ᐃᓕᓐᓂᐊᕐᕕᐊᕈᓰᑦ ᐱᒋᐊᒃᑲᓐᓂᖅᑎᓪᓗᒋᑦ ᑮᓕᓂᒃ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ ᐃᖃᓗᒃᑑᑦᑎᐊᕐᒥ, ᐊᔾᔨᒋᙱᓐᓂᖅᑕᖃᖅᐳᖅ.
ᐹᑎ ᐸᓚᐃ, ᓴᙱᓂᐅᔪᒥ ᕿᑎᕐᒥᐅᓂ ᐃᓕᓐᓂᐊᕐᓂᓕᕆᓂᕐᒧᑦ ᓄᓇᓕᐅᔪᒥ ᐊᕐᕌᒍᑦ 20 ᐅᖓᑖᓄᑦ, ᑕᐃᑲᓃᑦᑐᓐᓃᖅᐳᖅ. ᓄᖅᑲᖅᓯᒪᕗᖅ ᐱᓕᕆᐊᒥᓂᑦ, ᐃᖅᑲᓇᐃᔮᖅᑖᖅᖢᓂ ᔭᓗᓇᐃᕝᒥ ᐊᑕᐅᓯᕐᒥ−ᐊᕐᕌᒍᒧᑦ ᐱᓕᕆᓂᐅᔪᒥ ᐅᑭᐅᖅᑕᖅᑐᒥ ᖃᐅᔨᓴᕐᓂᐅᔪᒧᑦ ᐊᒻᒪ ᐃᓅᖃᑎᒌᖑᔪᓄᑦ ᖃᐅᔨᓴᕐᓂᐅᔪᒥ ᑲᒪᔨᐅᓪᓗᓂ ᓄᓇᑦᓯᐊᕐᒥ ᒐᕙᒪᒃᑯᓐᓄᑦ. ᐅᖃᓚᐅᖅᐳᖅ ᐱᔪᓐᓇᖅᑎᑦᑎᓂᐊᕐᓂᖓᓂ ᐃᕿᑦᑎᓂᖓᓂ “ᐊᑐᖅᑕᐅᕙᓚᐅᖅᑐᓂ ᐱᓕᕆᓕᒪᓂᖓᓂ” ᐊᒻᒪ ᐸᓂᖕᒥᓃᓐᓂᖅᓴᐅᓂᕐᒥ, ᓄᓇᖃᖅᑐᒥ ᓄᓇᑦᓯᐊᕐᒥ ᐊᖓᔪᖅᑳᖃᕐᕕᖓᓂ.
ᐸᓚᐃ ᐊᒻᒪ ᐅᐃᖓ, ᒍᐊᑕᓐ, ᐃᖃᓗᒃᑑᑦᑎᐊᕐᒨᓚᐅᖅᐳᑦ ᔪᓚᐃ 1998−ᒥ, ᒍᐊᑕᓐ ᐊᖏᓚᐅᖅᑎᓪᓗᒍ ᐃᓂᒃᓴᐅᔪᒥ ᑮᓴᐅᔭᒃᑯᕕᖕᒥ Royal Bank−ᒥ. ᐸᕐᓇᓚᐅᖅᐳᑦ ᑕᐃᑲᓃᓐᓂᐊᕐᓂᖏᓐᓂ ᑕᖅᑭᓄᑦ 18−ᓄᑦ.
ᐹᑎ, ᓴᔅᑳᑦᓱᐊᓐᒥᐅᑕᓪᓚᕆᒃ, ᐸᕐᓇᓚᐅᖅᐳᖅ ᐱᒋᐊᕐᓂᖓᓂ ᐅᓪᓗᓕᒫᖅᓯᐅᑎᐅᓂᕐᒥ ᐃᓕᓴᐃᔨᐅᓂᖓᓂ ᑕᐃᔅᓱᒪᓂ, ᑭᓯᐊᓂ ᖁᑦᑎᒃᑐᒥ ᐃᓕᓐᓂᐊᕐᕕᖓ ᐃᑭᓚᐅᖅᐳᖅ ᑕᐃᔅᓱᒪᓂ ᐊᐅᔭᐅᔪᒥ.
