Skip to content

ᐊᐅᓚᐅᑎᓂᒃ ᐃᖏᕐᕋᓯᑎᑦᑎᔪᑦ ᒪᒃᑯᒃᑐᓄᑦ ᐊᐅᓪᓚᕐᓂᐅᔪᒥ

ᓄᕙᔫᐊᕐᓇᖅ-19 ᐲᖅᓯᓯᒪᕗᖅ ‘ᑕᕆᐅᑉ ᐊᑭᐊᓄᙵᐅᔪᓂ’ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᑕᕆᐅᑉ ᐊᑭᐊᓄᙵᐅᔪᑦ ᖄᖏᖅᓯᒪᔪᒥ ᐊᕐᕌᒍᒥ ᓇᑉᐸᓪᓗᐊᖓᓂᓗ.
26054657_web1_210809-NUN-NYA_2
ᐃᓕᑦᑎᓂᕐᒥ ᑲᑎᙵᓗᑎᒃ ᐱᓕᕆᓂᐅᔪᒥ ᐊᑕᐅᓯᐅᓪᓗᓂ ᐃᓚᒋᔭᐅᖃᑕᐅᕗᖅ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᑕᕆᐅᑉ ᐊᑭᐊᓄᙵᐅᔪᑦ. ᑲᑎᙵᔪᓄᑦ ᐃᓗᐃᑦᑐᙳᖅᑎᑦᑎᓂᕐᒥ ᐱᓪᓚᕆᐅᕗᖅ ᓯᕗᒻᒧᑦ ᐃᖏᕐᕋᓇᓱᐊᕐᓂᕐᒥ ᑲᑐᔾᔨᓪᓗᑎᒃᒪ ᕿᔪᖕᓄᑦ, ᓲᕐᓗ.

ᓄᕙᔫᐊᕐᓇᖅ-19 ᐲᖅᓯᓯᒪᕗᖅ ‘ᑕᕆᐅᑉ ᐊᑭᐊᓄᙵᐅᔪᓂ’ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᑕᕆᐅᑉ ᐊᑭᐊᓄᙵᐅᔪᑦ ᖄᖏᖅᓯᒪᔪᒥ ᐊᕐᕌᒍᒥ ᓇᑉᐸᓪᓗᐊᖓᓂᓗ.

ᑭᓯᐊᓂ ᐊᓪᓚᕝᕕᓕᕆᔨᐅᔪᑦ ᐱᓕᕆᐊᖑᔪᒥ ᐱᓕᕆᕗᑦ ᓇᓗᓇᐃᖅᓯᓂᕐᒥ ᐊᐅᓪᓛᕐᓂᖅ ᐃᖏᕐᕋᓯᒃᑲᓐᓂᕐᓂᖓᓂ ᐊᑦᑕᕐᓇᕈᓐᓃᑐᐊᖅᐸᑦ.

ᑲᑎᙵᓂᐅᔪᓂ 60–ᓂ ᐃᓕᓐᓂᐊᖅᑎᓂ ᐸᕐᓇᒃᓯᒪᔪᓂ ᐃᓴᕈᖏᓐᓂ ᐃᓯᕕᑎᑦᑎᓂᖏᓐᓂ ᐃᓂᐅᔪᓄᑦ ᑲᓇᑕᓕᒫᒥ ᐅᕝᕙᓘᓐᓃᑦ ᑲᓇᑕᐅᑉ ᓯᓚᑖᓄᑦ. ᑭᓇᑐᐃᓐᓇᑦᑎᐊᖅ ᐃᖏᕐᕋᓂᖃᖅᓯᒪᙱᓚᑦ ᑕᐃᒪᙵᓂ ᒫᔾᔨ 2020–ᒥ, ᐊᐅᓪᓛᕐᓂᕐᒧᑦ ᑲᓇᑕᐅᑉ ᐃᓗᐊᓂ ᐊᒻᒪ ᑕᕆᐅᑉ ᐊᑭᐊᓄᑦ ᐅᐸᒐᒃᓴᐅᔪᓂ ᒪᑐᔭᐅᔭᕆᐊᖃᓚᐅᖅᑎᓪᓗᒍ ᐱᔾᔪᑎᖃᖅᑐᒥ ᐊᒥᓱᓄᑦ ᖃᓂᒻᒪᓐᓇᐅᔪᒥ.

