ᐃᒡᓗᓕᒑᕐᔪᒃ ᑐᐊᕕᕐᓇᖅᑐᒥ ᐱᔭᕆᐊᖃᖅᐳᑦ ᓄᑖᖑᔪᒥ ᒥᑦᑕᕐᕕᖓᑕ ᐃᒡᓗᖁᑎᖓᓐᓂ, ᐅᓂᒃᑳᕆᓚᐅᖅᐳᖅ ᑲᖏᖅᖠᓂᕐᒥ ᐅᐊᖕᓇᒥ–ᐃᒡᓗᓕᒑᕐᔪᖕᒧᑦ ᒪᓕᒐᓕᐅᖅᑎᖓ ᐋᓕᒃᓵᓐᑐᕐ ᓴᒻᒧᖅᑐᖅ ᒪᓕᒐᓕᐅᕐᕕᖕᒥ ᖄᖏᖅᓯᒪᓕᖅᑐᒥ ᐅᑭᐊᒃᓵᒃᑯᑦ ᐃᒃᓯᕚᕐᓂᐅᔪᒥ ᓄᕕᐱᕆ 2−ᒥ.

ᓴᖅᑭᑎᑦᑎᓚᐅᖅᐳᖅ ᐊᔾᔨᙳᐊᓂ ᑕᑯᒃᓴᐅᑎᑦᑎᔪᒥ ᐱᐅᙱᑦᑐᒥ ᖃᓄᐃᓕᖓᓂᖓᓂ ᐃᒡᓗᕐᔪᐊᕐᒥ.

“ᒪᓕᒐᓕᐅᕐᕕᒃ ᓯᕗᓂᐊᓂ ᐊᖏᖅᓯᒪᒐᓗᐊᖅᑎᓪᓗᒍ ᒥᓕᐊᓐᓂ ᑮᓇᐅᔭᓂ ᑮᓇᐅᔭᖃᖅᑎᑦᑎᓂᕐᒧᑦ ᐆᒧᖓ ᐱᓕᕆᐊᒃᓴᐅᔪᒧᑦ, ᒐᕙᒪᒃᑯᑦ ᓄᖅᑲᖅᑎᑦᑎᓯᒪᕗᑦ ᖃᔅᓯᒐᓚᖕᓂ ᑳᓐᑐᕌᒃᑖᕋᓱᐊᕐᓂᐅᔪᒥ ᖁᑦᑎᓗᐊᖅᑐᒥ ᐱᓇᓱᐊᕐᓂᐅᔪᓄᑦ,” ᐅᖃᓚᐅᖅᐳᖅ. “ᒥᓂᔅᑕ ᓇᓗᓇᐃᖅᓯᔪᓐᓇᖅᐸ ᖃᖓ ᓄᑖᖑᔪᒥ ᑳᓐᑐᕌᒃᑖᕋᓱᐊᕐᓂᐅᔪᒥ ᐃᒡᓗᓕᒑᕐᔪᖕᒧᑦ ᒥᑦᑕᕐᕕᖓᑕ ᐃᒡᓗᖁᑎᖓᓐᓂ ᐱᓕᕆᐊᒃᓴᐅᔪᒧᑦ ᑐᓂᔭᐅᓂᐊᖅᐸ?”

ᒥᓂᔅᑕ ᐱᕙᓪᓕᐊᔪᓕᕆᔨᒃᑯᓐᓂ ᐃᖏᕐᕋᔪᓕᕆᔨᒃᑯᓪᓗ ᑕᐃᕕᑦ ᐊᕿᐊᕈᖅ ᑭᐅᓚᐅᖅᐳᖅ ᐱᓕᕆᕝᕕᖓ ᐱᓕᕇᓐᓇᕐᓂᐊᕐᓂᖏᓐᓂ ᐆᒧᖓ ᐱᓕᕆᐊᒃᓴᐅᔪᒧᑦ, ᑭᓯᐊᓂ ᖃᐅᔨᒪᓚᐅᙱᓚᖅ ᐱᖓᔪᖓᓐᓂ ᑳᓐᑐᕌᒃᑖᕋᓱᐊᕐᓂᐅᔪᖃᕐᓂᐊᕐᓂᖓᓂ.