ᐅᐸᓗᖓᐃᔭᕈᓘᔭᖅᖢᑎᒃ ᐊᑐᐃᓐᓇᖃᖅᑎᑦᑎᓚᐅᖅᐳᑦ ᐃᓕᓐᓂᐊᕐᕕᐊᕈᓯᖃᕐᓂᕐᒥ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᓄᓇᓕᖕᓂ ᐃᓕᓐᓂᐊᕐᕕᖓᓂ, ᐊᒻᒪᓗ ᐊᓯᖏᓐᓂ ᐃᒡᓗᕐᔪᐊᓂ.
“ᕿᓚᒥᐊᓗᒃ ᐃᓕᑦᑎᓐᓇᓚᐅᖅᐳᖅ ᓴᖑᓴᕋᐃᓐᓂᐅᓂᕐᒥ,” ᐃᖅᑲᐅᒪᕗᖅ, ᐃᓚᒋᐊᖅᓯᓪᓗᓂ ᑐᙵᕕᒋᔭᖓ ᓄᓇᓕᓕᒫᒥ ᐃᓕᓐᓂᐊᕐᕕᐅᓂᖓᓂ, ᐃᓚᖃᖅᑐᒥ ᓯᓚᒥ. “ᖁᕕᐊᓇᕐᔪᐊᓚᐅᖅᐳᖅ ᐊᒻᒪ ᐱᔪᒥᓇᖅᖢᓂ ᐊᒻᒪ ᐊᒃᓱᕈᕐᓇᖅᖢᓂ.
“ᐊᓯᔾᔩᓲᖑᕗᖅ ᖃᓄᖅ ᐃᓕᓐᓂᐊᖅᑎᑦᑎᕙᖕᓂᕐᓂ … ᐅᖃᕋᔭᓚᐅᖅᐳᖓ ᐱᐅᓂᖅᐹᖑᔪᒥ ᐃᓕᓴᐃᓂᕐᒧᑦ ᐅᑭᐅᖅᑕᖅᑐᒥ, ᓄᓇᓕᐅᔪᖅ ᐃᓕᓐᓂᐊᕐᕕᐅᓪᓗᓂ,” ᐅᖃᓚᐅᖅᐳᖅ.
ᑲᑎᙵᓂᐅᔪᒥ ᑎᑭᑉᐸᓪᓕᐊᔪᓂ “ᖃᓪᓗᓈᑦ ᓄᓇᖓᓐᓂ ᒪᓕᒋᐊᖃᕐᓂᐅᔪᓂ” ᐊᕐᕌᒍᒐᓴᓄᑦ ᐊᒻᒪ, ᐱᓗᐊᖅᑐᒥ ᓴᖅᑭᓐᓂᐅᔪᒥ ᓄᕙᒡᔪᐊᕐᓇᖅ-19−ᒥ ᑕᐃᒪᙵᓂ 2020−ᒥ ᐊᖏᓂᖅᓴᒻᒪᕆᖕᓂ ᑭᒡᓕᖃᖅᑎᑦᑎᓯᒪᕗᖅ ᖃᓄᖅ ᐃᓕᓐᓂᐊᕈᑕᐅᔪᑦ ᐃᓕᓐᓂᐊᖅᑎᑕᐅᓂᖏᓐᓂ. ᐊᒥᓱᑦ ᐃᓕᓐᓂᐊᕐᕕᐊᕈᓰᑦ ᓅᓯᒪᕗᑦ ᖃᕋᓴᐅᔭᑎᒍᑦ ᐊᒻᒪ ᐊᑐᕐᓂᖅᓴᐅᓪᓗᑎᒃ ᐱᔭᕆᑐᓂᖅᓴᐅᔪᓄᑦ.
“ᐃᓕᓐᓂᐊᕐᓂᕐᒧᑦ ᓴᖑᓂᐅᕗᖅ ᐅᕙᓐᓄᑦ,” ᐅᖃᓚᐅᖅᐳᖅ. “ᓈᒻᒪᒃᓯᕗᖅ ᐃᓕᓐᓂᐊᖅᑎᑦᑎᔪᓐᓃᕐᓂᓐᓂ.”
