ᐃᓄᐃᑦ ᑕᐱᕇᑦ ᑲᓇᑕᒥ ᕿᓂᖅᐳᑦ ᓴᖅᑭᑎᑦᑎᓂᕐᒥ ᐃᓕᓐᓂᐊᕐᕕᓂ ᓂᕆᔭᒃᓴᓂ ᐱᓕᕆᐊᖑᔪᓂ ᓄᓇᕗᒻᒥ ᐊᒻᒪᓗ ᐃᓄᐃᑦ ᓄᓇᖓᓐᓂ.
ᑲᑐᔾᔨᖃᑎᒌᖑᔪᖅ, ᐃᑲᔪᖅᓱᐃᓲᖑᔪᒥ ᐃᓄᐃᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᖃᓄᐃᙱᑦᑎᐊᕐᓂᕐᒧᑦ, ᕿᓂᖅᐳᑦ ᑭᓇᑐᐃᓐᓇᒥᒃ ᐋᖅᑭᒃᓱᐃᓂᕐᒥ ᑐᒃᓯᕋᕈᑕᐅᔪᒥ, ᐊᑑᑎᖃᕐᓂᐊᖅᑐᒥ ᐱᒋᐊᓕᓵᖅᑐᓂ ᖁᑦᑎᖕᓂᓕᖕᓄᑦ 12–ᒧᑦ, ᑐᓂᔭᐅᔪᓐᓇᕋᔭᖅᑐᒥ ᒐᕙᒪᑐᖃᒃᑯᓐᓄᑦ ᐊᒻᒪ ᓄᓇᕗᒻᒥ ᒐᕙᒪᐅᔪᓄᑦ ᐊᒻᒪ ᐊᓯᖏᓐᓂ ᐱᑕᖃᑐᐃᓐᓇᕆᐊᓕᖕᓂ ᑮᓇᐅᔭᖃᖅᑎᑦᑎᓂᐅᔪᒥ ᐱᓕᕆᖃᑎᒋᔭᐅᔪᓐᓇᖅᑐᓂ.
“ᐃᓕᓐᓂᐊᕐᕕᖕᒥ-ᑐᙵᕕᓕᖕᒥ ᓂᕿᓄᑦ ᐱᓕᕆᐊᖑᔪᓂ ᐊᑐᐃᓐᓇᖃᖅᑎᑦᑎᕗᑦ ᐱᔪᒥᓇᑦᑎᐊᖅᑐᒥ ᐸᕐᓇᒍᑎᒥᒃ ᐱᐅᓯᒋᐊᖅᑎᑦᑎᓂᕐᒧᑦ ᓱᕈᓯᓄᑦ ᐊᑐᐃᓐᓇᖃᕐᓂᖏᓐᓂ ᖃᓄᐃᙱᑦᑎᐊᖅᑐᒧᑦ ᐊᒻᒪ ᐃᓕᖅᑯᓯᒧᑦ ᐱᐅᒋᔭᐅᓂᖅᓴᓂ ᓂᕿᓂᑦ ᐃᑲᔪᖅᓱᐃᖑᔮᕐᔪᒃᑎᓪᓗᒋᑦ ᐊᑯᓂᐅᔪᒥ ᐱᕚᓪᓕᕈᑎᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᒻᒪ ᖃᓄᐃᙱᑦᑎᐊᕐᓂᐅᔪᒥ,” ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐅᖃᖅᐳᑦ.
ᑐᒃᓯᕋᐅᑎ ᖃᐅᔨᓴᖅᑕᐅᓂᖓ ᐊᒻᒪ ᑎᑎᕋᕐᓂᕐᒧᑦ ᐱᓕᕆᓂᖓ ᓂᕆᐅᒋᔭᐅᕗᖅ ᐱᒋᐊᕐᓂᐊᕐᓂᖓᓂ ᑎᓯᐱᕆᒥ ᐊᒻᒪ ᐃᓱᓕᓪᓗᓂ ᔫᓂ 2022–ᒥ.