ᖄᖏᖅᓯᒪᓕᖅᑐᒥ ᐅᐱᕐᙶᖑᓚᐅᖅᑐᒥ, ᓴᒻᒧᖅᑐᖅ ᓴᖅᑭᑎᑦᑎᓚᐅᖅᐳᖅ ᑎᑎᖅᑲᒥ ᒪᐃᔭᖓᓂ ᐃᒡᓗᓕᒑᕐᔪᖕᒥ, ᑐᒃᓯᕋᓚᐅᖅᑐᒥ ᒐᕙᒪᒃᑯᑦ ᑐᓂᓯᓂᖓᓐᓂ ᐃᒻᒥᒃᑰᖅᑐᒥ ᑳᓐᑐᕌᒃᑖᕋᓱᐊᕐᓂᐅᔪᒥ ᒥᑦᑕᕐᕕᖓᑕ ᐃᒡᓗᖁᑎᖓᓐᓄᑦ ᑲᑎᖃᑎᖃᙱᖔᕐᓗᓂ ᑳᓐᑐᕌᒃᑖᕋᓱᐊᕐᓂᐅᔪᓂ ᐊᓯᖏᓐᓂ ᐱᓕᕆᐊᒃᓴᐅᔪᓂ. ᓴᒻᓱᖅᑐᖅ ᐊᐱᕆᓚᐅᖅᐳᖅ ᐊᕿᐊᕈᕐᒧᑦ ᐊᖏᖃᑎᖃᕈᓐᓇᕐᒪᖔᑕ ᑕᐃᔅᓱᒧᖓ ᑐᒃᓯᕋᕐᓂᐅᔪᒧᑦ.

“ᑕᐃᑯᙵᕈᑦᑕ ᐱᓕᕆᓂᐅᔪᒥ ᑳᓐᑐᕌᒃᑖᕋᓱᐊᕐᓂᐅᔪᒧᑦ, ᑕᐃᑲᓂ ᐃᓱᒪᓕᐅᕆᓂᐅᔪᖅ ᐱᓕᕆᐊᖑᓂᐊᖅᐳᖅ,” ᑭᐅᓚᐅᖅᐳᖅ ᐊᕿᐊᕈᖅ. “ᑭᕙᓪᓕᕐᒦᒃᑯᑦᑕ, ᑕᐃᒃᑯᓂᖓ ᐱᖓᓱᓂ ᐱᓕᕆᐊᒃᓴᐅᔪᓂ ᐊᔾᔨᑦᑎᐊᖓᓂ ᐱᓕᕆᓇᓱᐊᖅᑐᓂ, ᑐᑭᖃᑐᐃᓐᓇᖅᐳᖅ ᑳᓐᑐᕌᒃᑖᕋᓱᐊᕐᓂᐅᔪᒥ ᑲᑎᙵᑎᑕᐅᓗᑎᒃ. ᑕᒪᓐᓇ ᐆᒃᑐᕋᓱᐊᖅᓯᒪᕙᕗᑦ; ᐱᓇᓱᐊᓚᐅᖅᐸᕗᑦ ᑕᒪᒃᑭᓂ ᑕᓪᓕᒪᐅᔪᓄᑦ, ᐊᒻᒪ ᐆᒃᑐᓚᐅᖅᐸᕗᑦ ᐱᖓᓱᓄᑦ, ᐊᒻᒪ ᒫᓐᓇ ᕿᒪᒃᑕᐅᕗᒍᑦ ᖃᓄᐃᓕᐅᕐᓂᐊᓕᕐᓂᑦᑎᓐᓂ. ᑕᐃᓐᓇ ᐃᓚᖓ ᐊᒻᒪ ᐅᖃᓪᓚᖕᓂᕆᔭᑦᑎᓐᓂ ᐅᓯᑲᑦᑕᕐᓂᕐᒥ ᑲᓇᑕᒥ ᓱᓕ ᐱᓕᕆᐊᖑᕙᓪᓕᐊᕗᑦ. ᑕᐃᑯᖓ ᐱᓕᕆᓂᕐᒧᐊᕈᑦᑕ ᖃᐅᔨᒪᔪᓐᓇᖅᓯᓂᐊᖅᐳᖓ ᓇᓕᐊᖕᓄᑦ ᑳᓐᑐᕌᒃᑖᕋᓱᐊᕐᓂᐅᔪᑦ ᓇᒧᙵᐅᓂᐊᕐᓂᖏᓐᓂ ᑖᒃᑯᓄᖓ ᑕᓪᓕᒪᐅᔪᓄᑦ ᒥᑦᑕᕐᕕᖕᒥ ᐱᓕᕆᐊᒃᓴᐅᔪᓄᑦ.”

