ᓈᓐᓯ ᖃᕆᑕᖅ−ᓕᓐᑎᐅᓪ ᐱᕈᖅᓴᓚᐅᖅᑐᖅ ᐃᔅᑭᒧᐳᐃᑦᒥ, ᒫᓐᓇ ᑕᐃᔭᐅᓕᖅᑐᖅ ᐃᒪᓐᓇ ᐊᕐᕕᐊᑦ, ᖃᐅᔨᖃᑦᑕᓚᐅᖅᑐᖅ ᐊᖓᔪᖅᑳᒥᓂᒃ ᓂᐱᖃᖅᑎᑕᐅᙱᑦᑐᓂᒃ.
“ᐃᓚᖏᑦ ᐅᖃᑐᐃᓐᓇᕆᐊᓖᑦ ᐊᓯᔾᔨᖅᓯᒪᔪᖃᓗᐊᓐᖏᓐᓂᖓᓄᑦ, ᑭᓯᐊᓂᓕ ᐅᕙᖓ ᑕᐃᒪᐃᙱᓐᓇᓱᒋᔭᕋ − ᐱᑕᖃᓚᐅᙱᑦᑐᖅ ᐅᓐᓂᕐᓗᒡᕕᒃᓴᓂᒃ, ᐱᔪᓐᓇᐅᑎᖃᓚᐅᙱᑦᑐᑦ,ᐊᒻᒪᓗ ᐊᓯᔾᔨᒐᒃᓴᐃᑦ ᓲᕐᓗ ᓅᑦᑐᓐᓇᕐᓂᖅ ᐃᓄᖕᓄᑦ ᐱᑎᑕᐅᑐᐃᓐᓇᖅᐸᒃᖢᑎᒃ.
ᐃᓐᓇᐅᓂᖅᓴᐅᔪᑦ ᓂᐱᖃᖅᑎᑕᐅᓚᐅᙱᑦᑐᑦ ᖃᓄᐃᓕᐅᖅᑕᐅᓂᐊᕐᓂᖏᓐᓄᑦ ᐃᓄᐃᑦ, ᑕᐃᒪᓐᓇ ᐃᖅᑲᐅᒪᔪᖅ − ᐅᓐᓂᕐᓗᒡᕕᒃᓴᓂᒃ ᐱᑕᖃᓚᐅᙱᑦᑐᖅ, ᐱᔪᓐᓇᐅᑎᑕᖃᓚᐅᙱᑦᑐᖅ, ᐊᒻᒪᓗ ᐊᓯᔾᔩᔪᒪᓂᖅ ᐃᓄᖕᓄᑦ ᐊᔭᐅᖅᑐᖅᑕᐅᕙᒃᖢᑎᒃ.
ᐅᑉᓗᒥ, ᐃᓄᐃᑦ ᐱᔪᓐᓇᐅᑎᑕᖃᓕᖅᑐᑦ, ᐅᖃᐅᓯᕐᒥᓂᒃ ᐊᑐᕈᓐᓇᖅᓯᔪᑦ ᐊᒻᒪᓗ ᐃᖕᒥᓂᒃ ᐃᓱᒪᒃᓴᖅᓯᐅᕈᓐᓇᖅᓯᔪᑦ.
“ᐃᓕᑕᖅᓯᔭᕆᐊᖃᖅᑐᒍᑦ ᐅᕙᒍᑦ ᐃᓄᒃᑎᑐᑦ ᐃᓕᖅᑯᓯᕗᑦ, ᐅᖃᐅᓯᖅᐳᑦ, ᖃᐅᔨᒪᔭᖅᐳᑦ, ᐊᐅᓚᑦᑎᓂᕆᔪᓐᓇᖅᑕᖅᐳᑦ ᐃᓕᑕᕆᔭᐅᔭᕆᐊᖃᕐᒪᑕ ᐃᒃᐱᒍᓱᒃᑎᑕᐅᑐᐃᓐᓇᙱᓪᓗᑕ ᐃᓇᖏᖅᓯᒍᑕᐅᔪᓐᓇᕐᓂᖏᓐᓄᑦ ᐊᓯᐊᒍᑦ ᖃᓄᐃᓕᐅᕈᑕᐅᕙᒃᑐᒃᑯᑦ, ᐊᒻᒪᓗ ᐱᓕᕆᔪᒍᑦ ᓱᓕ ᐅᑎᖅᑎᕆᓗᑕ ᑕᒪᒃᑯᓂᙵ ᖃᐅᔨᒪᔭᑉᑎᓐᓂᒃ, ᐊᒻᒪᓗ ᐅᑎᖅᑎᑦᑎᓗᑕ ᐱᓕᕆᖃᑕᐅᔪᓐᓇᕐᓂᑉᑎᓐᓄᑦ ᐊᐅᓚᑦᑎᓂᒃᑯᑦ,” ᑕᐃᒪᓐᓇ ᐅᖃᖅᖢᓂ ᖃᕆᑕᖅ−ᓕᓐᑎᐅᓪ.
