ᔨᑎᓐ ᓄᙵᖅ ᐃᓄᒃᓱᒃ ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᕆᐊᖃᑦᑕᓚᐅᖅᑐᖅ ᐅᖃᓪᓚᒃᑎᒋᔭᐅᓚᐅᖅᑐᖅ ᐃᓕᓐᓂᐊᕈᑎᒥᓂᒃ ᐱᐊᓂᖕᒪᑕ ᒫᓐᓇᓵᖑᓚᐅᖅᑐᖅ. ᒫᓐᓇ ᐃᓕᓐᓂᐊᕌᓂᓵᓚᐅᖅᑐᖅ ᐃᖕᒥᓂᒃ ᐃᓕᓐᓂᐊᖅᑎᑦᑎᔪᖅ ᐃᒻᖏᕐᓂᕐᒥᒃ, ᒧᒥᕐᓂᕐᒥᒃ ᐊᒻᒪᓗ ᐅᖃᐅᓯᒃᑯᑦ ᓂᐱᓕᐅᕆᔪᖅ ᐊᖏᕐᕋᒥᓂᒃ ᑎᑕᒡᕕᒃᑖᖅᖢᓂ.
ᓇᓂᔭᐅᔪᓐᓇᖅᑐᑦ ᖃᕆᑕᐅᔭᒃᑯᑦ SoundCloud-ᑯᑦ, YouTube-ᑯᑦ, Apple-ᑯᑦ ᐊᒻᒪᓗ Spotify-ᑯᑦ ᐃᒪᓐᓇ ᐊᑎᖃᖅᖢᓂ ᔭᖕ ᑮᓐᒥᒃ, ᓄᖕᓂᖅ 18-ᓂᒃ ᐅᑭᐅᓕᒃ, ᐊᑐᖅᑐᖅ ᐊᐅᔭᒃᑯᑦ ᑮᓇᐅᔭᓕᐊᕆᓚᐅᖅᑕᒥᓂᒃ ᑲᑎᑦᑎᕙᓪᓕᐊᑉᓗᓂ ᑎᑕᖕᓂᒃᑯᑦ ᐊᔪᙱᑕᒥᓂᒃ.
ᐊᑐᖃᑦᑕᕈᒪᓂᐊᖅᑐᖅ Saxophone-ᒥᒃ ᑎᑕᐅᑎᒥᒃ ᐅᖃᓪᓚᒡᕕᒃᑯᑦ, ᓂᐱᖃᐅᑎᒃᑯᑦ, ᑯᑭᒃᑕᐹᒃᑯᑦ, ᓇᕿᑦᑕᐅᑎᒃᑯᑦ ᐊᒻᒪᓗ ᖃᕆᑕᐅᔭᒃᑯᑦ, ᐊᑐᖅᐸᒃᑕᖏᑦ ᐅᑉᓗᑕᒫᒃᑯᑦ ᐊᒥᓱᓂᒃ ᐃᑲᕐᕋᓂᒃ.
“ᐃᒻᖏᐅᓯᑦ ᐃᓅᓯᕆᔭᒃᑲ … ᑕᒪᒃᑯᐊ ᑕᒡᕙ, ᑭᓇᐅᓂᒻᓄᑦ ᓇᓗᓇᐃᖅᓯᓯᒪᔪᑦ,” ᑕᐃᒪᓐᓇ ᐅᖃᖅᓗᓂ. “ᓴᓇᔪᒪᒐᒪ ᐱᒻᒪᕆᐅᔪᒃᑯᑦ ᐱᕙᓪᓕᐊᑎᑕᐅᕙᒃᑐᓂᒃ ᐊᒻᒪᓗ ᐱᐅᔪᓪᓚᕆᖕᓂᒃ.” ᐃᖕᒥᓂᒃ ᐃᓕᓐᓂᐊᖅᑎᑦᑎᔪᖅ ᑯᑭᒃᑕᐹᓂᒃ ᐊᑐᕆᐅᖅᓴᓂᕐᒧᑦ ᓇᕿᑦᑕᐅᑎᓂᒡᓗ ᑕᐅᑐᖃᑦᑕᖅᖢᓂ ᑕᕐᕆᔭᐅᓯᐊᖑᓯᒪᔪᓂᒃ YouTube-ᑯᑦ.
“ᐱᓕᕆᔪᒪᑦᑎᐊᖅᑐᖓ,” ᑕᐃᒪᓐᓇ ᐅᖃᖅᖢᓂ, ᐊᒥᐊᓕᑲᒥᐅᑕᕐᒥᒃ ᑕᐅᑐᖃᑦᑕᖅᑐᖅ ᐃᔾᔪᐊᕈᒪᓯᒪᔭᒥᓂᒃ.
