ᐅᕙᒍᑦ ᑕᓚᕖᓴᒃᑯᑦ ᖁᕕᐊᓱᒍᑎᖃᖅᐳᑦ ᓯᕗᓪᓕᖅᐹᖓᓂ ᐊᕐᕌᒍᖓᓂ ᐃᓄᒃᑎᑐᐃᓐᓇᖅ ᑐᓂᓯᓂᕐᒥ ᑕᓚᕖᓴᒥ ᐃᓄᖕᓄᑦ ᑲᓇᑕᓕᒫᒧᑦ, ᔭᓄᐊᕆ 18, 2021–ᒥ ᐱᒋᐊᖅᑎᑕᐅᓂᖓᓂ ᐅᕘᓇ ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒃᑯᑦ.
ᓯᕗᓪᓕᖅᐹᖑᓪᓗᓂ ᑕᒪᒃᑭᓄᑦ ᓄᓇᖃᖅᑳᖅᓯᒪᔪᓄᑦ–ᐅᖃᐅᓯᕐᒥ ᑕᕐᕆᔭᕐᕕᐅᔪᒥ ᐊᒻᒪᓗ, APTN–ᑯᓐᓂ, ᒪᕐᕈᒋᔭᐅᓪᓗᓂ ᓄᓇᖃᖅᑳᖅᓯᒪᔪᓄᑦ ᑕᓚᕖᓴᒧᑦ ᑲᓱᖃᑎᒌᒃᓯᒪᔪᒥ ᐱᔨᑦᑎᕋᕐᓂᐅᔪᒥ ᐅᑯᓇᓂ 762–ᖑᔪᓂ ᓴᖅᑭᔮᖅᑎᑦᑎᓂᐅᔪᒥ ᑲᓇᑕᒥ.
“ᖁᔭᓐᓇᒦᒃ ᑭᒃᑯᓕᒫᓄᑦ ᐃᑲᔪᖅᓱᐃᓯᒪᔪᓂ ᐅᕙᒍᑦ ᑕᓚᕖᓴᒃᑯᓐᓂ, ᐅᓇ ᓯᕗᓪᓕᖅᐹᖑᔪᖅ ᐊᕐᕌᒍᖓᓂ ᐱᓕᕆᑦᑎᐊᕐᓂᖃᕈᓐᓇᕋᔭᓚᐅᙱᓚᖅ ᐃᑲᔪᓚᐅᙱᒃᑯᔅᓯ. ᐃᓄᑐᖃᐃᑦ ᐅᐱᐅᖅᑲᕗᑦ ᑕᑯᓂᕐᒥ ᐅᖃᐅᓯᑦᑎᓐᓂ ᑭᒡᒐᖅᑐᖅᑕᐅᓂᖓᓂ,” ᐅᖃᓚᐅᖅᐳᖅ ᓘᓯ ᑐᓗᒑᕐᔪᒃ, ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒃᑯᑦ ᐃᒃᓯᕙᐅᑕᖓ ᐊᒻᒪ ᐃᓱᒻᒥᖅᑐᐃᔨᖓ.
ᐱᒻᒪᕆᐅᓂᐅᔪᓂ ᐊᕐᕌᒍᒥ ᐃᓚᖃᓚᐅᖅᐳᖅ ᑕᑯᒃᓴᐅᑎᑦᑎᓂᐅᔪᒥ ᓴᖅᑭᔮᑲᐅᑎᒋᔪᒥ ᑕᓚᕖᓴᒃᑰᖅᑎᑦᑎᓂᕐᒥ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂ (NIRB) ᑐᓵᓂᐅᔪᓂ ᐱᓕᕆᓂᖓᓂ ᒪᕐᕈᖓᓂ ᐹᕙᓐᓛᓐᑯᑦ ᑐᒃᓯᕋᖅᑕᐅᔪᒥ ᐊᖏᒡᓕᒋᐊᕐᓂᖓᓄᑦ ᓄᓘᔭᕐᓂ ᐅᔭᕋᖕᓂᐊᕐᕕᖓᓂ ᔭᓄᐊᕆ 25, 2021–ᒥ ᐊᒻᒪᓗ ᓱᓕᒃᑲᓐᓂᖅ ᐊᐃᑉᕆᓕᒥ.