ᐅᑎᒧᑦ ᑐᑎᒋᐊᕆᐊᖃᖅᑐᒍᑦ ᐊᒻᒪᓗ ᐅᔾᔨᕈᓱᒡᓗᑕ ᖃᓄᖅ ᐊᖏᑎᒋᔪᒥᒃ ᐱᐊᓂᒃᓯᓯᒪᖕᒪᖔᑉᑕ, ᐃᓛᓐᓂᒃᑯᑦ, ᓄᓇᕐᔪᐊᕐᒧᑦ ᐊᑭᕋᖅᑐᖅᑕᐅᓯᒪᖃᑦᑕᕋᓗᐊᖅᑎᓪᓗᑕ.”
ᖃᕆᑕᖅ−ᓕᓐᑎᐅᓪ ᐱᕈᖅᓴᖅᖢᓂ, ᓄᓇᓂ ᑕᒡᕙᑐᐊᖑᓚᐅᖅᑐᖅ: ᐅᖃᓘᑎᑕᖃᕐᓇᓂ, ᑕᓚᕕᓴᖃᕐᓇᓂ ᐅᕝᕙᓘᓐᓃᑦ ᐊᔪᕐᓇᙱᑦᑐᒃᑯᑦ ᓇᒧᖓᐅᕝᕕᒃᓴᖃᕋᓂ.
ᐊᑖᑕᖓ ᐳᑭᖅᑕᓕᐅᓚᐅᖅᑐᖅ, ᐊᒻᒪᓗ ᐊᓈᓇᓂ ᑐᒃᓯᐊᕐᕕᖕᒥ ᐱᓕᕆᕙᒃᖢᓂ. ᑕᐃᑲᓂ ᖃᐅᔨᓚᐅᖅᑐᖅ ᖃᓄᖅ ᐱᒻᒪᕆᐅᑎᒋᖕᒪᖔᑦ ᐃᓄᖕᓂᒃ ᐱᓕᕆᖃᑎᖃᕆᐊᖃᖃᑦᑕᕐᓂᕐᒧᑦ ᖃᑕᙳᑎᒌᓪᓗ ᐃᑲᔪᖅᑑᑎᖃᑦᑕᕆᐊᖃᕐᓂᖏᓐᓄᑦ ᐊᖏᕐᕋᒥᓂᒃ ᐱᐅᓂᖅᐹᖑᑎᑦᑎᓇᓱᒃᖢᑎᒃ.
ᖃᕆᑕᖅ−ᓕᓐᑎᐅᓪ ᐱᕈᖅᐸᓪᓕᐊᑉᓗᓂ ᐊᒻᒪᓗ ᒪᓕᒐᓕᕆᔨᙳᖅᖢᓂ, ᑐᑭᓯᐅᒪᔭᖓ ᐱᕈᖅᐹᓪᓕᓚᐅᖅᑐᖅ ᐃᓱᒪᒋᔭᖃᓕᖅᖢᓂ ᓄᓇᒥᓂᒃ ᓄᓇᓕᖕᓂᒃ ᐊᕕᒃᑐᖅᓯᒪᔪᓂᒃ, ᓄᓇᕗᒥᒃ ᐊᒻᒪᓗ ᑲᓇᑕᒥᒃ, ᑭᓯᐊᓂ ᐊᒃᓱᕉᑎᒋᔭᖏᑦ ᑕᐃᒪᐃᑦᑕᐃᓐᓇᐅᓚᐅᖅᑐᑦ.
ᑭᖑᒻᒧᑦ ᑕᑯᒋᐊᕋᒥ ᖃᐅᔨᓚᐅᖅᑐᖅ ᐊᖓᔪᖅᑳᖏᑦ ᓂᐱᖃᙱᓗᐊᕐᓂᖏᓐᓄᑦ ᐊᖓᔪᖅᑳᖏᑦᑕᓗ ᐃᑭᙳᑎᖏᑦ.
“ᐃᒃᐱᒋᔭᐅᑎᑕᐅᓚᐅᖅᑐᑦ ᖃᐅᔨᒪᔭᖏᑦ ᐱᒻᒪᕆᐅᙱᓐᓂᖏᓐᓄᑦ, ᖃᐅᔨᒪᔭᖏᑦ ᓈᒻᒫᓂᖏᓐᓂᖏᓐᓄᑦ ᓄᑕᖅᑲᒥᓄᑦ ᕿᒪᐃᔪᓐᓇᖁᑉᓗᒋᑦ,” ᑕᐃᒪᓐᓇ ᐅᖃᖅᖢᓂ.
