“ᐃᒃᓯᓐᓇᖅᑕᐅᔫᔮᖅᐳᒍᑦ. ᐃᒃᐱᒍᓱᑦᑎᐊᕐᓂᐅᙱᑦᑐᒻᒪᕆᐊᓗᒃ,” ᐅᖃᓚᐅᖅᐳᖅ ᑕᓗᕐᔪᐊᒥ ᒪᐃᔭᖓ ᓴᒃ ᐱᑦᓱ–ᓚᐃᔪᓪ. “ᐊᐃᑦᑖᕈᓱᑐᐃᓐᓇᕐᓂᐅᕗᖅ.”
ᐱᑦᓱ–ᓚᐃᔪᓪ ᐅᖃᐅᓯᖃᓚᐅᖅᐳᖅ ᑐᓴᒐᒃᓴᓕᐊᖑᔪᓄᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑭᖑᕙᕆᐊᖅᑎᑦᑎᓂᐊᕐᓂᖓᓂ ᓇᑉᐸᖅᑎᕆᓂᐅᔪᒥ ᒪᕐᕉᖕᓂ ᑕᓪᓕᒪᓂ–ᑲᑎᙵᔪᓂ ᐃᒡᓗᒃᓴᓂ ᓄᓇᓕᖓᓂ ᐱᔾᔪᑎᖃᖅᑐᒥ ᓱᒃᑲᔪᒥ ᖁᕝᕙᖅᐸᓪᓕᐊᔪᓄᑦ ᐊᑭᐅᔪᓂ.
ᐃᓄᓕᒫᓄᑦ ᐃᒡᓗᒃᓴᓂ ᓴᓇᔭᐅᓯᒪᔪᖃᙱᓚᖅ ᑕᓗᕐᔪᐊᒥ 1,100–ᓄᑦ ᓄᓇᖃᖅᑎᐅᔪᓄᑦ ᐊᕐᕌᒍᑦ ᑎᓴᒪᑲᓴᖕᓄᑦ, ᒪᐃᔭᖓ ᐅᖃᓚᐅᖅᐳᖅ.
ᑎᑎᕋᓚᐅᖅᐳᖅ ᓴᖅᑭᑎᑕᐅᓯᒪᔪᒥ ᑲᑎᒪᔾᔪᑎᒃᓴᓂ ᒪᓕᒐᓕᐅᕐᕕᖕᒥ ᐅᒃᑐᐱᕆᐅᓚᐅᖅᑐᒥ, ᑐᑭᓯᓇᑦᑎᐊᖅᑐᒥ ᐅᖃᖅᓯᒪᔪᒥ ᐱᔭᕆᐊᖃᓪᓚᕆᖕᓂᐅᔪᒥ ᐊᖏᕐᕋᒃᓴᖃᕆᐊᖃᕐᓂᖓᓂ ᕼᐋᒻᓚᐅᔪᒥ. ᓈᒻᒪᓚᐅᙱᓚᖅ ᑭᓱᑐᐃᓐᓇᒥ ᐱᓕᕆᓚᐅᙱᓐᓂᖏᓐᓂ.
“ᓄᖑᕈᑎᕙᓪᓕᐊᓕᖅᐳᖓ ᐅᖃᕐᓂᕐᒧᑦ ᓄᓇᓕᖕᒥᐅᑕᓄᑦ ᖃᓄᐃᒻᒪᑦ ᑕᐃᒪᐃᓐᓂᖓᓂ,” ᐅᖃᓚᐅᖅᐳᖅ ᑭᖑᕙᕆᐊᕐᓂᐅᔪᒥ.