ᕇᐱᑲ ᐸᐃᓴᓐ, ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᑕᕆᐅᑉ ᐊᑭᐊᓄᙵᐅᔪᓄᑦ ᐃᓱᒻᒥᖅᑐᐃᔨᖓ, ᐅᖃᓚᐅᖅᐳᖅ ᐋᒍᔅᑎ 4–ᒥ ᑲᓇᑕᒥ ᐊᐅᓪᓛᕐᓂᐅᔪᑦ ᐱᒋᐊᒃᑲᓐᓂᑐᐃᓐᓇᕆᐊᖃᕐᓂᖓᓂ ᐊᐅᔭᐅᔪᒥ 2022–ᒥ, ᑕᕆᐅᑉ ᐊᑭᐊᓄᑦ ᐊᐅᓪᓛᕐᓂᐅᔪᑦ “ᑕᐃᒪᑐᖅ” ᕿᓚᒻᒥᐅᔪᒥ ᐱᔪᓐᓇᖅᓯᒃᑲᓐᓂᓛᕐᓂᖓᓂ ᓯᕗᓂᐊᓂ, ᑭᓯᐊᓂ ᒪᓕᖕᓂᖃᖅᐳᖅ ᖃᔅᓯᒐᓚᖕᓂ ᐱᔾᔪᑕᐅᔪᓄᑦ.

“ᐅᕙᑦᑎᓐᓄᑦ, ᓲᖃᐃᒻᒪ ᐋᓐᓂᐊᖃᕐᓇᙱᑦᑐᓕᕆᓂᖅ ᐊᒻᒪ ᐊᑦᑕᓇᔾᔭᐃᖅᓯᒪᓂᖅ ᓯᕗᓪᓕᖅᐸᐅᕗᖅ,” ᐅᖃᓚᐅᖅᐳᖅ. “ᐱᔭᕆᐊᖃᖅᐳᒍᑦ ᑕᒪᒃᑭᓂ–ᐱᔪᓐᓇᕐᓂᕋᖅᑕᐅᓂᕐᒥ ᑕᒪᒃᑭᓂ ᐃᓄᖕᓂ ᐅᖃᖃᑎᒋᓇᔭᖅᑕᑦᑎᓐᓄᑦ ᑖᔅᓱᒧᖓ. ᓇᓗᓇᐃᖅᓯᔪᒪᒋᕗᒍᑦ ᐃᑲᔪᕈᑎᒃᓴᖃᕐᓂᑦᑎᓐᓂ ᐊᒻᒪᓗ … ᐃᓚᐅᖃᑕᐅᓂᐊᖅᑐᑦ ᐱᓗᑎᒃ ᐱᐅᕐᔪᐊᖅᑐᒥ ᐊᒻᒪ ᐅᖓᓯᒃᑐᒧᑦ ᐊᑐᓕᒪᓂᖃᕐᓗᑎᒃ ᐱᓪᓗᐊᖅᑕᒥᓂᑦ.

“ᐊᒻᒪᓗ ᐱᒻᒪᕆᕐᔪᐊᖑᕗᖅ ᐅᕙᑦᑎᓐᓄᑦᑕᐅᖅ ᐃᓚᐅᖃᑕᐅᔪᑦ ᐃᓗᐊᖅᓴᕐᓂᖏᓐᓂ, ᐃᓚᖏᑦ ᐃᓗᐊᖅᓴᕐᓗᑎᒃ ᐊᒻᒪ ᓄᓇᓕᐅᔪᑦ ᐃᒃᐱᒍᓱᖕᓂᖏᓐᓂ ᐃᓱᒪᒃᓴᖅᓯᐅᕆᑦᑎᐊᕐᓂᑦᑎᓐᓂᑦᑕᐅᖅ.”

ᓄᖅᑲᖅᑎᑕᐅᓂᖓᓂ ᐱᓕᕆᐊᖑᓂᐅᔪᓂ, ᓱᓕ ᐃᓱᒪᓕᐊᖑᓚᐅᙱᓚᖅ ᐅᓄᕐᓂᐅᔪᓂ ᒪᒃᑯᒃᑐᓂ ᐊᖏᖅᑕᐅᔪᓄᑦ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᑕᕆᐅᑉ ᐊᑭᐊᓄᙵᐅᔪᓄᑦ 2022–ᒥ ᐊᖏᒡᓕᒋᐊᖅᑕᐅᓂᐊᕐᒪᖔᑦ ᑭᐅᓂᕐᒧᑦ ᑭᖑᕙᖅᓯᒪᓂᕐᔪᐊᖑᓂᖓᓂ ᐃᓚᐅᔪᒪᔪᓄᑦ, ᐸᐃᓴᓐ ᐅᖃᓚᐅᖅᐳᖅ.

