᐅᓚᑦᑎᓯᒪᕗᑦ ᓂᕿᓕᐅᕐᕕᖓᓂ ᑕᐃᒪᙵᓂ ᓄᕕᐱᕆ 1, 2004-ᒥ.
ᐅᖃᓚᐅᖅᐳᖅ ᐱᔨᑦᑎᕋᑦᑎᐊᖅᓯᓯᒪᕗᖅ ᑭᓴᕐᕕᒃ ᑯᐊᐸᒃᑯᓐᓂᑦ, ᐃᓚᒋᔭᐅᔪᖁᑎᖏᓐᓂ ᐊᒻᒪ ᓄᓇᓕᐅᔪᒥ ᑕᒪᐃᑎᒍᑦ ᑕᐃᑲᓂᐅᔪᒥ, ᐊᒻᒪᓗ ᐱᕈᐃᕙᓪᓕᐊᖏᓐᓇᕈᒪᕗᑦ ᐱᓕᕆᑦᑎᐊᕐᓂᕆᔭᖓᓐᓂᑦ.
"ᖁᕙᓐᓇᒦᕐᓇᖅᓯᓂᐅᕗᖅ ᓂᕆᕕᐅᔪᒧᑦ, ᐱᔪᒪᒍᕕᑦ, ᐱᓕᕆᓂᖃᑦᑎᐊᕐᓂᕐᓄᑦ, ᐊᒻᒪ ᒫᓐᓇ ᐃᓕᖕᓂ ᐃᑲᔪᕐᓂᐊᖅᐳᒍᑦ ᐱᓕᕆᓂᖃᑦᑎᐊᒃᑲᓐᓂᕐᓂᕐᒧᑦ ᐊᑯᓂᒻᒪᕆᐊᓗᖕᒥ ᑎᑭᑉᐸᓪᓕᐊᔪᓄᑦ.
"ᐸᕐᓇᐃᓂᕐᒧᑦ ᐱᓕᖅᑭᑦᑕᕐᓂᒦᓯᒪᕗᖅ ᐊᑯᓂᐸᓗᖕᒥ ᐊᒻᒪ ᐸᕐᓇᒃᑕᐅᑦᑎᐊᖅᓯᒪᔪᒻᒪᕆᐅᕗᖅ ᐊᒻᒪ ᐋᖅᑭᒃᓱᖅᑕᐅᑦᑎᐊᖅᖢᓂ."
ᑐᔪᕐᒥᕕᒃ ᓄᑖᙳᕆᐊᖅᑎᑦᑎᒋᕗᑦ 21-ᓂ 22-ᖑᔪᓂ ᑐᔪᕐᒥᔪᓄᑦ ᐃᒡᓗᕈᓯᖏᓐᓂ.
ᐅᑦᕗᑦ ᐅᖃᓚᐅᖅᐳᖅ 14-ᐸᓗᑦ ᐃᒡᓗᕈᓯᑦ ᐱᔭᕇᖅᑕᐅᓯᒪᓕᖅᐳᑦ, ᐱᔾᔪᑎᖃᖅᑐᒥ ᓇᑉᐸᖅᑎᕆᓂᕐᓄᑦ ᐱᓕᕆᓂᐅᔪᒥ, ᐊᒻᒪ ᑐᔪᕐᒥᕕᒃ ᐅᑕᖅᑭᕗᑦ ᑎᑭᓐᓂᐊᕐᓂᖏᓐᓂ ᑕᒪᒃᑭᓂ ᐃᒡᓗᕈᓯᕐᒥᐅᑕᒃᓴᓂ ᐃᒡᓗᕈᓯᖏᓐᓄᑦ.
ᐅᖃᓚᐅᖅᐳᖅ ᑕᒪᒃᑭᑦᑎᐊᖅᑐᒥ ᓄᑖᙳᕆᐊᖅᑎᑦᑎᒋᕗᑦ ᐃᓕᔾᔨᕕᖕᓂ ᐊᓇᕐᕕᖕᓄᑦ ᐊᑐᓂ ᐃᒡᓗᕈᓯᐅᔪᓄᑦ.