ᓄᕕᐱᕆᒥ, ᐃᓄᓕᒫᓄᑦ ᑐᓵᓂᐅᔪᑦ ᐹᕙᓐᓛᓐᑯᑦ ᑐᒃᓯᕋᖅᑕᐅᔪᒥ ᐅᔭᕋᖕᓂᐊᕐᕕᖕᒧᑦ ᐊᖏᒡᓕᒋᐊᖅᑕᐅᓂᖓᓂ ᐱᒋᐊᒃᑲᓐᓂᕋᒥ ᐃᖃᓗᖕᓂ ᐊᒻᒪ ᒥᑦᑎᒪᑕᓕᖕᒥ, ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒃᑯᑦ ᑎᑎᕋᐃᓚᐅᖅᐳᑦ ᐃᖅᑲᖅᑐᐃᕕᖕᒥ ᓵᓚᖃᕋᓱᐊᕐᓂᐅᔪᒥ ᐅᑯᓄᖓ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᖏᖏᓐᓂᖏᓐᓂ ᑐᓂᓯᓂᕐᒥ ᐅᕙᒍᑦ ᑕᓚᕖᓴᒃᑯᓐᓂ ᐱᔪᓐᓇᕐᓂᐅᔪᒥ ᑕᑯᒃᓴᐅᑎᑦᑎᒃᑲᓐᓂᕐᓂᖏᓐᓂ ᐃᓄᓕᒫᓄᑦ ᑐᓵᓂᐅᔪᓂ.
ᑐᓗᒑᕐᔪᒃ, ᑕᐃᔅᓱᒪᓂ, ᐅᖃᓚᐅᖅᐳᖅ, “ᓇᖏᖃᑎᖃᐃᓐᓇᖅᐳᒍᑦ ᐃᓄᐃᑦ ᐱᔪᓐᓇᕐᓂᕆᔭᖏᓐᓂ ᐃᓚᐅᖃᑕᐅᓂᕐᒧᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᑦᑕ ᐱᓕᕆᓂᖏᓐᓂ ᐊᒻᒪᓗ ᑐᑭᖃᑦᑎᐊᖅᑐᒥ ᐅᖃᐅᔾᔨᓯᒪᓗᑕ ᖃᓄᐃᑉᐸᓪᓕᐊᓂᖏᓐᓂ ᐃᓄᐃᑦ ᓄᓇᖏᓐᓂ.”
ᓴᓇᓂᕐᒥ ᓴᖅᑭᔮᑲᐅᑎᒋᔪᒥ ᓴᖅᑭᔮᖅᑎᑦᑎᓂᐅᔪᒥ ᓄᓇᓕᖕᓂ ᐃᓄᐃᑦ ᓄᓇᖓᓐᓂ ᐅᐱᒋᔭᐅᓪᓗᓂ ᑎᑭᐅᑎᓯᒪᓂᕆᕙᕗᑦ ᐅᕙᒍᒃᑯᓐᓂ – ᑕᖅᑭᑦ 6 ᑕᑯᒃᓴᐅᑎᑦᑎᓯᒪᓂᖃᓕᖅᑎᓪᓗᒋᑦ ᐱᔪᓐᓇᖅᑎᑦᑎᓚᐅᖅᐳᖅ ᑕᕐᕆᔭᓕᐅᕐᓂᕐᒥ ᑲᑎᙵᓂᐅᔪᓂ ᓄᓇᓕᖕᓂ ᑕᕐᕆᔭᓕᐅᕐᓂᖏᓐᓂ ᐅᖃᐅᓯᖃᕐᓗᑎᒃ ᐅᓂᒃᑳᖏᓐᓂ ᐃᒻᒥᖕᓄᑦ ᐊᒻᒪ ᑲᓇᑕᒥ ᖁᙱᐊᖅᑐᓄᑦ.
ᐊᓯᖓᓐᓂ ᑎᑭᐅᑎᕐᔪᐊᖅᓯᒪᓂᐅᔪᒥ ᑕᑯᒃᓴᐅᑲᐅᑎᒋᔪᒥ ᑕᑯᒃᓴᐅᑎᑦᑎᓂᐅᔪᒥ ᖃᔅᓯᒐᓚᖕᓂ ᑲᓇᑕᒥ ᖃᓄᐃᓐᓂᐅᔪᓂ ᐃᓄᒃᑎᑐᑦ, ᐃᓚᖃᖅᑐᒥ ᐃᓕᔭᐅᓂᖓᓂ ᑯᐃᑉ ᑭᒡᒐᖅᑐᖅᑎᖓᓂ ᑲᓇᑕᒥ ᒥᐊᕆ ᓴᐃᒪᓐᒥ ᐊᒻᒪ ᒐᕙᒪᑐᖃᒃᑯᑦ ᓯᕗᓕᐅᖅᑎᒃᓴᓄᑦ ᓱᓕᓂᖅᓴᐅᓇᓱᖕᓂᕐᒥ.