“ᑭᓱᑐᐃᓐᓇᐃᑦ ᕿᓚᒥᑯᓗᒃ ᐊᓯᔾᔨᓲᖑᓂᖏᓐᓂ, ᓴᖑᓴᕋᐃᑦᑕᕆᐊᖃᖅᐳᒍᑦ ᐊᒻᒪᓗ ᑕᑯᓂᒐᓚᖕᒥ ᖃᓄᖅ ᐃᖏᕐᕋᓂᖓᓂ ᖃᓂᒡᓕᕙᓪᓕᐊᑎᓪᓗᑕ ᑕᐃᒪᐃᑦᑐᓄᑦ ᐃᓱᒪᓕᐅᕆᓂᐅᔪᓄᑦ,” ᐅᖃᓚᐅᖅᐳᖅ.

ᐊᑐᓂ ᐱᓕᕆᐊᖑᔪᖅ ᐊᐅᓚᑦᑎᕗᖅ ᑕᖅᑭᑦ 10 ᐅᖓᑖᓂ ᐊᒻᒪ ᐃᓚᖃᖅᐳᖅ ᐊᐅᔭᒃᑯᑦ ᐊᐅᓪᓛᕐᓂᐅᔪᒥ ᐃᓕᓯᓂᐅᔪᒥ ᐱᓇᓱᐊᕈᓯᕐᓄᑦ ᑕᓪᓕᒪᓂ ᐊᕐᕕᓂᓕᖕᓄᑦ.

ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᑕᕆᐅᑉ ᐊᑭᐊᓄᙵᐅᔪᑦ ᓴᖅᑭᑎᑕᐅᓚᐅᖅᓯᒪᕗᖅ 1998–ᒥ ᐊᒻᒪ 525 ᒪᒃᑯᒃᑐᓂ ᐱᕕᒃᓴᖃᖅᑎᑕᐅᓚᐅᖅᐳᑦ ᐊᐅᓪᓛᕐᓂᕐᒧᑦ ᑕᐃᔅᓱᒪᓂ. ᐊᓯᒃᑲᓐᓂᖏᓐᓂ 150–ᓂ ᐃᓚᐅᖃᑕᐅᓯᒪᕗᑦ ᐃᓕᒃᑯᐊᖑᙱᑦᑐᒥ ᖃᓄᐃᓕᐅᕐᓂᐅᔪᓂ ᓲᕐᓗ ᖁᑦᑎᖕᓂᖅᓴᒥ–ᐃᓕᓐᓂᐊᕐᓂᐅᔪᒥ ᐃᓕᓐᓂᐊᕐᕕᖕᓂ ᐳᓚᕋᖅᑎᑕᐅᓂᐅᔪᓂ, ᐅᖃᐅᓯᐅᓪᓗᓂ ᐸᐃᓴᓐᒧᑦ.

ᖄᒃᑲᓐᓂᐊᓂ ᐊᐅᓪᓛᕐᓂᐅᔪᓄᑦ, ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᑕᕆᐅᑉ ᐊᑭᐊᓄᙵᐅᔪᑦ ᐊᖏᒡᓕᒋᐊᖅᑎᑦᑎᓇᓱᐊᓲᖑᕗᑦ ᐃᓕᓐᓂᐊᕐᓂᐅᔪᒥ, ᐃᖅᑲᓇᐃᔮᕆᔪᒪᔭᖏᓐᓂ ᐱᕙᓪᓕᐊᑎᑦᑎᓂᕐᒥ, ᓇᖕᒥᓂᖅ ᑐᕌᒐᒃᓴᖏᓐᓂ ᐋᖅᑭᒃᓱᐃᓂᕐᒥ, ᓄᓇᓕᖕᓂ ᓯᕗᓕᐅᖅᑎᐅᓂᕐᒥ, ᐃᓕᖅᑯᓯᑦ–ᐊᔾᔨᒌᙱᑦᑐᓂ ᐅᔾᔨᕈᓱᖕᓂᕐᒥ ᐊᒻᒪ ᐱᕈᖅᓴᐃᓂᕐᒧᑦ ᐃᒻᒥᓂᒃ–ᐅᐱᒋᔭᖃᕐᓂᕐᒥ.