ᑭᓯᐊᓂ ᐅᑭᐅᓂᒃ ᖃᐃᔪᓂᒃ, ᐃᓄᐃᑦ ᓂᐱᖃᕐᓂᖅᓴᐅᓕᓚᐅᖅᑐᑦ ᓄᓇᖏᓐᓂᒃ ᒐᕙᒪᓕᕆᓂᒃᑯᑦ ᓲᕐᓗ Hᐊᒻᓚᒃᑯᑦ ᑲᑎᒪᔨᖏᑦᑎᒍᑦ ᐊᒻᒪᓗ ᐊᓯᖏᑦᑎᒍᑦ ᒐᕙᒪᓕᕆᓂᒃᑯᑦ.
“ᑕᒪᓐᓇ, ᐃᓱᒪᒋᔭᒃᑯᑦ, ᐊᖏᓂᖅᐹᖑᓇᓱᒋᔭᕋ ᐊᔾᔨᐅᙱᓐᓂᖅᐹᖑᓇᓱᒋᔭᕋ ᐃᑭᙳᑎᒃᑲᓗᑦ ᐃᓅᖅᑳᓚᐅᖅᑐᓄᓪᓗ,” ᑕᐃᒪᓐᓇ ᐅᖃᖅᖢᓂ ᖃᕆᑕᖅ − ᓕᓐᑎᐅᓪ. “ᐱᕕᒃᓴᖃᖅᑎᑕᐅᓚᐅᙱᒻᒪᑕ ᐊᐱᖅᓱᕈᓐᓇᕐᓂᕐᒧᑦ ᐃᓱᒪᓕᐅᕈᑕᐅᔪᒃᑯᑦ ᐊᒃᑐᖅᓯᒍᑕᐅᓂᐊᖅᑐᓄᑦ ᐃᓅᓯᕐᒥᓄᑦ. ᑕᒪᓐᓇ ᓂᑲᓪᓗᖓᓇᖅᑐᖅ, ᐱᓗᐊᖅᑐᒥ ᓄᓇᖃᕋᑉᑕ ᐊᒃᓱᕈᕐᓇᖅᑐᒃᑰᖃᑦᑕᖅᑐᓂᒃ ᓲᕐᓗ ᑲᓇᑕᒥ, ᐃᓄᐃᑦ ᑲᓇᑕᒥ ᐃᖕᒥᓂᒃ ᐃᓱᒪᓕᐅᕈᓐᓇᖅᑎᑕᐅᓚᐅᙱᒻᒪᑕ, ᐊᒻᒪᓗ ᑕᒪᓐᓇᑐᐃᓐᓇᐅᙱᑦᑐᖅ − ᐱᕕᒃᓴᖃᖅᑎᑕᐅᓚᐅᙱᑦᑐᑦ ᐊᐱᖅᓱᕈᓐᓇᕐᓂᕐᒧᑦ ᐃᓱᒪᓕᐅᕈᑕᐅᔪᒃᑯᑦ.”
ᐅᐱᓐᓇᖅᑐᐊᓗᒃ ᖃᓄᖅ ᐃᓄᐃᑦ ᓱᖏᐅᑎᖃᑦᑕᕐᓂᖏᓐᓄᑦ ᖃᓄᕐᓗ ᒪᓕᒋᐊᖃᕐᓂᕐᒧᑦ ᖃᓄᐃᓕᐅᕈᑕᐅᔪᒃᑯᑦ ᐃᖕᒥᓄᑦ, ᑕᐃᒪᓐᓇ ᐅᖃᒃᑲᓐᓂᖅᖢᓂ.
“ᐊᒥᓱᓂᒃ ᑎᒥᐅᔪᓂᒃ ᐃᓄᖕᓂᒃ ᐃᓅᑎᑦᑎᔪᓐᓇᙱᑦᑐᒍᑦ ᑕᐃᒪᓐᓇ ᐊᒥᓲᑎᒋᔪᓂᒃ ᐊᒥᔾᔨᖅᓯᒪᔪᓂᒃ ᓱᖏᐅᑎᑲᐅᑎᒋᔪᓐᓇᖅᑐᓂᒃ ᐊᒻᒪᓗ ᐊᒃᓱᕈᓕᕋᔭᙱᑦᑐᓂᒃ,” ᑕᐃᒪᓐᓇ ᐅᖃᖅᖢᓂ.