ᐊᐃᕕᓕᒃ ᒪᓕᒐᓕᐅᖅᑎ ᓵᓚᒪᓐ ᒪᓕᑭ ᐊᔾᔨᐸᓗᐊᓂ ᐅᖃᓪᓚᖕᓂᖃᓚᐅᖅᐳᖅ ᐊᐱᕆᒐᒥ ᐊᕿᐊᕈᕐᒥ ᓄᑖᖑᔪᒥ ᑳᓐᑐᕌᒃᑖᕋᓱᐊᕐᓂᖃᕐᓂᐊᕐᓂᖓᓂ ᓇᐅᔮᓄᑦ ᒥᑦᑕᕐᕕᖓᑕ ᐃᒡᓗᖁᑎᖓᓐᓂ ᐱᓕᕆᐊᒃᓴᐅᔪᒧᑦ.

“ᐱᖓᓱᑦ ᓄᓇᓕᐅᔪᑦ – ᓇᐅᔮᑦ, ᐃᒡᓗᓕᒑᕐᔪᒃ ᐊᒻᒪ ᑎᑭᕋᕐᔪᐊᖅ – ᑲᑎᙵᕗᑦ ᐊᒻᒪ ᑳᓐᑐᕌᒃᑖᕋᓱᐊᕐᓂᐅᔪᖅ ᒫᓐᓇᐅᔪᒥ ᒪᑐᐊᖓᙱᓚᖅ ,” ᑭᐅᓚᐅᖅᐳᖅ ᐊᕿᐊᕈᖅ ᑐᓵᔨᖃᖅᖢᓂ. “ᒪᑐᐃᒃᑲᓐᓂᕐᓂᐊᖅᐸᕗᑦ.”

ᑐᓴᒐᒃᓴᓕᐅᕐᓂᕐᒧᑦ ᑎᓯᐱᕆ 12,−ᒥ ᓄᑖᖑᔪᒥ ᑳᓐᑐᕌᒃᑖᕋᓱᐊᕐᓂᐅᔪᒥ ᑐᓂᔭᐅᔪᖃᖅᓯᒪᙱᓚᖅ ᓄᓇᕗᒻᒥ ᒐᕙᒪᒃᑯᓐᓂ ᒥᑦᑕᕐᕕᖓᑕ ᐃᒡᓗᖁᑎᖓᓐᓂ ᓇᐅᔮᓂ, ᐃᒡᓗᓕᒑᕐᔪᒃ ᐊᒻᒪ ᑎᑭᕋᕐᔪᐊᕐᒧᑦ.

ᑳᓐᑐᕌᒃᑖᕋᓱᐊᕐᓂᐅᔪᒧᑦ ᐱᓕᕆᓂᐅᔪᖅ ᐱᓕᕆᐊᖑᓇᓱᐃᓐᓇᖅᓯᒪᕗᖅ ᐊᕐᕌᒍᓄᑦ ᒪᕐᕕᑲᓴᖕᓄᑦ. 2020−ᒥ, ᓄᓇᕗᒻᒥ ᒐᕙᒪᒃᑯᑦ ᓇᓗᓇᐃᖅᓯᓯᒪᕗᑦ $30 ᒥᓕᐊᓐᓂ ᑕᓪᓕᒪᓄᑦ ᒥᑦᑕᕐᕕᖕᓄᑦ — ᖁᕐᓗᖅᑐᖅ ᐊᒻᒪ ᑭᒻᒥᕈᑦ ᐊᐃᑉᐸᕆᔭᐅᓪᓗᑎᒃ ᒪᕐᕉᔪᓂ — ᑮᓴᐅᔭᖃᖅᑎᑕᐅᓪᓗᑎᒃ ᑲᓇᑕᒥ ᒐᕙᒪᒃᑯᓐᓂ ᑲᓇᑕᒥ ᑕᐅᖅᓰᓂᐅᔪᒥ ᐃᓯᕐᕕᐅᔪᓂ ᑮᓴᐅᔭᖏᓐᓂ. ᑭᓯᐊᓂ, ᐱᓕᕆᑦᑎᐊᕈᓐᓇᖅᓯᒪᔪᒥ ᐱᔪᖃᖅᓯᒪᙱᓚᖅ.

Leave a comment

Your email address will not be published. Required fields are marked *