ᓄᕙᔫᐊᕐᓇᖅ-19 ᓄᓇᒥ ᐊᐅᓪᓛᕐᓂᐅᔪᒥ ᓄᖅᑲᖅᓯᒪᑦᑎᐊᖅᑎᓪᓗᒍ, ᐱᓕᕆᐊᖑᔪᖅ ᐃᖏᕐᕋᐃᓐᓇᕈᓐᓇᖅᓯᒪᕗᖅ ᐅᑭᐅᖅᑕᖅᑐᒥ ᒪᒃᑯᒃᑐᓄᑦ ᐱᔨᑦᑎᕋᕐᓂᕐᒥ ᓯᕗᓕᐅᖅᑎᐅᓂᕐᒥ ᐱᓕᒻᒪᒃᓴᐃᓂᐅᔪᒥ ᐊᒻᒪ ᓄᓇᓕᖕᓂ ᐃᓚᐅᑎᑦᑎᓂᐅᔪᒥ ᐃᓚᖓᓐᓂ ᑕᐃᒫᒃ ᒪᒃᑯᒃᑐᑦ ᐱᔭᕇᖅᓯᓪᓗᑎᒃ ᐱᓕᕆᐊᒃᓴᐅᔪᓂ ᐊᖏᕐᕋᖓᓂ ᓄᓇᓕᖏᓐᓂ. ᐃᓕᓐᓂᐊᕐᓂᕐᒧᑦ ᐃᓕᓐᓂᐊᖅᑎᑦᑎᒃᑲᓐᓂᕐᓂᖃᕆᕗᖅ ᐊᒻᒪ ᐅᓄᕐᓂᐅᔪᓂ $500–ᒥ ᒥᑭᑦᑐᓂ-ᑐᓂᕐᕈᓯᐊᓂ ᐃᑲᔪᖅᓱᐃᔪᒥ ᓄᓇᓕᖕᓂ ᖃᓄᐃᓕᐅᕐᓂᐅᔪᓂ ᓲᕐᓗ ᐃᒐᓂᕐᒥ ᐊᒻᒪ ᑐᒃᑑᑉ ᐊᒥᖓᓂ ᒥᖅᓱᐃᓂᐅᔪᒥ.

ᐃᓚᐅᖃᑕᐅᔪᑦ ᑎᑎᕋᐃᓯᒪᕗᑦ ᐊᑐᕐᓂᑯᖏᓐᓂ ᑎᑎᕋᐃᓂᐅᔭᕆᐊᖃᕐᓂᐅᔪᒥ.

ᐃᒃᐱᐊᕐᔪᖕᒥᐅᑕᖅ ᑯᕆᔅᑐᓪ ᐃᓄᒎ ᑎᑭᐅᑎᓚᐅᖅᐳᖅ St. John’s Newfoundland–ᒧᑦ, ᐊᑭᓕᖅᓱᖅᑕᐅᓇᓂ ᐃᑲᔪᖅᑎᓪᓗᒍ ᓯᕗᓪᓕᖅᐹᒥ ᖃᐅᒪᔪᒥ ᐊᓪᓚᓄᑦ ᐱᖃᓐᓇᕇᒃᑐᓄᑦ ᐱᓕᕆᕝᕕᖕᒥ ᐅᓪᓗᒃᑯᑦ ᑕᖕᒫᕐᕕᖓᓂ 2019–ᒥ. ᐃᑲᔪᕐᓂᖃᕐᔪᐊᖃᑦᑕᓚᐅᖅᐳᖅ, ᐅᒥᐊᕐᔪᐊᒃᑯᑦ ᐃᑭᒪᓪᓗᓂ Bell Island–ᒧᑦ ᐊᒻᒪᓗ ᕿᓚᓗᒐᕐᓂ ᐊᒻᒪ ᑎᖕᒥᐊᓂ puffin–ᓂ ᖁᙱᐊᓚᐅᖅᖢᓂ.