ᑕᐃᒪᐅᒐᓗᐊᖅᑎᓪᓗᒍ, ᐃᓄᐃᑦ ᖃᐅᔨᔪᓐᓇᖅᓯᓚᐅᖅᑐᑦ ᐊᑕᐅᓯᙳᕈᓐᓇᕐᓂᕐᒧᑦ ᐊᒻᒪᓗ ᐃᓕᑕᕆᔭᐅᔪᒪᓂᖏᓐᓄᑦ −ᐱᔪᓐᓇᐅᑎᑖᕈᓐᓇᖅᓯᑉᓗᑎᒃ, ᓄᓇᑖᖅᓯᒪᓕᖅᖢᑎᒃ ᓄᓇᕗᒥ ᐊᒻᒪᓗ ᓇᓂᓯᔪᓐᓇᖅᖢᑎᒃ ᓴᐳᓐᓂᐊᕈᓐᓇᕐᓂᕐᒧᑦ ᐃᓕᖅᑯᓯᑐᖃᕐᒥᓂᒃ.
“ᑕᒪᒃᑯᐊ ᐅᐱᓐᓇᖅᑐᑦ, ᐅᐱᓐᓇᖅᑐᒻᒪᕆᐊᓗᐃᑦ ᐱᐊᓂᒍᑎᒋᓯᒪᔭᖏᑦ ᖃᑉᓰᓐᓇᐅᒐᓗᐊᖅᖢᑎᒃ ᐃᓱᒪᓕᐅᖅᓯᒪᔪᑦ ᐱᔪᓐᓇᐅᑎᒥᓂᒃ ᑎᒍᒥᐊᕈᓐᓇᕐᓂᕐᒧᑦ,” ᑕᐃᒪᓐᓇ ᐅᖃᖅᖢᓂ ᖃᕆᑕᖅ−ᓕᓐᑎᐅᓪ.
ᐃᖕᒥᓄᓪᓕ, ᑎᒃᑯᐊᖅᑕᐅᒐᒥ ᑯᐃᓐ ᐃᓕᑕᖅᓯᔾᔪᑎᖓᓄᑦ ᐃᓱᒪᒋᓕᖅᑕᖏᑦ ᑕᒪᕐᒥᒃ ᐃᑲᔪᖅᑎᒋᓚᐅᖅᑕᖏᑦ ᐱᓕᕆᑎᓪᓗᒍ. ᐊᒥᓲᔪᑦ ᑕᐃᔭᐅᓯᒪᙱᑦᑐᑦ ᐱᓕᕆᕐᔪᐊᖅᓯᒪᔪᑦ ᓄᓇᑉᑎᓐᓂᒃ, ᑕᐃᒪᓐᓇ ᐅᖃᖅᖢᓂ, ᐊᒻᒪᓗ ᐊᓕᐊᓇᐃᒍᓱᒃᑐᖅ ᐊᔭᐅᖅᑕᔪᓐᓇᖅᓯᒪᒐᒥ ᖃᑕᙳᑎᒥᓄᑦ, ᐃᑭᙳᑎᒥᓄᑦ, ᐃᓕᓐᓂᐊᖅᑎᑦᑎᔨᓄᑦ ᐊᒻᒪᓗ ᐊᓯᖏᓐᓄᑦ ᐊᐅᓚᑦᑎᔨᐅᔪᓄᑦ.
“ᑕᒫᓃᓐᓇᔭᙱᑦᑐᖓ ᑐᙵᕕᖃᙱᒃᑯᒪ,” ᑕᐃᒪᓐᓇ ᐅᖃᖅᖢᓂ. “ᐊᕐᕕᐊᕐᒥᐅᑦ ᖃᐅᔨᒪᖁᔭᒃᑲ, ᐃᓕᑕᕆᖃᑦᑕᕋᑉᑭᑦ ᓱᓇᒥᒃ ᐱᐊᓂᒃᓯᔭᕌᖓᒪ, ᐅᕙᒻᓂᖏᓛᑦ ᐃᑲᔪᖅᓯᒪᒻᒪᕆᖕᒪᑕ ᐊᒻᒪᓗ ᐅᕙᒻᓂᒃ ᐅᒃᐱᕈᓱᒃᐸᒃᖢᑎᒃ ᑕᒫᓃᑦᑐᓐᓇᕐᓂᒻᓄᑦ. ᑕᐃᒪᐃᑦᑐᖃᕆᐊᖃᕋᑉᑕ ᒪᒃᑯᒃᑑᑉᓗᑕ, ᑭᓯᐊᓂ ᐊᓯᐊᒍᑦ ᐃᓱᒪᒋᐊᕋᔪᒃᑲᑉᑕ ᐃᓅᑉᓗᑕ.”