ᐃᓚᒋᐊᖅᓯᓚᐅᖅᐳᖅ ᑕᑯᔪᒪᕐᔪᐊᕐᓂᖓᓂ ᐃᖏᕐᕋᐃᓐᓇᕐᓂᐅᔪᒥ ᐃᓕᓴᐃᔨᐅᔪᓄᑦ, ᓄᖅᑲᙱᓐᓂᖅᓴᐅᓗᑎᒃ. ᑕᐃᔅᓱᒧᖓ ᐱᔾᔪᑕᐅᔪᒥ, ᓄᓇᕗᒻᒥ ᐃᓕᓴᐃᔨᙳᕐᓂᕐᒥ ᐱᓕᕆᐊᖑᔪᒥ ᐅᑎᖅᑎᑦᑎᓇᓱᐊᓚᐅᖅᐳᖅ ᐃᖃᓗᒃᑑᑦᑎᐊᕐᒧᑦ.
ᐊᔭᐅᕆᒋᕗᖅ ᐊᖓᔪᖅᑳᖑᔪᓄᑦ ᐃᑲᔪᖅᓱᐃᒃᑲᓐᓂᕐᓂᐅᔪᒥ ᓱᕈᓯᖏᓐᓄᑦ ᐃᓕᓐᓂᐊᕐᓂᖏᓐᓄᑦ.
“ᖁᑦᑎᒃᓯᒋᐊᒃᑲᓐᓂᖅᓯᔭᕆᐊᖃᖅᐳᒍᑦ,” ᐅᖃᓚᐅᖅᐳᖅ. “ᓱᕈᓰᑦ ᐱᓕᕆᑦᑎᐊᕈᓐᓇᕐᓂᖏᑦ ᐃᓕᓐᓂᐊᕐᕕᖕᒥ ᐃᓕᓴᐃᔨᓂᙶᖅᐳᑦ ᑭᓯᐊᓂ ᐊᐅᓚᑕᐅᓪᓗᓂ ᐊᖓᔪᖅᑳᖑᔪᓂ.”
ᐹᑎ ᐅᖃᓚᐅᖅᐳᖅ ᐅᒡᒍᐊᕐᓂᖃᙱᑦᑎᐊᕐᓂᖓᓂ ᐃᖃᓗᒃᑑᑦᑎᐊᕐᒦᖏᓐᓇᕐᓂᕐᒥ, ᐅᖃᓚᐅᖅᐳᖅ ᓇᓂᓯᓂᖓᓂ “ᑐᙵᓇᕐᔪᐊᕐᓂᖓᓂ,” ᐊᒻᒪᓗ ᐱᖓᓱᑦ ᕿᑐᕐᙵᖏᑦ ᐃᓕᓐᓂᐊᕐᕕᖕᒥ ᐱᓕᕆᔾᔪᓯᖓᒎᓚᐅᖅᐳᑦ ᑕᐃᑲᓂ, ᐱᐅᑦᑎᐊᖅᑐᒥ ᐃᓕᓐᓂᐊᕐᓂᖃᓚᐅᖅᖢᑎᒃ. ᐊᓈᓇᙳᐊᖑᓚᐅᕆᕗᖅ ᖃᓂᒋᔭᖓᓐᓄᑦ 40−ᓄᑦ ᓱᕈᓯᕐᓄᑦ ᐊᕐᕌᒍᒐᓴᓄᑦ.
“ᐃᖃᓗᒃᑑᑦᑎᐊᖅ ᐅᕙᑦᑎᓐᓄᑦ ᐊᖏᕐᕋᐅᕗᖅ. ᕿᒪᙱᑕᕗᑦ ᐃᓕᓐᓂᐊᖅᑎᑦᑎᔨᐅᔪᓐᓃᕋᒪ,” ᐅᖃᓚᐅᖅᐳᖅ.
ᓱᒃᑲᔪᒥ ᑐᑭᓯᓇᖅᓯᓚᐅᖅᐳᖅ ᐅᐱᒋᔭᐅᓂᖓᓂ ᑐᕌᒐᕆᔭᖓᓄᑦ ᐅᖓᓯᓚᐅᕐᓂᖓᓂ ᑐᓴᖅᐸᓪᓕᐊᑎᓪᓗᒋᑦ ᓄᖅᑲᓛᕐᓂᖓᓂ ᓯᕗᓂᐊᓂ ᖁᕕᐊᓱᒡᕕᖕᒧᑦ ᐊᒻᒪ ᐅᐱᒋᔭᐅᓂᖓᓂ ᐅᖃᐅᓯᐅᓚᐅᖅᐳᖅ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ.