ᐃᓄᐃᑦ ᑲᑐᔾᔨᖃᑎᒌᖑᔪᑦ ᓇᓗᓇᐃᖅᓯᓚᐅᖅᐳᑦ ᖃᔅᓯᒐᓚᖕᓂ ᓂᕿᓄᑦ ᐱᒋᐊᕈᑕᐅᔪᓂ ᐱᑕᖄᓂᖕᓂᖓᓂ ᐃᓕᓐᓂᐊᕐᕕᓂ ᐊᒻᒪ ᓄᓇᓕᐅᔪᑦ, ᐱᓕᕆᕗᑦ “ᐱᒻᒪᕆᐅᔪᒥ ᐱᓕᕆᓂᖓᓐᓂ,” ᑭᓯᐊᓂ ᑐᕌᒐᕆᓇᓱᐊᖅᑕᖓ ᐆᒥᖓ ᓄᑖᖑᔪᒥ ᐱᒋᐊᕈᑕᐅᔪᒥ ᓴᖅᑭᑎᑦᑎᓇᓱᐊᕐᓂᕐᒥ ᓇᖕᒥᓂᕆᔭᐅᔪᒥ ᐱᓕᕆᓂᐅᔪᒥ ᓈᒻᒪᒃᑐᒧᑦ ᐊᒻᒪ ᒪᑭᒪᔾᔪᑕᐅᔪᓐᓇᖅᑐᒥ ᑮᓇᐅᔭᖃᖅᑎᑕᐅᓂᖓᓂ.
ᑲᑎᒪᔨᕐᔪᐊᖑᓂᐅᔪᒥ ᐊᑯᓂᐅᓂᖓᓂ ᑭᖑᓪᓕᖅᐹᒥ ᒪᓕᒐᓕᐅᖅᑎᒃᑯᑦ ᑲᑎᒪᓂᖏᓐᓂ, ᒪᓕᒐᓕᐅᖅᑎ ᐋᑕᒻ ᓚᐃᑦᔅᑑᓐ ᐊᒻᒪ ᔮᓐ ᒪᐃᓐ ᐅᖃᐃᓐᓇᓚᐅᖅᐳᑦ ᖃᐃᖁᔨᓂᐅᔪᒥ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᓐᓂ ᐋᖅᑭᒃᓯᓪᓚᕆᖕᓂᖏᓐᓂ ᓄᓇᕗᓕᒫᒥ ᐃᓕᓐᓂᐊᕐᕕᖕᓂ ᐅᓪᓛᕈᒻᒥᑕᖃᕐᓂᕐᒥ ᐊᒻᒪ ᐅᓪᓗᕈᒻᒥᑕᕐᒥ ᐱᓕᕆᐊᖑᔪᓂ.
ᐱᓕᕆᕝᕕᒃ ᐅᔾᔨᕆᓚᐅᖅᐳᑦ ᓄᓇᓕᐅᔪᑦ ᑐᒃᓯᕋᕈᓐᓇᕐᓂᖏᓐᓂ ᑮᓇᐅᔭᖃᖅᑎᑕᐅᓂᕐᒥ ᐃᓕᓐᓂᐊᕐᕕᖕᒧᑦ ᓂᕿᓄᑦ ᐱᓕᕆᐊᖑᔪᒥ ᐅᕘᓇ ᓄᓇᕗᒻᒥ ᒐᕙᒪᒃᑯᓐᓂ ᓄᓇᓕᖕᓂ ᖃᓄᐃᙱᑦᑎᐊᕐᓂᐅᔪᒥ ᐸᕐᓇᐅᑎᖓᓐᓂ, ᑎᒍᒥᐊᖅᑐᒥ ᐊᕐᕌᒍᑕᒫᒥ ᑮᓇᐅᔭᓂᒃ ᐊᑐᖅᑐᒃᓴᓂ $1.5 ᒥᓕᐊᓐᒥ $2 ᒥᓕᐊᓐᒧᑦ.
