ᐊᕐᕕᐊᕐᒥᐅᑕᖅ ᐊᕐᓇᖅ ᖁᑦᑎᖕᓂᖅᓴᒃᑯᑦ ᐃᓕᓐᓂᐊᕐᓂᕐᒥᒃ ᐱᔫᒥᓵᕆᔪᒪᔪᖅ ᓄᓇᖃᖅᑳᖅᓯᒪᔫᖃᑎᒥᓄᑦ ᐃᓕᓐᓂᐊᖅᑐᓄᑦ.
ᐃᒥ ᑯᒪᒡᔪᐊᖅ ᐃᓕᑕᕆᔭᐅᔾᔪᑎᓕᒃ ᑐᓵᔨᐅᓂᕐᒧᑦ ᑭᖑᓪᓕᖅᐹᒃᑯᑦ ᐅᑭᐅᒥ ᐃᓕᓐᓂᐊᓕᖅᑐᖅ ᑐᓵᔨᐅᓂᕐᒧᑦ ᓄᓇᕗᒥ ᓯᓚᑦᑐᖅᓴᕐᕕᖕᒥ ᐃᖃᓗᖕᓂ.
ᓄᑕᕋᖃᖅᖢᓂ ᐃᓕᓐᓂᐊᓕᓚᐅᖅᑐᖅ ᓯᓚᑦᑐᖅᓴᕐᕕᖕᒥ ᐅᖃᖅᑐᖅ “ᐊᔭᐅᖅᑐᐃᓂᕋᖅᖢᓂ ᐃᓄᖕᓂᒃ ᓄᑕᕋᓕᖕᓂᒃ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖃᑦᑕᖁᑉᓗᒋᑦ ᐊᒻᒪᓗ ᓄᑕᕋᒥᓂᒃ ᐃᓕᓐᓂᐊᖅᑎᑦᑎᖃᑦᑕᕐᓗᑎᒃ.”
“ᐃᓕᓐᓂᐊᖅᑐᑦ ᖁᑦᑎᖕᓂᓕᖕᒥ 12-ᒥ ᑲᑉᐱᐊᓱᒐᔪᖕᒪᑕ ᓯᓚᑦᑐᖅᓴᕐᕕᖕᒥ ᓯᓚᑦᑐᖅᓴᕐᕕᒡᔪᐊᕐᒥᓘᓐᓃᑦ ᐃᓕᓐᓂᐊᕆᐊᕆᐊᒃᓴᖅ ᐱᒻᒪᕆᐊᓘᖕᒪᑦ,” ᑕᐃᒪᓐᓇ ᐅᖃᖅᖢᓂ. “ᑭᓯᐊᓂ ᐊᔭᐅᖅᑐᖃᑦᑕᖅᑕᒃᑲ ᐆᒃᑐᖁᑉᓗᒋᑦ ᓯᕗᓂᒃᓴᖃᑦᑎᐊᕐᓂᐊᕐᒪᑕ ᓄᑕᕋᖏᓪᓗ.”
ᐆᒃᑐᓚᐅᖅᓯᒪᔪᖅ ᐃᓕᓐᓂᐊᕆᐊᕈᒪᑉᓗᓂ ᑐᓵᔨᐅᓂᕐᒧᑦ 2019-ᒥ ᐱᔾᔪᑎᒋᑉᓗᒍ “ᓄᑖᓂᒃ ᐆᒃᑐᕈᒪᖃᑦᑕᕋᒥ,” ᐊᖏᖅᑕᐅᑲᐅᑎᒋᓚᐅᖅᖢᓂᓗ.
ᑐᓵᔨᐅᑉᓗᓂ, ᑯᒪᒡᔪᐊᖅ ᐱᓕᕆᓂᐊᖅᑐᖅ ᑐᓴᐅᒪᖃᑦᑕᐅᑎᓂᖅ ᐱᕚᓪᓕᖅᓯᒪᖁᑉᓗᒍ ᓄᓇᕗᒥᐅᓄᑦ ᐃᓄᒃᑎᑐᑦ ᐅᖃᓪᓚᒃᐸᒃᑐᓄᑦ (ᐅᖃᐅᓯᑐᐊᕆᒐᔪᒃᑕᖓ) ᐊᒻᒪᓗ ᖃᑉᓗᓈᑎᑐᐃᓐᓇᖅ ᐅᖃᓪᓚᒃᐸᒃᑐᓄᑦ ᓴᓇᔨᓄᑦ ᐋᓐᓂᐊᖃᕐᓇᙱᑦᑐᓕᕆᓂᒃᑯᑦ, ᐃᖅᑲᖅᑐᐃᔪᓕᕆᓂᒃᑯᑦ ᐊᒻᒪᓗ ᐊᓯᐊᒍᑦ ᐱᓕᕆᕝᕕᒡᔪᐊᒃᑯᑦ ᑲᓇᑕᒥ.
ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕌᓂᒃᑯᓂ, ᑯᒪᒡᔪᐊᖅ ᑐᓵᔨᐅᓂᕐᒥᒃ ᐊᑐᕐᓗᓂ ᐱᕙᓪᓕᐊᑎᑦᑎᔪᒪᔪᖅ. ᐅᑎᕈᒪᓂᐊᖅᑐᖅ ᐊᕐᕕᐊᓄᑦ ᓇᖕᒥᓂᖅᑖᕈᒪᓂᐊᖅᖢᓂ ᑐᓵᔨᐅᖃᑦᑕᕐᓂᐊᕐᓂᒃᑯᑦ “ᐱᑕᖃᒃᑲᓐᓂᕆᐊᖃᕐᒪᑦ ᑐᓵᔨᓂᒃ ᐃᓕᑕᕆᔭᐅᔾᔪᑎᓕᖕᓂᒃ ᐊᖏᕐᕋᖓᓂᒃ.”
ᐊᐅᔭᐅᓚᐅᖅᑐᖅ ᑭᕙᓪᓕᕐᒦᓚᐅᖅᑐᖅ ᓴᓇᑉᓗᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓂᒃ ᐊᐅᓪᓚᖃᑦᑕᕆᐊᓕᖕᓂᒃ ᑲᒪᔨᐅᑉᓗᓂ “ᐊᓕᐊᓇᐃᒋᑦᑎᐊᒻᒪᕆᓚᐅᖅᑕᖓ.”
ᓴᓇᓚᐅᐱᓪᓚᓚᐅᖅᓯᒪᔫᒐᓗᐊᖅ ᐊᕐᕕᓂᓕᖕᓂᒃ ᑕᖅᑭᓂᒃ ᑐᙵᓱᒡᕕᖕᒥ ᕕᓂᐲᒃᒥ, ᑯᒪᒡᔪᐊᖅ ᕿᒪᐅᒪᓚᐅᖅᓯᒪᙱᑦᑐᖅ ᓄᓇᒥᓂᒃ ᐊᕐᕕᐊᓂ, ᑕᐃᒪᐃᒻᒪᑦ ᐊᐅᓪᓚᕆᐊᖃᓕᕋᒥ ᐃᖃᓗᖕᓄᑦ ᐃᓕᓐᓂᐊᕆᐊᖅᖢᓂ ᐱᔭᕆᐊᑐᔪᐊᓘᓚᐅᖅᑐᖅ ᑭᓯᐊᓂ ᐱᕚᓪᓕᕈᑎᒋᓯᒪᔭᖓ, ᑕᐃᒪᓐᓇ ᐅᖃᖅᖢᓂ.
“ᐊᐅᓪᓚᖃᑎᒋᔭᕆᐊᖃᓚᐅᕋᑉᑭᑦ ᓄᑕᖅᑲᒃᑲ ᐃᓕᓐᓂᐊᕆᐊᖅᖢᖓ,” ᑕᐃᒪᓐᓇ ᐅᖃᖅᖢᓂ. “ᒪᕉᖕᓂᒃ ᐅᑭᐅᓂᒃ ᐃᓕᓐᓂᐊᕆᐊᖅᓯᒪᑉᓗᖓ ᓱᑲᔪᐊᓘᓚᐅᖅᑐᖅ. ᑕᒪᒃᑯᐊ ᑐᓴᕈᒥᓇᖅᑐᑦ ᐃᓕᓐᓂᐊᓚᐅᖅᑕᒃᑲ. ᐊᓕᐊᓇᐃᓚᐅᖅᑐᑦ.”
ᑯᒪᒡᔪᐊᖅ, ᐅᐃᒃᓴᓂᓗ ᐊᒻᒪᓗ ᓄᑕᕋᖏᑦ – ᐅᑭᐅᓖᑦ ᖁᓕᓂᒃ, ᖁᓕᖏᓗᐊᖅᑐᓂᒃ ᐊᒻᒪᓗ ᐱᖓᓱᓂᒃ – ᒫᓐᓇᐅᔪᖅ ᐃᓕᓐᓂᐊᖅᑐᑦ ᐃᒡᓗᖁᑎᖏᓐᓂᒃ ᐃᒡᓗᖃᖃᑕᐅᔪᑦ.
