ᓖ (ᕿᓚᒃ) ᓖ ᕿᓚᒃ ᖃᒪᓂᑦᑐᐊᕐᒥᐅᑕᖅ ᑐᕌᒐᒃᓴᖏᓐᓂ ᖁᑦᑎᒃᑏᓐᓇᐅᔭᖅᐳᖅ ᐃᓅᓯᐅᔪᒥ, ᐊᒻᒪ ᐱᕕᒃᓴᖃᕐᓂᐅᔪᒥ ᐹᖅᓯᓂᖓᓂ ᐱᓕᕆᐊᒥᓂ ᐃᖅᑲᓇᐃᔭᖅᑎᐅᔪᖅ ᑲᓇᖕᓇᕐᒥ ᓯᒡᔭᖅᐸᓯᖓᓂ ᐃᑲᔪᓚᐅᖅᐳᖅ ᖃᐅᓐᒻᒪᒃᑎᑦᑎᓂᕐᒥ ᐃᓂᖓᓂ ᐃᑲᔪᕐᓂᕐᒧᑦ ᑎᑭᐅᑎᓂᖓᓂ ᐅᑯᓄᖓ ᑐᕌᒐᒃᓴᐅᔪᓂ.
ᕿᓚᒃ, 36, ᐱᔭᕇᖅᓯᓚᐅᖅᑐᒥ ᖁᑦᑎᖕᓂᓕᖕᒥ 11−ᒥ ᔫᓇ ᐊᒥᑦᓈᖅ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᐅᔪᒥ ᖃᒪᓂᑦᑐᐊᕐᒥ, ᐃᖅᑲᓇᐃᔭᓚᐅᖅᐳᖅ ᐊᐳᖅᑎᓐᓈᖅᑐᖅ ᒎᓗᒧᑦ ᐅᔭᕋᖕᓂᐊᕐᕕᖓᓂ ᖃᒪᓂᑦᑐᐊᑉ ᖃᓂᒋᔭᖓᓂ ᑲᒪᔨᐅᓂᕐᒧᑦ ᕿᑯᒃᓴᒧᑦ ᐱᓕᕆᕝᕕᐅᔪᒥ 2009−ᒥ.
ᑕᐃᑲᓂ ᐹᖅᓯᓚᐅᖅᐳᖅ ᐸᐃᑉᐹᖃᖅᑐᒥ ᐅᐊᔭᓕᕆᔨᐅᔪᒥ ᓅᕙᓐᓛᓐᒥᐅᑕᒥ ᓯᕗᓂᒃᓴᖓᓂ ᐃᑲᔪᕐᓂᖃᕈᒪᓚᐅᖅᑐᒥ.
ᕿᓚᒃ ᐅᖃᓚᐅᖅᐳᖅ ᓅᕙᓐᓛᓐᒥᐅᑕᖅ ᐊᐱᕆᓚᐅᖅᐳᖅ ᖃᓄᐃᓕᐅᕐᓂᐊᕆᐊᒃᓴᖓᓂ ᑳᓐᑐᕌᒃ ᐊᓂᒍᕈᓂ ᐊᒻᒪ ᐱᔪᒪᓂᖃᓚᐅᖅᐸ ᐅᐊᔭᓕᕆᔨᙳᕐᓂᖓᓂ.
ᐅᖃᓚᐅᖅᐳᖅ ᑐᓂᓯᓚᐅᕐᓂᖓᓂ ᐅᐊᔭᓕᕆᔨᒥ ᑖᔅᓱᒥᖓᑦᑕᐃᓐᓇᖅ ᑭᐅᓂᐅᔪᒥ ᑕᒪᒃᑭᓄᑦ ᐊᐱᖅᑯᑕᐅᔪᓄᑦ.