ᐅᓄᕐᓂᖅᓴᐅᔪᓂ 100-ᓂ ᑐᒃᓯᕋᖅᓯᒪᔪᓂ ᐅᑕᖅᑭᔭᕆᐊᓕᖕᓂ ᑎᑎᕋᖅᓯᒪᓂᐅᔪᒥ ᑭᖑᓪᓕᖅᐹᒥ ᖃᐅᔨᒋᐊᕋᒥ. ᖃᐅᔨᒪᓂᖃᖅᐳᖅ ᐱᖓᓱᓂ–ᐃᒡᓗᕈᓯᓕᖕᒥ ᐊᖏᕐᕋᐅᔪᒥ ᑕᓗᕐᔪᐊᓂ 18–ᓂ ᐃᓄᖕᓂ ᐃᓄᖃᖅᑐᒥ.
ᐊᒥᓲᙱᓗᐊᖅᑐᓂ ᐃᒡᓗᒃᓴᐅᔪᓂ ᐊᑐᐃᓐᓇᐅᓂᖓᓂ ᐊᒻᒪ ᐊᖏᕐᕋᖃᙱᑦᑐᓄᑦ ᐃᒡᓗᖃᕐᓇᑎᒃ, ᒪᐃᔭᖓ ᐅᖃᓚᐅᖅᐳᖅ ᐃᓄᖕᓂ ᓵᖃᑦᑕᖅᑐᓄᑦ ᐱᕋᔭᖕᓂᕐᒧᑦ ᓇᓗᓇᐃᖅᓯᓂᕐᒧᑦ ᐊᑦᑕᓇᙱᑦᑐᒥ ᐊᒻᒪ ᐅᖅᑰᔪᒥ ᐃᓂᖃᕐᓂᐊᕐᓂᖏᓐᓂ: ᐊᓄᓪᓚᒃᓰᕕᖕᓂ.
“ᐱᑦᑎᐊᕋᓱᐊᖅᐸᙱᓚᑦ ᐃᒡᓗᖃᓚᐅᑲᑐᐃᓐᓇᕐᓂᕐᒧᑦ,” ᐅᖃᓚᐅᖅᐳᖅ. “ᑕᐃᒪᓐᓇ ᐃᓱᒪᔪᒪᕙᙱᒃᑲᓗᐊᖅᑐᖓ, ᑭᓯᐊᓂ ᑕᐃᒪᐃᑉᐸᓕᕐᒪᑕ.”
ᐊᔪᕐᓇᖅᓯᒪᑎᓪᓗᒍ ᑕᓗᕐᔪᐊᓂ, ᐱᑦᓱ–ᓚᐃᔪᓪ ᐅᔾᔨᕈᓱᒃᐳᖅ ᓄᓇᕘᑉ ᐃᒡᓗᒃᓴᖃᕐᓂᕐᒥ ᑐᐊᕕᕐᓇᕐᓂᐅᔪᖅ ᐊᖏᔪᒻᒪᕆᐊᓘᓂᖓᓂ. ᐱᖃᓐᓇᕆᔭᖃᖅᐳᖅ ᐃᓚᒌᑦ ᐅᑭᐅᖅᓯᐅᓚᐅᕐᓂᖏᓐᓂ ᐃᖃᓗᖕᓂ ᑐᐱᕐᒥᐅᑕᐅᓪᓗᑎᒃ ᓇᒧᙵᐅᕝᕕᒃᓴᖃᓚᐅᙱᒻᒪᑕ.
“ᐱᐅᙱᑦᑐᒻᒪᕆᐊᓘᕗᖅ,”ᐅᖃᓚᐅᖅᐳᖅ.
ᐃᓚᒋᐊᖅᓯᓚᐅᖅᐳᖅ ᓂᕆᐅᒃᐳᖅ ᓄᓇᕗᒻᒥ ᒐᕙᒪᒃᑯᑦ ᐱᒋᐊᒃᑲᓐᓂᕐᓂᐊᕐᓂᖓᓂ ᐊᖏᕐᕋᒃᓴᒥ ᓇᖕᒥᓂᖃᕐᓂᕐᒧᑦ ᐱᓕᕆᐊᖑᔪᒥ. ᐅᖃᓚᐅᖅᐳᖅ ᒪᕐᕈᐃᖅᓱᖅᖢᓂ ᑎᑭᐅᑎᓇᓱᐊᓚᐅᖅᐳᖅ ᐱᔭᕆᐊᖃᕐᓂᐅᔪᓂ ᑭᓯᐊᓂ ᓇᓗᓇᖅᑐᐊᓘᓪᓗᓂ ᐱᓕᕆᓂᐅᕗᖅ ᐊᒻᒪ ᐱᔭᕇᕈᓐᓇᓚᐅᙱᓚᖓ.