“ᑲᒪᕐᔪᐊᖅᓯᒪᕗᖓ ᐱᑦᑎᐊᕐᔪᐊᕐᓂᖏᓐᓂ ᐃᓄᐃᑦ. ᐅᒃᐱᕈᓱᑦᑎᐊᖅᐳᖓ ᐃᓄᖕᓂ ᓂᓪᓕᙱᑦᑐᓂ (ᐱᐅᙱᑦᑐᓂ), ᐊᒻᒪ ᑕᒪᓐᓴ ᖁᔭᒋᕙᕋᑦᑕᐅᖅ,” ᐅᖃᓚᐅᖅᐳᖅ, ᐃᒡᓚᖅᖢᓂ. “ᑭᒃᑯᓕᒫᓄᑦ ᐱᐅᒋᔭᐅᒍᕕᑦ, ᐃᓱᒪᕗᖓ ᐃᓕᓴᐃᔨᑦᑎᐊᕙᐅᙱᓐᓂᕐᓂ. ᐃᓅᕗᑎᑦ ᓴᖅᑭᑎᑦᑎᔪᒥ ᓄᓇᕐᔪᐊᒥ ᐆᒪᑎᑦᑎᔪᒥ ᓱᓕᙱᑦᑐᒥ ᑕᐅᑐᙳᐊᕐᓂᐅᔪᓂ.”
ᐃᓕᓐᓂᐊᖅᑎᐅᔪᑦ ᖃᐅᔨᒪᓂᖃᖅᐳᑦ ᐱᐅᒃᓴᕐᓂᖓᓂ ᐅᖃᓗᕋᐅᔭᐅᑎᓂᑦ ᐊᒻᒪ ᐊᓕᐊᓇᐃᒋᔭᖃᕐᔪᐊᕐᓂᖓᓂ ᐊᑐᖅᑕᐅᕙᓚᐅᖅᑐᓄᑦ, ᑕᑯᓚᐅᖅᑐᒥ ᑲᒪᔨᐅᓂᖓᓂ 6−ᖏᖅᓱᖅᑐᒥ ᐃᓕᓐᓂᐊᕐᕕᖕᒥ ᐊᐅᓪᓛᕐᓂᐅᔪᒥ ᑕᕆᐅᑉ ᐊᑭᐊᓄᑦ ᒪᕐᕈᖓᓂ ᓄᓇᕐᔪᐊᒥ ᐅᓇᑕᕐᔪᐊᕐᕕᐅᕙᓚᐅᖅᑐᓄᑦ ᑲᓇᑕᒥ ᐅᓇᑕᖅᑐᒃᓴᓂ ᐅᓇᑕᓚᐅᕐᓂᖏᓐᓂ.
ᒦᐊ ᐅᑐᑭᐊᒃ ᐊᑕᐅᓯᐅᓪᓗᓂ ᐹᑎᐅᑉ ᐃᓕᓐᓂᐊᖅᑎᒋᔭᐅᖃᑕᐅᓚᐅᖅᐳᖅ, ᐊᒻᒪ ᐱᓕᕆᖃᑎᖃᕐᓂᖓᓂ ᐅᖓᑖᓄᐊᕐᔪᐊᖅᓯᒪᕗᖅ ᐃᓕᓴᐃᔨᒧᑦ ᐊᒻᒪ ᐃᓕᓐᓂᐊᖅᑎᒧᑦ ᐅᑐᑭᐊᒃ ᐃᓐᓇᕈᖅᑎᓪᓗᒍ.