“ᐅᖃᐅᑎᓚᐅᖅᐸᕋ ᖃᐅᔨᒪᙱᑦᑎᐊᕐᓂᓐᓂ,” ᐅᖃᓚᐅᖅᐳᖅ ᕿᓚᒃ. “ᑕᐃᒫᒃ ᐅᖃᓪᓚᖃᑎᖃᓚᐅᖅᐳᖅ ᐊᖓᔪᖅᑳᓐᓄᑦ (ᐃᖅᑲᓇᐃᔮᒥᒃ) ᐃᓕᓐᓂᐊᖅᐸᓪᓕᐊᓂᕐᒥ ᖃᔅᓯᐊᕐᔪᖕᓂ ᐅᓪᓗᓄᑦ, ᑭᓱᑐᐃᓐᓇᐃᑦ ᓱᒃᑲᐃᓚᐅᕐᒪᑕ ᐅᕙᓐᓄᑦ ᕿᑯᓕᐅᕐᕕᖕᒥ.
“ᖃᔅᓯᐊᕐᔪᖕᓂ ᐅᓪᓗᓂ ᐅᐸᒃᓯᒪᓚᐅᖅᐸᕋ ᐊᒻᒪ, ᐃᒻᒥᓂᑐᐊᐸᓗᑦ ᐅᕙᓐᓂ ᐊᔭᐅᕆᓚᐅᖅᐳᖅ ᐱᓕᕆᓂᕐᒨᕐᓂᕐᒧᑦ.
“ᖁᔭᓕᕐᔪᐊᖅᓯᒪᕗᖓ ᐊᑐᐃᓐᓴᐅᑎᑦᑎᓚᐅᕐᓂᖓᓂ ᐃᓕᓐᓂᐊᖅᑎᑦᑎᓂᕐᒥ ᑕᐃᒃᑯᓂᖓ ᖃᔅᓯᐊᕐᔪᖕᓂ ᐅᓪᓗᓂᑦ.”
ᐊᑯᓂᐅᙱᑦᑐᒥ ᓅᕙᓐᓛᓐᒥᐅᑕᒥ ᐊᑐᐃᓐᓇᖃᕐᓂᖓᓂ ᕿᓚᒃ ᐱᒋᐊᓕᓚᐅᕐᓂᖓᓂ ᐱᓕᕆᓂᐅᔪᒥ ᐸᐃᑉᐹᖃᕐᓂᕐᒧᑦ ᐅᐊᔭᓕᕆᔨᙳᕋᓱᐊᕐᓂᖓᓄᑦ.
ᓄᓇᕗᑦ ᐊᑐᓕᓚᐅᖅᐳᖅ ᐋᓪᐴᑕᒥ ᐃᓕᓐᓂᐊᕈᑎᓕᐅᖅᑕᐅᓯᒪᔪᓂ ᑕᒪᒃᑭᓂ ᐱᓕᕆᐊᖑᓂᐅᔪᓂ ᑭᓯᐊᓂ ᑭᐊᒃᓴᐅᑎᓕᕆᔨᒧᑦ ᐊᐅᓚᐅᓯᕆᔨᒧᑦ ᐊᒻᒪ ᕿᓚᐅᑉ ᓯᕗᓪᓕᖅᐸᐅᔪᒥ ᐱᓕᕆᐊᒃᓴᖓᓂ ᓇᓂᓯᓂᕐᒥ ᐃᖅᑲᓇᐃᔭᖅᑎᖁᑎᓕᖕᒥ ᐃᖅᑲᓇᐃᔭᖅᑎᑖᕆᔭᐅᓂᖓᓂ ᐃᓕᓐᓂᐊᖅᑎᓪᓗᒍ.
ᕿᓚᒃ ᐅᖃᓚᐅᖅᐳᖅ ᑕᒪᓐᓇ ᐱᒐᒥᐅᒃ ᐊᒻᒪ ᐊᑎᓕᐅᖅᑕᐅᒐᒥ, ᓄᓇᕗᒻᒥ ᒐᕙᒪᒃᑯᑦ ᑐᓂᓯᓚᐅᖅᐳᑦ ᑐᖑᔪᖅᑐᒥ ᐅᖃᓕᒫᒐᕐᒥ’ ᐃᑲᕐᕋᖏᓐᓂ ᑎᑎᕋᖅᐸᓪᓕᐊᕝᕕᒃᓴᖓᓄᑦ.
