ᐊᖑᓇᓱᒃᑏᑦ ᐅᑭᐅᖅᑕᖅᑐᒥ ᖃᕆᑕᐅᔭᒃᑯᑦ ᐅᓂᒃᑳᖅᑐᐊᖃᑦᑕᓚᐅᖅᑐᑦ ᑖᒻᓇ ᑕᖅᑭᖅ ᐱᒋᐊᓕᓵᖅᑎᓪᓗᒍ ᑎᑉᓯᓇᖅᑐᓂᒃ ᐅᖃᐅᓯᖃᖅᖢᑎᒃ ᑐᒃᑐᒐᓱᖕᓂᒃᑯᑦ.
ᖃᒪᓂ’ᑐᐊᕐᒥᐅᑕᖅ ᑎᒻ ᑐᖑᐊᖅ ᐃᖅᑲᐅᒪᓕᓚᐅᖅᑐᖅ ᐊᐅᔭᒃᑯᑦ ᔪᓚᐃᒥ ᑕᐃᑉᓱᒪᓂᑐᖃᖅ ᐃᕐᓂᓂᓗ ᑐᒃᑐᓐᓇᓱᒃᑎᓪᓗᒋᑦ ᓄᓇᖓᑕ ᖃᓂᒋᔭᖓᓂᒃ.
ᐅᒥᐊᒃᑯᑦ ᒥHᐊᓗᒃᒧᙵᐅᓪᓗᑎᒃ ᑕᑯᔪᕕᓃᑦ ᑐᒃᑐᓂᒃ ᖃᑉᓰᓐᓇᐅᔪᓂᒃ ᐊᒋᐅᑎᑦ ᐅᐊᖕᓇᖓᓂ ᐊᓂᒍᖅ ᑰᖕᒥ.
“ᕿᖑᒻᒥᒃᖢᑕ, ᑐᒃᑐᑦ ᑕᐅᑐᒃᖢᒋᑦ, ᖃᐅᔨᓇᓱᒃᖢᑕ ᓇᒧᙵᐅᖕᒪᖔᑕ,” ᑕᐃᒪᓐᓇ ᐃᖅᑲᐅᒪᔪᖅ ᑐᙳᐊᖅ.
ᐅᕙᑦᑎᐊᕈᙳᕐᒪᑦ, ᑐᒃᑐᓯᐅᖅᓯᒪᔪᑦ ᐅᔾᔨᕈᓱᓕᖅᖢᑎᒃ ᑐᒃᑐᑦ ᑕᖃᐃᖅᓯᕐᓂᖏᓐᓄᑦ. ᐊᖓᔪᒃᖡᑦ ᐊᖏᐅᑎᓕᐊᖅᖢᑎᒃ ᖃᐅᔨᓇᓱᒃᖢᑎᒃ ᑐᒃᑐᓄᑦ ᖃᓂᓪᓕᒋᐊᕈᓐᓇᕐᒪᖔᕐᒥᒃ. ᐅᒥᐊᓂ ᑰᑉ ᓴᓂᐊᓂ ᓄᖅᑲᖅᑎᖦᖢᒍ ᑐᒃᑐᑦ ᒪᔪᕆᐊᕐᕕᐅᑉ ᖄᖓᓃᓐᓂᖅᓴᐅᑉᓗᑎᒃ ᐊᒻᒪᓗ ᐊᖑᓇᓱᒃᑏᑦ ᐹᕐᖑᖅᖢᑎᒃ ᐸᕐᕆᐊᓕᖅᖢᑎᒃ.
ᑐᒃᑐᑦ ᓇᓚᑲᑕᒃᑐᑦ ᓱᓕ ᑐᙳᐊᖅ ᖃᓂᓪᓕᒐᒥ ᑐᒃᑐᓄᑦ ᑐᕌᖅᑎᑦᑎᓕᖅᖢᓂ.
“ᓴᓂᓕᕇᒃᖢᑕ ᖁᑭᐊᓕᖅᑐᒍᑦ ᐊᑕᐅᑦᑎᒃᑯᑦ,” ᑕᐃᒪᓐᓇ ᑎᑎᕋᖅᖢᓂ ᑐᙳᐊᖅ. “ᐃᕐᓃᒃᑲ ᐅᖃᐅᑎᓯᒪᑉᓗᒋᑦ ᐊᑐᓂ ᐊᑕᐅᓯᕌᑐᐃᓐᓇᕐᓂᐊᕐᓂᑉᑎᓐᓄᑦ, ᑰᒃ ᐃᒃᑲᑦᑑᖕᒪᑦ, ᐃᓄᐃᑦ ᖃᒪᓂ’ᑐᐊᕐᒥᐅᑦ ᐊᒥᓲᓂᖅᓴᑦ ᑕᒪᑐᒥᙵ ᖃᐅᔨᒪᖕᒪᑕ.”