ᑕᒪᕐᒥᒃ ᓄᓇᕗᒻᒥ ᐃᓕᓐᓂᐊᕐᕕᐅᔪᑦ ᓂᕿᒧᑦ ᐱᓕᕆᐊᖃᖅᐳᑦ, ᑭᓯᐊᓂ ᑕᒪᒃᑭᑦ ᐃᓚᖃᙱᓚᑦ ᐅᓪᓗᕈᒻᒥᑕᕐᒥ, ᐱᓕᕆᕝᕕᒃ ᒫᓐᓇᓕᓴᐅᔪᒥ ᐅᖃᓚᐅᖅᐳᑦ. 2019–ᒥ, ᒐᕙᒪᒃᑯᓐᓂ ᑎᑎᖅᑲᖁᑕᐅᔪᒥ ᐅᖃᖅᓯᒪᕗᖅ ᐊᑭᖃᕋᔭᕐᓂᖓᓂ $400 ᐊᑐᓂ ᐃᓕᓐᓂᐊᖅᑎᐅᔪᒧᑦ, ᐊᑐᓂ ᐊᕐᕌᒍᒥ — ᐅᕝᕙᓘᓐᓃᑦ ᑲᑎᓪᓗᒍ $4 ᒥᓕᐊᓐᑲᓴᖕᓂ ᑐᓂᓯᓂᕐᒥ ᐅᓪᓗᕈᒻᒥᑕᓂ ᑕᒪᒃᑭᓄᑦ ᓄᓇᕗᒻᒥ ᐃᓕᓐᓂᐊᕐᕕᐅᔪᓄᑦ.
ᑕᐃᒪᙵᓂ ᓄᕙᒡᔪᐊᕐᓇᖅ-19–ᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐱᕙᓪᓕᐊᑎᓪᓗᒍ, ᐃᓕᓐᓂᐊᖅᑐᓕᕆᔨᒃᑯᑦ ᐅᖃᓚᐅᖅᐳᑦ ᑕᒪᓐᓇ, ᐃᓚᖃᖅᖢᓂ ᐃᓄᓕᒫᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᖓᔪᖅᑳᖓᓂ, “ᐊᔭᐅᕆᕐᔪᐊᖅᐳᑦ ᐃᖏᕐᕋᐃᓐᓇᖅᑐᒥ ᐊᐅᓚᑕᐅᓂᖓᓂ ᓂᕿᓄᑦ ᐱᓕᕆᐊᖑᔪᓂ ᑐᓂᔭᐅᕙᒃᑐᓂ ᐃᓕᓐᓂᐊᕐᕕᓂᑦ ᐃᑲᔪᖅᓱᐃᓂᕐᒧᑦ ᐃᓕᓐᓂᐊᖅᑎᐅᑉ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐊᒻᒪ ᖃᓄᐃᙱᑦᑎᐊᕐᓂᐅᔪᒥ.”
ᐃᓚᖏᓐᓂ ᐊᑦᑕᓇᔾᔭᐃᖅᓯᒪᓂᕐᒧᑦ ᒪᓕᒋᐊᓕᖕᓂ ᐊᑐᖁᔭᐅᓇᔭᖅᐳᑦ ᐃᓱᒪᒋᓪᓗᒍ ᖁᐱᕐᕈᐃᑦ ᐊᐃᑦᑐᐃᓐᓇᖅᑐᒥ, ᓲᕐᓗ ᓇᓗᓇᐃᖅᑕᐅᓯᒪᔪᓂ ᐃᖅᑲᓇᐃᔭᖅᑎᓂ ᐸᕐᓇᐃᓂᖏᓐᓂ ᐊᒻᒪ ᑐᓂᐅᖅᑲᐃᓂᖏᓐᓂ ᓂᕿᓂᑦ, ᐴᖅᑲᐃᓂᕐᒥ ᓂᕿᓂᒃ ᐊᑐᓂᓄᑦ, ᐅᖃᐅᓯᖃᒃᑲᓐᓂᕐᓂᕐᒥ ᓴᓗᒪᓂᐅᔪᒥ ᐊᒻᒪᓗ ᓂᖀᑦ ᐊᒻᒪ ᐃᒥᒐᒃᓴᑦ ᐊᓯᐊᒧᑦ ᐊᒥᖅᑳᖅᑕᐅᙱᓪᓗᑎᒃ ᐊᓯᖏᓐᓂ ᐃᓕᓐᓂᐊᖅᑎᐅᔪᓄᑦ ᐊᒻᒪ ᐊᔭᐅᕆᓂᕐᒥ ᐃᓕᓐᓂᐊᖅᑎᓂ ᓇᖕᒥᓂᖅ ᓇᒃᓴᖅᐸᒡᓗᑎᒃ ᓇᖕᒥᓂᖅ ᐊᑐᖅᑕᐅᒃᑲᓐᓂᕈᓐᓇᖅᑐᒥ ᐃᒪᖃᐅᑎᐅᔪᓂ.