ᒪᒃᑯᒃᑐᓂᒃ ᐃᑲᔪᕆᐊᖅᑎᐅᑉᓗᓂ ᒐᕙᒪᒃᑯᑦ ᐃᓄᓕᕆᔨᒃᑯᖏᓐᓂᒃ, ᓴᓇᖃᑎᓂᓗ ᓴᖅᑭᑎᑦᑎᓚᐅᖅᑑᒃ ᓄᓇᒥ ᐊᐅᔭᒃᑯᑦ ᐅᐸᒃᑕᐅᖃᑦᑕᕐᓂᐊᖅᑐᒥᒃ ᓄᓇᖓᓂ ᓄᑕᖅᑲᑦ ᑕᕐᕆᔭᖅᑎᑉᐸᒃᖢᒋᑦ, ᐊᖅᓴᖅᑎᑉᐸᒃᖢᒋᑦ ᐊᒻᒪᓗ ᒥᕐᖑᐃᖅᓯᕐᕕᓕᐊᕈᑎᕙᒃᖢᒋᑦ. ᓇᖕᒪᖕᑕᓂᒃ ᑐᓂᐅᖅᑲᐃᓚᐅᖅᑐᑦ ᓄᑕᖅᑲᑦ ᐃᓕᓐᓂᐊᕆᐊᕈᒫᕐᓂᖏᓐᓄᑦ ᐸᕐᓇᒃᑕᐅᑉᓗᑎᒃ.
“ᑕᒪᒃᑯᐊ ᓄᑕᖅᑲᑦ ᐃᓅᖃᑎᖃᖅᐸᓪᓕᐊᔪᓐᓇᓚᐅᖅᑐᑦ ᑭᓇᐅᖕᒪᖔᕐᒥᓂᒡᓗ ᐃᓕᑦᑎᕙᓪᓕᐊᑉᓗᑎᒃ,” ᓄᙵᖅ ᑕᐃᒪᓐᓇ ᐅᖃᖅᓗᓂ, ᐅᖃᖅᖢᓂᓗ ᐃᑲᔪᕈᒪᒐᒥᒋᑦ ᖃᓄᖅ ᐃᖕᒥᓂᒃ ᐱᓕᕆᕙᓪᓕᐊᔪᓐᓇᖅᓯᓂᖏᓐᓄᑦ ᐱᓕᕆᔪᒪᓂᕐᒧᓪᓗ.
ᐅᖃᖅᖢᓂᓗ ᒪᒃᑯᒃᑐᓄᑦ ᐅᖃᖃᑦᑕᕋᒥ ᐃᓕᓐᓂᐊᕐᓂᖅ ᐱᕕᒃᓴᖃᖅᑎᑦᑎᔪᓐᓇᕐᓂᖓᓄᑦ ᐃᓚᐅᖃᑕᐅᖃᑦᑕᖁᑉᓗᓂᒋᑦ ᐃᓕᓐᓂᐊᕈᑎᓂᒃ ᓲᕐᓗ Skills Canada-ᑯᓐᓂᒃ, ᐊᐅᓪᓚᖃᑦᑕᖁᑉᓗᓂᒋᑦ ᐃᓅᖃᑎᖃᖃᑦᑕᖁᑉᓗᒋᓪᓗ.
“ᒪᒃᑯᒃᑑᒐᕕᑦ ᐊᒻᒪᓗ ᐱᓕᕆᔪᓐᓇᑦᑎᐊᖅᖢᑎᑦ ᑕᒪᒃᑯᓄᙳ ᐃᓕᓐᓂᐊᕈᑎᓄᑦ ᐱᓇᓱᖃᑦᑕᕆᑦᑎ,” ᑕᐃᒪᓐᓇ ᐅᖃᖅᓗᓂ.
ᐃᓕᓐᓂᐊᕐᕕᒡᔪᐊᕐᒥ ᐃᓕᓐᓂᐊᖅᖢᓂ, ᓄᙵᖅ ᓄᕙᒡᔪᐊᕐᓂᖅ ᓴᖅᑭᖅᑳᖅᑎᓐᓇᒍ ᐋᔅᑐᕆᔭᓕᐊᖃᑕᐅᓚᐅᖅᑐᖅ, ᓂᐅ ᔩᓚᓐᒧᓪᓗ ᐊᒻᒪᓗ ᑯᒃ ᐊᐃᓚᓐᒧᑦ. ᑐᕌᓐᑐᓕᐊᓚᐅᕐᒥᔪᖅ ᐃᓚᐅᖃᑕᐅᑉᓗᓂ ᒪᕐᕉᖕᓂᒃ ᐱᓇᓱᐊᕈᓯᕐᓂᒃ ᒧᒥᕐᓂᕐᒥᒃ ᐃᓕᓐᓂᐊᕆᐊᖅᖢᓂ, ᒫᓐᓇᐅᓕᖅᑐᖅ ᒧᒥᕈᑕᐅᕙᒃᑐᓂᒃ ᒪᒃᑯᒃᑐᓄᑦ ᐊᒻᒪᓗ ᐊᓯᐊᒍᑦᑕᐅᖅ ᒧᒥᕐᓂᒃᑯᑦ ᐊᓕᐊᓇᐃᒋᔭᖃᕐᒥᔪᖅ. ᒧᒥᖅᑏᑦ ᐊᓯᖏᑦ ᓄᓇᖃᖅᑳᖅᑑᓚᐅᕐᒥᔪᑦ ᐊᔾᔨᒌᙱᑦᑑᑕᐅᔪᓂᒃ ᓄᓇᓕᖕᓂᙶᖅᑐᑦ ᑲᓇᑕᒥ, ᑕᐃᒪᓐᓇ ᐃᓕᑦᑎᓚᐅᖅᑐᖅ ᐃᓅᓯᖏᓐᓂᒃ ᓇᑭᙶᖅᓯᒪᓂᖏᓐᓂᒡᓗ ᐊᒻᒪᓗ ᐅᖃᐅᓯᖃᖃᑦᑕᖅᖢᓂ ᐃᓅᓂᕐᒥᓂᒃ.