ᐅᖃᓚᐅᖅᐳᖅ ᐱᔭᕆᐊᖃᖅᑎᑕᐅᕗᑦ ᐃᖅᑲᓇᐃᔭᕐᓂᕐᒥ ᒥᑭᓛᖑᔪᒥ ᐃᑲᕐᕋᓂ 900−ᓂ ᐃᖅᑲᓇᐃᔮᒥᒃ ᐱᔭᕆᑐᔪᒥ ᐱᓕᒻᒪᒃᓴᓚᐅᖅᑳᙱᑎᓪᓗᒋᑦ.
“ᓯᕗᓪᓕᖅᐹᒥ ᐊᕐᕌᒍᒥ ᐱᓕᕆᓚᐅᖅᑎᓪᓗᑎᑦ ᐱᔭᕆᑐᔪᒥ ᐱᓕᒻᒪᒃᓴᓂᐅᔪᒥ, ᑐᓂᔭᐅᕗᑎᑦ ᐃᑲᕐᕋᓂ 240−ᓂ ᐃᓕᓐᓂᐊᕐᕕᐊᕈᓯᐅᑉ ᐃᓗᐊᓂ ᐱᓕᒻᒪᒃᓴᓂᐅᔪᒥ ᑎᑎᕋᕐᓂᕐᒧᑦ ᑐᖑᔪᖅᑐᒥ ᐅᖃᓕᒫᒐᕐᓄᑦ.
“ᐊᕐᕌᒍᑦ ᐊᑕᐅᓯᖅ, ᒪᕐᕈᖓ ᐊᒻᒪ ᐱᖓᔪᖓ ᐊᔾᔨᒌᐸᓘᕗᑦ ᐱᓕᒻᒪᒃᓴᓂᐅᔪᒥ, ᑕᖅᑭᓂ ᒪᕐᕉᖕᓂ ᐱᔭᕆᑐᔪᓄᑦ, ᑭᖑᓪᓕᖅᐹᖓ ᐊᕐᕌᒍᖓᓂ ᑕᖅᑭᓄᑦ ᐱᖓᓲᕗᑦ.
“ᐊᕐᕌᒍᓂ ᑎᓴᒪᓂ ᐱᓇᓱᐊᓚᐅᖅᐸᕋ ᐃᓕᓴᖅᓯᒪᓂᕐᒥ ᐱᓕᕆᐊᒥᓂᑦ ᐸᐃᑉᐹᖁᑎᖃᕐᓂᕐᒧᑦ. ᒫᓐᓇᓕᓴᐅᔪᒥ ᐱᓚᐅᖅᐳᖓ ᐊᐅᐸᖅᑐᒥ ᓇᓗᓇᐃᒃᑯᑕᓐᓂ, ᐱᓕᕆᓚᐅᙱᓐᓇᒃᑯᑦ ᖃᐅᔨᓴᖅᑕᐅᓂᓐᓂ ᐊᑯᓂᒻᒪᕆᐊᓗᒃ.
“ᐃᓕᓴᖅᓯᒪᓂᕐᒥ ᐱᓕᕆᐊᒥᓂᑦ ᐸᐃᑉᐹᖁᑎᖃᕐᓂᕐᒧᑦ ᐱᔪᓐᓇᖅᑎᑦᑎᕗᖅ ᐃᖅᑲᓇᐃᔭᕐᓂᕐᒥ ᑲᓇᑕᐅᑉ ᐊᕕᒃᑐᖅᓯᒪᓂᐅᔪᓂ ᐅᕝᕙᓘᓐᓃᑦ ᐅᑭᐅᖅᑕᖅᑐᒥ ᑭᓯᐊᓂ, ᐊᐅᐸᖅᑐᒥ ᓇᓗᓇᐃᒃᑯᑕᖅᑖᕈᕕᑦ, ᐃᖅᑲᓇᐃᔭᕈᓐᓇᖅᐳᑎᑦ ᓇᒥᑐᐃᓐᓇᑦᑎᐊᖅ ᓄᓇᕐᔪᐊᓕᒫᒥ ᑲᓇᑕᒥ ᐊᑐᒐᒃᓴᐃᑦ ᐋᖅᑭᒃᑕᐅᓯᒪᓂᖏᑎᒍᑦ ᖁᑦᑎᒃᑐᐊᓘᖕᒪᑕ.”