“ᓄᓇᑖᕋᓱᑐᐃᓐᓇᕐᓂᕐᒥ ᓴᐱᕐᓇᖅᐳᖅ,” ᐅᖃᓚᐅᖅᐳᖅ.
ᒪᓕᒐᓕᐅᕐᕕᖕᒥ, ᓇᑦᓯᓕᒃ ᒪᓕᒐᓕᐅᖅᑎ ᐃᒦᓕᐋᓄ ᕿᖕᓄᖅ ᐅᓪᓗᒐᓴᓂ ᓯᕗᓪᓕᖅᐹᒥ ᐱᓇᓱᐊᕈᓯᐅᔪᒥ ᔫᓂᒥ ᐊᖏᖅᑎᑦᑎᓇᓱᐊᕐᓂᕐᒥ ᐃᒡᓗᓕᕆᔨᕐᔪᐊᒃᑯᓐᓂ ᒥᓂᔅᑕᖓᓂ ᒫᒡᒍᓕᖅ ᓇᑲᓱᖕᒥ.
“ᓱᓕ ᖁᒃᓴᓪᓚᒃᓯᒪᕗᒍᑦ ᐅᓪᓗᒥ ᓄᓇᓕᑦᑎᓐᓂ ᑕᓗᕐᔪᐊᒥ ᑕᐃᒪᙵᓂ ᒥᓂᔅᑕ ᐅᖃᓚᐅᕐᓂᖓᓂ ᐱᓇᓱᐊᕈᓯᐅᓚᐅᖅᑐᒥ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑳᓐᑐᕌᒃᑖᕋᓱᐊᕐᓂᐅᔪᒥ ᓄᓇᓕᖕᓄᑦ ᓄᑖᖑᔪᒥ ᑕᓪᓕᒪᓂ–ᑲᑎᙵᔪᓂ ᐃᒡᓗᖃᖅᑐᓂ ᓄᖅᑲᖅᑎᑕᐅᓂᖓᓂ,” ᕿᖕᓄᖅ ᐅᖃᓚᐅᖅᐳᖅ ᔫᓂ 1–ᒥ. “ᒥᓂᔅᑕ ᖃᐅᔨᒪᑦᑎᐊᖅᐳᖅ, ᑕᓗᕐᔪᐊᖅ ᐊᑕᐅᓯᐅᓪᓗᓂ ᓄᓇᓕᐅᕗᖅ ᐱᔭᕆᐊᖃᕐᓂᖅᐹᖑᓂᖓᓂ ᐅᓄᕐᓂᖅᓴᐅᔪᓄᑦ ᐃᒡᓗᒃᓴᓄᑦ. ᒥᓂᔅᑕ ᑐᑭᓯᓇᑦᑎᐊᖅᑐᒥ ᐅᓂᒃᑳᕈᓐᓇᖅᐸ ᖃᓄᐃᒻᒪᑦ ᓄᓇᕗᒻᒥ ᐃᒡᓗᓕᕆᔨᕐᔪᐊᒃᑯᑦ ᑐᓂᓯᔪᓐᓇᙱᓐᓂᖏᓐᓂ ᑳᓐᑐᕌᒃᑖᕋᓱᐊᖅᑎᑦᑎᓂᕐᒧᑦ ᑕᒪᑐᒪᓂ ᐊᕐᕌᒎᔪᒥ ᐱᓕᕆᐊᒃᓴᒧᑦ?”