“ᐹᑎ ᑕᑯᔭᕆᐊᓚᐅᖅᐸᕋ ᐸᓂᖓ (ᓯᕚᓐ) ᐊᒻᒪ ᐅᕙᖓ ᐅᑭᐅᖃᑎᒌᒃᑲᓐᓄᒃ ᐊᒻᒪ ᐹᖃᑦᑕᐅᑎᓪᓗᓄᒃ ᖁᑦᑎᖕᓂᓕᖕᒥ 1−ᒥ. ᑕᐃᒪᙵᓂ ᐹᑎ ᓲᕐᓗ ᒪᕐᕈᖓᓐᓂ ᐊᓈᓇᒋᕙᕋ. ᐊᓈᓇᒐᓘᓐᓃᑦ ᑕᐃᕙᒃᐸᖓ ᒪᕐᕈᖓᓂ ᐊᓈᓇᖓᓂ,” ᐅᖃᓚᐅᖅᐳᖅ ᐅᑐᑭᐊᒃ. “ᐅᕙᓐᓄᑦ ᖃᓄᐃᓕᐅᕐᔪᐊᖅᓯᒪᕗᖅ, ᐅᕙᓐᓂ ᐃᓕᓐᓂᐊᖅᑎᑦᑎᓂᕐᒥ ᑐᙵᓇᕐᓂᐅᔪᒥ, ᐊᒥᓱᓄᑦ ᑲᒪᓇᖅᑐᓂ ᐱᓕᕆᐊᖑᔪᓄᙵᐅᑎᖦᖢᓂᖓ ᑲᓇᑕᓕᒫᒥ; ᐃᑲᔪᑐᐃᓐᓇᙱᖦᖢᓂᖓ ᐅᔾᔨᕆᓂᕐᒥ ᖃᓄᖅ ᐱᒻᒪᕆᐅᓂᖓᓂ ᐃᓕᓐᓂᐊᕐᓂᖅ, ᑭᓯᐊᓂ ᐅᕙᓐᓂ ᐃᑲᔪᕐᓂᕐᒥ ᐊᓂᒍᐃᓂᕐᒥ ᐊᒻᒪ ᐃᓱᓕᑦᑎᓂᕐᒥ ᖁᑦᑎᒃᑐᒥ ᐃᓕᓐᓂᐊᕐᕕᖕᒥ.”
ᐹᑎ ᐃᓚᐅᖃᑕᐅᓚᐅᕆᕗᖅ ᐊᒥᓱᓂ ᖄᒃᑲᓐᓂᐊᒍᑦ-ᐃᓕᓐᓂᐊᕈᑎᓕᐅᖅᑕᐅᓯᒪᔪᓄᑦ ᖃᓄᐃᓕᐅᕐᓂᐅᔪᓄᑦ ᓲᕐᓗ ᑰᓕᖕ ᐊᒻᒪ ᐲᕗᔅ. ᐅᑐᑭᐊᒃ ᐅᖃᐅᓯᕆᓚᐅᖅᐸᖓ “ᓄᖅᑲᔪᐃᑦᑑᓪᓗᓂ ᐊᑭᓕᖅᓱᖅᑕᐅᓇᓂ ᐃᑲᔪᖅᑎᐅᓂᖓᓂ.”
“ᐅᖃᓕᒫᒐᓕᒫᒥ ᑎᑎᕋᕈᓐᓇᖅᐳᖓ ᖃᓄᑎᒋ ᐹᑎ ᑲᒪᓇᖅᑐᒥ ᐊᔭᐅᕆᓯᒪᓂᓐᓂ ᐃᓅᓯᓐᓂ,” ᐅᖃᓚᐅᖅᐳᖅ. “ᐃᓚᓯᔪᒪᑐᐃᓐᓇᖅᐳᖓ ᐹᑎ ᑲᒪᓇᕐᔪᐊᖅᖢᓂ ᐃᓕᓴᐃᔨᐅᕗᖅ, ᐊᓈᓇᐅᓪᓗᓂ ᐊᒻᒪ ᐱᖃᓐᓇᕆᓪᓗᒍ. ᓇᒡᓕᒋᕐᔪᐊᖅᐸᕋ ᐊᒻᒪᓗ ᖁᔭᒋᒃᑲᓐᓂᕈᓐᓇᙱᓚᕋ ᖃᓄᐃᓕᐅᕐᓂᓕᒫᖏᓐᓄᑦ ᐅᕙᓐᓄᑦ.”