“ᐃᓕᓐᓂᐊᖅᑐᓕᕆᔨᒃᑯᑦ ᐃᓕᓴᖅᓯᕗᑦ ᐱᒻᒪᕆᐅᓂᖓᓂ ᓂᕿᓄᑦ ᐱᓕᕆᐊᖑᔪᓂ ᐃᓕᓐᓂᐊᕐᕕᓂᑦ ᐃᑲᔪᕐᓂᕐᒧᑦ ᐃᑲᔪᕐᓂᖏᓐᓂ ᓂᕿᒃᓴᖃᑦᑎᐊᙱᓐᓂᐅᔪᒥ ᓄᓇᓕᑦᑎᓐᓂ,” ᐅᖃᖅᓯᒪᕗᖅ. “ᓂᕿᓄᑦ ᐱᓕᕆᐊᖑᔪᑦ ᑮᓇᐅᔭᖃᖅᑎᑕᐅᙱᑎᓪᓗᒋᑦ ᐅᕝᕙᓘᓐᓃᑦ ᐊᐅᓚᑕᐅᓇᑎᒃ ᐃᓕᓐᓂᐊᖅᑐᓕᕆᔨᒃᑯᓐᓂ, ᐃᓕᓴᖅᓯᕗᒍᑦ ᐊᒥᓱᑦ ᐃᓕᓐᓂᐊᕐᕕᖕᒥ ᐃᖅᑲᓇᐃᔭᖅᑎᐅᔪᑦ ᐊᑭᓕᖅᓱᖅᑕᐅᓇᑎᒃ ᐃᑲᔪᓲᖑᕗᑦ ᐱᓕᕆᓂᖏᓐᓂ ᐊᒻᒪ ᐊᒃᓱᕈᖅᖢᑎᒃ ᐊᐅᓚᑦᑎᓂᕐᒧᑦ ᓂᕿᓂᑦ ᐱᓕᕆᐊᖑᔪᓂᑦ ᐅᑯᓇᓂ 45–ᖑᔪᓂ ᐃᓕᓐᓂᐊᕐᕕᑦ. ᓂᕿᓄᑦ ᐱᓕᕆᐊᖑᔪᑦ ᐃᓕᓐᓂᐊᕐᕕᓂᑦ ᓇᓗᓇᐃᖅᓯᕗᑦ ᐃᓕᓐᓂᐊᖅᑏᑦ ᐱᔭᕆᐊᖃᖅᑕᖏᓐᓂ ᑭᐅᔭᐅᓂᖏᓐᓂ ᒪᓕᒃᑐᒥ ᐊᑐᐃᓐᓇᐅᓂᖓᓂ ᐃᓄᖃᕈᓐᓇᕐᓂᖓᓂ ᐊᒻᒪ ᐃᑲᔪᕈᑎᒃᓴᓂ ᓄᓇᓕᐅᔪᒥ.”