ᕿᓚᒃ ᐃᓕᓐᓂᐊᓚᐅᖅᐳᖅ Grande Prairie ᐊᕕᒃᑐᖅᓯᒪᓂᐅᔪᒥ ᓯᓚᑦᑐᖅᓴᕐᕕᖕᒥ ᐊᒻᒪ ᐃᖅᑲᓇᐃᔭᓚᐅᖅᐳᖅ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖓᓂ (AEM) ᐊᕐᕌᒍᐸᓗᖕᓄᑦ ᑎᓴᒪᓄᑦ. ᓅᓚᐅᖅᐳᖅ ᓚᑦᐳᕆᔾ, ᐋᓪᐴᑕᒧᑦ ᑕᖅᑭᐸᓗᑦ 6−ᖑᓕᖅᑐᓂ ᓄᓕᐊᖓᓗ ᐊᒻᒪ ᒪᕐᕉᒃ ᐃᕐᓂᖏᑦ ᐱᓕᕆᐊᖃᕆᐊᖅᑐᖅᖢᓂ Atco ᐅᖅᓱᕐᒧᑦ ᓱᓪᓗᑯᑖᖓᓂ ᐊᕕᒃᑐᖅᓯᒪᓂᐅᔪᒧᑦ.
ᐅᖃᓚᐅᖅᐳᖅ ᐊᓕᐊᓇᐃᒋᔭᖃᑦᑎᐊᖅᐳᖅ ᓇᒧᕈᓘᔭᖅ ᐊᐅᓪᓛᕐᓂᕐᒥ ᐊᒻᒪ ᐱᓕᕆᖃᑎᖃᕐᓂᕐᒥ ᓱᓪᓗᑯᑖᒥ ᐃᓂᐅᔪᓂ, ᐱᕕᒃᓴᖃᓚᐅᖅᓯᒪᙱᒻᒪᑦ ᑕᐃᒪᐃᑦᑐᓂ ᐱᓕᕆᓂᕐᒧᑦ ᓅᓚᐅᖅᑳᕋᓂ ᐋᓪᐴᑕᒧᑦ.
“ᑲᑉᐱᐊᓱᖕᓂᐅᔪᒥ ᖃᐅᔨᒪᙱᓗᐊᕐᓂᐅᔪᒥ ᖃᒡᓯᐊᕐᔪᖕᓂ ᐅᖃᐅᓯᐅᔪᓄᑦ ᐅᑯᓇᓂ ᐃᓂᐅᔪᓂ ᐃᓱᒪᒋᓯᒪᕙᕋ ᖃᔅᓰᖅᓱᐊᕐᔪᒃᖢᖓ. ᑭᓯᐊᓂ ᐃᖅᑲᓇᐃᔭᖃᑎᖃᕐᓂᕐᒥ ᐊᖑᒻᒥ ᐃᓂᐅᔪᓄᐊᖅᓯᒪᔪᒥ ᐊᑯᓂᒻᒪᕆᐊᓗᒃ ᐅᕙᓐᓂ ᐃᑲᔪᕐᓂᖃᓚᐅᖅᐳᖅ ᖄᖏᐅᑎᓂᕐᒧᑦ, ᐅᐸᒋᐊᒃᓴᖅ ᐊᔪᕐᓇᙱᓚᖅ.