“ᓄᓇᕗᒻᒥ ᐃᒻᒥᒃᑰᖅᑐᓂ ᑕᓚᕖᓴᒃᑯᑦ ᑐᕌᖓᓂᖃᖅᐳᑦ ᐊᖏᒡᓕᒋᐊᖅᓯᓂᕐᒧᑦ ᐊᒻᒪ ᐸᐸᑦᑏᓐᓇᕐᓂᕐᒧᑦ ᐃᓄᒃᑐᒻᒥ ᐊᒻᒪ ᐃᓄᐃᑦ ᐃᓕᖅᑯᓯᖓᓐᓂ ᐅᕘᓇ ᓴᖅᑭᑎᑕᐅᓂᖓᓂ ᐊᒻᒪ ᑕᑯᒃᓴᐅᑎᑦᑎᓂᕐᒥ ᐃᓄᐃᑦ ᑕᕐᕆᔭᓕᐊᖑᔪᓄᑦ ᓴᓇᐅᒐᓂᑦ, ᑲᓱᖃᑎᖃᕐᓂᖅ ᓄᓇᕗᒻᒥ ᓄᓇᓕᐅᔪᓂ ᐅᕘᓇ ᖃᕋᓴᐅᔭᒃᑯᑦ-ᑕᓚᕖᓴᒧᑦ, ᓯᐊᒻᒪᖅᑎᑦᑎᓂᕐᒧᑦ ᐱᓕᒻᒪᒃᓴᐃᓂᕐᒥ ᐊᒻᒪ ᖃᕋᓴᐅᔭᑎᒍᑦ ᑐᑭᓯᐅᒪᓂᖏᓐᓂ ᐱᒋᐊᕈᑕᐅᔪᓂ, ᓴᖅᑭᑎᑦᑎᓂᕐᒥ ᐊᒻᒪ ᑐᓐᓂᖅᓴᐃᓂᕐᒥ ᐃᓄᒃᑐᑦ ᑕᓚᕖᓴᒃᑯᑦ ᐊᒻᒪ ᑕᕐᕆᔭᓕᐅᕐᓂᕐᒧᑦ — ᐊᒻᒪ ᒫᓐᓇ ᓴᖅᑭᔮᖅᑎᑦᑎᓂᐅᔪᒥ ᑕᓚᕖᓴᒥᑦ,” ᐅᖃᖅᓯᒪᕗᖅ ᔭᓄᐊᕆ 17–ᒥ ᑐᓴᒐᒃᓴᓕᐊᖑᔪᒥ ᐅᕙᒍᑦ ᑕᓚᕖᓴᒃᑯᓐᓂᑦ.
ᐅᕙᒍᑦ ᓴᖅᑭᔮᖅᑎᑦᑎᓲᖑᕗᖅ ᐱᓕᕆᐊᖑᔪᓂ ᐊᕐᓇᐃᑦ ᑕᕐᕆᔭᓕᐊᖏᓐᓂ, ᐊᖅᓯᖅ, ᑭᖑᓪᓕ ᐊᒻᒪ ᑕᖅᑯᑦ ᓴᖅᑭᔮᖅᑎᑕᐅᓂᐅᔪᓂ ᐊᒻᒪᓗᑦᑕᐅᖅ ᐃᓄᒃᑐᑦ ᑕᕐᕆᔭᓕᐊᖑᔪᓂ ᐊᒻᒪ ᓱᓕᔪᒥᒃ ᐊᑐᖅᑕᐅᓪᓚᕆᒃᓯᒪᔪᒥ ᑕᕐᕆᔮᕈᑎᓂᑦ.
“ᑲᑎᙵᓪᓗᑕ ᐅᑎᖅᑎᕆᕙᓪᓕᐊᕗᒍᑦ ᑭᓇᐅᓂᑦᑎᓐᓂ,” ᐅᖃᓚᐅᖅᐳᖅ ᑐᓗᒑᕐᔪᒃ ᑐᓂᓯᓂᕐᒥ ᐅᓄᕐᓂᖅᓴᐅᔪᓂ ᐃᓄᒃᑎᑐᑦ ᐃᓗᓕᖃᖅᑐᓂ ᐃᓄᖕᓄᑦ.