ᔫᓂ 2–ᒥ, ᓇᑲᓱᒃ ᑭᐅᓚᐅᖅᐳᖅ, “ᐃᒡᓗᓄᑦ ᑲᑎᙵᓂᐅᔪᓂ ᓴᓇᔭᐅᓂᐊᓚᐅᖅᑐᓂ ᑕᓗᕐᔪᐊᓂ ᓄᖅᑲᖅᑎᑕᐅᙱᓚᑦ. ᐸᕐᓇᒃᑕᐅᓂᖓᓂ ᐱᓕᕆᔭᐅᕙᓪᓕᐊᕗᑦ ᑭᓯᐊᓂ ᓯᕗᒻᒧᑦ ᐃᖏᕐᕋᔪᓐᓇᙱᓚᑦ ᑕᒪᑐᒧᖓ ᐊᕐᕌᒎᔪᒧᑦ… ᐃᔨᖅᓯᓯᒪᙱᑦᑐᒍᑦ ᑭᓱᑐᐃᓐᓇᒥᒃ. ᐅᕙᓂ ᐅᖃᕈᓐᓇᖅᐳᖓ ᑮᓇᐅᔭᑦ ᓈᒻᒪᙱᑐᐃᓐᓇᓚᐅᖅᐳᑦ ᓂᐅᕕᕐᓂᐅᔪᒥ ᐃᒡᓗᓕᐅᕐᓂᕐᒧᑦ ᓱᓇᒃᑯᑖᖏᓐᓄᑦ ᐊᑭᑦᑐᕆᐊᕐᔪᐊᖅᓯᒪᔪᓄᑦ.”
ᔫᓂ 7–ᒥ, ᕿᖕᓄᖅ ᓵᓚᐅᖅᐳᖅ ᐃᓄᓕᕆᔨᒃᑯᓐᓄᑦ ᒥᓂᔅᑕᖓᓄᑦ ᐃᓕᓴᐱ ᓯᐅᑎᐊᐱᖕᒧᑦ ᐊᐱᕆᓪᓗᓂᐅᒃ ᐱᓕᕆᕝᕕᖓ ᐃᑲᔪᕈᓐᓇᕐᒪᖔᑦ “ᑕᐃᒃᑯᓄᖓ ᐊᖏᕐᕋᖃᙱᑦᑐᓄᑦ ᑕᐃᔪᓐᓇᖅᑕᒥᓂ ᓇᖕᒥᓂᕆᓂᕋᕐᓗᓂᐅᒃ.”
ᓯᐅᑎᐊᐱᒃ ᑭᐅᓚᐅᖅᐳᖅ, “ᐱᓕᕆᕝᕕᒃᐳᑦ ᐊᖏᖅᓯᒪᐃᓐᓇᐅᔭᖅᐳᑦ ᐱᓕᕆᖃᑎᖃᕐᓂᕐᒥ ᒥᓂᔅᑕᐅᖃᑎᒥᓂᑦ, ᒪᓕᒐᓕᐅᖅᑎᑦᑎᓐᓂ ᐊᒻᒪ ᐱᓗᐊᖅᑐᒥ ᓄᓇᓕᑦᑎᓐᓂ, ᐅᕘᓇ ᐊᔪᖅᓴᕐᓂᕐᒥ ᒥᒃᖠᒋᐊᖅᑎᑦᑎᓂᐅᔪᒥ ᐊᕕᒃᑐᖅᓯᒪᓂᐅᔪᒥ, ᑕᐃᒪᐃᓕᐅᓪᓚᕆᖕᓂᕐᒥ, ᐃᓴᒃᓯᒪᓂᕐᒧᑦ ᐊᑐᓂ ᓄᓇᓕᐅᔪᓄᑦ ᑕᑯᓂᕐᒥ ᑭᓱᑦ ᐃᓂᐅᔪᑦ ᐊᑐᐃᓐᓇᐅᓂᖏᓐᓂ ᐃᕐᙲᓐᓇᒥ ᐊᑐᖅᑕᐅᔪᓐᓇᕋᔭᖅᑐᓄᑦ.”