ᑲᓇᑕᒥ ᒐᕙᒪᒃᑯᑦ ᓴᖅᑭᑎᑦᑎᓚᐅᖅᐳᑦ ᐃᓄᐃᑦ-ᑯᐃᓐᒧᑦ ᓂᕿᒃᓴᖃᑦᑎᐊᕐᓂᐅᔪᒥ ᐱᓕᕆᓂᕐᒧᑦ ᑲᑎᙵᓂᐅᔪᒥ 2018–ᒥ ᑭᐅᓂᕐᒧᑦ ᓂᕿᒃᓴᖃᑦᑎᐊᖅᑎᑦᑎᓂᕐᒧᑦ ᐃᓄᐃᑦ ᓄᓇᖓᓐᓂ. ᑕᐃᑲᙵᑦ, ᐊᖑᓇᓱᒃᑎᐅᔪᓄᑦ ᐃᑲᔪᖅᓱᐃᓂᕐᒧᑦ ᑐᓂᕐᕈᑎᒥᒃ ᑐᓂᔭᐅᓚᐅᖅᐳᖅ ᑕᐃᑯᖓᓪᓚᕆᒃ ᐃᓄᐃᑦ ᓄᓇᑖᕋᓱᐊᕐᓂᕐᒧᑦ ᑲᑐᔾᔨᖃᑎᒌᖑᔪᓄᑦ ᑐᓂᓯᓂᕐᒥ ᑮᓇᐅᔭᒥᒃ ᐃᑲᔪᖅᓱᐃᓂᐅᔪᒥ ᐊᖑᓇᓱᖕᓂᕐᒧᑦ ᖃᓄᐃᓕᐅᕐᓂᐅᔪᓄᑦ. ᖄᒃᑲᓐᓂᐊᒍᑦ, ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᑲᓇᑕᒥ ᑐᓂᓯᓚᐅᖅᐳᑦ $8 ᒥᓕᐊᓐᓂ ᑮᓇᐅᔭᖃᖅᑎᑕᐅᓂᐅᔪᒥ ᓂᕿᓄᑦ ᐱᒋᐊᕈᑕᐅᔪᓄᑦ ᑕᐃᑲᓂ ᓄᕙᒡᔪᐊᕐᓇᖅ-19–ᒧᑦ ᐊᒥᓱᓄᑦ ᖃᓂᒻᒪᓐᓇᐅᔪᒥ ᐅᕘᓇ ᑎᓴᒪᓄᑦ ᐃᓄᖕᓄᑦ ᓄᓇᑖᕋᓱᐊᕐᓂᐅᔪᒥ ᑲᑐᔾᔨᖃᑎᒌᖑᔪᓄᑦ ᓄᓇᕗᒻᒥ, ᓄᓇᕕᒃ, ᓄᓇᑦᓯᐊᕗᑦ ᐊᒻᒪ ᐃᓄᕕᐊᓗᖕᓄᑦ. ᐅᓇ ᐃᓚᖃᓚᐅᖅᐳᖅ ᓂᕆᔭᒃᓴᓂ ᐊᒡᔭᖅᓯᓂᐅᔪᓂ ᐱᔨᑦᑎᕋᕐᓂᐅᔪᒥ, ᐊᖏᒡᓕᒋᐊᖅᑐᒥ ᓄᓇᒥ ᐃᑲᔪᖅᓱᐃᓂᐅᔪᓂ, ᐊᖏᒡᓕᒋᐊᖅᑐᒥ ᓂᕿᑦᑎᐊᕙᖕᓂ ᑐᖅᑯᖅᑕᐅᓂᖏᓐᓂ ᐊᒻᒪ ᓂᐅᕕᕐᕕᓄᑦ ᓂᕿᑖᕈᑎᒃᓴᓂ, ᐊᓯᖏᓐᓂᓪᓗ, ᐅᖃᐅᓯᐅᓪᓗᓂ ᐃᓄᐃᑦ ᑕᐱᕇᑦ ᑲᓇᑕᒥ.