ᐊᑐᓂ ᐃᒡᓗᕈᓯᕐᒥ, ᐃᒡᓕᐅᑉ ᓴᓂᐊᓂ ᑭᐳᕋᓛᑦ, ᐃᒡᓕᑦ, ᑕᓚᕖᓴᖏᑦ – ᑕᒪᕐᒥᓕᒫᑦ ᓄᑖᖑᓂᐊᖅᐳᑦ.
"ᐊᑕᐅᓯᕐᒥ ᐃᒡᓗᕈᓯᐅᔪᒥ ᑐᔪᕐᒥᐊᓄᑦ ᐱᔨᑦᑎᕋᕐᓂᕐᒥ ᐊᑐᖅᑕᐅᓂᐊᕐᓗᓂ ᑐᖅᑯᐃᕕᒃᓴᐅᓂᐊᕐᓗᓂ ᓂᕆᕕᖕᒧᑦ, ᐊᒻᒪᓗᑦᑕᐅᖅ ᐃᓯᕐᕕᐅᔪᓐᓇᖅᑐᒥ ᓂᒡᓕᓇᖅᑐᒃᑯᕕᖕᒥ ᐊᒻᒪ ᖁᐊᒃᑯᕕᐅᔪᒥ."
ᐅᑦᕗᑦ ᐅᖃᓚᐅᖅᐳᖅ ᓂᕆᐅᒃᐳᖅ ᐋᖅᑭᒋᐊᖅᑕᐅᓂᐅᔪᑦ ᖁᑦᑎᒃᓯᒋᐊᖅᓯᓂᐊᕐᓂᖓᓂ ᐃᖅᑲᓇᐅᔭᖅᑏᑦ ᐱᓕᕆᑦᑎᐊᒃᑲᓐᓂᕈᒪᓂᖏᓐᓂ.
ᐅᖃᓚᐅᖅᐳᖅ ᐃᖅᑲᓇᐃᔭᖅᑎᐅᔪᑦ ᐅᐱᒋᔭᖃᒃᑲᓐᓂᐅᔭᕐᓂᐊᓕᖅᐳᑦ ᐱᓕᕆᕕᖓᑕ ᐊᕙᑎᖓᓐᓂ ᓄᑖᙳᕆᐊᖅᑎᑕᐅᓂᖓ ᐱᔭᕇᖅᑕᐅᒃᐸᑦ.
"ᓲᕐᓗ ᓂᐅᕕᕐᓂᕐᒥ ᓄᑖᒥ ᓄᓇᓯᐅᒻᒥ ᐃᓚᒌᖑᔪᓄᑦ – ᐊᓈᓇ, ᐊᑖᑕ ᐊᒻᒪ ᕿᑐᙵᓕᒫᖏᑦ ᖁᕕᐊᑉᐳᑦ.
"ᑕᐃᒪᓐᓇᑦᑕᐃᓐᓇᖅ ᐃᓱᒪᓂᐅᕗᖅ.
"ᑕᒪᐃᑎᒍᑦ, ᓄᑖᒥ ᑐᔪᕐᒥᕕᒃᑖᖅᐳᒍᑦ ᐊᒻᒪ ᓂᕆᕕᖕᒥ, ᑕᑯᓕᕆᑦ ᖃᓄᐃᓕᐅᕐᓂᑦᑎᓐᓂ ᒫᓐᓇ ᐱᔨᑦᑎᕋᑦᑎᐊᒃᑲᓐᓂᕐᓂᕐᐅᔪᒧᑦ ᐃᓚᒋᔭᖁᑎᑦᑎᓐᓄᑦ.
"ᑭᒃᑯᓕᒫᑦ ᖁᕕᐊᓱᖕᓂᐊᖅᐳᑦ ᓄᑖᙳᕆᐊᖅᑎᑕᐅᓂᐅᔪᓂᑦ."