“ᐱᓕᕆᐊᖑᔪᖅ ᐅᕙᓐᓂ ᐃᑲᔪᕐᔪᐊᖅᓯᒪᕗᖅ, ᖃᓪᓗᓇᐅᔭᕈᓐᓇᕐᓂᕋ ᐱᐅᓯᕚᓪᓕᕐᔪᐊᖅᐳᖅ ᑕᐃᒪᙵᓂ ᐊᐅᓪᓚᓚᐅᕋᒪ ᐃᒃᐱᐊᕐᔪᖕᒥ–ᒪᑐᐃᖓᓂᖅᓴᐅᓂᕐᒥ ᐃᒃᐱᒋᔭᓐᓂ, ᐃᓕᑦᑎᓂᖅ ᖃᓄᖅ ᐱᓕᕆᓂᕐᒥ ᑲᑎᙵᓂᐅᔪᒥ, ᐃᓕᑦᑎᓂᖅ ᓄᓇᓕᐸᐅᔭᒥ ᐃᓅᓯᖓᓐᓂ,” ᐃᓄᒎ ᑎᑎᕋᓚᐅᖅᐳᖅ, ᐃᓚᒋᐊᖅᓯᓪᓗᓂ ᑕᐃᒪᑐᖅ ᐊᓯᖏᓐᓂ ᐃᓅᓱᒃᑐᓂ ᑲᒪᔪᓂ ᐊᑐᕐᓂᑯᖏᓐᓂ ᐱᓕᕆᐊᖑᔪᒥ ᐆᒃᑐᕐᓂᐊᖅᐳᑦ.

ᒪᕼᐊᓯ ᓇᑏᓚ ᐊᕐᕕᐊᕐᒥᐅᑕᖅ ᐊᐅᔭᖓᓂ ᐃᓕᔭᐅᓂᖃᓚᐅᖅᐳᖅ Powell River, B.C.–ᒥ Tla’amin ᐊᓪᓚᓄᑦ ᐃᓂᒋᔭᒥ 2016–ᒥ.

“ᑕᐃᑲᓂᓗᒃᑖᖅ ᐱᓕᕆᓂᐅᔪᒥ ᐃᓕᑦᑎᓚᐅᖅᐳᖓ ᐃᓕᖅᑯᓯᓐᓂ, ᐊᓯᖏᓐᓂ ᐃᓕᖅᑯᓯᐅᔪᓂ ᐊᒻᒪ ᐅᕙᓐᓂᑦ. ᐃᓕᑦᑎᓂᖅ ᐊᓯᖏᓐᓂ ᐃᓕᖅᑯᓯᐅᔪᓂ ᐅᕙᓐᓄᑦ ᑲᒪᓇᕐᔪᐊᓚᐅᖅᐳᖅ, ᐃᓕᑦᑎᓂᕐᒥ ᐅᖃᓪᓚᖕᓂᕐᒧᑦ ᐊᒻᒪ ᑐᑭᓯᐅᒪᓂᕐᒧᑦ ᐅᖃᐅᓯᖏᓐᓂ, ᓈᓚᖕᓂᕐᒥ ᐅᓂᒃᑳᖏᓐᓂ ᐊᒻᒪ ᐅᓂᒃᑳᖅᑐᐊᖏᓐᓂ ᐃᓚᐅᖃᑕᐅᓂᕐᒥ ᒧᒥᕐᓂᖏᓐᓂ ᐊᒻᒪ ᐱᓯᖏᓐᓂ, ᐆᒃᑐᕐᓂᕐᒥ ᓂᕿᖏᓐᓂ ᐊᒻᒪ ᐊᓐᓄᕌᖏᓐᓂ, ᐊᓯᖏᓪᓗ,” ᓇᑏᓚ ᑎᑎᕋᓚᐅᖅᐳᖅ. “ᐊᓕᐊᓇᐃᒋᓚᐅᕆᕙᕋ ᐃᓕᓐᓂᐊᖅᑎᑦᑎᓂᕐᒥ ᑲᒪᔨᒋᔭᓐᓂ ᐃᓚᓐᓂᑦ ᐊᒻᒪ ᐱᓕᕆᖃᑎᒋᔭᓐᓂ ᐃᓕᖅᑯᓯᓐᓂ.”