“ᐅᐱᓐᓇᖅᑐᐊᓘᓚᐅᖅᑐᖅ,” ᑕᐃᒪᓐᓇ ᐅᖃᖅᖢᓂ ᐃᖅᑲᐅᒪᔭᒥᓂᒃ.
ᐃᓕᓐᓂᐊᕌᓂᒃᑲᒥᒃ ᒧᒥᓚᐅᖅᑐᑦ Sony Centre-ᒥ ᑐᕋᓐᑐᒥ 100 ᐃᓄᐃᑦ ᓵᖓᓂ.
“ᐃᓐᓇᕈᖅᐸᓪᓕᐊᑉᓗᖓ, ᐅᔾᔨᕈᓱᓕᓚᐅᖅᑐᖓ ᐊᓕᐊᓇᐃᒍᓱᖕᓂᒻᓄᑦ ᒧᒥᕐᓂᕐᒥᒃ ᖁᕕᐊᒋᑦᑎᐊᕋᑉᑯ. ᐃᓄᖕᓂᒃ ᐃᓅᖃᑎᖃᕈᓐᓇᖅᓯᓚᐅᖅᑐᖓ ᐅᖃᖃᑎᒋᔪᓐᓇᔾᔮᙱᓐᓇᓱᒋᔭᒃᑲᓂᒃ,” ᑕᐃᒪᓐᓇ ᐅᖃᖅᖢᓂ.
ᓯᕗᓂᒃᓴᒥ, ᓄᙵᖅ ᐃᒻᖏᖃᑦᑕᕈᒪᓂᐊᖅᑐᖅ ᒧᒥᖃᑦᑕᕐᓗᓂᓗ ᐃᓄᐃᑦ ᓵᖓᓂ.
“ᑕᓪᓕᒪᓂᒃ ᖁᓕᓂᒡᓗ ᐅᑭᐅᓂᒃ ᖃᐃᔪᓂᒃ, ᑕᐃᒪᑐᖅ ᓄᓇᕐᔪᐊᕐᒥ ᐊᐅᓪᓚᖃᑦᑕᓕᕈᒫᖅᐳᖓ ᐊᒻᒪᓗ ᖃᐅᔨᒪᕙᓪᓕᐊᓕᕐᓗᖓ ᐃᒻᖏᖅᑎᕐᔪᐊᓂᒃ, ᐅᑎᕐᓗᖓᓗ ᓄᓇᒻᓄᑦ ᐊᔪᕈᓐᓃᕐᔪᒥᒍᒪ ᑮᓇᐅᔭᓕᐅᑦᑎᐊᖅᓯᒪᓕᕐᓗᖓᓗ ᐃᒻᖏᕐᓂᒃᑯᑦ,” ᑕᐃᒪᓐᓇ ᐅᖃᖅᖢᓂ. “ᑕᐃᒪᑐᖅ ᐃᑲᔪᕈᓐᓇᖅᓯᔪᒫᖅᐳᖓ ᓄᓇᒻᓂᒃ. ᐊᖏᓂᖅᓴᒃᑯᓪᓗ ᐊᒃᑐᖅᓯᓂᖃᕐᓗᖓ ᓄᓇᕗᒥ, ᐊᒻᒪᓗ ᐅᕙᒻᓂᒃ ᐃᓚᒃᑲᓂᒡᓗ ᐃᑲᔪᕈᓐᓇᖅᓯᓗᖓ, ᐱᓗᐊᖅᑐᒥ ᐃᒻᖏᖃᑦᑕᕐᓂᒃᑯᑦ ᐱᕙᓪᓕᐊᑦᑎᐊᕈᒪᒐᒪ ᖁᕕᐊᓱᖕᓂᕐᒥᒡᓗ ᐱᔪᒪᑉᓗᖓ ᐅᑉᓗᑕᒫᒃᑯᑦ.”