ᑐᒃᑐᑦ ᒪᑭᒋᐊᕈᓐᓇᖅᓯᒪᙱᑎᓪᓗᒋᓪᓘᓐᓃᑦ ᓱᓕ ᐊᖑᓇᓱᒃᑏᑦ ᖁᑭᐊᓕᖅᖢᑎᒃ. “ᑕᒪᑦᑕ ᑐᒃᑐᖦᖢᑕ,” ᑕᐃᒪᓐᓇ ᑎᑎᕋᖅᖢᓂ ᑐᙳᐊᖅ, ᐅᖃᖅᖢᓂᓗ ᑐᒃᑐᓯᒪᓕᕋᒥᒃ ᑐᒃᑐᑦᑕᒥᓄᑦ ᐱᓱᓕᖅᖢᑎᒃ.
ᖃᓂᓪᓕᒐᒥ, ᐅᔾᔨᕈᓱᓕᖅᖢᓂ ᑐᒃᑐᑕᐅᓯᒪᔪᑦ ᐊᒥᓲᓂᖅᓴᐅᓂᖏᓐᓄᑦ, ᐃᒪᓐᓇ ᑐᑭᖃᖅᑐᖅ ᐊᖑᓇᓱᒃᑎᐅᑉ ᐃᓚᖓ ᖃᑉᓯᒃᑲᓐᓂᕐᓂᒃ ᑐᒃᑐᓯᒪᔪᒃᓴᐅᓂᖓᓄᑦ.
ᐃᕆᐊᓪᓚᒃᖢᓂ, “7-ᖑᔪᑦ ᑐᒃᑐᑕᐅᓯᒪᔪᑦ ᐊᕐᕕᓂᓖᓐᓇᐅᑉᓗᑕ. ᑭᓇ ᒪᕐᕈᕌᖅᓯᒪᖕᒪᑦ?”
ᑐᒃᑐᑕᐅᓯᒪᔪᑦ ᑕᑯᒋᐊᓕᕋᒥᒋᑦ ᑭᖑᓪᓕᖅᐹᒧᑦ ᑎᑭᐅᑎᑉᓗᓂ. ᐊᖑᓇᓱᒃᑐᑦ ᖁᒃᓴᓪᓚᒃᖢᑎᒃ, ᑐᒃᑐᓗ ᐅᐃᖦᖢᓂ ᐊᒻᒪᓗ ᐅᔾᔨᕈᓱᓕᕋᒥ ᐅᐸᒃᑕᐅᓂᕐᒥᓄᑦ ᐃᓄᖕᓄᑦ, ᐅᐸᒋᐊᖅᑐᓯᔪᐊᓘᑉᓗᓂ ᐃᓄᖕᓄᑦ.
“ᐊᖑᑎᐊᓘᙱᖔᖅᖢᖓ, ᑐᓄᖦᖢᒍ ᕿᒪᓯᔪᖓ ᖁᑭᐅᓯᔭᖅᑐᖓ ᑕᒡᕙ,” ᑕᐃᒪᓐᓇ ᑎᑎᕋᖅᖢᓂ ᑐᙳᐊᖅ. “ᑕᐃᒪᐃᓕᐅᖅᖢᓂᓗ ᓴᓂᓕᕆᔭᕋ ᐊᖑᑎ, ᑕᒪᓐᓄᒃ ᐃᕆᐊᓛᖢᓄᒃ. ᐱᖃᑎᕗᑦ ᐊᖑᑎᑦ ᐅᕙᑉᑎᓐᓂᒃ ᑕᐅᑐᒃᑐᑦ ᐃᒡᓚᖅᑐᐊᓘᑉᓗᑎᒃ.”
ᑐᓄᑕᐃᓐᓇᕋᒥᒃ, ᑕᑯᓕᖅᖢᑎᒃ ᑐᒃᑐ ᐅᑎᒧᑦ ᐅᑎᓕᖅᑐᕕᓂᖅ ᕿᒪᓯᑉᓗᓂᓗ.
“ᑐᒃᑐ ᕿᑉᓯᙱᑦᑐᕕᓂᐊᓗᒃ ᖁᑭᐊᔪᐊᓗᖕᓂᒃ, ᖁᑭᖅᑕᐅᓇᓂᓗ ᐊᒻᒪᓗ ᕿᓪᓚᖃᕐᓇᓂ,” ᑕᐃᒪᓐᓇ ᑎᑎᕋᖅᑐᖅ ᑐᙳᐊᖅ.
ᑕᐃᑲᓂ ᖃᐅᔨᓕᓚᐅᖅᑐᖅ ᑐᒃᑐᑦ ᓯᓂᒍᓐᓇᕐᓂᖏᓐᓄᑦ ᓂᐱᖃᖅᑐᐊᓘᒐᓗᐊᖅᐸᑦ. “ᐊᑕᓈᕐᔪᐊᕐᒥ ᐅᕿᓚᓂᖅᓴᐅᓚᐅᖅᑰᖅᑐᖓᓘᓐᓃᑦ ᑕᐃᑉᓱᒪᓂ,” ᑕᐃᒪᓐᓇ ᑎᑎᕋᖅᖢᓂ ᑐᙳᐊᖅ, ᐅᖃᐅᓯᖃᖅᖢᓂ ᑕᕐᕆᔭᐅᓯᐊᖑᓚᐅᖅᑐᒥ 2001-ᒥ ᐃᒪᓐᓇ ᑕᐃᒎᓯᓕᖕᒥ: The Fast Runner.