ᐊᕐᕕᐊᑦ ᐃᓱᒪᒋᑉᓗᒍ, ᓄᓇᕗᒥ ᐊᖓᔪᖅᑳᒃᑯᕕᒃ “ᐊᖏᔪᐊᓗᒃ ᐅᕙᒻᓄᑦ,” ᑕᐃᒪᓐᓇ ᐅᖃᖅᖢᓂ. ᓄᕙᒡᔪᐊᕐᓂᒃᑯᑦ ᒪᓕᒃᑕᐅᔭᕆᐊᓖᑦ ᑕᐃᒪᐅᓚᐅᖅᑎᓪᓗᒋᑦ ᓄᓇᒥᓂ, ᐃᖃᓗᐃᑦᒎᖅ ᐊᓕᐊᓇᐃᒋᓯᒪᔭᖓ.
ᓅᓚᐅᕐᓂᖓᓗ ᐃᓕᑦᑎᔾᔪᑕᐅᓯᒪᔪᖅ ᓄᑕᕋᒥᓄᑦ “ᐃᓕᓐᓂᐊᖃᑕᐅᖃᑦᑕᕐᒪᑕ ᐅᐃᕕᑎᑐᑦ ᐅᖃᓪᓚᒍᓐᓇᖅᓯᓂᕐᒧᑦ, ᑕᒪᓐᓇ ᐱᐅᔪᖅ,” ᑕᐃᒪᓐᓇ ᐅᖃᖅᖢᓂ. “ᓄᑕᕋᒃᑲ ᖁᕕᐊᒋᔭᖃᖅᓯᒪᔪᑦ ᐱᕙᓪᓕᐊᑦᑎᐊᖅᑐᓪᓗ. ᑕᒫᓂ ᖃᓄᐃᓕᐅᕈᓘᔭᖃᑕᐅᔪᓐᓇᖃᑦᑕᕋᑉᑕ ᓲᕐᓗ ᓇᓗᒋᐊᖅᑐᖅᐸᒃᖢᑕ, ᐅᕝᕙᓘᓐᓃᑦ ᑕᕐᕆᔭᕐᕕᖕᒧᑦ ᑕᕐᕆᔭᕆᐊᖅᑐᖅᐸᒃᖢᑕ.”
ᐊᒻᒪᓗᑦᑕᐅᖅ, ᖁᑦᑎᖕᓂᖅᓴᒃᑯᑦ ᐃᓕᓐᓂᐊᖅᖢᓂ ᐃᓅᖃᑎᖃᖁᓐᓇᖅᓯᓯᒪᔪᖅ ᐃᓕᓐᓂᐊᖃᑕᐅᔪᓂᒃ ᓄᓇᕗᒥᐅᓂᒃ ᐊᒻᒪᓗ ᐃᓕᑦᑎᑉᓗᓂ ᐊᔾᔨᐅᙱᑦᑐᒃᑯᑦ ᐃᓄᒃᑎᑐᑦ ᐅᖃᐅᓯᖃᖃᑦᑕᖅᑐᓂᒃ.
“ᑕᐃᒪᐅᔪᑦᑕᐅᖅ ᐊᓯᖏᑦ ᐃᓕᓐᓂᐊᖅᑐᑦ ᐊᓯᖏᓐᓂᒃ ᓄᓇᓕᖕᓂᙶᖅᑐᑦ ᓲᕐᓗ ᑭᙵᕐᓂ, ᓴᓂᕋᔭᖕᒥ, ᐃᒃᐱᐊᕐᔪᖕᒥ ᐊᒻᒪᓗ ᐊᓯᖏᓐᓂᒃ,” ᑕᐃᒪᓐᓇ ᐅᖃᖅᖢᓂ. “ᑐᓴᕈᒥᓇᖅᓯᓲᖅ ᓄᑖᓂᒃ ᐅᖃᐅᓯᕐᓂᒃ, ᐅᕝᕙᓘᓐᓃᑦ ᐅᖃᐅᓯᖏᑦ ᑐᓵᔪᒪᓐᓇᓲᑦ, ᐅᕙᒻᓂᒃᑕᐅᖅ ᐃᓕᓐᓂᐊᕐᒪᑕ. ᐅᑉᓗᑕᒫᒃᑯᑦ ᓄᑖᓂᒃ ᐃᓕᑦᑎᕙᒃᑐᒍᑦ.”