“ᐊᐱᖅᓱᐃᓐᓇᐅᔭᖅᖢᓂ ᐅᕙᓐᓂ ᐃᓗᐊᖅᓯᑎᑦᑎᓯᒪᕗᖅ ᐅᕙᓂ ᐃᖅᑲᓇᐃᔭᕐᓂᕐᒥ, ᐃᓄᖕᓂ ᐃᑲᔪᕈᒪᑐᐃᓐᓇᕐᒪᑦ.
“ᐅᑎᓛᕈᒪᕗᖓ ᐃᖅᑲᓇᐃᔭᕐᓂᕐᒧᑦ ᐊᒡᓂᑯ ᐄᒍᓪ ᐅᔭᕋᖕᓂᐊᕐᕕᖓᓄᑦ ᐱᔭᕇᕈᒪ ᓱᓪᓗᑯᑖᒥ ᐱᓕᕆᐊᒃᓴᐅᔪᒥ ᐱᓕᕆᓂᐊᖅᑕᓐᓂ ᑕᖅᑭᐅᓛᖅᑐᒥ. ᐱᓕᕆᐊᒃᓴᐅᔪᖅ ᑲᔪᓯᑐᐃᓐᓇᕆᐊᖃᖅᐳᖅ ᐅᑭᐊᒃᓵᒧᑦ.”
ᓖ ᕿᓚᒃ ᐅᖃᓚᐅᖅᐳᖅ ᓱᓕ ᑐᕌᕋᓱᐊᖅᐳᖅ ᐅᓪᓗᕆᐊᓄᑦ, ᑭᓯᐊᓂ, ᑕᒪᐃᑎᒍᑦ, ᖁᕕᐊᓱᒃᐳᖅ ᓇᒦᓐᓂᖓᓂ ᐃᓅᓯᕐᒥ. ᓄᓇᖃᖅᖢᓂ ᓕᐊᑦᐳᕆᔾᒥ ᐊᔾᔨᒋᙱᑦᑎᐊᖅᑕᖓᓂ ᐃᓅᓯᐅᕗᖅ ᐃᒻᒥᓄᑦ ᐊᒻᒪ ᐃᓚᖏᓐᓄᑦ ᐊᒻᒪ, ᒫᓐᓇᒧᑦ ᑎᑭᖦᖢᒍ, ᐱᓕᕆᑦᑎᐊᕐᔪᐊᖅᐳᖅ.
ᓴᙱᔪᒥ ᐃᑲᔪᖅᓱᐃᔨᐅᕗᖅ ᐱᓕᕆᐊᒥᓂᑦ ᐱᓕᕆᔪᓂ ᐊᒻᒪ ᑲᔪᖏᖅᓴᐃᓂᐅᔪᒥ ᐅᖃᐅᓯᒃᓴᖃᖅᐳᖅ ᑕᐃᒃᑯᓄᖓ ᖁᑦᑎᖕᓂᖅᓴᒥ ᐃᓕᓐᓂᐊᖅᑐᓂ ᐃᓱᒪᔪᓂ ᐃᖅᑲᓇᐃᔮᖃᕐᓂᕐᒥ ᐱᓕᕆᐊᖑᔪᓂᑦ.
“ᓄᓇᕐᔪᐊᓕᒫᖅᑕᖃᖅᐳᖅ ᑕᖅᑳᓂ ᕿᒥᕐᕈᐊᒐᒃᓴᕐᓂᑦ.
“ᐊᓂᓗᑎᑦ, ᑐᕌᕐᓗᑎᑦ ᑯᑦᑎᖕᓂᖅᓴᐅᔪᒥ ᐱᔪᓐᓇᕋᓱᒋᓚᐅᖅᑕᕐᓂ ᐊᒻᒪ ᑲᑉᐱᐊᓱᙱᓪᓗᑎᑦ ᑭᖑᕙᕆᐊᕐᓂᐅᔪᒥ.”